1, 2. ¿Mbaʼéichapa ojepuru jepi pe palávra “pyrenda” Escrituras Hebréaspe?

JEHOVÁ heʼi vaʼekue: “Yvága che guapyha ha yvy che pyrenda” (Is. 66:1). Ha heʼi avei: “Amoporãta che pyrenda” (Is. 60:13, NM). ¿Mbaʼéichapa Jehová omoporã ‘ipyrenda’? ¿Mbaʼéichapa upéva ovenefisia entéro oikóvape ko yvy ape ári?

² Escrituras Hebréaspe pe palávra “pyrenda” ojepuru jepi oñeñeʼẽ jave Israel témplore (1 Crón. 28:2; Sal. 132:7). Pe témplo ningo iporãiterei vaʼekue Jehovápe g̃uarã, pórke isiervokuéra oho upépe oadora hag̃ua chupe.

3. a) ¿Mbaʼéichapa jaadora Jehovápe koʼã tiémpope? b) ¿Arakaʼe guivépa oĩ pe témplo espirituál?

³ Ñane tiémpope ndojeadoravéima Jehovápe peteĩ témplo tuichávape yma ojejapo haguéicha, síno peteĩ “témplo espirituálpe”. ¿Mbaʼépa pe témplo espirituál? Upéva haʼe hína umi médio Ñandejára oprepara vaʼekue ikatu hag̃uáicha ñande yvypóra jaadora chupe ha jaiko iñamígoramo. Ko vendisión jahupyty Jesús omano haguére ñanderehehápe. ¿Arakaʼe guivépa oĩ pe témplo espirituál? Pe témplo espirituál oñeforma áño 29 guive, Jesús ojevautisárõ guare ha ojeporavo  oservi hag̃ua kómo Saserdóte Prinsipál Jehová témplo espirituálpe (Heb. 9:11, 12).

4, 5. a) ¿Mbaʼépa ojapo vaʼerã Jehová siervokuéra heʼiháicha Salmo 99? b) ¿Mbaʼépa ñañeporandu vaʼerã?

⁴ ¡Ajépa jaagradesete Jehovápe oprepara haguére ñandéve umi médio ikatu hag̃uáicha jaadora chupe! Péro, ¿mbaʼéichapa ikatu jahechauka ñandeagradesidoha hendive? Ñamombeʼúvo umi héntepe Ñandejára heraha Jehová, ha haʼe ombou hague Itaʼýra Jesúspe omano hag̃ua ñanderehehápe. Koʼág̃a ningo oĩma mas de ocho millón de Testígo ko yvy tuichakuére ombotuicháva Jehovápe koʼẽ koʼẽre. Péro oĩ heta persóna ndojapóiva upéva, pórke oimoʼã omano rire ohotaha yvágape ha upépe ae omombaʼeguasutaha Ñandejárape. Ñande katu jaikuaa porã koʼág̃ama jaadora vaʼerãha Jehovápe.

⁵ Jaadora jave Jehovápe jajapo hína Ñandejára siervokuéra yma guare ojapo haguéicha. Por ehémplo Moisés, Aarón ha Samuel oaprovecha vaʼekue umi médio Jehová omoĩva ojeadora hag̃ua chupe (elee Salmo 99:1-3, 5-7). Ñane tiémpope oĩ mokõi grúpo omombaʼeguasúva Jehovápe oñondive. Pe primer grúpo haʼe hína umi unhído ohótava yvágape oservi hag̃ua kómo saserdóte Jesús ndive, péro koʼág̃a oservi hikuái ko yvy ape ári. Pe segundo grúpo katu haʼe umi “ambue ovechakuéra” oipytyvõ meméva umi kristiáno unhídope (Juan 10:16). Upéicharõ, káda uno ñañeporandu vaʼerã: “¿Aaprovecha porãpa hína umi médio Ñandejára omoĩva aadora hag̃ua chupe?”.

6, 7. a) ¿Mbaʼépa oiko oñeforma rire pe kongregasión kristiána? b) ¿Mbaʼépa hesakãma áño 1919-pe g̃uarã?

⁶ Apóstol Pablo oprofetisa vaʼekue oĩtaha kristiáno ojerrevelátava ha omboʼétava japu kongregasiónpe (Hech. 20:28-30; 2 Tes. 2:3, 4). Pe kongregasión kristiána oñeforma rire, ndohasái ni 100 áño ha oñekumplíma ko profesía. Upe rire ijetuʼu kuri ojekuaa hag̃ua máva mávapa oservi Jehovápe haʼe oipotahaichaite. Péro heta año rire, Jehová ojevale Jesucrístore ohechauka hag̃ua mávapa añetehápe oaprovecha umi médio haʼe oprepara vaʼekue ojeadora hag̃ua chupe.

⁷ Áño 1919-pe g̃uarã hesakã porãma máva mávapa oreko Jehová aprovasión. Umi kristiáno okambia kuri heta mbaʼépe ikatu hag̃uáicha oadora Jehovápe haʼe oipotahaichaite (Is. 4:2, 3; Mal. 3:1-4). Upe guive oñepyrũ oñekumpli peteĩ visión ohecha vaʼekue Pablo. Ñañeʼẽmína upévare.

8, 9. ¿Mbaʼépa “pe paraíso” Pablo ohecha vaʼekue?

⁸ Jehová podér rupive, Pablo ohecha peteĩ mbaʼe oikótava tenonderãme (elee 2 Corintios 12:1-4). Pe visiónpe ojehechauka chupe pe tercer siélo, ha upépe ohecha “pe paraíso”. ¿Mbaʼépa pe paraíso? Ikatu hína osignifika mbohapy mbaʼe. Primero, pe paraíso térã hardín koʼẽrõite oĩtava ko yvy ape ári (Luc. 23:43). Segundo, pe paraíso espirituál perfékto oĩtava pe múndo pyahúpe. Ha tercero, ‘Ñandejára paraíso’ térã umi mbaʼe porãita oikóva yvágape (Apoc. 2:7, nóta).

⁹ ¿Mbaʼérepa Pablo heʼi ohendu hague “ñeʼẽ ikatuʼỹva oñemombeʼu ha ndovaléiva  peteĩ kuimbaʼe heʼi”? Pórke upérõ guare ndahaʼéi gueteri tiémpo oikuaauka hag̃ua umi mbaʼe porãita ohecha vaʼekue pe visiónpe. Péro ñane tiémpope, ñande jaservíva Jehovápe ikatúma ñamombeʼu umi héntepe umi mbaʼe porãita jahupytýva Ñandejára puévlope.

10. ¿Idiferéntepa pe paraíso espirituál pe témplo espirituálgui?

¹⁰ Ñane puvlikasionkuéra pyʼỹinte oñeʼẽ pe paraíso espirituálre. Péro, ¿idiferéntepa pe paraíso espirituál pe témplo espirituálgui? Si, idiferénte. Jahecha haguéicha, pe témplo espirituál haʼe hína umi médio Jehová oprepara vaʼekue ikatu hag̃uáicha jaadora chupe. Péro pe paraíso espirituál katu haʼe pe pyʼaguapy ha unida oĩva Jehová puévlope. Ko paraíso rupive ojekuaa porã mávapa oreko Ñandejára aprovasión ha oservi chupe haʼe oipotahaichaite (Mal. 3:18).

11. ¿Mbaʼe priviléhiopa jareko koʼág̃a?

¹¹ Áño 1919 guive Jehová ojevale yvyporakuéra imperféktore oñangareko, omombareteve ha ombotuicha hag̃ua pe paraíso espirituál. ¡Ajépa ñanemokyreʼỹete upéva! Péro iporã ñañeporandu: “¿Añehaʼãmbaitépa hína ikatu hag̃uáicha amoporãve pe paraíso espirituál? ¿Amombaʼépa pe priviléhio ikatu haguére ambotuicha Jehovápe?”.

12. ¿Mbaʼérepa jaʼekuaa oñekumpliha hína pe profesía oĩva Isaías 60:17-pe? (Ehecha pe taʼanga oĩva iñepyrũme.)

¹² Proféta Isaías heʼi vaʼekue ohasávo pe tiémpo oikotaha heta kámbio Ñandejára organisasiónpe, pe párte oĩvape ko yvy ape ári (elee Isaías 60:17). Umi Testígo ipyahúva Jehová organisasiónpe ha avei umi imitãva, oiméne ohendu oiko hague koʼã kámbio oĩgui omombeʼúva chupekuéra, térã olee rupi umi puvlikasiónpe. Péro oĩ ermáno ijedavéva ohecha vaʼekue koʼã kámbio. Haʼekuéra oĩ konvensído Jehová oipuruha Jesucrístope ogia hag̃ua iñorganisasiónpe. Ñahendúramo chupekuéra oñeʼẽ jave umi kámbiore, katuete jajeroviavéta Jehováre.

13. Heʼiháicha Salmo 48:12-14, ¿mbaʼépa jajapo vaʼerã?

¹³ Entéronte ñañeʼẽ vaʼerã ótrope Jehová organisasiónre. Ko múndo henyhẽramo jepe hénte iñañávagui, oĩ hetaiterei ermáno oikóva peteĩ paraíso espirituálpe oĩháme pyʼaguapy ha unida. Jaʼekuaa upéva haʼeha peteĩ milágro. Upévare iporãitereíta ñañeʼẽramo Ñandejára Rréinore ha pe paraíso espirituálre “umi henerasión oútavape”. Umíva hína umi imitãvéva ha umi ipyahúva Jehová organisasiónpe (elee Salmo 48:12-14).

14, 15. a) ¿Mbaʼe kámbiopa ojejapo 1972 guive? b) ¿Mbaʼérepa umi kámbio ou porã Jehová organisasiónpe?

¹⁴ Heta testígo de Jehová iñexperiensiavéva ohecha mbaʼéichapa umi kámbio omoporãve Ñandejára organisasiónpe ko yvy ape ári. Por ehémplo, ymave káda kongregasión oreko vaʼekue peteĩ siérvo de kongregasión, káda sukursálpe oĩ peteĩ siérvo de sukursál, ha pe séde mundiál katu odirihi vaʼekue pe presidénte de la Sociedad Watch Tower. Koʼã ermáno orekóramo jepe iñajudánte, haʼekuéra jey odesidi vaʼerã opa mbaʼe. Ha upéicha ojejapo vaʼekue káda kongregasiónpe, káda sukursálpe ha pe séde mundiálpe. Péro áño 1972 guive oñekambia upéva, umi  grúpo de ansiáno odesidíma oñondivepa. Por ehémplo, káda kongregasiónpe ogia peteĩ grúpo de ansiáno, káda sukursálpe oĩ peteĩ Komite de Sukursál, ha testígo de Jehová organisasión katu odirihi peteĩ grúpo de ansiáno unhído, oñehenóiva Kuérpo Governánte.

¹⁵ Koʼág̃arupi Jehová organisasión ontende porãve la Biblia, upévare ojejapo umi kámbio tuicha ovenefisiáva entéro oservívape Ñandejárape. Por ehémplo, ojedesidíta jave peteĩ mbaʼe, ndahaʼevéima peteĩ persónante la odesidíva. Entéro umi ansiáno Jehová omeʼẽva “rregáloramo” oñopytyvõ odesidi hag̃ua umi mbaʼe ovenefisiátava ermanokuérape (Efes. 4:8; Prov. 24:6).

16, 17. ¿Mbaʼe kámbiopa ndéve ndegustave, ha mbaʼérepa?

¹⁶ Jahechamína unos kuánto kámbio ojejapo ramovéva Jehová organisasiónpe. Por ehémplo, koʼág̃a ñane puvlikasionkuéra iporãve, isensillove ha oñeʼẽve umi téma ointeresávare umi héntepe. Avei jaipuru Internet japredika hag̃ua. Pe páhina jw.org rupive oñepytyvõ heta persónape ikatu hag̃uáicha oñemoag̃ui Ñandejárare. Opa koʼã kámbio ojejapóva, ohechauka Jehová ohayhu ha ojepyʼapyha umi héntere.

¹⁷ Jaagradeseterei umi kámbio ojejapóva umi rreunionkuérape. Péicha hembyve ñandéve tiémpo jastudia hag̃ua ñane famíliandi ha ñaneañoháme. Avei jaguerohory umi kámbio ojejapóva umi asambleakuérape, iporãvereíva káda áño. Javalora avei opa mbaʼe ñaaprendéva umi eskuéla vívlikape, ojepreparáva ñanembokatupyryve hag̃ua. Koʼã kámbio ohechauka Jehová odirihiha iñorganisasión  ha omoporãveha ohóvo pe paraíso espirituál.

18, 19. ¿Mbaʼépa ikatu jajapo ñamoporãve hag̃ua ñande paraíso espirituál?

¹⁸ Jehová omeʼẽ ñandéve pe priviléhio ikatu hag̃uáicha ñamoporãve pe paraíso espirituál. ¿Mbaʼéichapa ikatu jajapo upéva? Primero, japredika kyreʼỹvo pe notísia porã oñeʼẽva Ñandejára Rréinore, ha ñaipytyvõvo umi héntepe oservi hag̃ua Ñandejárape. Ñaipytyvõ jave ñande rapichakuérape oiko hag̃ua chugui testígo de Jehová, ñambotuichave hína pe paraíso espirituál (Is. 26:15; 54:2).

¹⁹ Segundo, ñañehaʼãmbaitévo ñanekondúkta porã. Umi hénte ohechávo jaikoha kristiáno teéicha, ñanemoirũse avei pe paraíso espirituálpe. Ndahaʼéi voi jaikuaágui heta mbaʼe la Bíbliagui la oikeséva hikuái ñane rrelihiónpe, síno ohechágui ñanekondúkta porãha. Ha upéva avei oipytyvõ chupekuéra oñemoag̃ui hag̃ua Jehová ha Jesúsre.

20. Heʼiháicha Proverbios 14:35, ¿mbaʼépa jajapo vaʼerã?

²⁰ Katuete ningo Jehová ha Jesús ovyʼaiterei ohechávo mbaʼeichaitépa iporã ñande paraíso espirituál. Ñande avei javyʼa ikatu haguére ñaipytyvõ oñemoporãve hag̃ua. Ha javyʼaitevéta jajapo vove ko yvy tuichakuégui peteĩ paraíso neporãva. Proverbios 14:35 heʼi: “Pe rréi ovyʼa isiérvo ohechaukáramo iñaranduha” (NM). Upéicharõ, ñanearandúkena ñande avei ha ñañehaʼã ñamoporãve ñande paraíso espirituál.