Epensamína avei ko ótra situasiónre: Peteĩ matrimónio oinvita peteĩ ermána ikongregasionguápe omongakuaáva hína haʼeño mokõi mitãme, osena ha ohasa porã hag̃ua hendivekuéra. Ko ermána omombeʼúvo upéva imembykuérape, haʼekuéra ovyʼaiterei ha oipotántema voi og̃uahẽ upe día. Péro ofaltávo un día, pe matrimónio oavisa pe ermánape oñepresentaha peteĩ situasión ha ndaikatumoʼãiha oñatende hesekuéra. Upe rire pe ermána oikuaa mbaʼépa la oiko vaʼekue. Aviasído pe matrimónio ojapo riremi pe arréglo pe ermánandi, orresivi hikuái peteĩ invitasión iñamigokuéragui, ha haʼekuéra oasepta.

Jaikuaaháicha, ñande kristianokuéra ñakumpli vaʼerã ñaprometéva, arakaʼeve ndajaʼéi vaʼerã “Si”, upéi ñakambia ha jaʼe “No” (2 Cor. 1:18). Péro jahecha haguéicha koʼã ehémplope, ikatu hína oñepresenta opaichagua situasión. Upévare, sapyʼánte nañarremediái rupi ñamboykémante peteĩ kompromíso jajapo vaʼekue. Peteĩ jey apóstol Pablo ojecha vaʼekue upe situasiónpe.

Áño 55-pe, apóstol Pablo oĩ kuri Éfesope ojapórõ guare pe tercer viáhe misionál. Upérõ haʼe okalkula ohotaha mar Egéorupi og̃uahẽ hag̃ua Coríntope, ha upégui ohasa hag̃ua Macedóniape. Ha Macedóniagui ohóta kuri Jerusalénpe, péro tapére og̃uahẽse jey Coríntope, amalisia umi ermáno upepegua omeʼẽta kuri chupe ikontrivusión ogueraha hag̃ua umi ermáno oĩvape Jerusalénpe (1 Cor. 16:3). Upéicha ñantende jaleévo 2 Corintios 1:15 ha 16. Upépe heʼi: “Péicha ajeroviágui penderehe, ahase jey kuri pene rendápe ikatu hag̃uáicha pevyʼa jey. Ha apytase kuri pohecha hag̃ua, upe rire ahase kuri Macedóniape, aju jey hag̃ua pene rendápe Macedóniagui, ikatu hag̃uáicha peho chendive tapekuʼa peve aviahávo Judéape”.

 Apóstol Pablo amalisia omombeʼúma voi kuri chupekuéra peteĩ kártape mbaʼépa ojapose (1 Cor. 5:9). Péro ojapo rire ko kárta, “Cloe rogayguakuéra apytépe” oĩ omombeʼúva Páblope oĩha heta joavy pe kongregasión oĩvape Coríntope (1 Cor. 1:10, 11). Upévare, Pablo ndohóinte ha oskrivi chupekuéra peteĩ kárta, upéva hína Primera a los Corintios. Upe kártape haʼe mborayhúpe oñemoñeʼẽ umi ermánope, ha avei omombeʼu chupekuéra oho raẽtaha Macedóniape ha upéi ae ohasataha Coríntope (1 Cor. 16:5, 6). *

Umi kristiáno oĩva Coríntope orresivírõ guare ikárta, umi ‘apóstol oñembovaletéva’ heʼi hese nokumplíri hague iñeʼẽ. Upémarõ Pablo heʼi chupekuéra: “Ajaposérõ guare upéva, napensái ajapóvo péicha péichante, ¿ajépa? ¿Térã piko adesidi jave apensa raʼe chejehénte ha haʼe: ‘Si, katuete ajapóta’ ha upéi haʼe: ‘No, ndajapomoʼãi’?” (2 Cor. 1:17; 11:5.)

¿Opensápa raʼe Pablo naiñimportanteguasuiha upe opromete vaʼekue? ¡Nahániri! Pe palávra ojetradusíva “péicha péichante” ojeporu jepi oñeñeʼẽ hag̃ua peteĩ persóna iñirresponsávlevare, opyrũva iñeʼẽre ha ndaikatúivare jajerovia. Pablo heʼi: ‘¿Adesidi jave piko apensa chejehénte?’ Ko mbaʼe Pablo heʼi vaʼekue, oipytyvõ vaʼerã kuri umi Corintoguápe ohechakuaa hag̃ua haʼe oho hague ótro ládo, ndahaʼéi openságui naiñimportanteiha upe opromete vaʼekue.

Pablo ohechauka hag̃ua oñeñeʼẽ reiha hese, heʼi: “Ikatuháicha pejerovia Ñandejárare, ikatu avei peguerovia añeteha umi mbaʼe roʼéva peẽme, ha roʼéramo: ‘Si’, norokambiamoʼãiha ha upéi roʼe: ‘No’” (2 Cor. 1:18). Pablo ndohói kuri Coríntope raẽ ndoipotái rupi umi ermáno ‘oñeñandu vai ikáusare’ (2 Cor. 1:23). Pablo omeʼẽ chupekuéra tiémpo ikatu hag̃uáicha osolusiona hikuái umi provléma orekóva oho mboyve hendapekuéra. Ha oĩrõ guare Macedóniape, haʼe ovyʼaiterei kuri Tito omombeʼúrõ guare chupe pe kárta omondo vaʼekue tuicha oipytyvõ hague umi ermánope oñarrepenti hag̃ua (2 Cor. 6:11; 7:5-7).

Páblore ningo ojeʼe kuri nokumpliriha iñeʼẽ ni umi mbaʼe naiñimportanteguasúivape jepe, ha upévare ndaikatuiha avei ojeguerovia umi mbaʼe opredikáva. Péro haʼe omomanduʼa umi Corintoguápe opredikaha umi mbaʼe Jesús omboʼe vaʼekuénte. Upévare heʼi chupekuéra: “Silvano, Timoteo ha che roikuaauka kuri peẽme Ñandejára Raʼy Cristo Jesúspe; haʼe ndahaʼéi ‘Si’ ñepyrũrã, ha upe rire ‘No’, haʼe guei ‘Si’ opa árare” (2 Cor. 1:19). Jesús oikórõ guare ko yvy ape ári omboʼe vaʼekue pe añeteguánte, upévare ikatu vaʼekue ojejerovia hese, ha Pablo opredika vaʼekue umi mbaʼe Jesús omboʼe vaʼekuénte avei, upéicha rupi ikatúnte avei ojejerovia hese (Juan 14:6; 18:37).

Jehová ningo ndaikatúi ijapu (Tito 1:2). Upéva ohechauka porã Pablo ohai vaʼekue: “Opa mbaʼe Ñandejára oprometéva oñekumpli Jesús rupive”. Oĩrõ guare ko yvy ape ári, Jesús iñeʼẽrendu vaʼekue Itúvape opa mbaʼépe, upéicha rupi ikatu jajerovia Jehová okumplitaha umi mbaʼe oprometéva Jesucristo rupive. Pablo heʼive: “Upévare hérape avei jaʼe: ‘Amén’, ñambotuicha hag̃ua Ñandejárape” (2 Cor. 1:20, nóta). Jesús ningo haʼe pe “Amén” térã pe garantía ohechaukáva Jehová katuete okumplitaha ipromesakuéra.

Apóstol Pablo osegi Jehová ha Jesús ehémplo, upévare heʼírõ guare ojapotaha peteĩ mbaʼe, katuete okumpli (2 Cor. 1:19).  Pablo ningo ndahaʼéi vaʼekue peteĩ persóna oñeʼẽ rei reíva térã opensáva ijehénte odesidíta jave peteĩ mbaʼe (2 Cor. 1:17). Upéva rangue oiko pe “espíritu poguýpe” ha opa mbaʼe ojapóvape ohechauka ojepyʼapyha ótrore ha nopyrũiha iñeʼẽre (Gál. 5:16).

Koʼág̃arupi heta hénte nomombaʼevéima umi mbaʼe oprometéva, upévare oñepresenta jave chupekuéra oimeraẽ vyrorei térã peteĩ mbaʼe okonvenivétava, nokumplírinte iñeʼẽ. Por ehémplo, ojejapo jave negósio, sapyʼánte umi hénte nokumplíri iñeʼẽ ofirmárõ jepe peteĩ dokuménto. Avei, heta oĩ nomombaʼéiva pe matrimónio ha opensa ikatuha oimeraẽ mbaʼére opoi ojuehegui. Upévare, káda día hetaitereivéntema oĩ umi ojedivorsiáva (2 Tim. 3:1, 2).

Ha nde, ¿rekumplípa hína umi mbaʼe reprometéva? Jahecha haguéicha oñepyrũvo ko artíkulo, sapyʼánte nañarremediái ha ñasuspendémante vaʼerã peteĩ kompromíso, péro ndahaʼéi jajaposégui, síno oñepresentágui peteĩ situasión ijetuʼúva. Péro peteĩ kristiáno oñekomprometéramo ojapotaha peteĩ mbaʼe, oñehaʼãmbaite vaʼerã okumpli (Sal. 15:4; Mat. 5:37). Péicha entéronte ohechakuaáta rekumpliha umi mbaʼe eréva ha ojejeroviáta nderehe (Efes. 4:15, 25; Sant. 5:12). Reiko lájare, umi hénte ohechakuaáramo ikatuha ojerovia nderehe, ndahasyivéta nerendu hag̃ua emombeʼu jave chupekuéra umi notísia porã oñeʼẽva Ñandejára Rréinore. Upévare, akóintekena eñehaʼã ekumpli ne ñeʼẽ.