1, 2. ¿Mbaʼépa Jehová onkarga Moiséspe ojapo hag̃ua, ha mbaʼépa opromete chupe?

EPENSAMÍNA reñepresentataha pe governánte ipoderosovéva renondépe ha reñeʼẽtaha Ñandejára puévlo rehehápe. ¿Mbaʼéichapa reñeñandúta? Ikatu rekyhyje, ndereikuaái mbaʼépa eréta térã rechuchu. ¿Mbaʼépa rejapo vaʼerã reime hag̃ua preparádo? ¿Mbaʼéichapa Ñandejára mensáhe og̃uahẽvéta pe nerendúvape?

² Moisés ojecha vaʼekue peichagua situasiónpe. Haʼe ningo “pe ivuenovéva oĩ vaʼekue ko yvy ape ári”, ha Jehová heʼi chupe omondotaha faraón rendápe Egíptope omosãso hag̃ua ipuévlope oĩva upépe kómo esklávo (Núm. 12:3, NM). Péro faraón haʼe peteĩ persóna imaledukádo ha oñemombaʼeguasúva. Upéicharõ jepe, Jehová oipota Moisés omanda pe mburuvichápe opoi hag̃ua umi esklávo isrraelítagui, oĩva tres millónrupi (Éx. 5:1, 2). Ndareíri Moisés heʼi Jehovápe: “Che ningo ndahaʼéi mbaʼeve aha hag̃ua faraón rendápe ha aguenohẽ Egíptogui umi isrraelítape”. Katuete Moisés opensáne raʼe ndaikatumoʼãiha ojapo upéva. Péro Ñandejára opromete ndohejareimoʼãiha chupe, heʼívo: “Che aiméta nendive” (Éx. 3:9-12, NM).

3, 4. a) ¿Mbaʼérepa Moisés okyhyje vaʼekue? b) ¿Mbaʼépa sapyʼánte ikatu ijetuʼu ñandéve?

³ Moisés okyhyje vaʼekue faraón ndorresivírirõ g̃uarã chupe  ha ndoroviáirõ g̃uarã Ñandejára Jehová omondoha chupe. Avei okyhyje umi isrraelíta voi ndoroviáirõ g̃uarã Jehová oiporavo hague chupe oguenohẽ hag̃ua ipuévlope Egíptogui. Upévare Moisés heʼi Jehovápe: ‘Israelgua ndacheroviái ha nohenduséiramo upe haʼéva, ¿mbaʼe ajapóta? Ha mbaʼe ajapóta heʼíramo chéve: “[Jehová] ndojehechaukái kuri ndéve”’ (Éx. 3:15-18; 4:1).

⁴ Naentéroi ningo tekotevẽta oñeʼẽ peteĩ governánte ipoderósovape. Péro sapyʼánte ikatu ijetuʼu ndéve reñeʼẽ hag̃ua Ñandejárare ha Irréinore umi héntepe. Jahechamína mbaʼépa Jehová orresponde Moiséspe ha mbaʼépa ojapo upe rire. Upéva ñanemboʼéta peteĩ mbaʼe iñimportantetereíva.

5. a) ¿Mbaʼépa Jehová omeʼẽ Moiséspe ikatu hag̃uáicha okumpli hembipota? (Ehecha pe taʼanga oĩva iñepyrũme.) b) ¿Mbaʼéichapa upéva oipytyvõ Moiséspe ipyʼaguasu hag̃ua?

⁵ Moisés ningo heʼi vaʼekue okyhyjeha avave ndoroviáirõ g̃uarã chupe. Upévare Jehová oprepara porã ko isiérvope ombohovái hag̃ua opa mbaʼe ohaʼarõva chupe. Lívro de Éxodo omombeʼu: “Jehová heʼi chupe: ‘¿Mbaʼéiko ereko nde pópe?’, ha Moisés heʼi: ‘Peteĩ vastón’. Ñandejára heʼi chupe: ‘Eitymi yvýpe’. Ha haʼe oity yvýpe ha oiko chugui peteĩ mbói; ha Moisés tuicha odipara chugui. Upéi Jehová heʼi Moiséspe: ‘Ejagarra pe mbói huguáigui’. Ha Moisés ojagarrávo oiko jey chugui peteĩ vastón. Upéi Ñandejára heʼi: ‘Upéicha haʼekuéra ogueroviáta Jehová [...] ojaparese hague ndéve’” (Éx. 4:2-5, NM). Ñandejára podér rupive, peteĩ vastóngui oiko peteĩ mbói. Upe milágro rupive, Moisés ikatúta ohechauka Jehová omondoha chupe ha oĩha hendive. Upéi Jehová heʼi Moiséspe: “Ko vastón regueraháta nde pópe rejapo hag̃ua umi milágro” (Éx. 4:17, NM). Péicha Moisés orekóma ipópe peteĩ mbaʼe oipytyvõtava chupe okumpli hag̃ua Jehová rembipota, ha ipyʼaguasuvéma oñeʼẽ hag̃ua faraónpe ha umi isrraelítape (Éx. 4:29-31; 7:8-13).

6. a) ¿Mbaʼépa jareko vaʼerã preparádo japredika jave? b) ¿Mbaʼérepa Pablo heʼi raʼe Ñandejára Ñeʼẽ oikove ha ipoderosoitereiha’?

⁶ Ñameʼẽ jave umi héntepe Ñandejára mensáhe, ¿mbaʼépa jareko jepi ñande pópe? Heta vése jareko la Biblia ha ñaime preparádo jaipuru hag̃ua. Hetápe g̃uarã la Biblia haʼe peteĩ lívro reínte, péro añetehápe ndahaʼéi upéicha. La Biblia ningo Ñandejára voi oskrivika vaʼekue, ha upéva rupive oñeʼẽ ñandéve (2 Ped. 1:21). Pype oñemombeʼu Ñandejára ojapótava Irréino rupive. Upévare apóstol Pablo oskrivi vaʼekue: “Ñandejára Ñeʼẽ oikove ha ipoderosoiterei” (elee Hebreos 4:12). Jehová promesakuéra núnka ndopytareíri, haʼe siémpre oñenkarga ikatu hag̃uáicha oñekumpli umi mbaʼe heʼíva (Is. 46:10; 55:11). Peteĩ persóna ohechakuaáramo upéva, umi mbaʼe oleéva la Bíbliape opokovéta hese.

7. ¿Mbaʼéichapa ikatu ‘jaipuru Ñandejára Ñeʼẽ hekoitépe’?

⁷ Jehová omoĩ ñande pópe Iñeʼẽ, la Biblia ikatu hag̃uáicha upéva rupive jahechauka umi héntepe siertoha pe mensáhe ñamombeʼúva ha ouha Ñandejáragui. Ndareíri Pablo ohai rire umi kristiáno evréope, heʼi Timotéope: ‘Eñehaʼãmbaitéke [...] eipuru Ñandejára Ñeʼẽ hekoitépe’ (2 Tim. 2:15). ¿Mbaʼéichapa ñande avei ikatu jasegi ko konsého? Jaiporavo porã vaʼerã umi téxto jaleétava umi héntepe, ikatu hag̃uáicha Ñandejára Ñeʼẽ opoko ikorasõre. Umi tratádo oñepresenta vaʼekue 2013-pe, ojeprepara jaipuru hag̃ua upéicha.

8. ¿Mbaʼépa heʼi peteĩ superintendénte de servísio umi tratádo pyahúre?

⁸ Koʼã tratádo pyahu oreko diferénte téma káda uno, péro enterovéva ojojogua  ojejapo lájape. Upévare, jaipurukuaáramo peteĩ jepe, enterovévama jaipurukuaáta. Peteĩ superintendénte de servísio oĩva Hawáipe (Estados Unidos) oskrivi: “Ore noroimoʼãi kuri peichaite peve ideprovechotaha koʼã tratádo predikasiónpe, tahaʼe ropredika jave umi ogahárupi térã ambue hendáicha”. ¿Mbaʼérepa jaʼekuaa koʼã tratádo ndahasyiha jaipuru hag̃ua ha tuicha ñanepytyvõha predikasiónpe? Pe ermáno ohechakuaa umi tres rrespuésta oĩva káda tratádope oipytyvõha umi héntepe heʼi hag̃ua upe opensáva, ha ndoipyʼapýi chupekuéra ojavýrõ g̃uarã.

9, 10. a) ¿Mbaʼéichapa ñanepytyvõ umi tratádo pyahu jaipuru hag̃ua la Biblia? b) ¿Mbaʼeichagua tratádopa nepytyvõve predikasiónpe, ha mbaʼérepa?

⁹ Káda tratádo ñandegia jalee hag̃ua peteĩ téxto vívliko ojeporavo porã vaʼekue. Ñamoĩmína kómo ehémplo pe tratádo ¿Opánepa jehasa asy? Jajapo rire ko pregúnta umi héntepe, haʼekuéra ikatu orresponde: “opáta”, “ndopamoʼãi”, térã “ikatu mbaʼe”. Tahaʼe haʼéva irrespuésta, jahasa direktoite pe ótra páhinape ha jaʼe: “Jahechamína mbaʼépa heʼi la Biblia”. Ha jalee Apocalipsis 21:4.

¹⁰ Jaipuru jave pe tratádo ¿Mbaʼépa nde repensa la Bíbliare?, ñapresenta vaʼerã avei pe ótroicha. Tahaʼe haʼéva pe rrespuésta oiporavóva umi tres opsióngui, ensegída jahasáma vaʼerã pe ótra páhinape ha jalee pe téxto oĩva upépe: “Opa mbaʼe oĩva Ñandejára Ñeʼẽme ojehai [Ñandejára espíritu] rupive”. Upéi ikatu jaʼe ko téxto omyesakãveha hetave mbaʼe, ha jaavri ñande Biblia ha jalee 2 Timoteo 3:16.

11, 12. a) ¿Mbaʼéichapa reñeñandúta reipuru porãramo umi tratádo? b) ¿Mbaʼéichapa umi tratádo ikatu nepytyvõ rejapo hag̃ua rrevisíta?

¹¹ Heta vése umi hénte ohendu porã ñane predikasión, ha péicha jave ikatu jaleemie pe tratádo ha ñahesaʼỹijove hendive. Péro ndaikatúiramo jepe jasegi ñañemongeta, javyʼátama jaheja haguére chupe pe tratádo ha jalee rupi uno térã dos téxto vívliko pe primera visítape. Upe rire ikatu javisita jey chupe ñañemongetave hag̃ua hendive.

¹² Koʼã tratádo oreko pe última páhinape peteĩ párte heʼíva “Mbaʼépa nde repensa”. Iguýpe oĩ peteĩ pregúnta ha téxto vívliko ikatúva reipuru reho jey vove revisita umi héntepe. Pe tratádo ¿Mbaʼépa nde ere oikotaha ko múndogui?, pe última  páhinape oporandu “¿Mbaʼéichapa Ñandejára okambiáta ko múndo?”, ha umi téxto oĩva pépe katu Mateo 6:9, 10 ha Daniel 2:44. Pe tratádo héravape ¿Añetehápepa oikove jeýta umi omanóva? oĩ ko porandu, “Mbaʼérepa ñandetuja ha ñamano?”. Ha umi téxto oĩva upépe katu Génesis 3:17-19 ha Romanos 5:12.

13. ¿Mbaʼéichapa ikatu jaipuru umi tratádo ñamoñepyrũ hag̃ua estúdio vívliko?

¹³ Eipuru koʼã tratádo emoñepyrũ hag̃ua peteĩ estúdio vívliko. Koʼã tratádo kupépe retopáta peteĩ kódigo QR (código de respuesta rápida). * Reeskaneáramo ko kódigo nde selulár rupive, ojavri Internétpe jw.org guaraníme, ha ohechauka peteĩ páhina oĩháme peteĩ vidéo oinvitáva umi héntepe ostudia hag̃ua la Biblia. Umi tratádo oporomokyreʼỹ avei ojelee hag̃ua pe folléto ¡Notísia porã oúva Ñandejáragui! Por ehémplo pe tratádo ¿Mávapa odomina ko múndo? oporoinvita ojelee hag̃ua pe folléto leksión 5-pe. Ha pe tratádo ¿Mbaʼéichapa ikatu revyʼa ne famíliandi? oporoinvita ojelee hag̃ua leksión 9. Jaipuru porãramo koʼã tratádo, ikatúta jalee la Biblia umi héntepe primera ves ñañemongetávo hendivekuéra, ha avei javisita jeývo chupekuéra. Upéicha ikatúta ñamoñepyrũ estúdio vívliko. ¿Mbaʼépa ikatu rejapove reipuru porã hag̃ua Ñandejára Ñeʼẽ repredika jave?

14, 15. ¿Mbaʼéichapa ikatu jasegi Pablo ehémplo japredika jave?

¹⁴ Apóstol Pablo oñehaʼã vaʼekue opredika og̃uahẽ hag̃uáicha “opa ikatúvape” (elee 1 Corintios 9:19-23). ¿Maʼerãpa ojapo upéva? Haʼe heʼi: ‘Aipytyvõ hag̃ua umi hudíope, [...] umi oĩvape Léi poguýpe, [...] umi orekoʼỹvape Léi, [...] umi ikangývape’. Añetehápe, Pablo oñehaʼãmbaite vaʼekue oikuaauka pe marandu porã “opaichagua tapichápe”, ikatu hag̃uáicha mbovymi jepe ojesalva (Hech. 20:21). ¿Mbaʼéichapa ikatu jasegi Pablo ehémplo jajeprepara jave japredika hag̃ua “opaichagua tapichápe”? (1 Tim. 2:3, 4.)

¹⁵ Káda mes, Ñane Marandu Porã oguenohẽ umi presentasión ideprovéchova japredika hag̃ua. ¿Jaipurúpa ñaína? Péro, ¿mbaʼépa ikatu jajapo jahechakuaáramo umi héntepe ointeresaha ótro téma? Upéicharõ ñapensa porã vaʼerã jaikuaa hag̃ua mbaʼérehepa oñeʼẽse hikuái. Por ehémplo: “¿Mbaʼe situasiónpepa oĩ pe tapicha ñañeʼẽtaha? ¿Mbaʼépa la oipyʼapyvéva chupe?”. Upéi jaiporavo umi téxto ikatúva oipytyvõ chupe. Peteĩ superintendénte de sirkuíto omombeʼu mbaʼépa ojapo haʼe ha hembireko ikatu hag̃uáicha oipuru la Biblia: “Ñepyrũrã rosaluda umi héntepe, ha roguerekóma rupi aviérto ore Biblia, roleéma chupe pe téxto roprepara vaʼekue. Roñehaʼã rupi roñeʼẽ sapyʼaiténte ha ndoroikóigui rojereterei roʼe hag̃ua peteĩ mbaʼe, heta vése rolee peteĩ versíkulo jepe chupekuéra”. Jahechamína mbaʼe témarepa ñañeʼẽkuaa, mbaʼépa ikatu ñaporandu ha mbaʼe téxtopa ikatu jalee. Koʼã ehémplo jahechátava katuete ñanepytyvõta ñande territóriope.

16. ¿Mbaʼéichapa ikatu reipuru Isaías 14:7 predikasiónpe?

¹⁶ Reikóramo umi lugár oĩhápe insegurida ha hetahápe ivioléntova, ikatu ere pe persónape: “Eñeimahinamína peteĩ díape, entéro umi diário oguenohẽha peteĩ notísia heʼíva ko yvy tuichakuére oĩmaha pyʼaguapy, enterovéva oikotamaha trankílo ha ovyʼajoáta. Ajépa hasy lénto oiko hag̃ua upéva. Péro la Biblia heʼi oikotaha”. Elee chupe Isaías 14:7. Upéi ere: “Ñandejára Ñeʼẽ opromete ñandéve koʼẽrõitéma jaikotaha pyʼaguapýpe”. Ha ikatu relee chupe peteĩva umi promésa.

17. ¿Mbaʼéichapa ikatu reipuru Mateo 5:3 reñepyrũ hag̃ua repredika?

 ¹⁷ ¿Ivaípa la pórte pe lugár nde reikohárupi? Oiméramo upéicha, ikatu ere eñepyrũ hag̃ua reñemongeta: “¿Mboýpa tekotevẽ regana ikatu hag̃uáicha ne família oiko porã ha ovyʼa?” Orresponde rire, ere chupe: “Oĩ oganáva hetaiteve upévagui, péro ndovyʼáinte avei hikuái. ¿Mbaʼépa upéicharõ oñekotevẽ ojevyʼa hag̃ua?”. Upéi elee chupe Mateo 5:3 ha eofrese chupe peteĩ estúdio vívliko.

18. ¿Mbaʼéichapa ikatu reipuru Jeremías 29:11 ekonsola hag̃ua umi héntepe?

¹⁸ ¿Oĩpa pe território repredikahápe umi ohasa asýva oiko rupi peteĩ desgrásia? Oiméramo upéicha, ikatu ere ñepyrũrã: “Agueru ningo ndéve peteĩ notísia nekonsolátava [elee Jeremías 29:11]. Ko téxto ohechauka Ñandejára oipotaha ‘ñandepyʼaguapy’, ‘jahupyty iporãva’ ha ‘jareko esperánsa’. Javyʼaite ningo Ñandejára oipota haguére iporãva ñandéve g̃uarã. Péro, ¿ikatúne piko oiko upéva?”. Upéi ehecha hendive pe folléto Notísia porã, peteĩ leksión oñeʼẽva ko témare.

19. ¿Mbaʼéichapa ikatu reipuru predikasiónpe Apocalipsis 14:6, 7?

¹⁹ ¿Mbaʼépa ikatu ere umi hénte nde territoriopegua irrelihiósoramo? Eñepyrũ hag̃ua reñemongeta hendive ikatu ere: “Peteĩ ánhel oúramo oñeʼẽ ndéve, ¿rehendútapa chupe? [elee Apocalipsis 14:6, 7.] Ko ánhel heʼi ‘pekyhyje Ñandejáragui’ ha ‘pemombaʼeguasúke [...] upe ojapo vaʼekuépe yvága ha yvy’. ¿Mbaʼéichapa héra pe Kreadór?”. Elee chupe Salmo 124:8. Upépe heʼi: “Upe ñanepytyvõva ningo Ñandejára [Jehová], yvága ha yvy Apohare”. Ha ijáma guive ndéve, esegi eñeʼẽ chupe Jehováre.

20. a) ¿Mbaʼéichapa ikatu reipuru Proverbios 30:4 reikuaauka hag̃ua Ñandejára réra? b) ¿Mbaʼe téxtopa nde reipuru jepi reñeʼẽ jave ko témare?

²⁰ Reñepyrũ hag̃ua reñemongeta peteĩ imitãvandi, ikatu ere: “Aleeseténgo ndéve peteĩ téxto oĩva la Bíbliape heʼíva peteĩ mbaʼe iñimportantetereíva” [elee Proverbios 30:4]. ¿Mávarepa oñeʼẽ ko téxto? Jaʼekuaa noñeʼẽiha peteĩ umánore, síno oñeʼẽ pe Kreadór rehe, ojapo vaʼekue opa mbaʼe. * ¿Mbaʼéichapa ikatu jaikuaa héra? Repermitíramo chéve, ahechaukáta avei ndéve la Bíbliape”.

21, 22. a) ¿Mbaʼéichapa peteĩ téxto ojeporavo porãva ikatu oipytyvõ umi héntepe? b) ¿Mbaʼépa rejapo vaʼerã reipuru porãve hag̃ua la Biblia repredika jave?

²¹ Ñande ningo ndajaikuaái mbaʼeichaite pevépa peteĩ téxto ikatúta opoko peteĩ persónare. Por ehémplo, mokõi Testígo Australiagua og̃uahẽ peteĩ kuñakarai imitãva rógape, ha peteĩva oporandu chupe: “¿Ndépa reikuaa mbaʼéichapa héra Ñandejára?”. Upéi olee chupe Salmo 83:18. Pe kuñakarai omombeʼu: “¡Ndaikuaái ningo mbaʼépa haʼéta! Oho rire hikuái, ajupi che áutope ha aha peteĩ livreríape, opytáva 56 kilómetro ógagui. Upépe aheka umi ótra Bíbliape upe téra ha upéi avei peteĩ diksionáriope. Ahecha rire Ñandejára añetehápe heraha Jehová, apensa: ‘Mboy kósapa oiméne ndaikuaái hína’”. Upéi, ko kuñakarai ha ikonkuvíno ostudia la Biblia, omenda ha ojevautisa hikuái.

²² Jahechaháicha, Ñandejára Ñeʼẽ ipoderosoiterei. Upéicha rupi heta persóna oleéva la Biblia ou okambia ha ojerovia Jehová promesakuérare (elee 1 Tesalonicenses 2:13). Umi mbaʼe heʼíva la Biblia ikatu opoko umi hénte korasõre ha ipoderosove opa mbaʼe ñande ikatúvagui jaʼe peteĩ persónape. Ñandejára Ñeʼẽ ningo oikove, ¡jaipurúkena siémpre!