ÑANDE Apohare omombaʼe yvyporakuérape, upévare omeʼẽ enterovévape liverta odesidi hag̃ua mbaʼépa ojapóta. Hiʼarive ovendesi umi ombaʼapo memévape Irréino rehehápe, oñehaʼãmbaitéva omombaʼeguasu héra ha oapojáva hembipota. Jehová ndoipotái jaservi chupe jakyhyjégui, oĩ rupi ñandejopýva térã jajapo vaʼerãgui reínte. Haʼe ovaloraiterei jaservíramo chupe ñande pyʼaite guive.

Umi isrraelíta oĩrõ guare Sinaí desiértope, Jehová omanda chupekuéra oprepara hag̃ua peteĩ lugár ikatu hag̃uáicha ojeadora chupe. Haʼe heʼi: “Pembyaty kontrivusión Jehovápe g̃uarã. Káda uno tomeʼẽ ikontrivusión Jehovápe ikorasõ heʼiháicha chupe” (Éx. 35:5, NM). Káda isrraelíta okontrivui vaʼerã omeʼẽháicha iposivilida, marãve ndoikói ikatúramo omeʼẽ heta térã saʼi, péro omeʼẽ vaʼerã ipyʼaite guive. Péicha, umi kontrivusión ojepuru ojejapo hag̃ua Jehová rembipota. ¿Mbaʼépa ojapo pe puévlo ojejerure rire pe kontrivusión?

Entéro “umi oñandúva omeʼẽseha ipyʼaite guive” ogueru ikontrivusión ha “maymáva ogueru torypápe”. Kuña ha kuimbaʼe omeʼẽ ikontrivusión ipyʼaite guive Jehovápe g̃uarã. Omeʼẽ hikuái prendedór, namichãi, kuãirũ, óro, pláta, cóvre, ílo hovy asýva, lána pytãhũ, tínta pytã asýva, líno iporãva, kavara rague, ovecha mácho rague oñemopytãpyre, fóka pire, madéra de akásia, ita vera, válsamo ha aséite. Umi hénte “ogueru hetave mbaʼe oñekotevẽvagui, ha hembypa” (Éx. 35:21-24, 27-29; 36:7, NM).

Péro ndahaʼéi umi mbaʼeta oguerúva hikuái la Jehová oguerohoryvéva, síno mbaʼéichapa ipojera oapoja hag̃ua pe adorasión verdadéra. Umi isrraelíta oipuru kuri avei itiémpo ha oipytyvõ umi traváho ojejapóvape. Por ehémplo, “entéro umi kuña ikatupyrýva ojapo ílo”. Añetehápe “entéro umi kuña oipytyvõséva ipyʼaite guive, ojapo ílo kavara raguégui”. Avei Bezalélpe Jehová “omoarandu, ombokatupyry ha omovakeáno ojapo hag̃ua opaichagua traváho de artesanía”. Péicha Jehová oipytyvõ Bezalel ha Oholiábpe ojapopaite hag̃ua umi traváho omandáva chupekuéra (Éx. 35:25, 26, 30-35, NM).

Jehová ojerurérõ guare umi isrraelítape omeʼẽ hag̃ua ikontrivusión, haʼe ojerovia haʼekuéra omeʼẽtaha ‘ikorasõ heʼiháicha chupekuéra’ oapoja hag̃ua pe adorasión verdadéra. Ha Jehová ohechágui mbaʼéichapa ipojera hikuái hendive, ogia ha ovendesi chupekuéra oiko hag̃ua vyʼápe. Jahechaháicha, haʼe ovendesi umi isiérvo ipojerávape ha omeʼẽvape chupe opa ikatúva ipyʼaite guive. Hiʼarive haʼe ombokatupyry ha omeʼẽ isiervokuérape oikotevẽva guive ojapo hag̃ua hembipota (Sal. 34:9). Reservíramo Jehovápe nde pyʼaite guive, haʼe katuete ovendesíta umi mbaʼe rejapóva iservísiope.