1, 2. a) ¿Mbaʼépa oikuaase umi líder rrelihióso hudío? b) ¿Mbaʼépa Pedro ombohovái chupekuéra? (Ehecha pe taʼanga oĩva iñepyrũme.) c) ¿Mbaʼéicha rupípa Pedro ndokyhyjéi ombohovái hag̃ua umi líder rrelihiósope?

JESÚS omano riremínte, umi líder rrelihióso hudío oñemoĩ apóstol Pédrore. Haʼekuéra ningo ojukauka kuri Jesúspe, ha koʼág̃a ojopy hikuái pe apóstolpe omombeʼu hag̃ua mbaʼéicha rupípa ojapo peteĩ milágro. Pedro omonguera kuri peteĩ kuimbaʼe onase vaʼekuépe paralítiko, ha umi líder rrelihióso oikuaase mávapa omeʼẽ chupe podér ojapo hag̃ua upéva. Pyʼaguasúpe haʼe osẽ orresponde: “Ko kuimbaʼe oĩva pene renondépe okuera [...] Jesucristo Nazaretgua rérape, upe peẽ pemosaingo vaʼekue yvyráre, péro Ñandejára omopuʼã jey chupe omanóva apytégui” (Hech. 4:5-10).

² Upe mboyvemínte Pedro onega kuri Jesúspe tres vése voi ipyʼajúgui (Mar. 14:66-72). ¿Mbaʼéicha rupípa upéicharõ ndokyhyjéi raʼe ombohovái hag̃ua umi líder rrelihiósope? Pe espíritu sánto oipytyvõ rupi chupe, ha oikuaa porãgui Jesús orresusita hague ha oĩha vívo. ¿Mbaʼérepa haʼe oĩ segúro upeichaha? ¿Ha mbaʼérepa ñande avei ikatu jaguerovia upéva?

3, 4. a) ¿Máva mávapepa oñemoingove jey vaʼekue umi apóstol tiémpo mboyve? b) ¿Máva mávapepa Jesús omoingove jey vaʼekue?

³ Heta tiémpo umi apóstol onase mboyve oikóma vaʼekue  umi rresurreksión. Upévare haʼekuéra ni michĩmi ndodudái umi omanóva ikatuha oikove jey. Oiméne katuete oikuaa hikuái proféta Elías ha Eliseo oporomoingove jey hague Jehová podér rupive (1 Rey. 17:17-24; 2 Rey. 4:32-37). Peteĩ kuimbaʼe katu orresusita vaʼekue oja haguénte Eliseo kanguekuére, ojepoírõ guare hetekue pe proféta sepultúrape (2 Rey. 13:20, 21). Umi kristiáno ypykue orovia koʼã rreláto, ha ñande avei jaguerovia añeteha opa mbaʼe la Biblia heʼíva.

⁴ ¿Opokópa ñane korasõre umi rresurreksión Jesús ojapo vaʼekue? Oiméne ñanemanduʼa haʼe omoingove jey hague peteĩ viúda membykariaʼy peteĩmíme. ¿Ñañeimahinápa mbaʼeichaitépa pe kuñakarai ohecharamóne raʼe pe oikóva? (Luc. 7:11-15.) Jesús omoingove jey kuri avei peteĩ mitãkuñaʼi de 12 áñope, ha itúva ha isy ovyʼaiterei. ¡Ni ndogueroviaséi hikuái pe ohecháva! (Luc. 8:49-56.) Ñapensamíntena avei mbaʼeichaitépa oiméne oponderajoa umi hénte ohechávo Lázarope osẽ pe sepultúragui sáno asy (Juan 11:38-44).

5. ¿Mbaʼérepa Jesús rresurreksión idiferénte umi ótrogui?

⁵ Umi apóstol oikuaa porã Jesús rresurreksión ndojoguaiha umi ótrope. ¿Mbaʼérepa? Umi ótro oikove jey vaʼekuépe oñemeʼẽ peteĩ kuérpo umáno, ha ohasávo pe tiémpo omano jey hikuái. Jesúspe katu oñemeʼẽ peteĩ kuérpo espirituál ndaikatúiva oñembyai ni omano (elee Hechos 13:34). Pedro heʼi hese: “Haʼe omano yvypóraicha, péro oikove jey espírituicha”. Upéi heʼi avei: “Haʼe oho yvágape ha koʼág̃a oĩ Ñandejára deréchape, ha oñemoĩ ipoguýpe umi ánhel, autoridakuéra ha umi podér” (1 Ped. 3:18-22). Umi rresurreksión oiko vaʼekue ymave ningo tuichaiterei mbaʼe kuri, péro ndaipóri ohupytýva Jesús rresurreksiónpe. Upéva haʼe pe milágro tuichavéva.

6. ¿Mbaʼéichapa oñeñandu umi disípulo Jesús oikove jey haguére?

⁶ Jesús rresurreksión opokoiterei vaʼekue idisipulokuérare. Haʼekuéra oikuaa porã Jesús oĩha vívo, ndahaʼéi iñenemigokuéra opensaháicha. Jesúsgui oiko peteĩ espíritu ipoderosoitereíva ha ni peteĩ yvypóra ndaikatúi ojapo hese mbaʼeve. Hiʼarive Jesús orresusita rire, ojekuaa porãvéntema haʼeha Ñandejára Raʼy. Upéicha rupi idisipulokuéra noñembyasyvéima ni ndokyhyjevéima. Upéva rangue ovyʼa, ipyʼaguasu ha osegi omombeʼu pe marandu porã. ¡Jesús oĩ vívo, ha haʼe rupive oñekumplíta katuete Jehová rembipota!

7. a) ¿Mbaʼépa Jesús ojapo koʼág̃a? b) ¿Mbaʼe porandúpa ñambohováita ko artíkulope?

⁷ Ñande jaservíva Jehovápe jaikuaa porã Jesús ndahaʼéi hague peteĩ kuimbaʼe ivuéno ha iñarandúvante. Haʼe ningo koʼág̃a odirihi pe predikasión oñemog̃uahẽ hag̃ua pe marandu porã ko múndo tuichakuére. Jesús hína pe rréi Ñandejára Rréinope ha koʼẽrõitéma oipeʼapaitéta opa mbaʼe vai ko yvy ape árigui. Avei ojapóta ko planétagui peteĩ lugár neporãva ha umi hénte oikóta opa árare (Luc. 23:43). Jesús ndorresusitáirire ndojehupytýi vaʼerãmoʼã koʼã mbaʼe porãita. Péro ¿mbaʼérepa ikatu jaguerovia Jesús añetehápe oikove jey hague ha koʼág̃a oĩha vívo? ¿Mbaʼérepa iñimportánte ñandéve g̃uarã Jesús rresurreksión?

8, 9. a) ¿Mbaʼérepa umi líder rrelihióso oipota ojevihila Jesús sepultúra? b) ¿Mbaʼépa oiko umi kuña ohórõ guare Jesús oñeñotỹ haguépe?

⁸ Jesús omano rire, umi saserdóte prinsipál ha umi fariséo oho Pilato rendápe ha  heʼi chupe: “Karai, oremanduʼa ningo hína ko tekove japu heʼi hague omano mboyve: ‘Tres día rire añemopuʼã jeýta’. Upévare roipota remoĩmi oñangareko vaʼerã pe panteón rehe tres día aja, ani ág̃a ou idisipulokuéra omonda hetekue ha upéi oiko heʼi umi héntepe: ‘¡Oñemopuʼã kuri omanóva apytégui!’. Ha ko japu ivaivéta hína pe heʼi vaʼekuégui ñepyrũrã”. Pilato ohendu chupekuéra ha omoĩ guárdia oñatende hag̃ua pe sepultúrare (Mat. 27:62-66).

⁹ Jesús retekue oñemoĩ kuri peteĩ itakuápe, ha pe sepultúra entráda oñemboty peteĩ ita guasúpe. Umi líder rrelihiósope ningo hiʼãiterei Jesús opyta upépe opa árare, péro Jehová nopensaiete upéicha. ¿Mbaʼépa oiko raʼe upe rire? Tres día haguépe, María Magdalena ha pe ótra María oho Jesús oñeñotỹ haguépe, ha otopa hikuái ojepeʼa hague pe ita ombotýva pe sepultúra entráda. Upépe peteĩ ánhel oguapy hína pe ita ári ha heʼi umi kuñáme omaña hag̃ua pe sepultúra ryepýpe okomprova hag̃ua nandiha. Pe ánhel heʼi chupekuéra: “Haʼe ndaipóri koʼápe, oñemopuʼãma chupe” (Mat. 28:1-6). ¡Jesús oikove jeýma!

10. ¿Mbaʼéichapa Pablo ohechauka Jesús orresusita hague?

¹⁰ Umi mbaʼe oiko vaʼekue upe rire 40 día aja, ohechauka Jesús añetehápe orresusita hague. Apóstol Pablo ohaírõ guare pe primera kárta umi kristiáno Corintoguápe, omombeʼu chupekuéra mbaʼérepa ikatu jajerovia Cristo oikove jey hague: “Che ningo pomboʼe pe iñimportantevéva aaprende vaʼekue: Cristo omano hague ñande pekádore, heʼiháicha Ñandejára Ñeʼẽme. Chupe oñeñotỹ ha upéi oñemopuʼã tres día haguépe, heʼiháicha Ñandejára Ñeʼẽme. Haʼe ojechauka Céfaspe ha upéi umi dócepe. Upe rire peteĩ árape ohecha chupe quinientos ermánorupi, ha ijapyteguikuéra heta oĩ gueteri ñanendive, péro oĩ avei umi omanómava. Upéi ojechauka Santiágope ha upe rire enterove umi apóstolpe. Péro ipahaitépe ojechauka avei chéve, upéicha rupi che ajogua peteĩ mitã onase vaʼekuépe og̃uahẽ mboyve itiémpo” (1 Cor. 15:3-8).

11. ¿Mbaʼérepa jaʼekuaa Jesús oikove jey hague “heʼiháicha Ñandejára Ñeʼẽme”?

¹¹ Jesús oikove jey vaʼekue “heʼiháicha Ñandejára Ñeʼẽme”. La Biblia oprofetisáma vaʼekue voi Jesús orresusitataha. Por ehémplo, rréi David oñeʼẽ kuri peteĩ “imarangatúvare” ha heʼi hese ndojehejamoʼãiha pe sepultúrape (elee Salmo 16:10). ¿Mávarepa oñeʼẽ raʼe? Pentekostés áño 33-pe, apóstol Pedro omyesakã pe profesía oñekumpli hague Jesús rehe. Haʼe heʼi: “David oikuaáma vaʼekue voi Crístope oñemoingove jeytaha ha omombeʼu upéva. Haʼe heʼi Ñandejára ndohejamoʼãiha Crístope sepultúrape ha hete noñembyaimoʼãiha” (Hech. 2:23-27, 31).

12. ¿Máva mávapa ohecha vaʼekue Jesúspe oikove jey rire?

¹² Heta oĩ ohecha vaʼekue Jesúspe orresusita rire. Jesús oikove jey rire, 40 día pukukue ojechauka idisipulokuérape. Por ehémplo, ojeaparese kuri chupekuéra pe hardín oĩháme isepultúra, ohokuévo hikuái Emaúspe ha ótro hendápe avei (Luc. 24:13-15). Sapyʼánte Jesús ojechauka peteĩmente, por ehémplo Pédrope, ha avei ojeaparese vaʼekue hetave héntepe. Peteĩ jey katu mas de 500 persóna ohecha chupe. Añetehápe, hetaiterei oĩ ohecha vaʼekue Jesúspe oikove jey rire, ndaipóri onega vaʼerã upéva.

13. ¿Mbaʼéichapa umi disípulo ohechauka ogueroviaha Jesús oikove jey hague?

¹³ Umi disípulo kyhyjeʼỹme opredika Jesús oikove jey hague. Heta kristiáno ohasa asy, ojepersegi, térã ojejuka voi opredika rupi Jesús orresusita hague. Oiméne  ñanemanduʼa Pedro ndokyhyjéi hague heʼi hag̃ua umi líder rrelihiósope Jesús oikove jeyha, hiʼarive koʼã kuimbaʼe ojukauka kuri Jesúspe ndaijaʼéigui hese. ¿Ojapeligránepa raʼe Pedro peichaite peve oimérire japu la heʼíva? Nahániri. Haʼe ha umi ambue disípulo oikuaa porã Jesús oĩha vívo ha omoakãha hína pe predikasión. Hiʼarive haʼekuéra ohechágui Jesús orresusita hague, oikuaa ikatutaha avei oñemoingove jey chupekuéra omano vove. Por ehémplo, Esteban omanoite peve oguerovia vaʼekue oñemoingove jeytaha chupe (Hech. 7:55-60).

14. ¿Mbaʼérepa nde reguerovia Jesús oikove jey hague?

¹⁴ Oĩ heta mbaʼe ohechaukáva Jesús ogovernamaha ha omoakãha pe kongregasión kristiána. Koʼág̃arupi heta hetave ohóvo umi ojerovia añetéva Cristo rehe ha omoirũva chupe. ¿Ikatúnepa oiko upéva Jesús noĩriramo vívo? Jesús ndorresusitáirire, ni nañahendúi vaʼerãmoʼã oñeñeʼẽha hese. Péro oĩ heta mbaʼe ohechaukáva haʼe añetehápe oĩha vívo ha omoakãha pe predikasión, ikatu hag̃uáicha oñemog̃uahẽ pe marandu porã ko yvy tuichakuére.

15. ¿Mbaʼépa ñanembopyʼaguasu japredika hag̃ua?

¹⁵ Jaikuaa rupi Jesús oikove jey hague, ñandepyʼaguasu japredika hag̃ua. Dos mil áñorema Ñandejára enemigokuéra ojapo ikatúva guive ojoko hag̃ua pe predikasión. Por ehémplo, oĩ oñembohorýva ñanderehe, ñanemaltratáva, oproiviséva ñane rembiapo, otortura térã ojukáva ñane ermanokuérape, ha oĩ avei umi apóstata. Péro la Biblia heʼi porã: “Tahaʼe haʼéva umi opuʼãva nderehe, nosẽporãmoʼãi” (Is. 54:17, NM). Upéicharõ, ndaipóri jakyhyje hag̃ua Satanás rembiguaikuéragui. Jesús oĩ ñande ykére ha ñanepytyvõ hína, opromete haguéicha ñandéve (Mat. 28:20). ¡Aníkena jakyhyje! Oñehaʼãvéramo jepe, ndaipuʼakamoʼãi ñanderehe hikuái.

16, 17. a) ¿Mbaʼéichapa Jesús rresurreksión ohechauka añeteha opa mbaʼe haʼe omboʼéva? b) Heʼiháicha Juan 11:25, ¿maʼerãpa Jehová omeʼẽ podér Jesúspe?

¹⁶ Jesús rresurreksión ohechauka añeteha opa mbaʼe haʼe omboʼe vaʼekue. Apóstol Pablo heʼi Jesús ndorresusitáirire, japredika ha jajerovia reitaha umi enseñánsa kristiánare. Peteĩ karai arandu katu heʼi: “Oimérire japu Jesús oikove jey hague, [...] umi kristiáno ivyroitereíta orovia rupi peteĩ mbaʼe ndasiértoiva”. Ñapensamíntena, Jesús ndorresusitáirire, umi rreláto oĩva Mateo, Marcos, Lucas ha Juánpe haʼéta peteĩ istória reínte oñeʼẽva peteĩ kuimbaʼe ivuéno ha iñarandúvare, ha upe rire ojejuka vaʼekue. Péro jaikuaaháicha, Jesús oikove jey kuri, ha upéva ohechauka opa mbaʼe omboʼe vaʼekue siertoha, umíva apytépe umi mbaʼe heʼi vaʼekue oikotaha tenonderãme (elee 1 Corintios 15:14, 15, 20).

¹⁷ Jesús heʼi vaʼekue: “Che hína pe ñemoingove jey ha che rupive oikove jey umi hénte. Pe ojeroviáva cherehe omanóramo jepe oikove jeýta” (Juan 11:25). ¡Katuete ningo oñekumplíta Jesús heʼi vaʼekue! Jehová omeʼẽ podér Jesúspe omoingove jey hag̃ua umi ogovernátavape hendive yvágape. Ha upe podér rupive omborresusitáta avei hetaiterei tapichápe oikove hag̃ua opa árare ko yvy ape ári. Jesús sakrifísio ha irresurreksión ogarantisa opataha pe ñemano. ¡Ajépa ñanemokyreʼỹete upéva ñaaguanta hag̃ua umi pruéva ijetuʼúva ha ñanepytyvõ ani hag̃ua jakyhyje pe ñemanógui!

18. ¿Mbaʼe garantíapa omeʼẽ ñandéve Jesús rresurreksión?

¹⁸ Jesús rresurreksión ogarantisa Jehová ñandehusgataha tekojojápe. Apóstol Pablo heʼi vaʼekue peteĩ hénte atýpe Aténaspe:  “[Ñandejára omoĩma] peteĩ ára ohusga hag̃ua tekojojápe entéro yvypórape, peteĩ kuimbaʼe Haʼe oiporavo vaʼekue rupive. Ha omeʼẽ opavavépe peteĩ garantía omoingove jeývo chupe omanóva apytégui” (Hech. 17:31). Jahechaháicha, Jesús haʼe pe Hués Jehová onombra vaʼekue, upévare jajeroviakuaa ñandehusgataha tekojoja ha mborayhúpe (elee Isaías 11:2-4).

19. ¿Mbaʼépa ñanemomýi jajapo hag̃ua jaikuaa rupi Jesús oikove jey hague?

¹⁹ Jaguerovia rupi Jesús oikove jey hague, ñanekyreʼỹ jajapo hag̃ua Ñandejára rembipota. Jesús nomanóirire ñanderehehápe ha ndorresusitáirire, ndajarekomoʼãi kuri esperánsa jajeívo pekádo ha ñemano poguýgui (Rom. 5:12; 6:23). Jaʼe vaʼerãmoʼã avei heta hénte heʼiháicha: “Jakaru ha ñamokõ katu, cháke koʼẽrõ ñamanóta” (1 Cor. 15:32). Péro ñande ndajaikói ñande rete rembipota rapykuéri. Upéva rangue, jaikuaa rupi oñemoingove jeytaha umi omano vaʼekuépe, jadesidíma ñaneñeʼẽrendutaha Ñandejárape opaite mbaʼépe.

20. ¿Mbaʼéichapa Jesús rresurreksión ohechauka Jehová tuichaha?

²⁰ Jesús rresurreksión ohechauka Jehová tuichaha ha orrekompensaha “umi oñehaʼãvape ipyʼaite guive ojapo hembipota” (Heb. 11:6). Ñapensamíntena mbaʼeichaitépa Jehová ipoderóso ha iñarandu omoingove jeývo Itaʼýrape peteĩ espírituicha oho hag̃ua yvágape, ha omeʼẽvo chupe peteĩ kuérpo nomanomoʼãiva arakaʼeve. Jesús rresurreksión ohechauka avei Ñandejára ikatuha okumpli opa mbaʼe oprometéva. Haʼe oprofetisa kuri peteĩ “desendénsia” ohechauka porãtaha mávapa añetehápe oreko derécho ogoverna hag̃ua ko univérso. Ha ikatu hag̃uáicha oñekumpli ko profesía, Jesús, pe desendénsia oñepromete vaʼekue omano ha oikove jeýmante vaʼerã (Gén. 3:15).

21. ¿Mbaʼérepa nde revyʼa reikuaávo oikove jeytaha umi omanóva?

²¹ ¡Jaagradesete ningo Jehovápe omoingove jeýta haguére umi omano vaʼekuépe! Apóstol Juan ohendu vaʼekue ko promésa: “‘¡Péina! Ñandejára róga oĩta yvyporakuérandi, haʼe oikóta hendivekuéra ha haʼekuéra haʼéta ipuévlo. Ha Ñandejára voi oĩta hendivekuéra. Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma’. Ha Pe oguapýva pe trónope heʼi: [...] ‘Ehaíkena koʼã mbaʼe. Koʼã ñeʼẽ ningo añetegua ha ikatu pejerovia hese’”. ¿Mávapa heʼi Juánpe koʼã mbaʼe? Jesucristo, pe oñemoingove jey vaʼekue omanóva apytégui (Apoc. 1:1; 21:3-5).