1. ¿Mbaʼe organisasiónpa Jehová oiporavo ipuevlorã Israel rendaguépe? (Ehecha pe taʼanga oĩva iñepyrũme.)

JEHOVÁ omoñepyrũ pe kongregasión kristiána síglo primérope ha ñane tiémpope ojapo jey tekotevẽva guive ñamombaʼeguasu hag̃ua chupe haʼe oipotaháicha. Pe artíkulo ohasa vaʼekuépe jahecha kuri Ñandejára omboyke hague Israélpe ha omoñepyrũ peteĩ organisasión pyahu oĩháme Cristo segidorkuéra. Jehová ovendesi ko organisasión pyahu, ha upéicha rupi ojesalva oñehundírõ guare Jerusalén áño 70-pe (Luc. 21:20, 21). Síglo primérope oiko vaʼekue orrepresenta umi mbaʼe ohasátava Jehová siervokuéra ñane tiémpope. Satanás múndo koʼẽrõitéma oñehundíta, péro Ñandejára organisasión ojesalváta koʼã “ára pahápe” (2 Tim. 3:1). ¿Mbaʼérepa jaʼe upéva?

2. a) ¿Mbaʼépa heʼi Jesús pe jehasa asy guasúre? b) ¿Mbaʼéichapa oñepyrũta pe “jehasa asy guasu”?

² Jesús oñeʼẽrõ guare ipresénsiare ha ko múndo ára pahaitére, heʼi: “Oúta jehasa asy guasu, arakaʼeve oikoʼỹ haguéicha ko múndo ñepyrũmby guive koʼág̃a peve, ha upe rire  ndoikomoʼãvéima arakaʼeve” (Mat. 24:3, 21). Jehová oipurúta umi goviérnope ohundi hag̃ua “Babilonia Guasu”, térã entéro umi rrelihión japúpe, ha upéva omoñepyrũta pe jehasa asy tuichaitéva (Apoc. 17:3-5, 16). ¿Mbaʼépa oikóta upe rire?

3. ¿Mbaʼépa oikóta Ñandejára puévlore oñehundi rire umi rrelihión japu?

³ Oñehundi rire pe rrelihión japu, Satanás ha imúndo oatakáta Jehová puévlope. La Biblia oñeʼẽvo “Gog, Magog retã ruvicha rehe”, heʼi: “Nde repuʼãta reju hag̃ua araícha; ku arai omoʼãva pe sérroicha, nde soldádo aty ha heta tetã nendive, pejeitýta hiʼarikuéra”. Ñande testígo de Jehová ndajarekói ehérsito ñañorairõ hag̃ua, hiʼarive ndaipóri ótro rrelihión ñandéicha oikóva pyʼaguapýpe. Upévare, ñane enemigokuéra oimoʼãta ndahasymoʼãiha ñanerundi hag̃ua. ¡Ajépa tuichaite ojavy hikuái! (Ezeq. 38:1, 2, 9-12, ÑÑB.)

4, 5. ¿Mbaʼépa Jehová ojapóta Satanás oñehaʼã vove ohundi ipuévlo?

⁴ ¿Mbaʼépa Jehová ojapóta Satanás oñehaʼã vove ohundi ipuévlo? Haʼe ningo pe Governánte Tuichavéva oĩva ko univérsope, ha oipurúta upe autorida orekóva odefende hag̃ua isiervokuérape. Añetehápe ojeatakáramo ipuévlope, chupe voi ojeataka hína (elee Zacarías 2:8). Ñande Ru yvagapegua pyaʼe voi ñanedefendéta ha Satanás múndo oñehundíta Armagedónpe, pe ‘gérra oikótava Ñandejára Ipuʼakapáva ára guasúpe’ (Apoc. 16:14, 16).

⁵ La Biblia heʼi ko gérrare: “Jehová ha umi tetã oñombohovakéta. Haʼe voi ohusgáta opavave yvypórape. Umi iñañáva ojejukáta espádape [...]. ¡Péina! Oikóta peteĩ mbaʼe ivaietereíva umi tetãrupi ha peteĩ torménta vai opuʼãta yvy ape árigui mombyryveháguio ládo. Ha umi Jehová ojukátava upe árape, opytáta ojepyso ko yvy apére, peteĩ púnta guive ambue púnta peve. Ndaiporimoʼãi ojaheʼóva hesekuéra, noñembyatymoʼãi heʼongue ni noñeñotỹmoʼãi. Opytáta hikuái avónoicha pe yvy apére” (Jer. 25:31-33, NM). Armagedónpe, Satanás múndo aña oñehundíta. Péro Ñandejára organisasión noñehundimoʼãi arakaʼeve.

6, 7. a) ¿Moõguipa ou umi persóna oĩva pe aty guasúpe? b) ¿Mbaʼe mbaʼépa ojehupyty Ñandejára organisasiónpe umi áño ohasa vaʼekuépe?

⁶ Jehová organisasión okakuaave ohóvo oĩ rupi pype hetaiterei persóna Ñandejára oguerohorýva. La Biblia heʼi voi: “Jehová ojesareko umi hekojojávare ha ohendu chupekuéra ojerure asy jave” (1 Ped. 3:12). Umi hekojojáva apytégui oĩta “peteĩ aty guasu” tuichaitereíva osẽva “pe jehasa asy guasúgui” (Apoc. 7:9, 14). ¿Ndépa reimese avei pe “aty guasu” ojesalvátava apytépe?

⁷ ¿Moõguipa ou umi persóna oĩva pe aty guasúpe? Oñembyaty chupekuéra opa tetãgui. Jesús oprofetisa vaʼekue mbaʼe mbaʼépa oikóta ipresénsia aja, ha heʼi: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mat. 24:14). Koʼã ára pahápe, pe predikasión haʼe hína pe tembiapo iñimportantevéva ojapóva Ñandejára organisasión. Upéicha rupi heta tapicha oaprendéma omombaʼeguasu hag̃ua Ñandejárape “espíritu sánto poguýpe ha añeteguápe” (Juan 4:23, 24).  Por ehémplo, áño de servísio 2003 guive 2012 peve, más de 2.707.000 persóna oñemeʼẽ Jehovápe ha ojevautisa. Koʼág̃a oĩma 7.900.000 ári testígo de Jehová ko yvy tuichakuére, ha oĩ hetaiterei ndahaʼéiva Testígo ohóva rreunionhápe, koʼýte ojejapo jave pe Konmemorasión. Añetehápe Jehová organisasión okakuaave ohóvo, péro ndahaʼéi ñande ñañehaʼã rupínte, síno “Ñandejára hína upe omongakuaáva” (1 Cor. 3:5-7). ¡Ajépa javyʼaite pe aty guasu tuichave haguére ohóvo káda áño!

8. ¿Mbaʼéicha rupípa ñane tiémpope Ñandejára organisasión okakuaave ohóvo?

⁸ Ñandejára ningo oipytyvõ meme isiervokuérape ko yvy ape ári, upéicha rupi iñorganisasión okakuaave ohóvo (elee Isaías 43:10-12). Peteĩ profesía heʼi voi: “Pe michĩvéva tuichavéta ha pe mbovýva hetavéta, chugui oikóta tetã guasu. Che, opa mbaʼe Jára, pyaʼe ha hiʼaraitépe ajapóta” (Is. 60:22). Ñepyrũrã, umi unhído hembýva ko yvy ape ári haʼe vaʼekue “pe michĩvéva”, péro Jehová ovendesi ipredikasión ha heta hetave persónagui oiko kristiáno unhído (Gál. 6:16). Upe rire Ñandejára organisasión okakuaave ha péicha oñepyrũ oñembyaty pe aty guasu.

9. ¿Mbaʼépa jajapo vaʼerã jahupyty hag̃ua umi mbaʼe porã la Biblia oprometéva ñandéve?

⁹ La Bíbliape oĩ heta promésa iporãitereíva, tahaʼe umi unhídope g̃uarã térã pe aty guasúpe g̃uarã. Péro ojehupyty hag̃ua umíva, tekotevẽ oñekumpli Jehová ojeruréva (Is. 48:17, 18). Ñapensamíntena umi isrraelíta yma guarére. Jehová ningo omeʼẽ vaʼekue chupekuéra pe Léi Mosáika. Ha pe Léi oipytyvõ pe puévlope heta hendáicha, por ehémplo hekopotĩ hag̃ua, omongakuaa hag̃ua ifamília, iñonrrádo hag̃ua ojapo jave negósio ha otratakuaa hag̃ua hapichakuérape (Éx. 20:14; Lev. 19:18, 35-37; Deut. 6:6-9). Péicha avei koʼág̃arupi Jehová omeʼẽ ñandéve umi léi ha konsého, ndahaʼéiva peteĩ kárga, síno ideprovechoiterei ñandéve (elee 1 Juan 5:3). Ñaneñeʼẽrendúramo jajehekýita heta mbaʼe vaígui ha ikatúta ‘jajerovia mbarete’ (Tito 1:13).

10. ¿Mbaʼérepa tekotevẽ ñamboyke tiémpo jastudia hag̃ua la Biblia ha jajapo hag̃ua ñande estúdio de família?

¹⁰ Ñandejára organisasión oho tenonde gotyo heta hendáicha. Por ehémplo, koʼág̃arupi ñantende porãve heta mbaʼe oĩva la Bíbliape. Ha péichata voi ningo upéva. Ñandejára Ñeʼẽ heʼi: “Hekopotĩva rape ku koʼẽjúicha hesakã hesakãve ohóvo koʼẽmba peve” (Prov. 4:18, NM). Péro iporã ñañeporandu: “¿Astudia ha aikuaapaitépa umi entendimiénto pyahu oguenohẽva pe tembiguái jeroviaha? ¿Aleépa la Biblia káda día? ¿Aleesetereípa voi káda puvlikasión osẽ ramóva? ¿Amboyképa peteĩ día káda semána astudia hag̃ua che famíliandi?”. Añetehápe ningo ndahasýi jajapo hag̃ua koʼã mbaʼe, péro tekotevẽ ñamohenda porã ñane tiémpo upearã. Iñimportanteterei ningo jastudia meme Ñandejára Ñeʼẽ, jajapo umi mbaʼe ñaaprendéva ha jaha avei tenonde gotyo Jehová organisasión ndive, koʼýte koʼág̃a hiʼag̃uimbaitémava pe jehasa asy guasu.

11. ¿Mbaʼéichapa oñevenefisia Jehová puévlo oñembyaty haguére oadora hag̃ua chupe?

¹¹ Jehová organisasión oipotaiterei ñasẽ porã opa mbaʼépe, upévare manterei ñanemomanduʼa jasegi hag̃ua ko konsého omeʼẽ vaʼekue apóstol Pablo: “Jajepyʼapýkena ojuehe ñande pyʼaite guive, ha ñañomokyreʼỹ japorohayhu ha jajapo hag̃ua iporãva. Ani jafalta  meme rreunionhápe, oĩramo jepe ojepokuaáva ojapo upéicha. Upéva rangue, ñañomokyreʼỹ vaʼerã, koʼýte koʼág̃a jahechávo pe ára hiʼag̃uimbaitemaha” (Heb. 10:24, 25). Umi isrraelíta ojepokuaa vaʼekue oñembyaty oadora hag̃ua Jehovápe, ha upéva tuicha oipytyvõ chupekuéra omombarete hag̃ua ijerovia. Hiʼarive koʼã rreunión ombovyʼaiterei chupekuéra. Por ehémplo ñapensamína mbaʼeichaitépa ovyʼa hikuái ofestehárõ guare Nehemías tiémpope pe Enrramáda Guýpe Jeiko Arete (Éx. 23:15, 16; Neh. 8:9-18). Koʼág̃arupi avei ou porãiterei ñandéve umi rreunión ha aty guasu ojejapóva Jehová puévlope. Aníkena jafalta koʼãichagua rreuniónpe, ñanepytyvõva jajerovia mbareteve ha javyʼa hag̃ua (Tito 2:2).

12. ¿Mbaʼéichapa jahecha vaʼerã pe tembiapo oñemeʼẽva ñandéve?

¹² Ñaime rupi Jehová organisasiónpe, jajapo peteĩ “tembiapo imarangatúva” jaikuaauka hag̃ua pe “marandu porã”, ha upéva ningo peteĩ priviléhio ijojahaʼỹva (Rom. 15:16). Ñañemeʼẽmbaitévo jajapo hag̃ua ko “tembiapo imarangatúva”, oiko ñandehegui “Ñandejára ajudánte”, térã pe ‘Imarangatúva’ pytyvõhára (1 Cor. 3:9; 1 Ped. 1:15). Hiʼarive, japredika jave ñaipytyvõ oñemopotĩ hag̃ua Jehová réra. ¡Ajépa tuichaite mbaʼe ikatu haguére ñamombeʼu pe “marandu porã ojajaipáva [...] Ñandejára ovyʼáva oheja vaʼekue” (1 Tim. 1:11).

13. ¿Mbaʼépa Jehová oipota jajapo ikatu hag̃uáicha jaikove ha jajerovia mbarete?

¹³ Jehová oipota ñañakãrama hatã hese ha ñambaʼapo meme opa tembiapo oñemeʼẽvape ñandéve iñorganisasiónpe. Péichamante ikatúta imbarete porã ñande jerovia. Moisés heʼi vaʼekue umi isrraelítape: “Ko árape amoĩ yvága ha yvy testígoramo pene kóntrape, amoĩ hague pene renondépe jeikove térã ñemano, vendisión térã maldisión; ha reiporavo vaʼerã pe jeikove ikatu hag̃uáicha reikove nde ha ne ñemoñare, ha rehayhu vaʼerã Jehová nde Járape, neñeʼẽrendu chupe ha reñakãrama hatã vaʼerã hese. Haʼe rupínte reikove ha reiko aréta pe yvy ohura vaʼekuépe omeʼẽtaha Abrahán, Isaac ha Jacóbpe, nde ypykuéra” (Deut. 30:19, 20, NM). Jehová oipota akóinte jahayhu ha ñaneñeʼẽrendu chupe.

14. ¿Mbaʼépa opensa peteĩ ermáno Ñandejára organisasión rehe?

¹⁴ Peteĩ ermáno hérava Pryce Hughes oñepyrũ vaʼekue oservi Jehovápe áño 1914 mboyve, ha iñeʼẽrendu meme vaʼekue Jehová ha iñorganisasiónpe oikove aja pukukue. Omombeʼúrõ guare hembiasakue heʼi: “Aaprende vaʼekue iñimportantetereiha jajapo Jehová organisasión heʼíva ha ndovaleiha jajerovia yvypóra opensávare. Upéva chepytyvõ agueropuʼaka hag̃ua umi mbaʼe omokangyséva che jerovia. Ahechakuaa tekotevẽha cheñeʼẽrendu meme Ñandejára organisasiónpe ikatu hag̃uáicha Haʼe cheguerohory”.

15. ¿Mbaʼe ehémplopa jasegi vaʼerã oĩ jave peteĩ entendimiénto pyahu?

¹⁵ Jaipotáramo Jehová ñanevendesi ñaime vaʼerã iñorganisasión ndive ha jaasepta umi entendimiénto pyahu. Jahechamína peteĩ ehémplo. Jesús omano rire, heta kristiáno hudíope hasyeterei vaʼekue oheja hag̃ua pe Léi Mosáika (Hech. 21:17-20). Péro Pablo ohaírõ guare Hebreos, oipytyvõ koʼã ermánope ontende hag̃ua peteĩ mbaʼe iñimportánteva. Haʼe omyesakã kuri  umi sakrifísio oñekuaveʼẽ vaʼekue “pe Léi heʼiháicha” nomomarangatúi hague chupekuéra. Upéi heʼi: “Ñande ñañemomarangatu kuri Jesucristo osakrifika rupi hete una ves ha opa ára g̃uarã” (Heb. 10:5-10). Opavave lénto umi kristiáno hudío oasepta Pablo heʼíva ha oho tenonde gotyo Jehová organisasión ndive. ¿Mbaʼépa ñaaprende chuguikuéra? Ñande avei ñahesaʼỹijo porã vaʼerã la Biblia ha pyaʼe jaasepta oimeraẽ kámbio ojapóva Ñandejára organisasión, tahaʼe peteĩ entendimiénto pyahu térã japredika lája.

16. a) ¿Mbaʼérepa javyʼaitéta pe múndo pyahúpe? b) ¿Mbaʼe promésapa reipotaiterei oñekumpli?

¹⁶ Entéro iñeʼẽrendúva Jehová ha iñorganisasiónpe katuete ohupytýta heta vendisión. Umi unhído ogovernáta Cristo ndive yvágape (Rom. 8:16, 17). Ha umi opytátava ko yvy ape ári katu oikóta vyʼápe peteĩ hardín neporãvape. ¡Ajépa tuichaite mbaʼe ikatu haguére ñañeʼẽ ñande rapichakuérape pe múndo pyahúre Ñandejára oprometéva! (2 Ped. 3:13.) Umi hekojojávape ‘opytapáta ko yvy, ha pyʼaguapýpe oikóta hikuái’ (Sal. 37:11). Upépe opavave “omopuʼãta hogarã ha ipype oikóta” ha “ipyʼarory asýta hembiapokuéra reheve” (Is. 65:21, 22, NM). Ndaiporimoʼãvéima imboriahúva, iñembyahýiva ni otrata vaíva hapichápe (Sal. 72:13-16). Upérõ g̃uarã Babilonia Guasu ndaiporimoʼãvéima oporombotavy hag̃ua (Apoc. 18:8, 21). Umi omanóva oikove jeýta ha orekóta oportunida oikovévo opa árare (Is. 25:8; Hech. 24:15). ¡Ajépa iporãite umi mbaʼe ñaneraʼarõva! Ñaiméma hetaiterei persóna ñañemeʼẽma vaʼekue Jehovápe. Péro ikatu hag̃uáicha jahecha koʼã mbaʼe porãite, káda uno jaha vaʼerã tenonde gotyo Ñandejára organisasión ndive.

17. ¿Mbaʼépa jajedesidi vaʼerã jajapo?

¹⁷ Ko múndo aña oñehundi potaitéma. Upévare jajedesidíkena ñamombarete ñande jerovia ha jaagradese ñande pyʼaite guive opa mbaʼe Jehová omeʼẽva ñandéve ñamombaʼeguasu hag̃ua chupe. Ñañehaʼã vaʼerã ñahaʼanga Davídpe. Haʼe ningo heʼi vaʼekue: “Peteĩ mbaʼénte ajeruréta Jehovápe, ha upéva ahekáta. Aikose Jehová rógape aikove aja pukukue, ikatu hag̃uáicha ahecha mbaʼeichaitépa Jehová ipyʼaporã ha aguerohory hag̃ua itémplo” (Sal. 27:4, NM). Avei káda uno jadesidi vaʼerã ñañakarama hatã Jehová ha ipuévlore ha jasegi jaha tenonde gotyo Ñandejára organisasión ndive.