CHE túva onase vaʼekue peteĩ siuda héravape Graz (Austria) áño 1899-pe. Ha oñepyrũvo pe primera gérra mundiál, haʼe imitã gueteri. Péro 1939-pe, oñepyrũ riremi pe segunda gérra mundiál, pe ehérsito alemán orrekluta chupe. Haʼe omano 1943-pe, oñorairõ jave Rúsiape. Upérõ che areko dos áñonte, ha ni ndaikuaajepéi chupe. Che mitãme ifaltaiterei chéve che ru, koʼýte ahechávo opavave lénto che kompañerokuéra orekoha itúva. Upéi chemitãrusúpema aikuaa arekoha avei peteĩ Túva oikóva yvágape ha nomanomoʼãiva arakaʼeve. Ha upéva tuichaiterei chekonsola (Hab. 1:12).

Arekórõ guare siete áño, aike pe Movimiento Scóutpe. Pe Boy Scouts (jóvenes exploradores) ningo peteĩ organisasión mundiál oñefunda vaʼekue Gran Bretáñape 1908-pe. Pe teniénte henerál vritániko hérava Robert Stephenson Smyth Baden-Powell omoñepyrũ vaʼekue ko organisasión, ha avei ofunda pe Wolf Cubs (térã Lobatos), peteĩ asosiasión oikehápe umi mitãʼi. Ha che aĩ vaʼekue upe grúpope.

Avyʼaitereími rosẽ jave fin de semána roakampa. Upéicha jave roke umi óga kárpape, roiporu unifórme ha roguata tambór púpe. Koʼág̃a peve chemanduʼa rohugárõ guare umi ótro mitãʼi ndive kaʼaguýre ha kaʼarupytũ katu roñemoĩ ropurahéi joa tata jerére. Oremboʼe hikuái avei heta mbaʼe pe naturalésagui, ha upéva chepytyvõ aguerohory hag̃ua ñande Apohare rembiapokue porãita.

Entéro oĩvape Boy Scouts organisasiónpe oñemokyreʼỹ ojapo hag̃ua káda día peteĩ mbaʼe iporãva. Ha roñehaʼã rokumpli upéva. Chemanduʼa rojosaluda jave roʼémi hague: “Siémpre preparádo”. Upéva ningo chegustaiterei. Ore grúpope roĩ mas de 100 mitãʼi, haimete a la mita katóliko, peteĩ vudísta ha umi ótro katu protestánte.

Áño 1920 guive umi Boy Scouts ojapo sapyʼapyʼa rreunión internasionál hérava jamborees. Che aha kuri pe séptima rreunión mundiálpe ojejapo vaʼekue Bad Ischl, Áustriape, agosto de 1951-pe. Avei aha pe novena rreuniónpe Sutton Párkpe, opytáva ag̃ui Bírminghamgui (Inglaterra) agosto de 1957-pe. Upépe roñembyaty vaʼekue 33.000 exploradór 85 tetãmegua, ha avei 750.000 invitádo, umíva apytépe pe rréina Isabel Inglaterragua. Che añeñandu aĩrõguáicha peteĩ organisasión tuichávape opavave ojotratahápe oñoermánoicha. Ni napensái upéi aiketaha ótra organisasión iporãvévape, oĩháme hetaiterei persóna ohayhúva Ñandejárape.

Áño 1958-pe che aaprende vaʼekue aikóvo ambaʼapo hag̃ua de kamaréro Grand Hotel  Wiesler de Grázpe (Austria). Ha marzo térã abril rupi, amohuʼãmbotaitévoma che preparasión, peteĩ che kompañéro de traváho oñenkargáva umi póstrere, oñepyrũ oñeʼẽ chéve la Bíbliare. Haʼe héra Rudolf Tschiggerl. Upérõ primera vés ojepredika chéve. Rudolf heʼi chéve la Biblia nomboʼeiha pe trinida, péro che ndagueroviái upéva ha ahechaukase voi chupe ojavyha. Rúdolfpe rohenói avei Rudi, ha chegusta la ilája, upévare akonvensese chupe oiko jey hag̃ua chugui katóliko.

Haʼe heʼi okonsegitaha chéve peteĩ Biblia, péro che haʼe chupe ajagarrataha chugui oguerúramo peteĩ Biblia katólika. Añepyrũrõ guare alee, atopa pe Biblia apytépe peteĩ tratádo ojapóva pe Sociedad Watchtower, Rudi voi omoĩ vaʼekue upépe. Ha upéva ndachegustái. Che apensa umichagua tratádo omyesakãtaha heta japu añeterõguáicha. Péro nacheprovlémai añeʼẽ hag̃ua la Bíbliare. Ha ani hag̃ua chembopochy, Rudi nomeʼẽvéi chéve ni peteĩ puvlikasión. Upéicharõ jepe, tres mésere roñeʼẽ mimi la Bíbliare ha sapyʼánte roñemongeta pyharepyte peve.

Amohuʼã rire che preparasión pe otélpe, mama chemondo peteĩ eskuéla oñemboʼehápe otelería. Pe eskuéla oĩ peteĩ puévlo héravape Bad Hofgastein, opytáva umi sérro Alpes ypýrupi. Umi ostudiáva upe eskuélape oho jepi opraktika Grand Hotel oĩva Bad Hofgásteinpe. Ha sapyʼánte che aha avei upépe añembokatupyryve hag̃ua che traváhope.

Rudi oavisa Viena sukursálpe moõpa aiko hína, ha pe sukursál omondo cherendápe mokõi misionéra hérava Ilse Unterdörfer ha Elfriede Löhr. * Peteĩ díape, pe rresepsionísta oñatendéva pe otélpe heʼi chéve mokõi kuñakarai oĩha okápe peteĩ kóchepe ha oñeʼẽseha chendive. Che ningo nahaʼarõi avavépe, péro asẽ ahecha mávapa hikuái. Tiémpo rire aikuaa koʼã ermána ombohasa hague kañyhápe heta puvlikasión Alemániape umi nási tiémpope, Testigokuérape ojepersegírõ guare. Ha oñepyrũ mboyve voi pe segunda gérra mundiál, pe Gestapo, térã pe polisía sekréta Alemaniagua, ojagarra ha ogueraha chupekuéra peteĩ kámpo de konsentrasiónpe (Lichtenburg). Upéi, pe gérra aja katu ojeguerova chupekuéra ótro kámpo de konsentrasiónpe opytáva namombyrýi Berlíngui (Ravensbrück).

Umi ermána ningo che sy avegua lénto ha arrespeta chupekuéra, péro nacheinteresái umi mbaʼe chemboʼéva, upévare ndaipotái operde rei hikuái itiémpo heta semánare térã mésere che rehehápe. Upémarõ ajerure chupekuéra togueru chéve peteĩ lísta oĩhápe umi téxto oñeʼẽva pe susesión apostólika rehe. Ha haʼe chupekuéra ahechaukataha pe paʼi oĩvape upe puévlope. Che apensa kuri hesakãvetaha chéve heta mbaʼe añeʼẽ rire pe paʼi ndive.

Umi ogueroviáva pe susesión apostólika opensa  pe primer pápa haʼe hague apóstol Pedro ha entéro umi pápa oúva upe rire orekoha autorida Pedro oreko haguéicha (pe iglésia ontende vai Jesús heʼi vaʼekue Mateo 16:18, 19-pe). Iglésia Katólika heʼi avei pe pápa ojapo jave iservísio (ex cathedra), ndojavyiha mbaʼevetépe. Ha che aguerovia upéva. Umi katóliko ohenói pe pápape Sánto Pádre, ha haʼe heʼíramo ikatuha ojejerovia pe trinidáre, che arovia avei upéva. Péro oiméramo pe pápa ikatu ojavy, apensa avei pe enseñánsa ikatuha oĩ vai. Heta katólikope g̃uarã pe susesión apostólika iñimportanteterei ha upévagui odepende heta enseñánsa.

Ahárõ guare pe paʼi rendápe, haʼe ndaikatúi orresponde umi mbaʼe aporandúva chupe, péro omeʼẽ chéve peteĩ lívro oñeʼẽva pe susesión apostólika rehe. Agueraha ógape, alee ha upéi aha jey hendápe ha arekóma hetave mbaʼe aporandu vaʼerã chupe. Péro ndoikuaáimarõ mbaʼéichapa ombohováita umi porandu, heʼi chéve: “Che ndaikatúi rokonvense, ni nde nachekonvensemoʼãi [...]. Toho porã ndéve”. Ha noñeʼẽsevéima chendive upe témare.

Oiko rire upéva adesidi astudia la Biblia Ilse ha Elfriede ndive. Haʼekuéra chepytyvõ aikuaa hag̃ua pe Pádre Sánto añeteguápe, Jehová (Juan 17:11). Upe tiémpope ndaipóri gueteri kongregasión upe lugárpe, upévare umi mokõi ermána odirihi umi rreunión peteĩ estudiánte rógape. Péro saʼi ojeho koʼã rreuniónpe, ha ndaipóri rupi kuimbaʼe omoakã hag̃ua umi rreunión, Ilse ha Elfriede ojapopalénto umi rreunión. Sapyʼapyʼa ou ermáno ótro ládogui ojapo hag̃ua diskúrso, ha péicha jave ojealkila peteĩ lugár.

Octubre de 1958-pe añepyrũ astudia la Biblia Ilse ha Elfriede ndive, ha tres mése haguépe, enero de 1959-pe ajevautisáma. Péro upe mboyve aporandu chupekuéra ikatúpa aha hendivekuéra predikasiónpe ahecha hag̃ua mbaʼéichapa ojepredika vaʼerã (Hech. 20:20). Asẽ rire hendivekuéra, ajeruréma che territoriorã ha omeʼẽ chéve hikuái peteĩ puévlo kompletoite. Upépe apredika cheaño umi ogahárupi ha upe rire aha jey avisita umi ohendu porã vaʼekuépe. Primera ves asẽrõ guare apredika peteĩ ermánondi, asẽ pe superintendénte de sirkuíto ndive. Upe rire pe ermáno ovisita ore grúpo.

Áño 1960-pe, amohuʼã che estúdio pe eskuéla de oteleríape ha aha jey ógape amombeʼu hag̃ua che hentekuérape umi mbaʼe aaprendéva la Bíbliagui. Koʼag̃aite peve ndaipóri che famíliape ni peteĩ Testígo, péro oĩ mimi oikuaaséva la Biblia omboʼéva.

Áño 1961-pe, pe sukursál omondo kárta umi kongregasiónpe omokyreʼỹ hag̃ua ermanokuérape ikatu hag̃uáicha ojapo iprekursorádo. Upérõ che namendái gueteri ha cheresãi, ha apensa ndarekoiha exkúsa ani hag̃ua ajapo che prekursorádo. Upémarõ añeʼẽ Kurt Kuhn ndive, pe superintendénte de sirkuíto, ha amombeʼu chupe ajaposeha che prekursorádo, péro ambaʼaposeveha unos kuánto mése ikatu hag̃uáicha ambyaty che áuto repyrã, pórke upéva ideprovéchota chéve. Haʼe osẽ heʼi chéve: “¿Jesús ha ijapostolkuéra piko oikotevẽ raʼe peteĩ áuto oservi hag̃ua de tiémpo kompléto?”. Upépe heʼipaitéma chéve. Upémarõ adesidi ajapo che prekursorádo. Péro ambaʼapo rupi 72 óra a la semána, tekotevẽmante akambia raẽ heta mbaʼe.

 Aporandu che héfepe ndaikatuichénepa ambaʼapo 60 órante, ha heʼi chéve ikatuha ha osegi opaga chéve el mísmo suéldo. Upe riremi haʼe chupe ambaʼaposeha 48 órante, ha heʼi jey chéve ikatuha ha nomboguejýi chehegui che suéldo. Upe rire ajerure chupe ambaʼapo hag̃ua 36 órantema, seis día a la semána de seis óra káda día, ha heʼi jey chéve ikatuha, hiʼarive omantene chéve che suéldo. Che héfe ningo ndoipotái vaʼekue aheja chupe. Upe riremínte añepyrũma ajapo che prekursorádo. Upérõ guare umi prekursór rregulár ojapo vaʼerã 100 óra káda més.

Cuatro mése rire añenombra prekursór espesiál ha siérvo de kongregasión peteĩ siuda héravape Spittal an der Drau, oĩva provínsia de Caríntiape. Upépe aservi avei de siérvo de kongregasión. Upérõ umi prekursór espesiál opredika vaʼerã 150 óra káda més. Che ningo cheaño ajapo kuri pe prekursorádo, upévare peteĩ ermána hérava Gertrude Lobner chepytyvõ umi traváho oĩvape kongregasiónpe. Haʼe oñenkarga umi tembiapo ojapóvare umi siérvo auxiliár de kongregasión. *

Áño 1963-pe, cheinvita hikuái aservi hag̃ua de superintendénte de sirkuíto. Sapyʼánte aviaha trénpe che valíha pohýi reheve avisita hag̃ua umi kongregasión. Heta ermáno ningo ndorekói vaʼekue áuto, upévare ndaikatúi ou hikuái chereka pe estasiónpe. Chéngo heta vése ikatúnte aha táxipe, péro apensa umi ermáno oñeñandu vaitaha, upévare adesidi aha yvýrupi umi óga apytatahápe.

Áño 1965-pe, cheinvita hikuái aha hag̃ua Eskuéla de Galaádpe kláse 41-pe. Upérõ chesoltéro gueteri ha heta ohóva upe klásepe soltéro avei. Naimoʼãiete ningo cheasignataha hikuái asegi hag̃ua aservi de superintendénte de sirkuíto Áustriape. Péro aha mboyve, ojerure chéve hikuái amoirũ hag̃ua cuatro semánare Anthony Cóntepe. Haʼe ningo oservi avei de superintendénte de sirkuíto Estados Unídospe, nórte gotyo Nueva Yórkpe, peteĩ siuda héravape Cornwall. Heta avyʼa ambaʼapórõ guare ko ermánondi. Haʼe ikatupyryeterei predikasiónpe ha chéicha avei ogusta chupe ko tembiapo.

Pe sirkuíto cheasignahápe hikuái aservi hag̃ua aju jey rire Áustriape, aikuaa peteĩ ermána ijukyetereívape hérava Tove Merete. Haʼe oreko guive 5 áño oservíma Jehovápe. Umi ermáno oporandu jave oréve mbaʼéichapa rojokuaa, ropuka jepi ha roʼe: “Pe sukursál ojapopaite”. Romenda un áño haguépe, abril de 1967-pe, ha opermiti oréve hikuái rosegi roservi sirkuítope.

Un áño haguépe, Jehová imbaʼeporãgui cheporavo espíritu sánto rupive itaʼyrarã. Upe guive añemoag̃ui che Ru yvagapeguáre de fórma espesiál ha avei umi ótro kristiáno Ñandejára oiporavo vaʼekuéndi, heʼíva avei: “¡Abba, che Ru!” (Rom. 8:15).

Merete ha che rombaʼapo sirkuíto ha distrítope áño 1976 peve. Inviérnope sapyʼánte roke jepi umi koty roʼysãme. Peteĩ vuéltape ropáy ha rotopa ore frasáda oñekonhela rorrespira haguépe hese. Upémarõ rodesidi rogueraha peteĩ estúfa  eléktrika hakumie hag̃ua ore koty. Heta lugárpe pe letrína oĩ vaʼekue okápe, upévare roipuruséramo váño pyharekue, rosẽ vaʼerã pe ógagui ha roguata pe niévere. Hiʼarive pe letrína pare ipaʼũmba ha oike pe yvytu roʼysã. Ore ningo ndaorerógai, upévare ropyta umi ermáno rógape martes pyhareve peve ha upéi roviaháma pe ótra kongregasión rovisitátavape.

Avyʼaiterei che rembireko akóinte chepytyvõ haguére. Chupe ningo ogustaiterei pe predikasión, upévare ni natekotevẽi aiko hapykuéri osẽ hag̃ua opredika. Haʼe ohayhueterei avei umi ermánope ha ipyʼaite guive oñeinteresa umi héntere. Upéicha rupi heta chepytyvõ.

Áño 1976-pe, oreinvita hikuái roservi hag̃ua Betel de Áustriape, oĩva Viénape, ha añenombra miémbro del Komité de Sukursál. Upérõ guare, pe sukursál osupervisa pe predikasión umi país oĩvape Europa del Éstepe, ha omog̃uahẽ chupekuéra ñemiháme umi puvlikasión. Chemanduʼa ambaʼapo hague ermáno Jürgen Rundel ndive, oñenkargáva ko traváhore. Upéi katu amoakã pe traduksión 10 idióma oñeñeʼẽvape Europa del Éstepe. Jürgen ha hembireko Gertrude osegi oservi Jehovápe ipyʼaite guive ha koʼág̃a oĩ hikuái kómo prekursór espesiál Alemániape. Áño 1978-pe, pe sukursál de Austria oñepyrũ ojapo rrevísta seis idiómape ha oipuru peteĩ imprénta michĩva. Avei romondo umi suskripsión heta tetãrupi. Peteĩ ermáno hérava Otto Kuglitsch heta oipytyvõ ojejapo hag̃ua ko tembiapo. Koʼág̃a haʼe ha hembireko Ingrid, oservi pe sukursál de Europa Centrálpe.

Umi ermáno oĩva Europa del Éstepe oimprimi umi puvlikasión hetãme, ha upearã oipuru hikuái peteĩ mákina ojapóva kópia hérava mimeógrafo, ha avei okopia umi informasión ojeguerukáva umi sínta de fotoichaguápe. Upéicharõ jepe, oikotevẽ hikuái umi ermánore oĩva ótro tetãme oipytyvõ hag̃ua chupekuéra. Jehová akóinte oprotehe koʼã traváho ojejapóva ñemihãme. Opavave rombaʼapóva sukursálpe romombaʼeterei koʼã ermánope ojapo haguére Jehová rembipota umi áño ijetuʼuetévape, ojeproivi tiémpope Testigokuéra rembiapo.

Áño 1989-pe, ermáno Theodore Jaracz, upérõ oĩva pe Kuérpo Governántepe, oviaha  Rumániape, ha areko pe priviléhio amoirũvo chupe. Roho roipytyvõ hag̃ua peteĩ grúpo tuichávape oike jey hag̃ua Jehová organisasiónpe. Oñepyrũvo áño 1949, koʼã ermáno ojesepara kuri pe organisasióngui heta mbaʼére ha oforma hikuái ikongregasionrã. Upéicharõ jepe, osegi opredika ha ovautisa heta persónape. Avei ojegueraha chupekuéra préso iñeʼẽrendu rupi Jehovápe, ojejapoháicha avei umi ermáno oĩvare pe organisasiónpe. Upérõ Rumániape ojeproivi gueteri Testigokuéra rembiapo, upévare roñerreuni ñemiháme ermáno Pamfil Albu rógape, ha oĩ orendive cuatro ansiáno orrepresentáva pe grúpope ha umi rrepresentánte del Komite de País. Avei oremoirũ peteĩ traduktór Austriagua hérava Rolf Kellner.

Pe segundo pyhare roñerreuni haguépe, ermáno Albu okonvense ikompañerokuérape, umi cuatro ansiánope, oñeuni jey hag̃ua orendive. Haʼe heʼi chupekuéra: “Koʼág̃a jajapóma vaʼerã, pórke ndajaikuaái jareko jeýnepa ótra oportunida”. Upéicha 5.000 ermáno oike jey Jehová organisasiónpe. ¡Ajépa tuichaite oñemotĩ Satanás ha mombyry ogana Jehová!

Opakuévoma 1989, hoʼa mboyvemi pe komunísmo Europa del Éstepe, pe Kuérpo Governánte oreinvita rombaʼapo hag̃ua Séde Sentrálpe, Nueva Yórkpe. Che ha che rembireko ningo norohaʼarõiete upéva. Roñepyrũ roservi Betel de Broóklynpe julio de 1990-pe. Áño 1992-pe, chenombra hikuái ajudánte del Komite de Servísio oĩva pe Kuérpo Governánte poguýpe, ha julio de 1994-pe katu, añepyrũ aservi pe Kuérpo Governántepe.

Yma aservi vaʼekue tembiʼu ambaʼapoha tiémpope otélpe, koʼág̃a katu aipytyvõ ojeprepara ha oñemeʼẽ hag̃ua hiʼupy oipytyvõtava ermanokuérape ojeroviave hag̃ua Jehováre (Mat. 24:45-47). Che ningo mas de 50 áñoma aservi hague de tiémpo kompléto, ha aagradeseterei ahechávo mbaʼeichaitépa Jehová ovendesi umi ermánope oĩva opárupi. Avyʼaiterei aha jave umi asambléa internasionálpe. Upépe ñanemomanduʼa mbaʼeichaitépa iñimportánte jaikuaa porã Jehovápe, ñande Ru yvagapegua, ha avei Iñeʼẽ.

Ajerure Jehovápe toipytyvõ hetave persónape ostudia hag̃ua la Biblia, toasepta heʼíva pype ha toservi ñanendive Ñandejárape (1 Ped. 2:17). Aipotaitereíma ningo oiko pe rresurreksión ko yvy ape ári, ha ahechaséma yvága guive che ru ndaikuaái vaʼekuépe. Hiʼãiterei chéve che túva, che sy ha che hentekuéra oadora avei Jehovápe pe paraísope.