¿Rehesaʼỹijópa raʼe umi rrevísta Ñemañaha osẽ ramovéva? Ehechamína ikatúpa nemanduʼa koʼã mbaʼére:

¿Mbaʼe moméntopepa ojejuka vaʼerã kuri pe ovecharaʼy Paskuarã pe 14 de nisán?

La Bíbliape heʼi ojejuka vaʼerãha “og̃uahẽvo kaʼaru pytũ”. Ñande Ruete Ñeʼẽ Bíblia heʼi “kaʼaru pytũ mboyvemi”. Upéicharõ, pe ovecharaʼy ojejuka vaʼekue oike rire kuarahy, péro hesakãvo gueteri, oñepyrũvo pe 14 de nisán (Éx. 12:6) (15/12, páh. 18, 19).

¿Mbaʼe konséhopa oipytyvõta umi imitãvape odesidi porã hag̃ua?

1) Emotenonde memékena Ñandejára Rréino ha ihustísia (Mat. 6:19-34). 2) Evyʼákena reservívo nde rapichakuérape (Hech. 20:35). 3) Evyʼákena reservívo Jehovápe nemitãre (Ecl. 12:1) (15/1, páh. 19, 20).

¿Mbaʼe mbaʼépa orrepresenta umi cuatro hinéte ohóva kavaju ári 1914 guive?

Jesús, ohóva peteĩ kavaju morotĩ ári omosẽma yvágagui Satanás ha idemoniokuérape. Pe ohóva pe kavaju pytã ári orrepresenta entéro umi gérra oikóva ko yvy ape ári. Pe ohóva pe kavaju hũ ári orrepresenta ñembyahýi. Ha pe ohóva pe kavaju saʼyju ári orrepresenta umi mbaʼasy ojukáva hetaiterei héntepe (Apoc. 6:2-8) (1/2, páh. 6, 7).

¿Arakaʼépa oikóta “pe Ovecharaʼy kasamiénto”? (Apoc. 19:7.)

Oikóta ág̃a pe Rréi Jesucristo omohuʼã rire iñorairõ, térã oñehundi rire Babilonia Guasu ha oiko rire Armagedón (15/2, páh. 10).

¿Mbaʼérepa umi hudío oikóva primer síglope “ohaʼarõjoa” vaʼekue og̃uahẽ pe Mesías? (Luc. 3:15.)

Ndaikatúi ningo jaikuaa umi hudío síglo primero guare ontende porãpa raʼe pe profesía oñeʼẽva pe Mesías rehe oĩva lívro de Daniélpe (Dan. 9:24-27). Upéicharõ jepe, oiméne ohendu raʼe hikuái oñemombeʼúvo peteĩ ánhel oñeʼẽ hague umi ovecharerekuápe Belén ypýrupi, térã oikuaa hikuái mbaʼépa heʼi kuri pe profetísa Ana ohechávo Jesúspe pe témplope. Upéi avei umi karai oadivináva og̃uahẽ Jerusalénpe ha oheka hikuái “pe hudiokuéra rréi onase vaʼekue” (Mat. 2:1, 2). Upe rire, Juan el Bautísta omomarandu avei Cristo og̃uahẽ potaitemaha (15/2, páh. 26, 27).

¿Mbaʼépa jajapo vaʼerã akóinte ñakumpli hag̃ua ñaprometéva? (2 Cor. 1:18.)

Jaikuaaháicha, sapyʼánte ñasuspendémante peteĩ kompromíso, péro ndahaʼéi jajaposégui, síno oñepresentágui peteĩ situasión ijetuʼúva. Upéicharõ jepe, peteĩ kristiáno oñekomprometéramo ojapotaha peteĩ mbaʼe, oñehaʼãmbaite vaʼerã okumpli (15/3, páh. 32).

¿Mbaʼépa jajapo vaʼerã ani hag̃ua jahecha pornografía?

1) Jahechárõ peteĩ taʼanga tieʼỹ, ensegída ñamaña vaʼerã ótro ládo. 2) Ñañatende vaʼerã mbaʼérehepa ñapensa: ñañehaʼã ñapensa umi mbaʼe iporãva ha ñañemboʼe Ñandejárape. 3) Ñañatende moõpa ñapyrũ: ani jahecha pelíkula térã jaike Internétpe umi páhina oĩháme pornografía (1/4, páh. 10-12).

¿Mbaʼépa ikatu oiko peteĩ kristiáno ohóramo ombaʼapo tetã ambuépe ha oheja ifamília?

Tuvakuéra ndoikóiramo ifamíliandi, tuicha operhudika chupekuéra. Ikatu umi mitã opensa itúva térã isy oheja reiha chupe ha opyta ipochy. Avei ména ha tembireko ikatu oñeñandu haʼeño ha oñomoakãratĩ (15/4, páh. 19, 20).

¿Mbaʼérepa yma umi delinkuénte oñemosaingóvape yvyráre oñemopẽ chuguikuéra hetyma?

Umi rrománo omosaingo vaʼekue yvyráre umi kriminálpe omano hag̃ua. Umi hudío ojerure kuri toñemopẽ hetyma umi mokõi mbaʼe vai apoha oĩ vaʼekuépe Jesús ykére. Ojejapóvo upéicha, haʼekuéra ndaikatuvéima orrespira porã ha sapyʼaitépe ipytupa ha omano. Upéicha ndojehejái pe yvyráre upe pyhare (Deut. 21:22, 23) (1/5, páh. 11).

¿Mbaʼe mbaʼépa ñañeporandu vaʼerã japredika jave umi héntepe ñande territóriope?

¿Mávapepa ñañeʼẽ hína? ¿Moõpa ñañeʼẽ chupe? ¿Mbaʼe moméntopepa opyta porãve ñañeʼẽ hag̃ua? ¿Mbaʼéichapa ñañeʼẽ vaʼerã chupe? (15/5, páh. 12-15).

¿Mboy tapichápepa ojukáma pe sigarríllo?

Pe síglo ohasa vaʼekuépe omano 100 millón persóna rupi pe sigarríllo káusare. Koʼág̃arupi katu káda áño omano seis millónrupi (1/6, páh. 3).