1. ¿Mbaʼépa ñaikotevẽ opavave yvypóra, ha máva mávarepa ñañemoag̃ui upearã?

ÑANDE yvypóra ningo ndaikatúi jaiko ñaneaño rei. Ojeʼe voi mokõi tapicha ‘oñemoag̃uiha ojuehe ojokuaa porã ha ojoayhúramo’. Upéicha rupi opavavénte javyʼaiterei ñane hénte ha ñane amigokuérandi, ha jaikuaa haʼekuéra ñandeguerohory, ñanentende ha ñanemombaʼeha. Péro tekotevẽramo jepe ñañemoag̃ui ñande rapichakuérare, iñimportanteve jey hína ñañemoag̃ui ñande Apohare Ijojahaʼỹvare (Ecl. 12:1).

2. a) ¿Mbaʼépa Jehová opromete ñandéve? b) ¿Mbaʼérepa heta persóna ndoroviái upe promésa?

² Iñeʼẽ rupive, Jehová ñaneinvita jaiko hag̃ua iñamígoramo, ha opromete ñandéve ‘haʼe oñemoag̃uitaha’ ñanderehe ñande ñañemoag̃uíramo hese (Sant. 4:8). ¡Ajépa ñanembovyʼaite upéva! Upéicharõ jepe, heta persóna ndoroviái Ñandejára oñemoag̃uiséne hag̃ua hesekuéra. Opensa hikuái nomereseiha voi oñemoag̃ui hese, térã Ñandejára oĩha mombyryeterei chuguikuéra. Péro ¿ikatu piko añetehápe jaiko Jehová amígoramo?

3. ¿Ikatúpa jaikuaa porã Jehovápe?

³ Ñaime vaʼerã segúro ikatuha jaikuaa porã Jehovápe. Haʼe ningo “noĩri voi mombyry” umi hese oñemoag̃uisévagui  (elee Hechos 17:26, 27 ha Salmo 145:18). Ñaneimperféktoramo jepe, Jehová oipota ñañemoag̃ui hese ha jaiko iñamígoramo (Is. 41:8; 55:6). Pe salmísta ohechakuaa Ñandejára upeichaha, upévare ohai: “Nde ningo rehendu pe ñemboʼe, upévagui nerendápe oupa vaʼerã mayma yvy arigua. Ovyʼaite vaʼerã upe nde reiporavóva ha oñemoag̃uikuaáva nerendápe” (Sal. 65:2, 4, ÑÑB). La Biblia omombeʼu rréi Asá oñemoag̃ui hague Jehováre. Ñahesaʼỹijomína iñehémplo ha jahecha mbaʼéichapa Ñandejára otrata chupe. *

4. ¿Mbaʼe ehémplopa omoĩ rréi Asá umi Judaguápe?

⁴ Asá oñepyrũrõ guare ogoverna Judá, henyhẽte vaʼekue umi omombaʼéva taʼanga ha umi ojeprostituíva pe témplope. Péro pe rréi odefende Jehová adorasión ha oipeʼaite koʼã mokõi mbaʼe ivaietéva (1 Rey. 15:9-13). Upéicha rupi Asá ikatu kuri oñemoñeʼẽ pe puévlope ha heʼi chupekuéra “oheka hag̃ua Jehovápe, ijypykuéra Járape, ha osegi hag̃ua pe léi ha okumpli hag̃ua pe mandamiénto”. Ñandejára ovendesi Asá goviérno ha 10 áñore pe tetã oiko pyʼaguapýpe. Asá ohechakuaa oikoha hikuái trankílo Jehová rupínte. Upévare heʼi pe puévlope: “Ñande jaheka kuri Ñandejára Jehovápe, jaheka kuri, ha haʼe omeʼẽ ñandéve pyʼaguapy” (2 Crón. 14:1-7, NM). Jahechamína mbaʼépa oiko upéi.

5. a) ¿Mbaʼe situasiónpa ombohovái vaʼekue Asá? b) ¿Mbaʼépa oiko Asá ojerovia rupi Jehováre?

⁵ Ñapensamína ñaimeha Asá lugárpe. Peteĩ Etiopiagua ruvicha hérava Zérah, ou oñorairõ hag̃uáicha Judá kóntrape ha ogueru 1.000.000 soldádo ha 300 kárro de gérra (2 Crón. 14:8-10). Nde katu ereko 580.000 soldádonte. ¿Mbaʼépa rejapóne rehechávo pe ehérsito oúva haimeteha el dóvle hetave nde ehérsitogui? Katuete reikuaaséta mbaʼérepa Ñandejára oheja chupekuéra ou pene kóntrape. ¿Rejeroviátapa ndejehe, térãpa rejeroviáta Jehováre? Asá ohechauka vaʼekue oĩ porãha Ñandejára ndive ha ojeroviaha hese. Upévare ojerure chupe ipyʼaite guive: “Orepytyvõmína Jehová, ore Jára. Ore ningo rojerovia nderehe, ha nde rérape rosẽ koʼã hénte kóntrape. Jehová, nde hína ore Jára. Aníkena reheja pe yvypóra ipuʼaka nderehe”. ¿Mbaʼéichapa Ñandejára ombohovái Asápe? La Biblia heʼi ‘Jehová ogana hague umi Etiopiaguápe’. ¡Ni peteĩ ndojesalvái ijapyteguikuéra! (2 Crón. 14:11-13, NM.)

6. ¿Mbaʼépepa ñahaʼanga vaʼerã Asápe?

⁶ ¿Mbaʼérepa Asá ojerovia Jehová katuete ogia ha oprotehetaha chupe? La Biblia heʼi “Asá hembiapo porã [hague] Ñandejára resa renondépe” ha “ndaipyʼamokõiri Jehová ndive” (1 Rey. 15:11, 14, NM). Ñande avei jaservi vaʼerã Ñandejárape ñande pyʼaite guive. Péichamante ikatúta ñaime porã hendive koʼág̃a ha opa árare. Jaagradese vaʼerã Jehovápe haʼe voi ñandegueru haguére ha ñandereko iñamígoramo. Haʼe ojapo mokõi mbaʼe iñimportánteva ñandegueru hag̃ua ijykére. Jahechamína umíva.

7. a) ¿Mbaʼe mbaʼépa Jehová ojapo ñandegueru hag̃ua ijykére? b) ¿Mbaʼépa hína pe pruéva tuichavéva ohechaukáva Jehová ñanderayhuha?

⁷ Jehová ohechauka ñanderayhuha ojapóvo ko Yvy porãite ha omoĩvo ñandéve koʼẽ koʼẽre opa mbaʼe ñaikotevẽva jasegi hag̃ua jaikove (Hech. 17:28; Apoc. 4:11). Ha iñimportantevéva katu, omeʼẽ ñandéve umi mbaʼe ñanepytyvõva ñaime porã hag̃ua hendive (Luc. 12:42). Ñandejára avei oasegura ñanerenduha ñañemboʼe jave  chupe (1 Juan 5:14). Ha iporãveha katu, haʼe ñandegueru ijykére Jesús sakrifísio rupive. Upéva hína pe pruéva tuichavéva ohechaukáva Jehová ñanderayhuha. Upéicha rupi ñande avei ñañemoag̃uise hese (elee 1 Juan 4:9, 10, 19). Ñandejára ombou Itaʼýra ko yvy ape ári ñandepeʼa hag̃ua pekádo ha ñemano poguýgui (Juan 3:16).

8, 9. ¿Mbaʼéichapa Jesús rupive oñekumpli hína Jehová rembipota?

⁸ Hetaiterei persóna oiko vaʼekue Cristo ou mboyve jepe oñevenefisia Jesús sakrifísio repykuégui. ¿Mbaʼéicha rupípa oiko upéva? Ñandejára oprofetisa ypy guive outaha peteĩ osalvátava yvypórape, chupe g̃uarã pe promésa oñekumplíma, oikuaa porãgui hembipota katuete oikotaha (Gén. 3:15). Ohasa rire heta síglo, apóstol Pablo oagradese Ñandejárape “Cristo Jesús opaga haguére osalva hag̃ua” yvyporakuérape. Upéi heʼi avei Jehová “operdonáma [hague] umi pekádo ojejapo vaʼekue yma” (Rom. 3:21-26). Jahechaháicha, Jesús reheʼỹ ndaikatumoʼãi kuri ñañemoag̃ui Ñandejárare.

⁹ Jesús rupive umi persóna hekomirĩva ikatu oikuaa Jehovápe ha avei oiko iñamígoramo. La Biblia heʼi voi: “Ñandejára katu ohechauka ñanderayhuha, Cristo omanóvo ñanderehehápe ñande pekadór aja gueteri” (Rom. 5:6-8). Jehová ha Jesús ndojapói pe sakrifísio ñande ñamerese rupi, síno ñanderayhueterei haguére. Jesús omyesakã upéva heʼívo: “Avave ndaikatúi ou che rendápe, che Ru chembou vaʼekue ndoguerúiramo chupe”. Upéi ótro día heʼi jey: “Che rupive añoite ikatu oñeg̃uahẽ pe Túva rendápe” (Juan 6:44; 14:6). Ñandejára ñandegueru ijykére Jesús rupive, ha upearã oipuru ijespíritu sánto. Avei ijespíritu rupive ñanepytyvõ akóinte ñaime porã hag̃ua hendive, ha péicha ikatúta jahupyty jeikove opaveʼỹva (elee Judas 20, 21). Péro oĩ gueteri ambue mbaʼe ñanepytyvõva ñañemoag̃ui hag̃ua Jehováre.

10. ¿Mbaʼéichapa la Biblia ñanepytyvõ ñañemoag̃ui hag̃ua Jehováre?

¹⁰ Ko artíkulope ojepurúma heta téxto oĩva 14 lívro vívlikope. Ndajarekóirire la Biblia, ndajaikuaái vaʼerãmoʼã ikatuha ñañemoag̃ui ñande Apoharére. Nañantendemoʼãi kuri mbaʼépa ikatu jahupyty Cristo sakrifísio rupive, ni ndajaikuaamoʼãi Jesús rupive ikatuha ñañemoag̃ui Jehováre. Ñandejára ningo oskrivika la Biblia ijespíritu rupive, ha pype oñemombeʼu mbaʼeichagua persónapa haʼe ha mbaʼépa oipota yvypórape g̃uarã. Por ehémplo, Jehová omombeʼu Moiséspe haʼeha “peteĩ Dios oporombyasýva, hasýva ipochy hag̃ua, oporohayhu añetéva ha nopyrũiva iñeʼẽre, ipyʼaporãva enterovéndi, operdonáva ojavývape ha hembiapo vaívape” (Éx. 34:6, 7, NM). ¡Ajépa igustoite ñaime peichagua persóna ykére! Ñandejára oikuaa jastudia meméramo Iñeʼẽ ha ñaaprendevévo chugui, ikatutaha jaiko jahecharõguáicha chupe ha ñañemoag̃uivetaha hese.

11. ¿Mbaʼérepa ñañehaʼã vaʼerã jaikuaa mbaʼeichagua persónapa Jehová? (Ehecha pe taʼanga oĩva iñepyrũme.)

¹¹ Pe lívro Acerquémonos a Jehová omyesakã mbaʼépa jajapo vaʼerã ikatu hag̃uáicha jaiko Ñandejára amígoramo. Iñepyrũmbýpe heʼi: “Jaiko hag̃ua peteĩ persóna amígoramo, tekotevẽ jaikuaa porã chupe. Péicha heta mbaʼe jaguerohory ha ñamombaʼéta hese. Upéicha avei, ikatu hag̃uáicha jaikuaa mbaʼeichagua persónapa Jehová ha mbaʼéichapa jaiko vaʼerã haʼe ñandeguerohory hag̃ua, tekotevẽ jastudia la Biblia”. ¡Ajépa imbaʼeporãite Ñandejára ohaika haguére Iñeʼẽ ñantende hag̃uáicha!

12. ¿Mbaʼérepa Jehová oipuru yvypórape oskrivika hag̃ua la Biblia?

 ¹² Jehová ikatu kuri oipuru umi ánhelpe ohaika hag̃ua Iñeʼẽ. Jaikuaaháicha, haʼekuéra oñeinteresaiterei avei ñanderehe ha umi mbaʼe jajapóvare (1 Ped. 1:12). Katuete ningo haʼekuéra ikatútante avei ombohasa Ñandejára mensáhe yvyporakuérape. Péro, ¿opensápa hikuái ñande ñapensaháicha? Haʼekuéra noñandúi umi mbaʼe ñande ñañandúva, noikotevẽi umi mbaʼe ñande ñaikotevẽva, ni naikangýi ñandéicha. Jehová oikuaa porã umi ánhel idiferentetereiha ñandehegui. Upévare oskrivika la Biblia kuimbaʼekuérape, ha ombohasa ñandéve Iñeʼẽ opoko hag̃uáicha ñane korasõre. Ajépa ñantende porã mbaʼéichapa oñeñandu umi eskritór vívliko ha umi ótro tapicha haʼekuéra oñeʼẽha. Añetehápe ñantende porã haʼekuéra omombeʼúvo oñedesepsiona hague, ipyʼamokõi, okyhyje térã ojavy hague. Ha jaikuaa avei mbaʼéichapa oñeñandu hikuái ovyʼa ha osẽ porãrõ guare. Entéro umi kuimbaʼe ohai vaʼekue la Biblia, ijapytepekuéra proféta Elías, “haʼe vaʼekue [...] yvypóra ñandeichaguánte” (Sant. 5:17).

13. ¿Mbaʼéichapa reñeñandu releévo Jonás orasión?

¹³ Epensamíntena mbaʼéichapa oiméne oñeñandu Jonás osẽrõ guare oho ótro ládo ndojaposéigui Jehová omandáva chupe. ¿Ikatúne piko peteĩ ánhel ontende ha omombeʼu mbaʼéichapa pe proféta oñeñandu? Nahániri. Haʼetépe ningo Jehová oipuru jey Jonáspe oskrivi hag̃ua umi mbaʼe oiko vaʼekue hese. Por ehémplo, oĩrõ guare pe pira ryepýpe, haʼe ojapo peteĩ orasión ha heʼi: “Añandúrõ guare amanotaha, Jehovárente chemanduʼa” (Jon. 1:3, 10; 2:1-9, NM).

14. ¿Mbaʼérepa ñande ikatu ñantende mbaʼéichapa Isaías oñeñandu vaʼekue?

¹⁴ Ñapensamína avei Isaías ohai vaʼekue  rehe. Haʼe ohecha Ñandejára glória peteĩ visión rupive, ha opensa Jehová rovairã ndahaʼeiha mbaʼevete haʼe rupi peteĩ pekadór. Upévare heʼi: “¡Ikatu ningo amano ahecha haguére pe Rréi, Jehová Ipuʼakapávape! ¡Che juru ningo naipotĩri, ha aiko peteĩ puévlo naipotĩriva apytépe!” (Is. 6:5, NM). Ajépa peteĩ ánhel ndeʼirichéne koʼã mbaʼe. Péro Isaías ikatu kuri heʼi péicha. Ha ñande ñaneimperfékto rupi haʼéicha, ñantende porã mbaʼéichapa oñeñandu rakaʼe.

15, 16. a) ¿Mbaʼérepa ñantende porã ambue ñande rapichakuérape? Emoĩ peteĩ ehémplo. b) ¿Mbaʼépa ñanepytyvõta ñañemoag̃uive hag̃ua Jehováre?

¹⁵ Jacob heʼi vaʼekue “nomereseiha” ohupyty umi mbaʼe porãite, ha Pedro katu heʼi haʼeha peteĩ “pekadór”. Peteĩ ánhel ni mbaʼevéicharõ ndeʼimoʼãi koʼã mbaʼe (Gén. 32:10, NM; Luc. 5:8). ¿Okyhyjénepa peteĩ ánhel Jesús disipulokuéraicha? ¿Tekotevẽnepa oñembopyʼaguasu opredika hag̃ua pe marandu porã ojepersegíramo jepe chupe, ojapo haguéicha Pablo ha umi ótro kristiáno? (Juan 6:19; 1 Tes. 2:2.) Nahániri. Umi ánhel ningo perfékto opa mbaʼépe ha ndahaʼéi yvypóraicha. Upévare, ambue ñande rapicha omombeʼu jave umi mbaʼe oñandúva, pyaʼe voi ñantende chupe. Jaleévo Ñandejára Ñeʼẽ, ikatu ‘javyʼa umi ovyʼávandi ha ñanerasẽ umi hasẽvandi’ (Rom. 12:15).

¹⁶ La Biblia omombeʼu Jehová ipasiénsia ha ohayhu hague isiervokuéra iñeʼẽrendúvape. Ha iñimperféktoramo jepe hikuái, haʼe oñemoag̃ui hesekuéra. Jajepyʼamongetáramo koʼã mbaʼére, katuete ñaaprendéta heta mbaʼe Ñandejáragui. Péicha jaikuaa porãvéta Jehovápe, jahayhúta chupe ñande pyʼaite guive, ha ñañandúta ñañemoag̃uiveha hese (elee Salmo 25:14).

17. a) ¿Mbaʼe konséhopa Azarías omeʼẽ Asápe? b) ¿Mbaʼérõ guarépa Asá ndosegíri pe konsého, ha mbaʼépa oiko upe haguére?

¹⁷ Rréi Asá ogana rire pe ehérsito Etiopiaguápe, proféta Azarías omeʼẽ chupe ha ipuévlope peteĩ konsého neporãva: “Jehová oĩ penendive peẽ peime aja hendive. Pehekárõ chupe, katuete pejuhúta hese; péro pehejárõ chupe, haʼe penderejáta” (2 Crón. 15:1, 2, NM). Ñambyasýramo jepe, ohasávo pe tiémpo, Asá nopenavéi ko konséhore. Upéi, pe rréino Israelgua de 10 trívu oamenasárõ guare Judá, Asá ojerure Síriape oipytyvõ hag̃ua chupe. Ojerure rangue Jehovápe toipytyvõ jey chupe, oñeuni peteĩ tetã ndoadoráivandi Jehovápe. Upévare Ñandejára heʼi chupe: “Koʼã mbaʼe rejapóva itavýva rembiapo; ko ára guive reñorairõ vaʼerã remano meve” (2 Crón. 16:1-9, ÑÑB). Ha upeichaite oiko Asáre. ¿Mbaʼépa ñanemboʼe ko ehémplo?

18, 19. a) ¿Mbaʼépa jajapo vaʼerã oiméramo ñañemomombyry hína Jehovágui? b) ¿Mbaʼéichapa ikatu ñañemoag̃ui Ñandejárare?

¹⁸ Aníkena arakaʼeve jaheja Jehovápe. Sapyʼa rei oiméramo ñañemomombyry hína chugui, jasegíkena pe konsého Oseas omeʼẽ vaʼekue: “Reju jey vaʼerã Ñandejára rendápe, ehechauka nderekojoja ha rehayhuha chupe nde pyʼaite guive, ha resegi vaʼerã rejerovia nde Járare” (Ose. 12:6, NM). Jajepyʼamongeta memékena Jesús sakrifísiore ha ñahesaʼỹijo porã la Biblia. Upéicha ikatúta ñañemoag̃uive koʼẽ koʼẽre Jehováre (elee Deuteronomio 13:4).

¹⁹ Pe salmísta oskrivi: “Ou porãiterei chéve añemoag̃ui Ñandejárare” (Sal. 73:28, NM). Upévare, jasegíkena ñaaprendeve Jehovágui. Péicha jatopavéta heta mbaʼe ñanemomýiva jahayhu hag̃ua chupe. Ñañemoag̃uíramo hese, haʼe avei oñemoag̃uíta ñanderehe koʼág̃a ha opa árare.