1, 2. ¿Mbaʼérepa tekotevẽ vaʼekue ojeprotehe pe kuña desendénsiape?

PE PRIMERA profesía oĩva la Bíbliape tuichaiterei ñanepytyvõ ñantende hag̃ua mbaʼéichapa oñekumplíta Jehová rembipota. Hardín de Edénpe, Jehová opromete vaʼekue mbaʼépa ojapóta. Haʼe heʼi Satanáspe: “Romoingovaíta pe kuña ndive, ha ne desendénsia amoingo vaíta pe kuña desendénsia ndive”. ¿Mbaʼeichaite pevépa oiko vaíta hikuái? Jehová heʼi Satanás oisuʼutaha “ipytápe” pe kuña desendénsiape, ha pe kuña desendénsia omonguʼitaha Satanás “akã” (Gén. 3:15, NM). Jahechaháicha, Satanás ha pe kuña oñoenemigoite hína, upévare haʼe oñehaʼãmbaitéta ohundi hag̃ua chugui idesendénsia.

² Ndareíri pe salmísta heʼi Jehovápe: “Ne enemigokuéra ningo opuʼãmba nderehe, umi ndaijaʼéiva nderehe oñemombaʼeguasu. Haʼekuéra ivaleterei otrama hag̃ua ñemiháme umi mbaʼe vai ojapótava nde puévlore, oplanea hikuái mbaʼe vai umi rehayhúva kóntrape. Haʼekuéra heʼi: ‘Peju jaha ñahundi umi isrraelítape, anivéma hag̃ua avave imanduʼa Israel rehe’” (Sal. 83:2-4, NM). Satanás ojapo opa ikatúva omongyʼa ha ohundi hag̃ua Abrahán familiarépe, oikuaágui upégui outaha pe kuña desendénsia. Péro Jehová ojevale umi pákto legál rehe ikatu hag̃uáicha oprotehe pe  desendénsia ha oasegura hag̃ua pe Rréino Mesiániko okumplitaha hembipota.

3, 4. a) ¿Arakaʼépa ojejapo pe pákto Léi rupive b) ¿Mbaʼépa oñekompromete ojapotaha pe tetã Israel? c) ¿Maʼerãpa oservi pe pákto ojejapo vaʼekue Léi rupive?

³ Abrahán, Isaac ha Jacob familiarekuéra hetavévo ohóvo, Jehová ojapo chuguikuéra peteĩ tetã, ha upéva hína Israel yma guare. Upéi, Moisés rupive Jehová ojapo peteĩ pákto upe tetã ndive. Jehová omeʼẽ chupekuéra Iléi ha haʼekuéra oñekompromete okumplitaha. La Biblia omombeʼu mbaʼéichapa ojapo hikuái upéva: “Moisés [...] ojagarra Ñandejára Léi ha olee pe puévlope, ha haʼekuéra heʼi: ‘Rojapóta opa mbaʼe Jehová heʼíva, ha oreñeʼẽrendúta chupe’. Upémarõ Moisés ojagarra [umi tóro oñekuaveʼẽ vaʼekue ruguy] ha ohypýi umi héntepe ha heʼi: ‘Kóva haʼe pe tuguy orrepresentáva pe pákto Jehová ojapóva penendive ojeʼeháicha ko Léipe’” (Éx. 24:3-8, NM).

⁴ Jehová ojapo vaʼekue Israel ndive pe pákto Léi rupive Mónte Sinaípe, áño 1513-pe a.C. Upe kompromíso rupive Jehová oiporavo Israélpe imbaʼerã ha oaparta chupekuéra umi ótro tetãgui. Upe guive Jehová ogoverna chupekuéra, omeʼẽ Iléi ha oiko Huésramo pe puévlope g̃uarã (Is. 33:22). Umi mbaʼe Israel ohasa vaʼekue ohechauka mbaʼépa oiko ojejapóramo Jehová heʼíva, ha avei mbaʼépa oiko ndojejapóiramo. Por ehémplo, pe Léi oproivi umi isrraelítagui omenda umi ndoadoráivare Jehovápe ha omombaʼeguasúva umi dios fálsope. ¿Mbaʼérepa oproivi chuguikuéra upéva? Ani hag̃ua oñemongyʼa Abrahán familiarépe, pórke chugui ou vaʼerã pe desendénsia (Éx. 20:4-6; 34:12-16).

5. a) ¿Mbaʼe oportunidápa omeʼẽ umi isrraelítape pe pákto ojejapo vaʼekue Léi rupive? b) ¿Mbaʼérepa Jehová orrechasa Israélpe?

⁵ Ojejapo rire avei pe pákto Léi rupive, oñenombra umi saserdóte oservi vaʼerã Israélpe, ha upéva orrepresenta kuri oĩtaha peteĩ saserdósio tuichavéva (Heb. 7:11; 10:1). Péicha pe Léi omeʼẽ oportunida umi isrraelítape oiko hag̃ua chuguikuéra peteĩ tetã oĩháme umi “rréi oservíva avei saserdóteramo”, ha upearã haʼekuéra iñeʼẽrendu vaʼerã Jehovápe (elee Éxodo 19:5, 6). Péro ñambyasýramo jepe, umi isrraelíta nokumplíri ipárte. Haʼekuéra orrechasa kuri pe Mesíaspe, pe desendénsia prinsipál oúva Abrahángui. Upévare Jehová upéi orrechasa avei Israélpe.

6. ¿Maʼerãpa oservi vaʼekue pe Léi?

⁶ Umi Israelgua ou rupi naiñeʼẽrenduvéi Ñandejárape, ndaikatuvéima oiko chuguikuéra peteĩ tetã orekóva “rréi oservíva avei saserdóteramo”. ¿Heʼisépa upéva pe Léi ndaideprovéchoi hague? Nahániri. Jaikuaaháicha, Jehová omeʼẽ vaʼekue pe Léi ikatu hag̃uáicha oprotehe pe desendénsia, ha oipytyvõ hag̃ua umi héntepe oikuaa hag̃ua mávapa pe Mesías. Ha jaʼekuaa  ojehupyty hague upéva, pórke Cristo oúrõ guare, heta oĩ vaʼekue ohechakuaáva haʼeha pe Mesías. Upévare la Biblia heʼi: “Cristo rupive ningo opa pe Léi” (Rom. 10:4). Péro ¿mbaʼeichagua tetãmepa oñemeʼẽ upe rire oportunida oreko hag̃ua rréi oservíva avei saserdóteramo? Jehová ojapo jey peteĩ kontráto legál oforma hag̃ua peteĩ tetã pyahu.

7. ¿Mbaʼépa heʼi vaʼekue Jehová proféta Jeremías rupive?

⁷ Heta tiémpo oñeanula mboyve pe pákto ojejapo vaʼekue Léi rupive, Jehová heʼíma vaʼekue voi ojapotaha tetã Israel ndive “peteĩ pákto pyahu” (elee Jeremías 31:31-33). Ko pákto pyahu idiferénte pe pákto ojejapo vaʼekuégui Léi rupive. Koʼág̃a natekotevẽmoʼãvéima osakrifika hikuái animál oñeperdona hag̃ua chupekuéra ipekádo. ¿Mbaʼéicha rupípa upéva?

8, 9. a) ¿Mbaʼépa ojehupyty Jesús ruguy rupive? b) ¿Mbaʼe oportunidápa oñemeʼẽ umi oĩvape pe pákto pyahúpe? (Ehecha pe taʼanga oĩva iñepyrũme.)

⁸ Heta tiémpo upe rire Jesús omoñepyrũ vaʼekue pe Séna del Señór el 14 de nisán, áño 33-pe. Upérõ haʼe ojagarra pe kópa ha heʼi umi 11 apóstol iñeʼẽrendúvape: “Ko kópa orrepresenta pe kompromíso pyahu ojejapóva che ruguy rupive, oñeñohẽtava penderehehápe” (Luc. 22:20). Mateo avei omombeʼu mbaʼépa heʼi Jesús pe víno rehe: “Kóva orrepresenta hína che ‘ruguy pe kompromíso pyahúpe’ g̃uarã, oñeñohẽtava oñeperdona hag̃ua hetápe ipekádo” (Mat. 26:27, 28).

⁹ Jesús ruguy rupive ojejapo vaʼekue pe pákto pyahu. Haʼe omano rupi ñanderehehápe oñeperdona avei ñande pekadokuéra. Jesús noñevenefisiái kuri upe kompromíso pyahúgui. Haʼe ningo perfékto vaʼekue ha ndahaʼéi pekadór ñandeichagua oikotevẽva oñeperdona chupe ipekádo. Péro Ñandejára oasepta rupi Jesús sakrifísio, tuichaiterei ovenefisia Adán familiarekuérape. Heta yvypóra iñeʼẽrendúvape Jehová oiporavóta avei espíritu sánto rupive ha oadoptáta chupekuéra “itaʼýraramo” (elee Romanos 8:14-17). Ñandejárape g̃uarã haʼekuéra ipotĩtama ipekádogui, ha ojoguáta hikuái Ñandejára Raʼy Jesucrístope. Jehová omeʼẽta avei chupekuéra “pe erénsia haʼe omeʼẽva Crístope”. Haʼekuéra orrekuperáta pe priviléhio operde vaʼekue tetã Israel: oikóta chuguikuéra rréi ha saserdóte. Chupekuéra apóstol Pedro heʼi kuri: “Peẽ haʼe hína ‘peteĩ trívu ojeporavopyre, saserdotekuéra oservíva rréiramo, peteĩ tetã marangatu, peteĩ puévlo Ñandejára mbaʼerã, ikatu hag̃uáicha pemombeʼu oparupiete umi mbaʼe porã’ ojapo vaʼekue upe penerenóiva pytũmbýgui ha pendeguerúva imbaʼerendy ijojahaʼỹvape” (1 Ped. 2:9). ¡Ajépa iñimportantete pe pákto pyahu! Upéva rupive Jesús disipulokuéragui oiko Abrahán desendénsia, pe párte secundaria.

10. a) ¿Mbaʼépa tekotevẽ vaʼekue oiko raẽ ikatu hag̃uáicha oñekumpli pe pákto pyahu? b) ¿Arakaʼépa oñekumpli pe pákto pyahu?

¹⁰ ¿Oñepyrũpa rakaʼe oñekumpli pe pákto pyahu Jesús oñeʼẽrõ guare hese pe última sénape idisipulokuérandi? Nahániri. Upe kompromíso oñepyrũ hag̃ua oñekumpli, oñeñohẽ raẽ vaʼerã Jesús ruguy, ha upe sakrifísio repykue oñepresenta vaʼerã Jehovápe yvágape. Ha ndahaʼéi upéva añónte, ojeporavo vaʼerã avei espíritu sánto rupive umi ohupytýtavape pe ‘erénsia oñemeʼẽva Crístope’. Upéicharõ, pe pákto pyahu oñepyrũ oñekumpli Pentekostés áño 33-pe, Jesús disipulokuéra iñeʼẽrendúva ojeporavórõ guare espíritu sánto rupive.

11. a) ¿Mbaʼéicha rupípa pe pákto pyahu rupive Ñandejára oasepta umi ndahaʼéivape hudío? b) ¿Mboy persónapa oike pe kompromíso pyahúpe?

 ¹¹ Jeremías rupive Jehová heʼi vaʼekue ojapotaha peteĩ pákto pyahu Israel ndive, péro upéva ndeʼiséi upe guive “ndovaleveimaha” pe kompromíso ojejapo vaʼekue Léi rupive. Upe kompromíso osegíta ideprovécho oñepyrũ peve oñekumpli pe pákto pyahu (Heb. 8:13). Upépe ae Ñandejára ikatútama oasepta umi ndahaʼéivape hudío ha noñesirkunsidáivape. ¿Mbaʼéicha rupípa? Pórke haʼekuéra ikatúma “oñesirkunsida ipyʼapýpe espíritu rupive, ndahaʼéi pe Léi rupive” (Rom. 2:29). Pe pákto pyahu rupive Jehová omoĩta Iléi “iñakãmekuéra ha [...] ikorasõme” (Heb. 8:10). ¿Mboy persónapa oike pe pákto pyahúpe? Oike 144.000. Chuguikuéra oikóta pe tetã pyahu, “Israel Ñandejára mbaʼéva” térã Israel espirituál (Gál. 6:16; Apoc. 14:1, 4).

12. ¿Mbaʼépepa ojojogua pe kompromíso ojejapo vaʼekue Léi rupive ha pe pákto pyahu?

¹² ¿Mbaʼépepa ojojogua koʼã pákto? Pe kompromíso ojejapo vaʼekue Léi rupive, Jehová ojapo kuri umi Israelgua ndive. Pe pákto pyahu katu Jehová ojapo Israel espirituál ndive. Ojapo hag̃ua pe kompromíso Israelgua ndive, Jehová ojevale Moisés rehe, ha ojapo hag̃ua pe Israel espirituál ndive katu ojevale Jesús rehe. Ojejapo hag̃ua pe kompromíso pe Léi rupive oñeñohẽ kuri animál ruguy, ha ojejapo hag̃ua pe pákto pyahu katu oñeñohẽ Jesús ruguy. Pe Léi poguýpe, Moisés omoakã vaʼekue umi Israelguápe, ha pe tetã pyahúpe omoakã Jesús, odirihíva hína pe kongregasión (Efes. 1:22).

13, 14. a) ¿Maʼerãpa ojejapo pe pákto pyahu? b) ¿Mbaʼépa oñekotevẽ ikatu hag̃uáicha pe Israel espirituál ogoverna Cristo ndive yvágape?

¹³ Pe pákto pyahu rupive oñeforma peteĩ tetã pyahu oĩháme kristiáno ikatútava ogoverna ha oservi saserdóteramo pe Rréino yvagapeguápe. Ko tetã pyahu haʼe hína pe párte secundaria Abrahán desendénsiagui (Gál. 3:29). Upéicharõ, ko pákto pyahu rupive oñekumplipaitéta pe kompromíso ojejapo vaʼekue Abrahán ndive.

¹⁴ Jahechaháicha, pe pákto pyahu rupive oñeforma pe Israel espirituál ha oñemeʼẽ oportunida umi unhídope ohupyty hag̃ua avei ‘pe erénsia oñemeʼẽva Crístope’. Péro oñekotevẽ jey ótro kompromíso legál ikatu hag̃uáicha umi unhídogui oiko rréi ha saserdóte Cristo ndive yvágape.

15. ¿Mbaʼeichagua páktopa Jesús ojapo ijapostolkuéra iñeʼẽrendúvandi?

¹⁵ Jesús omoñepyrũ rire pe Séna del Señór, ojapo peteĩ kompromíso umi 11 apóstol iñeʼẽrendúva ndive. Upe kompromísope oñehenói pákto del Rréino (elee Lucas 22:28-30). Umi ótro páktope Jehová voi oñekompromete kuri, péro ko páktope oñekompromete Jesús ha idisipulokuéra unhídonte. Amalisia Jesús heʼívo “che Túva ojapo haguéicha chendive peteĩ kompromíso agoverna hag̃ua Irréinope”, oñeʼẽ hína pe pákto Jehová ojapo vaʼekuére hendive haʼe hag̃ua “peteĩ saserdóte haʼe haguéicha avei Melquisedec [...] opa ára g̃uarã” (Heb. 5:5, 6).

16. ¿Mbaʼépa ojehupyty pe pákto del Rréino rupive?

¹⁶ Umi 11 apóstol siémpre iñeʼẽrendu vaʼekue ha oĩ Jesús ykére ohasárõ guare umi mbaʼe ijetuʼuetéva. Pe pákto Jesús ojapo vaʼekue hendivekuéra ogoverna hag̃ua, ohechauka chupekuéra oĩtaha avei hikuái ijykére yvágape. Upépe haʼekuéra oguapýta avei peteĩ trónope ogoverna ha oservi hag̃ua saserdóteramo. Péro ndahaʼéi umi 11 apóstol añónte orekótava upe priviléhio. Peteĩ visión rupive Jesús ojaparese apóstol Juánpe ha heʼi: “Pe oganávape, ameʼẽta permíso oguapy hag̃ua chendive che trónope, che agana haguéicha avei ha aguapy che Túvandi itrónope” (Apoc. 3:21). Upéicharõ, pe pákto del Rréinope oike avei umi 144.000  kristiáno unhído (Apoc. 5:9, 10; 7:4). Upe pákto rupive oñemeʼẽ avei chupekuéra derécho legál ogoverna hag̃ua Jesús ndive yvágape. Haʼete hikuái peteĩ nóvia omendáva peteĩ rréire, ha omenda rire orekóma avei derécho ogoverna hag̃ua pe rréi ndive. La Bíbliape, umi kristiáno unhídope oñehenói voi Cristo “nóvia”, ha oñekompara chupekuéra “peteĩ mitãkuña pyahu” hekopotĩvare, oñekomprometéva hendive omenda hag̃ua (Apoc. 19:7, 8; 21:9; 2 Cor. 11:2).

17, 18. a) Emyesakã mbyky mimi umi seis pákto ñahesaʼỹijo vaʼekue. b) ¿Mbaʼérepa ikatu jajerovia ñande pyʼaite guive Ñandejára Rréinore?

¹⁷ Umi pákto ñahesaʼỹijo vaʼekue koʼã mokõi artíkulope, ñanemboʼe hetaiterei mbaʼe iñimportantetereíva pe Rréinogui (ehecha pe rrekuádro “Mbaʼéichapa Ñandejára okumplíta hembipota”, oĩva pe artíkulo ohasa vaʼekuépe). Koʼã pákto omoĩ peteĩ fundaménto legál ikatu hag̃uáicha Ñandejára Rréino ogoverna. Upévare ikatu jajerovia ñande pyʼaite guive pe Rréino Mesiánikore. Ha upe goviérno rupive Jehová okumplíta hembipota ko yvy ha yvyporakuérape g̃uarã (Apoc. 11:15).

¹⁸ Upéicharamo, jajeroviákena ñande pyʼaite guive umi mbaʼe porãita ojehupytýtavare upe goviérno rupive ha ndopamoʼãiva arakaʼeve. Ñandejára Rréino añoite osolusionambaitéta opa ára g̃uarã umi provléma oĩva koʼág̃arupi. Upévare, ¡jajapókena ikatúva guive ñamombeʼu hag̃ua enterovépe ko notísia porãite! (Mat. 24:14.)