PEDRO hasẽ soro onega rire oikuaaha Jesúspe, ha tekotevẽ vaʼekue oñehaʼã ani hag̃ua omokangy chupe upe ojapo vaʼekue ha ojerovia mbarete jey hag̃ua. Péro Pedro ofalláramo jepe, Jesús oipuruse chupe oipytyvõ hag̃ua idisipulokuérape. Upévare heʼi chupe: “Reju jey vove, emombarete ne ermanokuérape” (Luc. 22:32, 54-62). Pedro tuichaiterei oipytyvõ kuri pe kongregasión kristiánape síglo primérope (Gál. 2:9). Upéicha avei, oiméramo ermáno yma oservi vaʼekue ansiánoramo ha upéi operde ipriviléhio, ikatu hína ohupyty jey upe priviléhio ha vyʼápe oipytyvõ jey iñermanokuérape.

Ikatu umi ermáno operde vaʼekue ipriviléhio oñeñandu vai ha opensa ijetuʼumaha ojerrekupera jey hag̃ua. Por ehémplo, Julio * oservi vaʼekue 20 áño rasa kómo ansiáno Sudaméricape, péro upéi operde ipriviléhio. Haʼe heʼi: “Aserviha tiémpope ansiánoramo, apreparámi diskúrso, avisita ha amokyreʼỹ ermanokuérape. Péro aperde rire che priviléhio, okambiaite upéva. Haʼete chéve ndachedeprovechovéiva ha heta asufri upévare”. Péro koʼág̃a Julio oservi jeýma kómo ansiáno kongregasiónpe.

Santiago ohai vaʼekue: “Pevyʼákena che ermanokuéra pembohováivo opaichagua jehasa asy” (Sant. 1:2). Upérõ haʼe oñeʼẽ umi mbaʼe ñanembosufrívare ñane imperfékto rupi, térã jaservi haguére Jehovápe. Por ehémplo, ñane imperfékto rupi sapyʼánte ñapensase ñandejehénte térã ñamombaʼeve peteĩ ñande rapichápe ha ñamboyke ótrope (Sant. 1:14; 2:1; 4:1, 2, 11). Hasy asy ningo ñandéve sapyʼánte Jehová ñandekorrehi jave, péro ndahaʼéi vaʼerã upe haguére japytátava ñañembyasy (Heb. 12:11).

Oiméramo japerde ñande priviléhio, jajepyʼamongeta vaʼerã noiméipa hína ikangy ñande jerovia, ha  ñañehaʼã jahechauka Jehovápe jahayhuha chupe. Ñapensa porã vaʼerã avei mbaʼérepa jaservi raʼe jaikóvo kómo ansiáno. Ikatu ñañeporandu: ¿Noiméi piko aipuru che priviléhio ajechauka hag̃uánte, térãpa añetehápe ahayhu Jehovápe? ¿Ahechakuaápa raʼe Jehová mbaʼeha pe kongregasión ha tekotevẽha oñeñangareko hese mborayhúpe? (Hech. 20:28-30.) Oĩ kuimbaʼe oservi vaʼekue kómo ansiáno ha upéi operde ipriviléhio. Upéicharõ jepe, osegi iñeʼẽrendu Jehovápe ha ohechauka Satanáspe ha enterovépe ohayhuha Ñandejárape ipyʼaite guive.

Rréi David opeka vaieterei vaʼekue Ñandejára renondépe, péro oñeperdona jey chupe ohendu rupi Jehová proféta oñemoñeʼẽ mbaretérõ guare chupe. Upéi haʼe heʼi: “Ovyʼa upe ojeheja reívape hembiapo vaikue ha umívagui oiko tesarái. Ovyʼa upe hovamokõiʼỹva, Ñandejára oheja reívape hembiapo vaikue” (Sal. 32:1, 2). David tuichaiterei omehora ojekorrehi rire, ha upe rire oñangareko porãve Ñandejára puévlore.

Pyʼỹinte ojehecha umi ermáno orrekupera jeýva ipriviléhio oñehaʼãveha oñangareko porãve hag̃ua pe kongregasión rehe. Peteĩ ermáno ohasa vaʼekue upe situasión, heʼi: “Koʼág̃a ikatu aipytyvõ porãve umi ermáno ojavývape”. Ótro ermáno katu heʼi: “Koʼág̃a amombaʼeve pe priviléhio arekóva aservi hag̃ua che ermanokuérape”.

Pe salmísta heʼi vaʼekue Jehová ‘ndoikomoʼãiha ohekýi ñandéve opa árare umi mbaʼe jajapo vai vaʼekue’ (Sal. 103:9, NM). Upévare, nañapensái vaʼerã Ñandejára arakaʼeve nokonfiaveimaha ñanderehe jaʼa haguére pekádope. Ricardo oservi vaʼekue heta áño kómo ansiáno kongregasiónpe, péro upéi ou operde ipriviléhio. Haʼe heʼi: “Añeñandu vaieterei vaʼekue ajavy haguére. Heta tiémpore apensa ndavaleiha mbaʼeverã ha upévare ndarrekuperavéi kuri che priviléhio. Akyhyje vaʼekue umi ermáno nokonfiavéirõ g̃uarã cherehe yma guaréicha. Péro che aipytyvõseterei che rapichakuérape, upéicha rupi añehaʼã ajapo estúdio vívliko, amokyreʼỹ ermanokuérape Salónpe ha apredika hendivekuéra. Upéva tuichaiterei chepytyvõ ajerovia jey hag̃ua chejehe, ha koʼág̃a aservi jeýma kómo ansiáno kongregasiónpe”.

Peteĩ ermáno opytáramo ipyʼaro operde haguére ipriviléhio, ijetuʼuvéta chupe oservi jey hag̃ua kómo  ansiáno. Iporãiteve ningo jasegi David ehémplo. Rréi Saúl opersegírõ guare chupe, haʼe okañýnte chugui ha orekóramo jepe oportunida oñevenga hag̃ua hese, ndojapói upéva (1 Sam. 24:4-7; 26:8-12). Ha oikuaárõ guare Saúl omano hague gerrahápe, hasẽ ha heʼi Saúl ha itaʼýra Jonatán ‘ojeguerohory ha ojehayhuha’ (2 Sam. 1:21-23, ÑÑB). Péicha David ohechauka ndopytái hague ipyʼaro umi mbaʼe ojejapo vaʼekuére hese.

Oimérõ nde repensa ojepeʼa reiete hague ndehegui nde priviléhio térã oĩ hague peteĩ malentendído, ani ndepyʼaro upe haguére. Por ehémplo, William oservi vaʼekue 30 áñore kómo ansiáno Gran Bretáñape, péro upéi operde ipriviléhio ha opyta ipyʼaro umi ansiánondi. ¿Mbaʼépa oipytyvõ chupe ohecha hag̃ua hendápe porãnte upe oiko vaʼekue hese? Haʼe heʼi: “Aleepaite pe lívro de Job ha upéva tuicha chepytyvõ. Ahechakuaa Jehová oipytyvõ hague Jóbpe operdona hag̃ua umi mbohapy kuimbaʼépe, ha apensa haʼe katuete chepytyvõtaha avei ajogueraha porã jey hag̃ua umi ansiáno ndive” (Job 42:7-9).

Oiméramo nde reheja raʼe nde priviléhio, iporãta repensami mbaʼérepa rejapo raʼe upéva. ¿Noiméipa ndejopyetereínte raʼe umi provléma reguerekóva? ¿Nderejúipa raʼe remotenondeve ótra kósa nde servísiogui? ¿Nemokangýpa rehechávo ótro ermáno ndojapoporãiha heta mbaʼe? Tahaʼe haʼeháicha, nemanduʼa vaʼerã reserviha tiémpope kómo ansiáno ikatu hague rejapo hetaitereive mbaʼe ne ermanokuéra rehehápe. Katuete umi diskúrso porãita rejapo vaʼekue, ne ehémplo ha umi visíta de pastoréo omokyreʼỹne raʼe chupekuéra ogueropuʼaka hag̃ua heta mbaʼe. Jehová avei oguerohorýne raʼe ohechávo mbaʼéichapa rembaʼapo kyreʼỹ vaʼekue ne ermanokuéra rehehápe, ha nde voi oiméne revyʼa rejapórõ guare upéicha (Prov. 27:11).

Jehová ningo hetaitereípema oipytyvõ ovyʼa jey hag̃ua ha ikatu hag̃uáicha oñehaʼã orrekupera ipriviléhio. Oiméramo nde reperde raʼe nde priviléhio, térã ndete voi reheja, iporãitereíta ‘reñehaʼãmbaitéramo reservi jey ansiánoramo’ (1 Tim. 3:1.) Pablo siémpre ojerure vaʼekue Ñandejárape ikatu hag̃uáicha umi kristiáno Colosasgua oikuaa porã Ñandejára rembipota. Péicha oikóta hikuái “Jehová oipotaháicha” ha haʼe oguerohorýta chupekuéra opa mbaʼépe (Col. 1:9, 10). Oiméramo reservi jeýma koʼág̃a kómo ansiáno katu, ejerurékena Jehovápe tanemombarete ha tanepytyvõ revyʼa ha ne pasiénsia hag̃ua. Koʼã ára pahápe ningo Jehová puévlo oikotevẽterei umi ansiáno oipytyvõ ha omombarete vaʼerãre chupekuéra. ¿Reipytyvõsépa péicha ne ermanokuérape?