1. ¿Mbaʼéichapa ñanepytyvõta ñahesaʼỹijóramo lívro de Levítico?

JEHOVÁ ningo oipota isiervokuéra hekomarangatu. Upévare la Bíbliape oñeñeʼẽ heta hendápe pe santidáre, péro prinsipalménte lívro de Levíticope. Ñahesaʼỹijóramo ko lívro, tuicha ñanepytyvõta ñantende porã hag̃ua mbaʼépa jajapo vaʼerã ikatu hag̃uáicha ñanderekomarangatu Jehová renondépe.

2. ¿Mbaʼépa jaʼekuaa lívro de Levíticore?

² Moisés ohai vaʼekue pe lívro de Levítico, haʼéva avei ‘Ñandejára Ñeʼẽ’. Ko lívro ningo umi ótro lívro vívlikoicha ideprovechoiterei ñaporomboʼe hag̃ua (2 Tim. 3:16). Káda kapítulope jajuhu 10 vése rupi Jehová réra, ha ñahesaʼỹijóvo ko lívro ñanemombaretéta ani hag̃ua jajapo mbaʼeve ikatu vaʼerã omongyʼa upe téra porãite (Lev. 22:32). Pe fráse “Che hína Jehová” ojerrepeti heta vése ko lívrope ha ñanemomanduʼa iñimportantetereiha ñaneñeʼẽrendu Ñandejárape. Ko artíkulope ha pe oúvape jahecháta heta mbaʼe ivaliosoitereíva ñanepytyvõtava ñanepotĩ hag̃ua Jehovápe renondépe.

3, 4. ¿Mbaʼépa orrepresenta Aarón ha itaʼyrakuéra oñemopotĩ hague oñepresenta mboyve Jehová renondépe? (Ehecha pe taʼanga oĩva iñepyrũme.)

³ (Elee Levítico 8:5, 6.) Jehová oiporavo Aarónpe oservi hag̃ua  kómo saserdóte prinsipál Israélpe ha itaʼyrakuérape oservi hag̃ua de saserdóte. Aarón orrepresenta Jesucrístope ha umi itaʼýra katu umi unhídope. La Biblia omombeʼu Jehová omanda hague Aarónpe ojahu hag̃ua oñepresenta mboyve henondépe pe tavernákulope. ¿Mbaʼépa orrepresenta upéva? ¿Heʼisépa Jesús tekotevẽ hague avei oñemopotĩ raẽ oñepresenta hag̃ua Jehová renondépe? Nahániri. Jesús ndahaʼéi vaʼekue pekadór ha ndorekói “mbaʼeve ivaíva” (Heb. 7:26; 9:14). Añetehápe Aarón opyta ipotĩ ojahu rire, ha upéva orrepresenta Jesús haʼeha peteĩ persóna hekojoja ha ipotĩva Jehová renondépe. Aarón raʼykuéra avei tekotevẽ vaʼekue ojahu oservi hag̃ua de saserdóte, ¿mbaʼépa orrepresenta upéva?

⁴ Ojahúvo Aarón raʼykuéra orrepresenta oñemopotĩtaha umi ojeporavóvape oservi hag̃ua kómo saserdóte yvágape. ¿Heʼise piko upéva umi unhído ipotĩmaha ojevautisávo? Nahániri. Pe vautísmo ningo ndeʼiséi ojevorraha ipekádo, síno heʼise pe persóna oñemeʼẽha Jehovápe oservi hag̃ua chupe ipyʼaite guive oikove aja pukukue. ¿Mbaʼéichapa upéicharõ oñemopotĩ umi unhídope? Pablo heʼi oñemopotĩha chupekuéra “Ñandejára Ñeʼẽ” rupive. Upévare umi unhído oiko vaʼerã Cristo omboʼe hagueichaite (Efes. 5:25-27). Péicha, Ñandejára Ñeʼẽ rupive oñemomarangatu ha oñemopotĩ chupekuéra. ¿Jaʼekuaápa upeichaha avei “ambue ovechakuéra” kásope? (Juan 10:16.)

5. ¿Mbaʼérepa jaʼekuaa umi ambue ovechakuéra oñemopotĩha avei Ñandejára Ñeʼẽ rupive?

⁵ Aarón raʼykuéra ningo norrepresentái umi ambue ovechakuérape térã pe “aty guasu” oikovétavape ko yvy ape ári (Apoc. 7:9). Upéicharõ jepe, koʼã kristiánope oñemomarangatu ha oñemopotĩ avei Ñandejára Ñeʼẽ rupive. Haʼekuéra ojeroviaiterei la Biblia heʼívare Jesús sakrifísiore, ha upéva omomýi chupekuéra oservi hag̃ua Jehovápe “ára ha pyhare” (Apoc. 7:13-15). Entéro umi unhído ha ambue ovechakuéra kontinuadoite oñemomarangatu ha upéicha rupi akóinte oiko hikuái hekopete (1 Ped. 2:12). Katuete Jehová ipyʼarory ohechávo mbaʼéichapa umi unhído ha ambue ovechakuéra hekomarangatu ha oiko porã oñondive iñeʼẽrendu rupi Jesúspe ipyʼaite guive.

6. ¿Mbaʼérepa tekotevẽ pyʼỹinte jahecha mbaʼéichapa ñaime Jehová renondépe?

⁶ Umi saserdóte tekotevẽ kuri ipotĩ oñepresenta hag̃ua Jehová renondépe, ha upéva ñanemboʼe avei peteĩ mbaʼe iñimportánteva. Pyʼỹinte ningo umi estudiánte ohecharamo mbaʼéichapa ipotĩ umi lugár ñañembyatyha ñamombaʼeguasu hag̃ua Jehovápe, ha avei mbaʼéichapa ñande voi ñanepotĩ ha ñañemonde porã. Yma umi saserdóte ndahaʼéi vaʼekue físikamentente ipotĩva, síno avei ipyʼapýpe. Upéva ñanemomanduʼa enterove oadoráva Ñandejárape, térã ojupíva pe “montáña oĩháme Jehová róga”, tekotẽveha avei ipyʼapy potĩ (elee Salmo 24:3, 4; Isa. 2:2, 3). Jehová oipota umi omombaʼeguasúva chupe ipotĩ opa mbaʼépe, tahaʼe iménte, ikorasõ ha físikamente. Upévare iporã pyʼỹinte jajepyʼamongeta jahecha hag̃ua oimépa ñanepotĩ hína opa mbaʼépe, upéicharõmante ikatúta ñakambia tekotevẽramo (2 Cor. 13:5). Por ehémplo, oĩrõ peteĩ Jehová siérvo ohecha meméva oikóvo pornografía, oñeporandu vaʼerã: “¿Ikatúta piko haʼe chejehe chepotĩha?”. Ko ermáno térã ermána ojepyʼamongeta rire ojerure vaʼerã toñepytyvõ chupe oheja hag̃ua ko vísio vaiete (Sant. 5:14).

7. ¿Mbaʼéichapa Jesús okumpli Levítico 8:22-24 heʼíva?

⁷ Oñepyrũrõ guare pe saserdósio Israélpe, Moisés omoĩ pe ovecha mácho ruguykue  pe saserdóte prinsipál Aarón ha itaʼyrakuéra nambi deréchare, avei ikuã guasu ha ipysã guasu deréchare (elee Levítico 8:22-24). Upéva ohechauka umi saserdóte iñeʼẽrendu ha oñehaʼãtaha ojapo porã hembiapo. Jesús, pe Saserdóte Prinsipál, oheja avei ehémplo neporãva umi unhído ha ambue ovechakuérape g̃uarã. Haʼe siémpre ohendu Jehová ñeʼẽ, ojapo Itúva rembipota ha akóinte oguata tape porãre (Juan 4:31-34).

8. ¿Mbaʼépa jajapo vaʼerã enterove jaservíva Jehovápe?

⁸ Enterovéva, tahaʼe unhído térã ambue ovechakuéra, jasegi vaʼerã ñande Saserdóte Prinsipál ehémplo ha jajapo opa mbaʼe Jehová omandáva ñandéve la Bíbliape. Upéicha noñembyasymoʼãi Ñandejára espíritu sánto (Efes. 4:30). ‘Jasegi vaʼerã jaguata derechoite pe tape porãre.’ (Heb. 12:13.)

9. a) ¿Mbaʼépa heʼi mbohapy ermáno heta áñorema ombaʼapóva umi oĩvandi pe Kuérpo Governántepe? b) ¿Mbaʼéichapa ñanepytyvõ koʼã ermáno heʼi vaʼekue?

⁹ Jahechamína mbaʼépa heʼi mbohapy ermáno heta áñorema ombaʼapóva umi oĩvandi pe Kuérpo Governántepe. Peteĩva heʼi: “Chéve g̃uarã ningo tuicha priviléhio ikatu haguére ambaʼapo koʼã ermánondi. Péro sapyʼánte ahechakuaa haʼéramo jepe unhído, iñimperfektoha avei hikuái. Upéicharõ jepe, ymaite guive añehaʼã cheñeʼẽrendu umi ermáno Jehová oipurúvape odirihi hag̃ua ipuévlope”. Ótro ermáno katu heʼi: “Oĩ heta téxto ñanemokyreʼỹva ñaneñeʼẽrendu hag̃ua Crístope, umíva apytépe 2 Corintios 10:5. Koʼãichagua téxto chemboʼe cheñeʼẽrendu vaʼerãha umi omoakãvape Jehová organisasión ha ambaʼapo kyreʼỹ vaʼerãha hendivekuéra. ¡Ha che siémpre ajapo upéva che pyʼaite guive!”. Ambue ermáno omombeʼu avei: “Peteĩ persóna iñeʼẽrendu hag̃ua Jehová organisasiónpe ha umi Haʼe oipurúvape ojapo hag̃ua hembipota ko yvy ape ári, tekotevẽ ohayhu umi mbaʼe Jehová ohayhúva, ndaijaʼéi umi mbaʼe Jehovápe ombojeguarúvare, ha oñehaʼã meme osegi ikonsého”. Ko ermáno imanduʼa avei opokoiterei hague hese ohechávo mbaʼéichapa iñeʼẽrendu ermáno Nathan Knorr (tiémpo rire Nathan Knorr oike Kuérpo Governántepe). Áño 1925-pe, pe rrevísta Ñemañaha, oĩva upérõ idióma ingléspente, oguenohẽ pe artíkulo hérava “Oñepyrũ peteĩ tetã”, ha omyesakã heta enseñánsa vívlika. Heta ermáno ndogueroviapái kuri umi mbaʼe osẽ pyahúva, péro ermáno Knorr pyaʼe voi oasepta. Jajepyʼamongetávo koʼã mbohapy ermáno heʼi vaʼekuére, ñanepytyvõta jahechakuaa hag̃ua tekotevẽha ñaneñeʼẽrendu ikatu hag̃uáicha ñanemarangatu.

10. ¿Mbaʼérepa iñimportánte ñakumpli Jehová Léi heʼíva pe tuguýre?

¹⁰ (Elee Levítico 17:10.) Jehová oproivi vaʼekue umi isrraelítagui hoʼu “tuguy”, ha entéro kristiánope omanda avei ani hag̃ua hoʼu ni oipuru tuguy, tahaʼe umáno térã animál ruguy (Hech. 15:28, 29). Sapyʼánte ikatu jajecha peteĩ situasión ijetuʼúvape, ha umi ndoikuaáiva Jehovápe ni nomombaʼéiva Iléi ñandejopy ñamboyke hag̃ua upe mandáto. Péro ñande jahayhu Jehovápe ha ni mbaʼevéicharõ ndajajapomoʼãi peteĩ mbaʼe ñanemoĩ vaítava hendive ha ikatúva ñaneguenohẽ ikongregasióngui. Upévare ñaiméma desidído ñaneñeʼẽrendutaha chupe. Katuete ningo oĩta oñembohorýva ñanderehe ndajaaseptái haguére tuguy, upéicharõ jepe ñande jadesidi jasegitaha ñaneñeʼẽrendu (Jud. 17, 18). ¿Mbaʼépa nepytyvõta ikatu hag̃uáicha reime ‘desidído’ ani hag̃ua reʼu ni remoĩka tuguy? (Deut. 12:23, NM.)

11. ¿Mbaʼérepa jaʼekuaa umi mbaʼe ojejapo vaʼekue pe Día Oñeperdonahápe umi Pekádo ndahaʼéi hague rrituál reínte?

 ¹¹ Jehová heʼi porã vaʼekue pe saserdóte prinsipál Israelguápe mbaʼépa ojapo vaʼerã pe tuguýgui pe Día Oñeperdonahápe umi Pekádo (Día de Expiación). Ha upéva ohechauka porã mbaʼépa opensa Ñandejára pe tuguýre. Pe tuguy ojepuru vaʼekue ojevorra hag̃ua umi persóna oñarrepentíva pekádo. Upe díape, pe saserdóte prinsipál ohypýi vaʼerã peteĩ tóro ruguy ha peteĩ kavara mácho ruguy pe árka del pákto renondépe (Lev. 16:14, 15, 19). Péicha Jehová operdona ipuévlope ipekádo. Ñandejára avei heʼi ojehuguyʼo vaʼerãha umi animál ojeʼútava, péro oñeñohẽ vaʼerã huguykue ha ojejaty yvýpe. ¿Mbaʼérepa ojejapo upéicha? La Biblia heʼi: “Opa oikovéva rekove oĩ huguýpe” (Lev. 17:11-14). Koʼã mandáto Jehová omeʼẽ vaʼekue ndahaʼéi peteĩ rrituál reínte, síno orrepresenta ambue mbaʼe iñimportantetereíva. Heta tiémpo upe mboyve, Jehová oproivíma vaʼekue voi Noé ha ifamiliakuéragui hoʼu tuguy (Gén. 9:3-6). ¿Mbaʼépa omboʼe kristianokuérape koʼã mbaʼe?

12. ¿Mbaʼépa Pablo heʼi vaʼekue tekotevẽha ojejapo oñeperdona hag̃ua umi pekádo?

¹² Apóstol Pablo heʼi vaʼekue umi kristiáno evréope tuguy rupivénte ikatuha oñeperdona umi pekádo. Haʼe oskrivi: “Pe Léi heʼi voi haimete opa mbaʼe oñemopotĩha tuguýpe, ha noñeñohẽiramo tuguy Ñandejára ndaikatúi operdona umi héntepe ipekadokuéra” (Heb. 9:22). Umi sakrifísio de animál ojapo vaʼekue umi isrraelíta iñimportánte vaʼekue. Péro Pablo heʼi haguéicha, umíva omomanduʼánte chupekuéra pekadorha ha oikotevẽha peteĩ sakrifísio tuichavéva ojevorraite hag̃ua ipekadokuéra. “Pe Léi ohechaukánte umi mbaʼe porã oútava, añetehápe, [pe Léi] ndahaʼéi hína umi mbaʼe porã, síno ijoguahánte.” (Heb. 10:1-4.) ¿Mbaʼéichapa ikatúta oñeperdonambaite umi pekádo?

13. ¿Mbaʼépa repensa Jesús ojapo vaʼekuére?

¹³ (Elee Efesios 1:7.) Opavave ohayhúva Jehovápe ha Crístope omombaʼeterei pe sakrifísio Jesús ojapo vaʼekue ‘oñemeʼẽvo  ñanderehehápe’ (Gál. 2:20). Péro, ¿heʼisépa upéva ñanesãsomaha pekádogui Jesús omanóvo ñanderehehápe? Nahániri. La ñandepeʼáva pekádo poguýgui haʼe hína Jesús ojapo vaʼekue orresusita ha oho rire yvágape. Umi mbaʼe ojejapo vaʼekue pe Día Oñeperdonahápe umi Pekádo, orrepresenta kuri Jesús ojapótava. Upe díape, pe Léi heʼiháicha, pe saserdóte prinsipál oike pe tavernákulope, pe lugár Santísimope, ha opresenta Jehovápe pe animál ruguy. Ha oĩ rire pe témplo, ojesegi ojejapo upéva (Lev. 16:11-15). Péicha avei, Jesús orresusita rire oho yvágape ha opresenta Jehovápe huguy repykue (Heb. 9:6, 7, 11-14, 24-28). ¡Ajépa ñamombaʼete pe ojapóva! Jajerovia rupi Jesús sakrifísiore, Jehová operdona ñande pekádo ha ikatu ñane konsiénsia potĩ.

14, 15. ¿Mbaʼérepa iñimportánte ñantende ha jarrespeta Jehová Léi heʼíva pe tuguýre?

¹⁴ Katuete koʼág̃a ñantende porãvéma mbaʼérepa Jehová oproivi jaʼu ‘opaichagua tuguy’ (Lev. 17:10, ÑÑB). Ñandejárape g̃uarã ñande ruguy sagrádo orrepresenta rupi ñande rekove (Gén. 9:4). Upévare ñande ñapensa vaʼerã haʼéicha ha jarrespeta pe mandáto heʼíva ndovaleiha jaʼu ni jaipuru tuguy. Ñaime porã hag̃ua Ñandejára ndive, tekotevẽ jajerovia Jesús sakrifísiore ha ñantende mbaʼeichaite pevépa Jehová omombaʼe pe tuguy (Col. 1:19, 20).

¹⁵ Ñahaʼarõʼỹetére ningo ikatu oimeraẽva jajecha peteĩ situasión tekotevẽtahápe jadesidi ñamoĩkátapa tuguy térãpa nahániri. Ha ikatu voi oiko upéva ñanderehe, ñane héntere térã peteĩ ñane amígore. Sapyʼánte tekotevẽ avei jadesidi jaaseptátapa umi párte michĩvéva orekóva pe tuguy, térã umi prosedimiénto médiko ojepuruhápe ñande ruguy. Avave ningo ndajaipotái Jehová oñembyasy jajapógui peteĩ mbaʼe haʼe oproivíva Iñeʼẽme. Upévare tekotevẽterei ñañemboʼe ha ñaanalisa porã ko téma, ikatu hag̃uáicha jajedesidíma oñepresenta mboyve peichagua situasión. Jajapóramo péicha, ñaimétama preparádo ñañedefende hag̃ua, ha ndajaguevimoʼãi. Heta doktór, enferméro ha hetave hénte opensa pe tuguy rupive ikatuha ojesalva heta vída, ha upévare ojerure hikuái oñedona hag̃ua tuguy. Péro ñande jaikuaa porã Jehová añoite orekoha derécho odesidívo mbaʼéichapa ojepuru vaʼerã pe tuguy, ha chupe g̃uarã “oimehaichagua tuguy” sagrádo. Jarrespetákena Jehová Léi heʼíva pe tuguýre. Ñañehaʼã akóinte ñanderekopotĩ ha péicha jahechauka ñamombaʼeha Jesucristo ruguy, oñeñohẽ vaʼekue jajesalva hag̃ua. Huguy rupive ningo ikatu oñeperdona ñande pekádo ha jahupyty jeikove opaveʼỹva (Juan 3:16).

16. ¿Mbaʼérepa ñanderekomarangatu vaʼerã?

¹⁶ Jehová oguenohẽrõ guare umi isrraelítape Egipto poguýgui, heʼi chupekuéra: “Che hína Jehová peneguenohẽva Egíptogui aiko hag̃ua pende Járaramo. Ha peẽ penemarangatu vaʼerã che chemarangatúgui” (Lev. 11:45, NM). Jehová ningo oipota vaʼekue ipuévlo ipotĩ haʼe ipotĩ rupi. Upévare ñande avei ñañehaʼãmbaite vaʼerã ñanderekomarangatu. Pe lívro de Levítico ñanemboʼe porãiterei upéva.

17. ¿Mbaʼéichapa ñanepytyvõ lívro de Levítico?

¹⁷ Koʼa peve ñahesaʼỹijóma heta téxto oĩva Levíticope ha ñaaprende chugui heta mbaʼe. Oiméne katuete ñanepytyvõ raʼe jaguerohoryve hag̃ua ko lívro oĩva la Bíbliape, ha ñantende porãve hag̃ua mbaʼérepa ñanderekomarangatu vaʼerã. Péro Levíticope oĩ gueteri hetave mbaʼe ikatúva ñanepytyvõ ñanemarangatu hag̃ua jaservívo Jehovápe. Upéva jahecháta pe artíkulo oúvape.