1-3. ¿Mbaʼérepa Pablo oikuaa porã vaʼekue ikatuha ojerovia Jehováre? (Ehecha pe taʼanga oĩva iñepyrũme.)

UMI kristiáno oiko vaʼekue síglo primérope Rómape, ohasa kuri heta mbaʼe ijetuʼuetereíva. Umi rrománo opersegi ha omaltrata chupekuéra. Áño 64-pe omboja hesekuéra ohapyha pe siuda ha ndaijaʼeiha umi héntere. Heta kristiánope omoinge hikuái kárselpe ha algúnope opoi umi mymba ñarõme hoʼu hag̃ua chupekuéra. Ótrope katu oklava yvyráre ha ohapy chupekuéra vívo ohesape hag̃ua pyharekue pe siuda. Umi kristiáno oikuaa porã koʼã mbaʼe ikatuha ohupyty chupekuéra oimeha óra.

² Upe tiémpo ijetuʼuetévape, umi rrománo ogueraha préso apóstol Páblope. Haʼe oiméne oñeporandu raʼe ohótapa umi ermáno hendápe. ¿Mbaʼérepa oipyʼapy chupe upéva? Pórke una ves ohóma voi kuri préso ha avave noipytyvõi chupe. Upévare ohai Timotéope: “Ajegueraha ypýrõ guare añedefende hag̃ua pe trivunál renondépe, avave ndohói chendive”. Upéicharõ jepe, Pablo orrekonose Jesús oipytyvõ ha omombarete hague chupe upérõ. Heʼi  voi osalva hague chupe “pe león jurúgui” (2 Tim. 4:16, 17). *

³ Apóstol Pablo oikuaa porã vaʼekue ikatuha ojerovia Jehováre. ¿Mbaʼérepa? Pórke imanduʼa Ñandejára oipytyvõma hague voi chupe ymave. Haʼe ningo ojeroviaiterei Jehová omombaretetaha chupe oaguanta hag̃ua upe provléma ohasáva hína ha oimeraẽ ótro provléma oñepresentáva. Upévare heʼi: “Ñande Ruvicha chesalváta opa mbaʼe vaígui” (2 Tim. 4:18). Umi ermáno ndohóiramo jepe hendápe, Pablo ni michĩmi ndodudái Jehová ha Jesús katuete oipytyvõtaha chupe.

4, 5. a) ¿Mávapa ñanepytyvõta ñañeñandu jave ñaneaño? b) ¿Mbaʼéichapa ikatu remombareteve ne amista Jehovándi?

⁴ ¿Reñeñandúpa sapyʼánte neaño rehasa jave peteĩ situasión ijetuʼúva? Ikatu oime reperde nde traváho, rereko provléma eskuélape térã koléhiope, nderasykatu térã ereko ótro provléma. Ha ikatu reñembyasy rehechávo avave nanepytyvõiha. Péro jaikuaaháicha, oĩ voi umi provléma yvypóra ndaikatumoʼãiva osolusiona. ¿Mbaʼépa ikatu rejapo upéicha jave? La Biblia ñanemokyreʼỹ ‘jajerovia hag̃ua Jehováre’ (Prov. 3:5, 6, NM). ¿Ikatúpa jajerovia hese? Si ikatu. La Biblia omombeʼu heta istória ohechaukáva Ñandejára añetehápe oipytyvõha isiervokuérape.

⁵ Oiméramo neprovléma ha avave nanepytyvõi, ani rejepyʼapy. Esegi Pablo ehémplo ha eaprovecha upéva rehechauka hag̃ua rejeroviaha Jehováre nde pyʼaite guive. Eaprovecha avei upe situasión rekomprova hag̃ua mbaʼéichapa Ñandejára oñangareko nderehe rehasa jave umi mbaʼe ijetuʼúva. Umíva katuete omombaretéta nde jerovia ha ne amista Jehovándi.

6. ¿Mbaʼérepa ikatu sapyʼánte ijetuʼu ñandéve ñakonfia hag̃ua Jehováre?

⁶ Ñamoĩ chupe erekoha peteĩ provléma ijetuʼúva ha ndepyʼapyetereíva. Rejapóma opa ikatúva resolusiona hag̃ua ha rejeruréma avei Jehovápe nepytyvõmi hag̃ua. Upéicharõ, natekotevẽvéima rejepyʼapyeterei. Ejerovia vaʼerã Ñandejára katuete nepytyvõtaha (elee Salmo 62:8 ha 1 Pedro 5:7). Reikosérõ Jehová amígoramo, rekonfia vaʼerã hese nde pyʼaite guive. Péro upéva heta vése ijetuʼu ñandéve. ¿Mbaʼérepa? Pórke sapyʼánte haʼe nokontestapyaʼéi ñane ñemboʼe (Sal. 13:1, 2; 74:10; 89:46; 90:13; Hab. 1:2).

7. ¿Mbaʼérepa sapyʼánte Jehová nokontestái ensegída ñane ñemboʼe?

⁷ ¿Mbaʼérepa sapyʼánte Jehová nokontestái ensegída ñaneñemboʼe? Ñantende hag̃ua upéva, iporã ñanemanduʼa la Biblia okomparaha Ñandejárape peteĩ túvare (Sal. 103:13). Umi túva ningo nomeʼẽi ifamíliape opa mbaʼe ojeruréva chupe. Ha omeʼẽtaramo jepe, hetave vése ohaʼarõʼimi omeʼẽ hag̃ua. Sapyʼánte avei umi mitã ojerure peteĩ mbaʼe ha sapyʼaitérõ g̃uarã ndoipotavéima. Umi túva oikuaa avei oĩ porãpa hína pe ifamília ojeruréva, térãpa operhudikáta chupe térã ótrope. Avei tuvakuéra siémpre omeʼẽramo ifamíliape opa mbaʼe ojeruréva, haʼetéta hikuái ifamília esklávo. Umi túva ningo oikuaa porã mbaʼépa oikotevẽ ifamília ha arakaʼépa iporãvéta omeʼẽ chupe. Jehová upeichaite avei. Haʼe ningo ñanderayhueterei, oikuaa mbaʼépa ñaikotevẽ, ha mbaʼe moméntopepa iporãvéta omeʼẽ ñandéve. Upévare, ñahaʼarõkuaa vaʼerã ha jahecháta mbaʼéichapa haʼe okontesta ñandéve ñane ñemboʼe (embojoja Isaías 29:16 ha 45:9 heʼívare).

8. ¿Mbaʼépa Jehová opromete ñandéve?

⁸ Ñanemanduʼa vaʼerã avei Jehová oikuaaha moõ pevépa káda uno ikatu ñaaguanta  (Sal. 103:14). Haʼe katuete ñanemombarete ñaikotevẽ jave. Sapyʼánte ikatu ijetuʼueterei umi mbaʼe ñambohováiva ha ñañandu ndajagueropuʼakaveimaha. Péro Ñandejára opromete ñanepytyvõtaha oiméramo ipohyieterei ñandéve ñane provléma. La Biblia heʼi voi haʼe ‘ohechaukataha ñandéve mbaʼéichapa ñasẽta chugui’ (elee 1 Corintios 10:13). Jehová ningo oikuaa porã moõ pevépa ikatu jagueropuʼaka, ha upéva tuichaiterei ñanembopyʼaguapy.

9. ¿Mbaʼépa rejapo vaʼerã Jehová nokontestapyaʼéiramo ne ñemboʼe?

⁹ Aníkena rejepyʼapy Jehová nokontestapyaʼéiramo ndéve ne ñemboʼe. Ehechauka vaʼerã ehaʼarõkuaaha. Nemanduʼákena haʼe nepytyvõseha ha ohaʼarõnteha pe moménto okonvenivéva ndéve. La Biblia heʼi Ñandejára ihustoha ha ojesarekoha ñanderehe ikatu hag̃uáicha ‘ñandeporiahuvereko ha ñanepytyvõ’. Ha heʼi avei ‘ovyʼaha umi ojeroviáva Jehováre’ (Is. 30:18, NM).

10-12. a) ¿Mbaʼérepa sapyʼánte ijetuʼu ñañangareko hag̃ua umi ñane hénte hasývare? b) ¿Mbaʼépa jahupytýta ñañemoag̃ui meméramo Jehováre jahasa jave peteĩ situasión ijetuʼúva? Emoĩ peteĩ ehémplo.

¹⁰ Ikatu hína rehasa peteĩ provléma ijetuʼuetereíva, ha Pábloicha reikotevẽ ndesalváva “pe león jurúgui” (2 Tim. 4:17). ¿Mbaʼépa rejapo vaʼerã upéicha jave? Tekotevẽterei rejerovia Jehováre. Por ehémplo, ikatu oime reñangareko hína peteĩ ne hénte hasývare, ha rejeruréma Ñandejárape tanepytyvõ regueropuʼaka hag̃ua upe situasión ha redesidi porã hag̃ua. * Jehová ningo ontende umi mbaʼe rehasáva, ha katuete nepytyvõta reaguanta hag̃ua ha resegi hag̃ua reservi porã chupe (Sal. 32:8). Upévare, aníkena rejepyʼapyeterei reiméramo koichagua situasiónpe.

¹¹ Sapyʼánte ikatu repensa Ñandejára nanepytyvõiha. Por ehémplo, ikatu umi doktór noñemoĩri peteĩ ñeʼẽme orrekomenda hag̃ua peteĩ tratamiénto ou porãvétava ne hénte hasývape. Térã ne hentekuéra ou rangue nepytyvõ, ombyaiverei hikuái la situasión. Upéicha jave, koʼýte reñemoag̃ui vaʼerã Jehováre ha esegi ejerure chupe nemombaretemi hag̃ua (elee 1 Samuel 30:3, 6). Upéi, rehechakuaa rire mbaʼéichapa Ñandejára nepytyvõ ko situasiónpe, reñemoag̃uivéta hese ha rehecháta haʼeha ne Amígo.

¹² Jahechamína mbaʼépa ohasa peteĩ ermána hérava Linda. * Haʼe heta tiémpore oñangareko itúva ha isýre omano meve hikuái. Ko ermána omombeʼu sapyʼánte iména, iñermáno ha haʼe ndoikuaavéima hague mbaʼépa ojapóta. Heta vése haʼete voi chupekuéra ndogueropuʼakavéimava pe situasión. Péro koʼág̃a ohechakuaa hikuái mbaʼéichapa Jehová oipytyvõ kuri chupekuéra upe tiémpope oaguanta hag̃ua. Linda oĩ segúra Ñandejára omombarete hague chupekuéra upe situasiónpe, koʼýte ndoikuaavéi jave hikuái mbaʼépa ojapóta.

13. ¿Mbaʼéichapa Jehová oipytyvõ peteĩ ermánape ohasárõ guare umi situasión ijetuʼuvéva?

¹³ Ñakonfiáramo Jehováre ñande pyʼaite guive, haʼe katuete ñanepytyvõta ñaaguanta hag̃ua umi provléma ijetuʼuvéva jepe. Peteĩ ermána hérava Rosa ohechakuaa añeteha upéva. Peteĩ día, iména ndahaʼéiva Testígo ojerure chupe pe divórsio, ha upe riremínte oñentera iñermáno orekoha peteĩ mbaʼasy hérava lupus. Mése riremi katu omano iñermáno rembireko. Hoʼa vaipaite  voi ningo chupe. Upéi oñeñandu porãmie rire, ojagarra iprekursorádo rregulár. Upe javete ou omano isy. ¿Mbaʼépa oipytyvõ chupe ogueropuʼaka hag̃ua koʼã situasión ijetuʼuetéva? Oñemboʼe káda día. Oñeʼẽ Ñandejárandi opaite mbaʼe ojapótavare, tahaʼe umi naiñimportanteguasúivare jepe. Rosa omombeʼu Jehová haʼe hague chupe g̃uarã peteĩ Amígo teete. Haʼe ohechakuaa iporãveha ojerovia Ñandejárare, ojerovia rangue ijehénte térã ótra persónare. Avei ohecha mbaʼeichaitépa Jehová oipytyvõ chupe, ha arakaʼeve noñeñandúi desamparáda. Oñandu Ñandejára siémpre oĩha ijykére.

14. ¿Mbaʼéichapa Jehová ikatu nepytyvõ oñemosẽramo peteĩ ne família kongregasióngui?

¹⁴ Oĩ avei ótra situasión ijetuʼuetereíva heta ermánope. Ñamoĩ chupe oñemosẽha kongregasióngui peteĩ ne família. Nde reikuaa porã la Biblia voi heʼiha mbaʼéichapa retrata vaʼerã umi expulsádope (1 Cor. 5:11; 2 Juan 10). Péro nde rehayhu ne famíliape ha repensa voi ijetuʼuetereiha rekumpli hag̃ua upe mandáto. * ¿Mbaʼéichapa Jehová ikatu nepytyvõ upe situasiónpe? Haʼe katuete nemombaretéta neñeʼẽrendu hag̃ua chupe, ha resegi hag̃ua rejapo umi mbaʼe haʼe oguerohorýva. Ekonfiána Ñandejárare ha eaprovecha upe situasión reñemoag̃uive hag̃ua hese.

15. ¿Mbaʼérepa Adán naiñeʼẽrendúi kuri Jehovápe?

¹⁵ Ko situasión ikatu ñakompara Adán ojapo vaʼekuére. ¿Mbaʼérepa haʼe hoʼu pe yva omeʼẽ vaʼekue chupe Eva? ¿Opensápa raʼe ikatutaha osegi oikove naiñeʼẽrendúiramo jepe Jehovápe? Nahániri. La Biblia heʼi “Adánpe noñembotavýi” hague (1 Tim. 2:14).  ¿Mbaʼérepa upéicharõ ohendu hembirekópe, ojapo rangue Ñandejára heʼíva? Pórke Adán ohayhuve hembirekópe Jehovápe rangue (Gén. 3:6, 17). ¿Mbaʼépa ñaaprende upe oiko vaʼekuégui?

16. ¿Mávapepa jahayhuve vaʼerã, ha mbaʼérepa?

¹⁶ Adán rehe oiko vaʼekue ohechauka ñandéve jahayhúramo jepe ñane héntepe, jahayhuve vaʼerãha Jehovápe (elee Mateo 22:37, 38). ¿Mbaʼérepa? Pórke jahechaukáramo jahayhuveha Ñandejárape, ñaipytyvõvéta ñane hentekuérape, tahaʼe umi oservívape Jehovápe, umi ndahaʼéivape Testígo, térã umi expulsádope. Upévare, eñehaʼãkena rehayhuve Ñandejárape káda día ha ekonfia hese nde pyʼaite guive. Oiméramo peteĩ ne família ojexpulsa raʼe ha rejepyʼapy hína upévare, emombeʼu Jehovápe mbaʼéichapa reñeñandu (Rom. 12:12; Filip. 4:6, 7). * Ñanembosufríramo jepe ko situasión, jaaprovecha vaʼerã ñamombareteve hag̃ua ñane amista Jehovándi. Péicha rejeroviavéta hese ha rehecháta opa mbaʼe osẽ porãveha neñeʼẽrendu rupi chupe.

17. ¿Mbaʼéichapa ñanepytyvõta japredika meméramo?

¹⁷ ¿Mbaʼérepa Jehová osalva rakaʼe Páblope “pe león jurúgui”? Haʼe heʼi: “Ñande Ruvicha oĩ che ykére ha chemombarete, ikatu hag̃uáicha che apredika hekoitépe” (2 Tim. 4:17). “Ñande ningo Ñandejára ajudánte” avei ha haʼe omanda ñandéve ‘japredika hag̃ua umi marandu porã’ (1 Cor. 3:9; 1 Tes. 2:4). Ñasẽ meméramo predikasiónpe, Jehová katuete omeʼẽta ñandéve opa mbaʼe ñaikotevẽva (Mat. 6:33). Upéicha avei, ifasilvéta ñandéve ñahaʼarõ hag̃ua Ñandejára okontesta peve ñane ñemboʼe.

18. ¿Mbaʼépa jajapo vaʼerã jasegi hag̃ua jaiko Jehová amígoramo ha jajeroviave hag̃ua hese?

¹⁸ Eñehaʼãkena káda día emombareteve ne amista Jehovándi. Oñepresentáramo peteĩ provléma ijetuʼuetereíva, eaprovechákena upéva reñemoag̃uive hag̃ua Jehováre. Relee ha restudia vaʼerã la Biblia ha eñemotiémpo rejepyʼamongeta hag̃ua hese. Esegíkena eñemboʼe ha embaʼapo meme Jehová servísiope. Rejapóramo koʼã mbaʼe, katuete Jehová nepytyvõta rembohovái hag̃ua umi provléma rerekóva koʼág̃a ha umi ikatúva oñepresenta amo gotyove.