ÁÑO 1870-pe, siuda de Píttsburghpe, oĩva Estados Unídospe, oñepyrũ oñembyaty peteĩ grúpo ostudia hag̃ua Ñandejára Ñeʼẽ. Charles Taze Russell omoakã vaʼekue upe grúpo. Haʼekuéra oanalisa pe rreskáte ha ensegída voi ohechakuaa Jesús sakrifísio iñimportanteterei hague oñekumpli hag̃ua Jehová rembipota. Oiméne ovyʼaite raʼe hikuái oaprendérõ guare Jesús sakrifísio rupive ikatuha hetaiterei hénte ojesalva, inklusíve umi ndorekói vaʼekue oportunida oaprende hag̃ua Ñandejáragui. Upéva omomýi chupekuéra ogueromanduʼa hag̃ua káda áño Jesús omano hague ára (1 Cor. 11:23-26).

Russell oñepyrũ oguenohẽ ingléspe peteĩ rrevísta hérava La Torre del Vigía de Sión, upéva rupive haʼe ohechauka porã Ñandejára ombouha Itaʼýrape omano hag̃ua ñanderehehápe ñanderayhueterei rupi. Heʼi avei pe Konmemorasión haʼeha “peteĩ tiémpo iñimportantetereíva”, ha omokyreʼỹ enterovépe ojapo hag̃ua pe Konmemorasión tahaʼe siuda de Píttsburghpe térã oimeraẽ ótro lugárpe, imbovymíramo jepe hikuái. Heʼi voi “oĩramo mokõi térã mbohapy ojeroviáva Ñandejárare”, térã peteĩ jepe, “Jesús oĩtaha ijapytepekuéra”.

Káda áño heta hetave vaʼekue umi ohóva Konmemorasionrã Píttsburghpe. Pe invitasiónre oñemoĩ: “Koʼápe retopáta hénte nderresivi porã ha ndetrata porãtava”. Ha upeichaite kuri. Umi estudiánte de la Biblia oikóva upe siudápe vyʼapópe orresivi, omongaru, ha omeʼẽ lugár oke hag̃ua umi ermáno oúvape mombyrýgui. Áño 1886-pe, Konmemorasión tiémpope, ojejapo peteĩ “Rreunión Henerál” oduráva unoskuánto día. Pe rrevísta La Torre del Vigía heʼi vaʼekue: “Pejúkena pehechauka hag̃ua pemombaʼeha pe añetegua ha pehayhuha Jesúspe ha ermanokuérape”.

Heta áñore umi Estudiánte de la Biblia oorganisa rreunión kakuaa siuda de Píttsburghpe umi ohóvape g̃uarã Konmemorasionhápe. Mbeguekatúpe, okakuaa ohóvo upe grúpo ha hetave héntema oho Konmemorasionhápe, upévare ojejapo hetave hendápe. Peteĩ ermáno hérava Ray Bopp, oĩ vaʼekue kongregasión (upérõ oñehenói vaʼekue eklésia) de Chicágope, omombeʼu vaʼekue éntre 1910 ha 1920 siéntore ijatyha hikuái Konmemorasionrã; ha opavave lénto hoʼu rupi pe pan ha pe víno, órare oĩmi hikuái upépe oñembohasapa peve.

¿Mbaʼeichagua pan ha vínopa ojepuru vaʼerã? Ojekuaárõ jepe Jesús oipuru hague víno pe Séna del Señórpe, peteĩ tiémpore pe rrevísta La Torre del Vigía heʼi vaʼekue iporãveha ojepurúnte húgo ojejapóva parrálgui térã parrál oñemboséko ha oñembojy pyrégui pono oñemoñepysanga “umi ikangývape”. Upéicharõ jepe, oĩ avei víno oñemeʼẽva umi ipyʼaite guive oñandúvape upéva mante ojepuru vaʼerãha. Kon el tiémpo oñentende ojepuru vaʼerãha víno tínto noñembojeheʼáiva mbaʼevére oñerrepresenta porã hag̃ua Jesús ruguy.

Pe Konmemorasión omeʼẽ vaʼekue oportunida opavavépe ojepyʼamongeta hag̃ua Jesús sakrifísiore. Péro heta kongregasiónpe, umi ohóva guive hovasy joa ha ndovyʼái pe diskúrso aja, ha opamírente ohopa hikuái  heʼiʼỹre mbaʼevete. Upévare, pe lívro Jehová, osẽ vaʼekue 1934-pe, omyesakã ndovaleiha umi ermáno oñekonsentra Jesús omano lájare, ha ojapo pe Konmemorasión peteĩ velórioicha. Upéva rangue ojapo vaʼerã hikuái “vyʼapópe”, Jesús oñepyrũma rupi ogoverna 1914-pe.

Áño 1935-pe oñentende porã mávapepa orrepresenta pe “aty guasu” oñeñeʼẽha Apocalipsis 7:9-pe. Upe mboyve, oñepensa vaʼekue pe aty guasu haʼeha umi kristiáno ojededika vaʼekuépe Jehovápe, péro naikyreʼỹguasúiva. Upe áñope ae oñentende porã pe aty guasu haʼeha umi ermáno ikyreʼỹva Jehová servísiope oikótava opa árare ko yvy ape ári. Upe riremínte, peteĩ ermáno hérava Russell Poggensee, heta ojepyʼamongeta rire, heʼi: “Che nañandúi ahaseha yvágape. Ahechakuaa Jehová ndacheporavói hague aha hag̃ua upépe”. Ko ermáno ha heta ótro ohechakuaáva ndahaʼeiha unhído, ndoʼuvéi pe pan ha pe víno, péro osegi oho Konmemorasionhápe.

Og̃uahẽ mboyve pe Konmemorasión día oñeorganisámi vaʼekue kampáña de predikasión, ha enterovéva ikatu kuri opartisipa ohechauka hag̃ua omombaʼeha Jesús sakrifísio. Áño 1932-pe, Ñane Marandu Porã heʼi vaʼekue entéro ermáno opredika vaʼerãha, ndahaʼéi Konmemorasión diápentema ojapareséva. * Umi ermáno iguápo vaʼerã kuri predikasiónpe. Áño 1934-pe, Ñane Marandu Porãme osẽ kuri ko pregúnta: “¿Jahupytýtapa 1.000 Konmemorasión tiémpope?”. Upe artíkulope oñemokyreʼỹ enterovépe ojapo hag̃ua iprekursorádo auxiliár (upérõ oñehenóiva prekursór de vakasión). Ha oñeʼẽvo umi unhídore heʼi: “Pevyʼa añete hag̃ua, pesẽ vaʼerã pepredika umi notísia porã oñeʼẽva Ñandejára Rréinore”. Tiémpo rire, ojeexplika kuri oĩha umi orekóva esperánsa oikovévo opa ára g̃uarã ko yvy ape ári, ha haʼekuéra avei ojapo vaʼerã ko tembiapo ovyʼa añete hag̃ua.

Testígo de Jehovápe g̃uarã iñimportanteterei pe Konmemorasión. Upévare, ndojavýi ko rreunión ohasáramo jepe heta mbaʼe ijetuʼúva. Por ehémplo, áño 1930-pe peteĩ ermána hérava Pearl English ha iñermána Ora oguata 80 kilómetro ani hag̃ua ojavy pe Konmemorasión. Ótro ermáno hérava Harold King, oĩrõ guare préso Chínape peteĩ kalavósope, oskrivi poesía ha purahéi oñeʼẽva Konmemorasiónre. Ko ermáno oipuru arro ojapo hag̃ua pe pan, ha peteĩ frúta ojoguáva yvapovõme ojapo hag̃ua la víno, péicha haʼe haʼeñomi ogueromanduʼa Jesús omano hague ára. Oĩ avei ermáno oikóva Europa del Este, América Central ha Áfricape, ojapóva pe Konmemorasión gérra paʼũme ha ojepersegíramo jepe chupekuéra. Tahaʼe haʼéva pe lugár jaikoha térã pe situasión jahasáva, Konmemorasión tiémpope opavave jareko oportunida ñamombaʼeguasúvo Jehovápe ha jahechaukávo ñamombaʼeha Jesús sakrifísio.