1. ¿Mbaʼépa ikatu jajapo Ñandejára ñandeapo rupi ijoguaháramo?

“JAGUARETERAʼY ipara jeýmante vaʼerã”. Péicha ojeʼe jepi umi mitã ojoguaitereíramo ituvakuérape. Amo ipahápe, haʼekuéra ogueronase voínte heta mbaʼe itúva ha isýgui. Upéicha avei Ñandejára ñandeapo ijoguaháramo. Ñande ningo ifamília ha upévare jajogua chupe: ikatu ñapensa, jadesidi heta mbaʼe ha jareko heta amígo (Gén. 1:26). Jehová hína ñande Ru yvagapegua, ha haʼe rupivénte jaikove (Sal. 36:9).

2. ¿Mbaʼéicha rupípa ikatu oiko ñandehegui Jehová amígo?

² Jehová ningo ikatu hína ñane Amigoite. ¿Mbaʼéicha rupípa ikatu ñañemoag̃ui hese? Haʼe voi ñanderayhúgui ha jajerovia rupi hese ha Itaʼýrare. Jesús heʼi vaʼekue: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Heta persónagui oikóma Jehová amigoite. Ñañeʼẽmína koʼág̃a mokõi iñamígore.

3, 4. ¿Mbaʼépepa idiferénte Abrahán ha iñemoñarekuéra?

³ Oñeʼẽvo Abrahán rehe, haʼéva umi isrraelíta ypykue, Jehová heʼi “che amígo” (Is. 41:8, NM). Ha 2 Crónicas 20:7-pe ojeʼe  avei Abrahán rehe haʼeha Ñandejára amígo. ¿Mbaʼéicha rupípa oiko chugui Ñandejára amigoite? Ojerovia rupi hese (Gén. 15:6; elee Santiago 2:21-23).

⁴ Umi isrraelítape g̃uarã Jehová haʼe vaʼekue peteĩ Túva ha avei peteĩ Amígo. Péro ñambyasýramo jepe, upe rire oñemomombyry chugui hikuái ha ndahaʼevéi iñamígo. ¿Mbaʼérepa oiko upéva? Ndojeroviavéi rupi Jehová promesakuérare.

5, 6. a) ¿Mbaʼéichapa oiko raʼe ndehegui Jehová amígo? b) ¿Mbaʼépa iporã ñañeporandu?

⁵ Reikuaavévo Jehovápe, nde jerovia imbaretevéta ha rehayhuvéta chupe. Epensamína: katuete revyʼáne raʼe reaprendérõ guare ikatuha reñemoag̃ui hese. Avei reaprende kuri enterovéva ñanaseha pekadór Adán naiñeʼẽrendúi haguére, ha opavave yvypóra japyta vaiha Ñandejára renondépe (Col. 1:21). Koʼã mbaʼe nepytyvõ rentende hag̃ua Jehová noĩriha mombyry ñandehegui, síno ojepyʼapyha ñanderehe. Ha reikuaárõ guare omeʼẽ hague Itaʼýra ñanderehehápe, reñepyrũma rejerovia upe sakrifísiore ha mbeguekatúpe oikóma ndehegui Jehová amígo.

⁶ Repensávo opa koʼã mbaʼére, ¿reñandúpa koʼág̃a neag̃uiveha Ñandejárare? ¿Rejeroviavépa hese ha rehayhuve chupe? Oĩ avei ótra persóna oiko vaʼekue Jehová amígoramo. Upéva hína Gedeón. Jahechamína iñehémplo ikatu hag̃uáicha ñahaʼanga chupe.

7-9. a) ¿Mbaʼépa ohasa Gedeón, ha mbaʼéichapa opyta upe rire Jehovándi? (Ehecha pe taʼanga oĩva iñepyrũme.) b) ¿Mbaʼéichapa ikatu oiko ñandehegui Jehová amígo?

⁷ Pe hués Gedeón oservi vaʼekue Jehovápe peteĩ tiémpo ijetuʼúvape. Upérõ Israel oĩma kuri pe Yvy Oñepromete vaʼekuépe. Jueces kapítulo 6 omombeʼu Jehová ánhel ovisita hague Gedeónpe táva Ofrápe. Umi isrraelíta okyhyje umi madianítagui ikatúgui operhudika chupekuéra. Upévare Gedeón nomonguʼíri pe trígo pe ñúrente, síno omonguʼi peteĩ mbaʼyru guasúpe ikatutahápe pyaʼe oñongatu. Pe ánhel ou vaʼekue hendápe heʼi chupe ‘imbarete ha ipyʼaguasuha’, upémarõ Gedeón oporandu añetehápepa Jehová oipytyvõta chupekuéra oipytyvõ haguéicha umi isrraelítape osẽrõ guare Egíptogui. Pe ánhel oñeʼẽ Jehová rérape ha heʼi katuete oipytyvõtaha chupe.

⁸ Gedeón oñeporandu mbaʼéichapa haʼe ikatúta oipeʼa “Israélpe Madianguakuéra poguýgui”. Upémarõ Jehová ombohovái chupe ha heʼi: “Che aĩta nendive, ha sarambi rejapóta Madianguakuéragui ku peteĩ kuimbaʼe haʼeño rehe reñemoĩramoguáicha” (Juec. 6:11-16, ÑÑB). Péro oime vaʼerã Gedeón oñeporandu gueteri mbaʼéichapa oikóta upéva, upéicha rupi ojerure peteĩ señál. Jahechaháicha, umi mbaʼe Gedeón opensávare ojekuaa orekoha Jehovápe iñamígoramo.

⁹ Upéi oiko peteĩ mbaʼe omombaretéva Gedeón jerovia ha omoag̃uivéva chupe Ñandejárare. Haʼe oprepara peteĩ tembiʼu ha omeʼẽ pe ánhelpe. Peteĩ milágro rupive pe ánhel ohapy pe tembiʼu opokóvo hese ivastónpe. Upépe Gedeón oikuaa Ñandejára ombou hague upe ánhelpe ha heʼi: “¡Jehová, Ñandejára Ipuʼakapáva, Jehová ánhel rovaitére amaña raʼe!” (Juec. 6:17-22, NM). ¿Mbaʼéichapa oñeñandu Gedeón upe rire? ¿Oñemomombyrýpa Ñandejáragui? Nahaniriete voi. Upéva rangue, haʼe oikuaa porãve Jehovápe ha oĩ pyʼaguapýpe hendive. Upe rire Gedeón ojapo peteĩ altár ha ombohéra “Jehová-salom”, heʼiséva “Jehová ningo pyʼaguapy” (elee Jueces 6:23, 24; nóta). Ñande avei jajepyʼamongetárõ umi mbaʼe Jehová ojapo vaʼekuére ñande rehehápe, jahechakuaa  haʼeha ñane Amigoite. Ha ñañemboʼevévo chupe, ñandepyʼaguapyve ha ñañemoag̃uive hese.

10. ¿Mbaʼépa Jehová oipota jajapo jaikosérõ iñamígoramo heʼiháicha Salmo 15:3, 5?

¹⁰ Ikatu hag̃uáicha Jehovágui oiko ñane amígo, jajapo vaʼerã umi mbaʼe haʼe ojeruréva ñandehegui. Salmo 15-pe, David ohechauka mbaʼépa tekotevẽ jajapo ikatu hag̃uáicha ‘ñag̃uahẽ pe lugár [Jehová] oikohápe’, térã oiko hag̃ua ñandehegui iñamígo (Sal. 15:1, NM). Ñahesaʼỹijomína mokõi mbaʼe Ñandejára ojeruréva: ndovaléi jataky ñande rapicháre ha ñaneonrrádo vaʼerã opa mbaʼépe. David heʼi Jehová amigokuéra ‘ndotakyiha’ avavére ha ‘nombotavyiha hapichápe’ (Sal. 15:3, 5, NM).

11. ¿Mbaʼérepa ndovaléi jataky avavére?

¹¹ Ambue sálmope David heʼi: “Anítei nde jurúgui osẽ mbaʼe vai” (Sal. 34:14 [34:13, NM]). Ndajasegíriramo ko konsého ha ñañepyrũ jataky ñande rapicháre, ñañemomombyrýta ñande Ru Jehovágui. Añetehápe Satanás, Ñandejára enemígo, otakykuaaiterei ótrore. Pe ñeʼẽ griégo ojetradusíva Diablo heʼise “otakýva”. Upévare, ñaime porã hag̃ua Jehovándi, ñakontrola vaʼerã umi mbaʼe jaʼéva ñande rapicháre. Koʼýte ndovaléi ñañeʼẽ vai umi ermáno Jehová omoĩvare omotenonde hag̃ua kongregasión (elee Hebreos 13:17 ha Judas 8).

12, 13. a) ¿Mbaʼérepa ñaneonrrádo vaʼerã opa mbaʼépe? b) ¿Mbaʼépa jahupyty ñaneonrrádoramo?

¹² Jehová siervokuéra ojekuaa avei iñonrrádo haguére. Apóstol Pablo oskrivi: “Peñemboʼe memékena orerehe, rojeroviágui ore konsiénsia ipotĩha, ha hiʼãiterei oréve roiko hekópe opa mbaʼépe” (Heb. 13:18). Ñande jajedesidíma ‘jaikotaha hekópe opa mbaʼépe’, upévare ndajajaprovechái ñane ermanokuérare. Por ehémplo, oiméramo ñameʼẽ traváho peteĩ ermánope, jatrata porã vaʼerã chupe ha ñakumpli ñande tráto japagávo chupe jaʼe hagueichaite. Ñaneonrrádo vaʼerã umi ombaʼapóva ndive ñandéve g̃uarã ha avei opavavéndi. Ha oiméramo ñande ñambaʼapo peteĩ ermánope g̃uarã, ndovaléi jajaprovecha ha ñaimoʼã haʼe ñandetrata porãve vaʼerãha umi ótrogui.

¹³ Pyʼỹinte umi hénte oguerohory umi testígo de Jehovápe iñonrrádo haguére. Por ehémplo, peteĩ karai orekóva ikárgope peteĩ emprésa de konstruksión, ohechakuaa umi Testígo nopyrũiha iñeʼẽre. Haʼe heʼi: “Peẽ ningo katuete pekumpli pende tráto” (Sal. 15:4). Jahechaháicha, ñaneonrrádoramo opa mbaʼépe ñaime porãta Jehovándi ha avei ñambotuicháta chupe.

14, 15. ¿Mbaʼéichapa ikatu ñaipytyvõ ñande rapichápeoikohag̃uachuguikuéraÑandejára amígo?

¹⁴ Japredika jave jatopa heta hénte ogueroviáva Ñandejára oexistiha, upéicharõ jepe chupekuéra g̃uarã Ñandejára ndahaʼéi Iñamigoite. ¿Mbaʼéichapa ikatu ñaipytyvõ koʼãichagua héntepe? Ñahesaʼỹijomína mbaʼépa Jesús heʼi vaʼekue umi 70 hemimboʼépe omondórõ guare chupekuéra de a dos opredika hag̃ua. Haʼe heʼi: “Peg̃uahẽvo peteĩ ógape peje raẽ: ‘Toĩ pyʼaguapy pende rógape’. Ha oĩramo upépe peteĩ ohayhúva pyʼaguapy, pende pyʼaguapy opytáta hendive. Péro ndaipóriramo, oho jeýta penendive” (Luc. 10:5, 6). Ñanderorýramo ñande rapichakuérape, ikatu hína ñamokyreʼỹ chupekuéra oikuaase hag̃ua pe añetegua. Ha oimérõ oĩ ijarhélva ñandéve, ñandepyʼaporãnte vaʼerã hendive. Upéicha ñaipytyvõta chupe oñekalma hag̃ua ha ikatúta ág̃a ótro día ñanderresivi porãve.

¹⁵ Jatopárõ umi hénte irrelihiosoitereíva  térã osegíva umi kostúmbre oñemoĩva la Biblia heʼívare, ñandepyʼaporã ha ñanderory vaʼerã hendivekuéra. Oĩ avei heta hénte ohechakuaáva ko múndo ndaikatuiha osolusiona umi provléma, upévare oikuaase hikuái Jehovápe ha oho ñane rreunionkuérape. Upéicha jave, ñande torýpe jarresivi ha ñamomaitei vaʼerã chupekuéra. Umi artíkulo héravape “La Biblia okambia chupekuéra”, jatopáta heta ehémplo koʼãichagua.

16. ¿Mbaʼérepa jaʼekuaa ñande haʼeha Ñandejára amígo ha “ajudánte”?

¹⁶ Heta vése umi ombaʼapóva oñondive opyta oñoamigoite. Opaite oñemeʼẽmava Jehovápe ningo iñamígo ha avei Ñandejára “ajudánte”, ha upéva tuichaiterei priviléhio (elee 1 Corintios 3:9). Japredika ha ñaipytyvõ memévo ñande rapichakuérape oikuaa hag̃ua Jehovápe, ñantende porãve mbaʼeichagua persónapa ñande Ru yvagapegua. Avei jahechakuaa mbaʼeichaitépa ijespíritu sánto ñanepytyvõ jajapo hag̃ua ko tembiapo iñimportantetéva.

17. ¿Mbaʼéichapa umi asambléa ohechauka Jehová haʼeha ñane Amígo?

¹⁷ Japredika meméramo, koʼýte ñañemoag̃uive avei Jehováre. Por ehémplo jahecha mbaʼéichapa Ñandejára ojoko umi oñemoĩvape ñanderehe japredika jave. Ñapensamíntena avei mbaʼéichapa haʼe ñandegia umi áño ohasa vaʼekuépe. Ñamombaʼeterei ningo umi hiʼupy Jehová omeʼẽva ñandéve ñamombarete hag̃ua ñande jerovia. Umi asambléa ohechauka porã Jehová ñanderayhuha ha oikuaaha ñane provlemakuéra, ha mbaʼépa ñaikotevẽ. Ndaʼaréi peteĩ família ohai peteĩ kárta de agradesimiénto oho rire asambléa de distrítope. Haʼekuéra heʼi: “Pe asambléa opokoiterei orerehe. Rohechakuaa mbaʼeichaitépa Jehová ohayhu káda uno isiérvope ha oipotaha entéronte osẽ porã”. Oho rire peteĩ asambléa espesiálpe Irlándape, peteĩ matrimónio Alemaniagua oagradeseterei umi ermáno upepeguápe oñangareko porã haguére hesekuéra, ha heʼi: “Opa mbaʼe ári, roagradese Jehovápe ha pe Rréi Jesucrístope. Haʼekuéra rupive ningo jaiko peteĩ ñeʼẽme oparupiete. Ndahaʼéi ñañeʼẽnteva upe unida rehe, síno jahecha ára ha ára ermanokuéra apytépe. Umi mbaʼe rohasa vaʼekue Dublínpe pe asambléa espesiálpe, akóinte oremomanduʼáta roguerekoha tuicha priviléhio roservívo penendive Ñandejára Ipuʼakapávape”.

18. ¿Mbaʼépa ikatu ñañeporandu ñane ñemboʼére?

¹⁸ Ñañemongeta meméramo ñane amigokuérandi  ñañemoag̃uive hesekuéra. Koʼág̃arupi heta hénte oiporueterei pe teknolohía ha Internet oñekomunika hag̃ua ótrondi, tahaʼe rred sosiál térã mensáhe rupive. Ñapensamína, ¿iñimportántepa ñandéve g̃uarã ñañeʼẽ Jehovándi, ñane Amigoite? Ñandejára ningo ‘ohendu maymáva ñemboʼe’ (Sal. 65:3 [65:2, NM]). Upévare iporã ñañeporandu: “¿Pyʼỹipa añemotiémpo añemboʼe hag̃ua Jehovápe?”.

19. ¿Mbaʼépa ikatu jajapo hasýramo ñandéve ñamombeʼu hag̃ua Jehovápe ñañandúva?

¹⁹ Sapyʼánte ningo hasyeterei ñañeʼẽ hag̃ua ñande pyʼaite guive Ñandejárape ha ñamombeʼu chupe mbaʼépa ñañandu. Péro Jehová oipota jajapo upéva ñañemboʼe jave (Sal. 119:145; Lam. 3:41). Ndovaléi jajepyʼapy ndajaikuaáiramo jepe mbaʼépa jaʼéta ñamombeʼu hag̃ua chupe ñane remiandu. Apóstol Pablo oskrivi vaʼekue umi kristiáno Romaguápe: “Oĩ vése tekotevẽha ñañemboʼe, péro ndajaikuaái mbaʼépa jaʼéta ha ñanepyahẽ kirirĩháme. Upéicha jave pe espíritu ojerure ñanderehe. Ha Ñandejára oipyguaráva ñande pyʼapy, oikuaa mbaʼépa ojerure pe espíritu sánto umi imarangatúva rehehápe, pe espíritu ojerurégui umi mbaʼe oĩ porãva Ñandejára rembipotándi” (Rom. 8:26, 27). Jajepyʼamongetáramo umi mbaʼe heʼívare lívro de Job, Salmos ha Provérbiospe, tuicha ñanepytyvõta ñamombeʼu hag̃ua Jehovápe umi mbaʼe ñañandúva.

20, 21. ¿Mbaʼéichapa ñanekonsola Filipenses 4:6, 7?

²⁰ Jahasa jave umi mbaʼe ijetuʼúva, jasegi vaʼerã pe konsého Pablo omeʼẽ vaʼekue espíritu sánto rupive umi kristiáno Filiposguápe: “Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe”. Tuicha ñanemombaretéta ha ñanekonsoláta ñañemongeta meméramo Ñandejárandi. Pablo heʼive: “Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare, Cristo Jesús rupive” (Filip. 4:6, 7). Akóintekena ñamombaʼe “Ñandejára pyʼaguapy”. Upéva ningo añetehápe oñangareko ñane korasõre ha umi mbaʼe ñapensávare.

²¹ Pe ñemboʼe ningo ñanepytyvõ ikatu hag̃uáicha ñañemoag̃uive Jehováre. Upévare, ‘ñañemboʼe jey jeýkena’ (1 Tes. 5:17). Jahejákena ko artíkulo tañanepytyvõ ñaime porã hag̃ua Ñandejárandi ha ñakumpli hag̃ua umi mbaʼe ojeruréva ñandehegui. Ñañemotiémpokena jajepyʼamongeta hag̃ua pe priviléhio jarekóvare jaservívo Jehovápe, haʼéva ñande Ru, Ñandejára ha ñane Amígo.