1, 2. a) ¿Mbaʼe ehémplopa Jesús omombeʼu iñamigokuérape? (Ehecha pe taʼanga oĩva iñepyrũme.) b) ¿Mbaʼépa ñahesaʼỹijóta ko artíkulope?

JESÚS oñemongeta hína Pedro, Andrés, Santiago ha Juan ndive peteĩ mbaʼe iñimportántevare. Omombeʼu chupekuéra mbohapy parávola: pe oñeʼẽva pe tembiguái jeroviaháre, umi 10 kuñataĩre ha umi taléntore. Upéi omombeʼu iñamigokuérape ótro ehémplo: pe oñeʼẽva umi ovecha ha kavaráre. Heʼi chupekuéra “pe Yvypóra Raʼy” ou vaʼerãha ohusga hag̃ua “opa tetãnguéra”. Jesús heʼi oseparataha yvyporakuérape dos grúpope, peteĩ grúpo oñekompara umi ovecháre ha pe ótro katu umi kavaráre. Péro upéi oñeʼẽ avei ótro grúpo iñimportántevare: pe Rréi ‘ermanokuéra’ (elee Mateo 25:31-46).

² Jehová puévlope siémpre ointeresa pe parávola oñeʼẽva umi ovecha ha kavaráre, pórke ohechauka mbaʼeichagua persónapa ojesalváta. Ko ehémplope Jesús heʼi oĩtaha peteĩ grúpo oikovétava opa ára g̃uarã, ha ótro grúpo oñehundítava. Upévare tekotevẽ ñantende porã mbaʼépa heʼise ko parávola ha jaikuaa mbaʼépa jajapo vaʼerã jahupyty hag̃ua pe jeikove opaʼỹva.  Ko artíkulope ñahesaʼỹijóta koʼã porandu: ¿Mbaʼéichapa Jehová ñanepytyvõ ñantende hag̃ua ko ehémplo? ¿Mbaʼéicha rupípa jaikuaa ko parávola ohechaukaha pe predikasión iñimportantetereiha? ¿Mávapepa oñemeʼẽ pe rresponsavilida opredika hag̃ua? Ha ¿mbaʼérepa koʼág̃ama jahechauka vaʼerã ñaneñeʼẽrenduha pe ‘Rréipe’ ha ‘iñermanokuérape’?

3, 4. a) ¿Mbaʼépa jaikuaa vaʼerã ñantende hag̃ua pe parávola oñeʼẽva umi ovecha ha kavaráre? b) ¿Mbaʼépa heʼi rakaʼe pe ehémplore rrevísta Ñemañaha osẽ vaʼekue áño 1881-pe?

³ Ñantende hag̃ua mbaʼépa heʼise pe parávola oñeʼẽva umi ovecha ha kavaráre, jaikuaa vaʼerã mbohapy mbaʼe: Primero, mávapa pe “yvypóra Raʼy” térã pe “Rréi”, mávapepa orrepresenta umi ovecha ha kavara, ha mávapa pe Rréi ‘ermanokuéra’. Segundo, jaikuaa vaʼerã arakaʼépa pe “yvypóra Raʼy” oseparáta, térã ohusgáta umi héntepe odesidi hag̃ua mávapa ovecha térã kavara. Tercero, ñantende vaʼerã mbaʼérepa algúnope oñekompara ovecháre ha ótrope katu kavaráre.

⁴ Áño 1881-pe rrevísta Ñemañaha, upérõ oĩ vaʼekue ingléspente, heʼi kuri pe “yvypóra Raʼy” térã pe “Rréi”, haʼeha Jesús. Avei heʼi pe Rréi ‘ermanokuéra’ orrepresentaha umi ogovernátavape Jesús ndive yvágape ha avei umi yvypóra perfékto oikótavape ko yvy ape ári. Pe rrevísta oexplika kuri Cristo ogoverna aja Mil Áñore ojeseparataha umi persónape, ojeseparaháicha umi ovecha ha kavara. Umi oporohayhúva Ñandejáraicha haʼéta hína umi oñekomparáva ovecháre.

5. ¿Mbaʼéichapa oexplika pe parávola rrevísta Ñemañaha osẽ vaʼekue 1923-pe?

⁵ Ohasávo pe tiémpo, Jehová ñanepytyvõ ñantende porãve hag̃ua pe parávola. Por ehémplo, rrevísta Ñemañaha 15 de octubre de 1923, heʼi jey vaʼekue Jesús haʼeha pe “yvypóra Raʼy”. Péro oipuru heta téxto ohechauka hag̃ua Cristo ermanokuéra haʼeha umi ogovernátava hendive yvágape, ha umi ovecha haʼeha umi oikótava ko yvy ape ári Jesús goviérno poguýpe. ¿Oñemombeʼúpa raʼe upe rrevístape arakaʼépa ojeseparáta umi ovecha ha kavara? Si, oñemombeʼu. Pe parávola ohechauka oĩtaha persóna oipytyvõ meméva Cristo ermanokuérape, ha oĩtaha avei umi ndoapojáiva chupekuéra. Upévare ojehusgáta, térã ojeseparáta koʼã persónape umi unhído oikove aja gueteri ko yvy ape ári, oho mboyve yvágape ogoverna hag̃ua Cristo ndive Mil Áñore. Ha ¿mbaʼérepa algúnope oñekompara ovecháre? Pórke haʼekuéra ojerovia Jesúsre ha oguerovia Igoviérno oguerutaha heta mbaʼe porã yvyporakuérape g̃uarã.

6. ¿Mbaʼéichapa oñemyesakã porã áño 1995-pe pe parávola oñeʼẽva umi ovecha ha kavaráre?

⁶ Heta tiémpore ñapensa vaʼekue pe predikasión rupive ojehusgaha umi héntepe koʼã ára pahápe. Ñaimoʼã kuri umi persóna oaseptáva pe marandu porã haʼeha ovecha, péro umi orrechasáva katu haʼeha kavara. Péro upéi, La Atalaya  15 de octubre de 1995-pe oñemyesakã porã ko parávola. Ko rrevístape osẽ mokõi artíkulo okomparáva Jesús heʼi vaʼekue Mateo 24:29-31-pe (elee) ha Mateo 25:31, 32-pe (elee). * Pe primer artíkulo heʼi arakaʼépa ojehusgáta umi ovecha ha kavarápe: “Upéva oikóta oñepyrũ rire pe jehasa asy oñeʼẽha Mateo 24:29, 30, ha pe Yvypóra Raʼy ou vove ‘tekomimbipa reheve’.  [...] Upéicharõ, oñemohuʼãvo pe jehasa asy guasu, Jesús ohusgáta umi héntepe ha odesidíta mávapa ovecha ha mávapa kavara. Upéi orrekompensáta umi ovechápe ha ohundíta umi kavarápe”.

7. ¿Mbaʼéichapa oñentende koʼág̃a pe ehémplo oñeʼẽva umi ovecha ha kavaráre?

⁷ Koʼág̃a ñande ñantende porãma pe ehémplo oñeʼẽva umi ovecha ha kavaráre. Jaikuaáma pe “Yvypóra Raʼy” térã pe “Rréi” orrepresentaha Jesúspe. Pe Rréi ‘ermanokuéra’ katu haʼe hína umi unhído ogovernátava hendive yvágape (Rom. 8:16, 17). Ha “umi ovecha” ha “kavara” orrepresenta umi persóna opa tetãyguápe. ¿Arakaʼépa ojehusgáta yvyporakuérape? Oñemohuʼãvo pe jehasa asy guasu og̃uahẽtava koʼẽrõitéma. Ha ¿mbaʼérepa algúnore ojeʼéta haʼeha ovecha ha ótrore kavara? Ojerekóta rupi enkuénta mbaʼéichapa otrata hikuái Cristo ermanokuérape oĩ aja ko yvy ape ári. Jahechaháicha, oñemoag̃uivévo ohóvo pe fin, Jehová omyesakãve ñandéve mbaʼépa heʼise umi ehémplo oĩva Mateo kapítulo 24 ha 25-pe. ¡Ajépa jaagradesete chupe!

8, 9. ¿Mbaʼérepa Jesús heʼi ‘hekojojaha’ umi persóna oñekomparáva ovecháre?

⁸ Jesús ndeʼíri kuri mbaʼeve pe predikasiónre omombeʼúrõ guare pe ehémplo oñeʼẽva umi ovecha ha kavaráre. ¿Mbaʼére piko upéicharõ jaʼe ko parávola ohechaukaha pe predikasión iñimportantetereiha?

⁹ Primero, ñanemanduʼa vaʼerã Jesús omoĩnte hague peteĩ ehémplo oñeʼẽrõ guare umi ovecha ha kavaráre. Upérõ haʼe ndeʼiséi kuri avei umi persóna oñekomparáva ovecháre tekotevẽha omongaru ha omboao Cristo ermanokuérape, ovisita chupekuéra oĩramo kárselpe térã oñangareko hesekuéra hasy jave. Upéva rangue, pe ehémplo rupive ohechauka mbaʼéichapa umi persóna oñekomparáva ovecháre otrata vaʼerã umi unhídope. Avei Jesús heʼi haʼekuéra ‘hekojojaha’, pórke orrekonose hikuái oĩha gueteri kristiáno unhído ko yvy ape ári, ha ombaʼapo meme hendivekuéra koʼã ára pahápe (Mat. 10:40-42; 25:40, 46; 2 Tim. 3:1-5).

10. ¿Mbaʼéichapa “umi ovecha” ikatu oipytyvõ Cristo ermanokuérape?

¹⁰ Segundo, ñanemanduʼa vaʼerã avei mbaʼéicha rupípa Jesús omeʼẽ vaʼekue ko ehémplo. Haʼe omombeʼúrõ guare ko parávola, oñeʼẽ kuri ipresénsiare ha umi mbaʼe oikótavare hiʼag̃ui vove pe fin (Mat. 24:3). Avei heʼi upe tiémpope ojejapotaha peteĩ tembiapo iñimportantetereíva: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári” (Mat. 24:14). Péro oñeʼẽ mboyve umi ovecha ha kavaráre, Jesús omombeʼu kuri pe ehémplo oñeʼẽva umi taléntore. Jahecha haguéicha pe ótro artíkulope, Jesús oipuru pe ehémplo ohechauka hag̃ua ‘iñermanokuéra’ unhídope ombaʼapo meme vaʼerãha predikasiónpe. Péro, ¿mbaʼéicha piko umi mbovymi unhído oĩva ko yvy ape ári Cristo presénsia aja ikatúta opredika “oparupiete” pe fín og̃uahẽ mboyve? Pe parávola oñeʼẽva umi ovecha ha kavaráre ohechauka umi ovecha oipytyvõtaha pe Rréi ermanokuérape. ¿Mbaʼéichapa oikóta upéva? “Umi ovecha” oapoja meméta chupekuéra predikasiónpe. ¿Heʼisépa upéva okontrivuitanteha pláta térã oguerohorytanteha chupekuéra itraváhore?

11. ¿Mbaʼépa ikatu algúno oñeporandu, ha mbaʼérepa?

¹¹ Ñane tiémpope oĩma haimete 8 millón  testígo de Jehová, péro la majoría ndahaʼéi unhído. Upévare Jesús nonkargái chupekuéra umi talénto onkarga haguéicha hembiguaikuéra unhídope (Mat. 25:14-18). Upéicha rupi ikatu oĩ oñeporandúva: “¿Tekotevẽpa che apredika ndahaʼéiramo jepe peteĩ kristiáno unhído?”. Si, tekotevẽ. Jahechamína mbaʼérepa ikatu jaʼe upéva.

12. ¿Mbaʼépa ohechauka ñandéve Mateo 28:19, 20?

¹² Jesús heʼi vaʼekue entéro idisípulo opredika vaʼerãha. Oikove jey rire, Jesús heʼi isegidorkuérape ojapo vaʼerãha disípulo ha omboʼe vaʼerã chupekuéra iñeʼẽrendu hag̃ua. Okumpli vaʼerã hikuái “opa mbaʼe” haʼe omanda vaʼekue, por ehémplo pe predikasión (elee Mateo 28:19, 20). Upéicharõ, entéro kristiáno, tahaʼe umi ohótava yvágape térã oikótava ko yvy ape ári, opredika vaʼerã (Hech. 10:42).

13. ¿Mbaʼépa ohechauka pe visión ohecha vaʼekue Juan?

¹³ Lívro de Apocalipsis ohechauka ndahaʼeiha umi unhídonte la opredikáva. Apóstol Juan ohecha peteĩ visiónpe peteĩ “nóvia” oinvitáva umi héntepe hoʼu hag̃ua “pe y oporomoingovévagui”. Pe nóvia orrepresenta umi 144.000 unhído ogovernátava Jesús ndive yvágape (Apoc. 14:1, 3; 22:17). “Pe y” orrepresenta opa mbaʼe Jehová ojapo vaʼekue Jesús sakrifísio rupive omosãso hag̃ua yvyporakuérape pekádo ha ñemanógui (Mat. 20:28; Juan 3:16; 1 Juan 4:9, 10). Umi unhído omboʼe umi héntepe mbaʼépa ikatu jahupyty Jesús omano rupi ñanderehehápe, ha mbaʼépa jajapo vaʼerã ñañevenefisia hag̃ua chugui (1 Cor. 1:23). Péro pe visiónpe ohechauka avei oĩha ótro grúpo ndahaʼéiva unhído, oikótava opa árare ko yvy ape ári, ha chupekuéra oñemanda avei heʼi hag̃ua “¡Eju!”. Koʼã kristiáno iñeʼẽrendu ha  omboʼe umi héntepe pe marandu porã. Upéicharõ, ko visión ohechauka opavave oaseptáva pe invitasión opredika vaʼerãha avei.

14. ¿Mbaʼépa jajapo vaʼerã ñakumpli hag̃ua “Cristo Léi”?

¹⁴ Opavave osegiséva “Cristo Léi” opredika vaʼerã (Gál. 6:2). Jehová omoĩ peteĩ Léinte entéro isiervokuérape g̃uarã. Upévare heʼi vaʼekue umi isrraelítape: “Peteĩ Léinte oĩ peẽme g̃uarã ha avei umi extranhérope g̃uarã oikóva pende apytépe” (Éx. 12:49, NM; Lev. 24:22). Añetehápe ningo, ñande kristiáno nañaimevéima pe Léi Mosáika poguýpe, péro enterovéva ñakumpli vaʼerã “Cristo Léi”, tahaʼe unhído, térã ambue ovechakuéra. Upe Léipe oikepaite opa mbaʼe Jesús omboʼe vaʼekue. Ha peteĩ enseñánsa iñimportantetereíva haʼe hína pe mborayhu ohechauka vaʼerã idisipulokuéra (Juan 13:35; Sant. 2:8). Ñapensamína: ¿Mbaʼéichapa ikatu jahechauka jahayhuha ñande pyʼaite guive Ñandejárape, Crístope ha ñande rapichakuérape? Japredikávo pe marandu porã oñeʼẽva pe Rréinore (Juan 15:10; Hech. 1:8).

15. ¿Mbaʼérepa jaʼekuaa Jesús omanda hague entéro idisípulope opredika hag̃ua?

¹⁵ Heta vése umi mbaʼe Jesús heʼíva peteĩ grúpope ohupyty avei hetave disípulope. Por ehémplo, Jesús ojapórõ guare pe pákto del Rréino, oĩ kuri hendive umi 11 apóstol, péro ndahaʼéi hendivekuérante ojapóva pe kompromíso. Pe páktope oike 144.000 unhído (Luc. 22:29, 30; Apoc. 5:10; 7:4-8). Péicha avei, Jesús oikove jey rire, mbovymínte idisípulo ohendu chupe heʼívo ojepredika vaʼerãha (Hech. 10:40-42; 1 Cor. 15:6). Upéicharõ jepe, enterove kristiáno primer síglope guare okumpli upe mandáto (Hech. 8:4; 1 Ped. 1:8). Ñande avei nañahendúi kuri haʼe omandávo ojepredika vaʼerãha, péro ñaiméma haimete 8 millón Testígo ñamombeʼúva opárupi pe marandu porã. ¿Mbaʼérepa jajapo ko tembiapo? Péicha jahechauka hína jajeroviaha Jesús rehe ñande pyʼaite guive (Sant. 2:18).

16-18. a) ¿Mbaʼéichapa ikatu ñaipytyvõ Cristo ermanokuérape? b) ¿Mbaʼérepa iñimportánte jaapoja koʼág̃ama voi umi unhídope?

¹⁶ Satanás oikuaa porã “mbykypaitemaha itiémpo”, upévare amáske ohasa pe tiémpo oataka mbareteve Cristo ermanokuérape, oĩva gueteri ko yvy ape ári (Apoc. 12:9, 12, 17). Upéicharõ jepe, umi unhído osegi ombaʼapo meme ha omoakã ko tembiapo tuichaitéva ikatu hag̃uáicha oñemog̃uahẽ pe marandu porã heta hetave persónape. Añetehápe ojekuaa porãiterei Cristo odirihi ha ovendesiha koʼã unhídope ombaʼapo meme haguére (Mat. 28:20).

¹⁷ Ñande ningo jareko pe priviléhio ñaipytyvõvo Cristo ermanokuérape, péro ndahaʼéi pe predikasión rupivénte. Por ehémplo, ikatu ñakontrivui pláta ha ñaipytyvõ oñemopuʼã hag̃ua umi Salón del Reino, Salón de Asambléa ha sukursál. Avei jahechauka hína jaapojaha umi unhídope jarrespeta ha ñaneñeʼẽrendúvo ansianokuérape ha ambue ermáno onombra vaʼekuépe “pe tembiguái jeroviaha ha iñarandúva” (Mat. 24:45-47; Heb. 13:17).

¹⁸ Koʼẽrõitéma Cristo ermanokuéra oĩva ko yvy ape ári orresivíta pe último séllo. Upéi umi ánhel opoíta “umi cuatro yvytu ko yvy arigua” ha oñepyrũta pe jehasa asy guasu (Apoc. 7:1-3). Pe Armagedón oñepyrũ mboyve, Jesús oguerahapátama umi unhídope yvágape (Mat. 13:41-43). Jaipotáramo Jesús ñanekompara ovecháre ñandehusga vove, koʼág̃ama ñaneñeʼẽrendu ha ñaipytyvõ meme vaʼerã iñermanokuérape.