1. ¿Mbaʼe tiémpopepa jaiko hína?

KOʼÁG̃A jaiko hína peteĩ tiémpo ‘ijetuʼuetereívape ha hasýva jagueropuʼaka hag̃ua’. Áño 1914 guive oñepyrũma ‘umi ára paha’. Upe rire opa mbaʼénte ivai vaive ohóvo (2 Tim. 3:1-5). Ha jaikuaa porã la situasión nomehoramoʼãiha, pórke la Biblia heʼi voi ‘umi kuimbaʼe aña ha hovamokõiva oho vai vaive vaʼerãha’ (2 Tim. 3:13).

2. ¿Mbaʼéichapa oñentretene jepi heta hénte koʼág̃arupi? (Ehecha pe taʼanga oĩva iñepyrũme.)

² Koʼág̃arupi heta hénte oñentretene umi mbaʼe Jehovápe ndogustáivare, umíva apytépe pe violénsia, inmoralida sexuál, máhia ha demonísmo. Koʼã mbaʼe osẽ iporãrõguáicha Internétpe, télepe, pelíkulape, lívro ha rrevístape. Por ehémplo, heta paíspe yma ndojeaseptái vaʼekue umi hekovaívape, térã ojekastiga voi umi oporojukávape. Péro koʼág̃a oñepermitíma koʼã mbaʼe vai ha oĩ léi oprotehéva koʼãichagua persónape. Jehová katu núnka nokambiái, ha yma guive koʼag̃aite peve ndaijaʼéi umi mbaʼe vaíre (elee Romanos 1:28-32).

3. ¿Mbaʼépa opensa heta hénte umi orrespetávare Ñandejára heʼíva?

 ³ Primer síglope, umi héntepe ogusta vaʼekue avei pe violénsia ha pe inmoralida sexuál. Péro umi kristiáno ypykue noñentretenéi koʼã mbaʼére, pórke haʼekuéra orrespeta Ñandejára heʼíva. Upéicha rupi heta hénte oñembohory hesekuéra ha opersegi chupekuéra. Umi hénte ‘nontendéi mbaʼérepa haʼekuéra ndosegíri ojapo umi mbaʼe ivaietéva hendivekuéra’ (1 Ped. 4:4). Koʼág̃arupi avei ñande ñakumpli Ñandejára heʼíva, upévare heta persóna oimoʼã ñandevyroiterei ha ndajavyʼakuaaiha. La Biblia heʼi voi: “Enterove Cristo Jesús disípulo omombaʼeguasuséva Ñandejárape, ojepersegíta avei” (2 Tim. 3:12).

4. ¿Mbaʼépa ndojapói vaʼerã umi oservíva Jehovápe?

⁴ Jajaposéramo Jehová rembipota, ni mbaʼevéicharõ ndajahayhumoʼãi ko múndo ni umi mbaʼe ojejapóva pype (elee 1 Juan 2:15, 16). La Biblia heʼi “ko múndo jára” Satanás, orekoha ipoguýpe umi rrelihión, umi goviérno, umi komersiánte ha umi médio de komunikasión (2 Cor. 4:4; 1 Juan 5:19). Ndajaipotáiramo ko múndo ñanembotavy, ñañatende vaʼerã mávapepa jaiporavo ñane amigorã. Upévare la Biblia ñandeavisa: “Aníke peheja ótro penembotavy. Umi júnta vai ohundi umi mbaʼe porã pejepokuaáva pejapo” (1 Cor. 15:33).

5, 6. a) ¿Mbaʼeichagua persónarepa ndajajeheʼái vaʼerã? b) ¿Mbaʼérepa nañañeamigái vaʼerã umi hembiapo vaívare?

⁵ Jaikoséramo siémpre Jehová amígoramo, ndovaléi ñañeamiga umi hembiapo vaívare. Avei ndajajeheʼamoʼãi umi heʼi guaʼúvare oserviha Jehovápe, péro añetehápe naiñeʼẽrendúi hína chupe. Upévare, oĩramo peteĩ ermáno hoʼáva peteĩ pekádo grávepe, péro noñearrepentíri, ndajajeheʼái hese ni nañañeʼẽvéima chupe (Rom. 16:17, 18).

⁶ Ñañeamigáramo peteĩ persóna hembiapo vaívare, ñande avei ikatu jaju ñanerembiapo vai haʼéicha. ¿Mbaʼérepa ikatu oiko upéva ñanderehe? Pórke la majoría ningo jajoguase ñane amigokuérape, térã japyta porãse hendivekuéra. Por ehémplo, ñañeamigáramo peteĩ okometévare inmoralida sexuál, ikatu avei ñande jaju jaʼa upe pekádope. Upéva oikóma heta testígo de Jehováre. Oĩ umi oñarrepenti vaʼekue, péro oĩ avei noñarrepentíriva ha upévare oñemosẽmante kongregasióngui (1 Cor. 5:11-13). Osegínteramo péicha hikuái ha nokambiái, oikóta hesekuéra heʼíva 2 Pedro 2:20-22 (elee).

7. ¿Mbaʼeichagua persónapa jaheka vaʼerã ñane amigorã?

⁷ Añetehápe ningo ñanderory vaʼerã opaichagua persónandi, péro ndovaléi jareko ñane amígoramo peteĩ ndahaʼéivape Jehová siérvo. Por ehémplo, naiporãmoʼãi peteĩ kristiáno oñemoĩramo de nóvio peteĩ persóna ndahaʼéivare testígo de Jehová. Iñimportanteve hína ñaneñeʼẽrendu Jehovápe, jaiko rangue ñañeamiga peteĩ ndohayhúivare chupe. Jaheka vaʼerã ñane amigorã sólamente umi oikóva Jehová oipotahaichaite. Jesús heʼi vaʼekue: “Oimeraẽ ojapóva Ñandejára rembipota, upéva hína che ermáno” (Mar. 3:35).

8. ¿Mbaʼépa oiko umi isrraelítare ijúnta vai haguére?

⁸ Umi ijúnta vaíva, katuete tuicha iprovlémata. Por ehémplo, umi isrraelíta oikétarõ guare pe Tiérra Prometídape, Jehová oavisa porã chupekuéra ani hag̃ua ojeheʼa umi hénte oikóvare upépe. Haʼe heʼi chupekuéra: “Aníke reiko haʼekuéra oikoháicha, ha  ani reñesũ umi idioskuéra renondépe ni readora chupekuéra. Upéva rangue, rehundi vaʼerã idioskuéra ha umi kolúmna ha póste sagrádo oadoráva hikuái. Che hína Jehová pende Jára, ha chéve pecheadora vaʼerã” (Éx. 23:24, 25, NM). Péro la majoría umi isrraelíta nopenái Jehováre, ha upévare ou opeka vai (Sal. 106:35-39). ¿Mbaʼépa oiko upéi hesekuéra? Jesús heʼi vaʼekue: “¡Péina! Pende róga ojeheja reíma peẽme” (Mat. 23:38). Jahechaháicha, Jehová orrechasa tetã Israélpe ha oiporavo ipuevlorã pe kongregasión kristiána (Hech. 2:1-4).

9. ¿Mbaʼérepa jakuida vaʼerã jahecháva, ñahendúva ha jaleéva?

⁹ Koʼág̃arupi heta pelíkula, lívro, rrevísta, músika, prográma de televisión ha páhina de Internet, ipeligrosoiterei kristianokuérape g̃uarã. ¿Mbaʼérepa? Pórke ikatu operhudika ñane amista Jehovándi. Umíva haʼete hína júnta vai ikatúva ñanemboliga jajerovia hag̃ua Satanás múndore, ñakonfia rangue Jehová ha ipromesakuérare. Upévare ñañatende porã vaʼerã. Aníkena jahecha ni jalee mbaʼeve ñanemoakãrakútava “jaipota [hag̃ua] umi mbaʼe ko mundopegua” ha ikatúva ñanemomombyry Jehovágui (Tito 2:12).

10. ¿Mbaʼépa oikóta umi pelíkula, músika, lívro, rrevísta ha páhina de Internet ivaívagui?

¹⁰ Koʼẽrõite Satanás múndo oñehundíta ha ndaiporimoʼãvéitama pelíkula, músika, lívro, rrevísta ni páhina de Internet ñandeperhudikátava. La Biblia heʼi: “Ko múndo ha umi mbaʼe oipotáva, ohasa ohóvo; péro pe ojapóva Ñandejára rembipota opyta opa ára g̃uarã” (1 Juan 2:17). Lívro de Salmo avei heʼi: “Umi iñañáva oñehundíta, péro Jehová omeʼẽta ko yvy umi ojeroviávape hese”. Upéi heʼi avei: “Umi hénte ivuénova opytáta ko yvy ape ári. Haʼekuéra oikóta pyʼaguapýpe ha upévare ovyʼaitereíta”. ¿Mboy tiémporepa oikóta hikuái péicha? “Umi hembiapo porãvape oñemeʼẽta ko yvy, ha oikóta pype opa ára g̃uarã” (Sal. 37:9, 11, 29, NM).

11. ¿Mbaʼéichapa Jehová ñanepytyvõ ñaneñeʼẽrendu hag̃ua chupe?

¹¹ Jesús heʼi vaʼekue peteĩ orasiónpe: “Umi hénte ohupyty hag̃ua jeikove opaveʼỹva, tekotevẽ ndekuaa porãve ohóvo, nde Ñandejára teete ha peteĩetévape ha Jesucrístope, upe nde rembou vaʼekue” (Juan 17:3). Ñandejára voi ñanepytyvõ jaikuaa hag̃ua ha ñaneñeʼẽrendu hag̃ua chupe. ¿Mbaʼéichapa ojapo upéva? Iñorganisasión rupive. Ñandejára organisasión ojapo puvlikasión, vidéo ha páhina de Internet ñanemboʼéva mbaʼépa jajapo vaʼerã jaiko hag̃ua pára siémpre. Avei ñanemboʼe heta mbaʼe la Bíbliagui umi rreunionkuéra rupive, ojejapóva hína mas de 110.000 kongregasiónpe ko yvy tuichakuére. Umi mbaʼe ñaaprendéva umi rreunión ha asambleahápe, ñanepytyvõ jajeroviave hag̃ua Jehováre ha ipromesakuérare (Heb. 10:24, 25). ¡Ajépa idiferentete Ñandejára organisasión ko múndogui!

12. ¿Mbaʼépa heʼise ñamenda vaʼerãha ‘peteĩ ojeroviávare ñande Ruvicháre’ añoite?

¹² Oiméramo ñamendase hína, tekotevẽ ñañatende porã mávapepa jaiporavóta ñane ména térã ñane rembirekorã. La Biblia ohechauka porã ndovaleiha jajegusta peteĩ persóna ndoservírivare Jehovápe, pórke tuichaiterei ñanediferénte. Ñandejára Ñeʼẽ heʼi voi: “Ani peñemoĩ peteĩ júgo guýpe umi ojeroviaʼỹva ndive. ¿Mbaʼéicha piko  ojoajúta tekoporã ha tekoaña? Térã, ¿mbaʼépe piko ojojogua ára ha pyhare?” (2 Cor. 6:14). La Biblia avei heʼi ñamenda vaʼerãha ‘peteĩ ojeroviávare ñande Ruvicháre’ añoite (1 Cor. 7:39). Upéva heʼise ñamenda vaʼerãha peteĩ testígo de Jehová vautisádore ha orrespetáva Ñandejára léi. Ñamendáramo peteĩ ohayhúvare Jehovápe, upe persóna katuete ñanepytyvõta jasegi hag̃ua jaservi Ñandejárape.

13. ¿Mbaʼépa Jehová omanda vaʼekue umi isrraelítape?

¹³ Jehová oikuaa mbaʼépa pe iporãvéva ñandéve g̃uarã. Ha ymaite guive omanda isiervokuérape omenda vaʼerãha umi persóna oservívare chupe. Por ehémplo, heʼi vaʼekue umi isrraelítape ani hag̃ua omenda umi oadorávare ótro dióspe. ¿Mbaʼérepa? Pórke umichagua persóna omboligáta chupekuéra oadora hag̃ua avei umi dios fálsope. Upévare ojeʼe umi isrraelítape: “Ani pemenda hesekuéra. Ani peheja pende rajy térã pende raʼy omenda hesekuéra. Pórke haʼekuéra omomombyrýta chupekuéra chehegui ha oñepyrũta oservi ótro dióspe. Ha Jehová ipochyetereíta penderehe ha sapyʼaitépe penerundíta” (Deut. 7:3, 4, NM).

14, 15. ¿Mbaʼépa oiko Salomón rehe naiñeʼẽrendúi haguére Jehovápe?

¹⁴ Salomón oñepyrũrõ guare ogoverna, ojerure Jehovápe toipytyvõmi chupe iñarandu hag̃ua. Ha Jehová okontesta iñorasión. Upéicha rupi Salomóngui oiko peteĩ rréi iñaranduetereíva ha hetã katu oñakãrapuʼã porã. La Biblia heʼi pe rréina Sebagua ou hague ovisita Salomónpe, ha oñesorprende ohechávo mbaʼeichaitépa pe rréi iñarandu. Ko rréina heʼi: “Ahechakuaa [ni la mita] noñemombeʼúi hague chéve [...]. Hetaitereive mbaʼe reikuaa ha rereko che ahendu vaʼekuégui” (1 Rey. 10:7). Salomón ningo iñarandueterei kuri, upéicharõ jepe upéi ou ndorrespetavéi peteĩ mandáto Jehová omeʼẽ vaʼekue. Iñehémplo ohechauka mbaʼépa ikatu oiko ñanderehe nañaneñeʼẽrendúiramo ha ñamendáramo peteĩ ndoservírivare Jehovápe (Ecl. 4:13).

¹⁵ Jehová omeʼẽramo jepe heta mbaʼe porã Salomónpe, haʼe odesovedese chupe ha ou omenda “heta kuña ótro tetãguáre”. Oreko voi 1.000 tembireko. Péro, ¿mbaʼépa oiko hese naiñeʼẽrendúi haguére Jehovápe? “Salomón itujámarõ, hembirekokuéra okonvenséma chupe omombaʼeguasu hag̃ua umi ótro dióspe, ha upéicha haʼe ndoservivéima ipyʼaite guive Ñandejára Jehovápe” (1 Rey. 11:1-6, NM). Jahechaháicha, ko rréi iñaranduetéva jepe ou omboyke Jehová omandáva. Ha nañañatendéiramo, upéva ikatu avei oiko ñanderehe. Upévare ndovaléi ni ñapensa ñamenda peteĩ ndohayhúivare Jehovápe.

16. ¿Mbaʼépa ojapo vaʼerã peteĩ kristiáno, iména térã hembireko ndahaʼéiramo testígo de Jehová?

¹⁶ Péro, ¿mbaʼépa ikatu ojapo peteĩ persóna omendámava oiko mboyve chugui Testígo? La Biblia heʼi umi tembirekópe: “Peñemoĩ vaʼerã pene ména poguýpe, upéicha oĩramo naiñeʼẽrendúiva Ñandejára Ñeʼẽme, ikatúta ojerovia Ñandejárare ojeʼeʼỹre chupe mbaʼeve, hembireko hekoporã rupi” (1 Ped. 3:1). ¿Mbaʼépa ñanemboʼe ko téxto? Peteĩ ermána iména ndahaʼéiva Testígo, oñehaʼã vaʼerã okumpli porã irresponsavilida hogapýpe ha osegi umi konsého oĩva la Bíbliape. Upéicha iména ikatu hína ohechakuaa hembireko amás día ikondúkta porãveha, ha upéi odesidi avei oservi Jehovápe. Upéva ojehecháma oikoha heta matrimóniope. Umi ermáno hembireko ndahaʼéiva Testígo, osegi vaʼerã avei pe konsého oĩva 1 Pedro 3:1-pe.

17, 18. a) ¿Mbaʼépa oipytyvõ Noépe ojesalva hag̃ua oúrõ guare pe Dilúvio? b) ¿Mbaʼépa oipytyvõ umi kristiáno ypykuépe ojesalva hag̃ua oñehundírõ guare Jerusalén?

¹⁷ Umi júnta vai ikatu ñanemboliga jadesovedese hag̃ua Jehovápe. Péro umi júnta porã katuete ñanepytyvõta siémpre ñaneñeʼẽrendu hag̃ua chupe. Ñapensamíntena Noé ehémplore. Haʼe oiko tiémpope “umi hénte iñaña ha ojapo hetaiterei mbaʼe vai ko yvy ape ári, ha tódo el tiémpo opensa hikuái ojapo hag̃ua ivaívante voi” (Gén. 6:5, NM). Umi hénte ningo iñañaiterei vaʼekue, upévare Jehová odesidi ohundipaite chupekuéra. Péro “Noé siémpre ojapo iporãva ha idiferénte vaʼekue, pórke ndojapói ivaíva umi hénte itiempopegua ojapoháicha. Noé oiko Ñandejára oipotaháicha” (Gén. 6:7-9, NM). ¿Mbaʼépa oipytyvõ chupe iñeʼẽrendu hag̃ua?

¹⁸ Noé arakaʼeve ndojeheʼáiva umi ndohayhúivare Jehovápe. Upéva rangue, haʼe, hembireko, umi itaʼýra ha inuerakuéra ombaʼapo oñondivepa ojapo hag̃ua pe árka. Avei Noé ‘opredika vaʼekue umi mbaʼe hekopeguáva’ (2 Ped. 2:5). Koʼã mbaʼe oipytyvõ Noé ha ifamíliape ojesalva hag̃ua oúrõ guare pe Dilúvio. ¡Ajépa jaagradesete haʼekuéra iñeʼẽrendu haguére ha ndojeheʼái haguére umi hembiapo vaívare! Upéicha rupi, ñande jaikove koʼág̃a. Umi kristiáno ypykue avei iñeʼẽrendu vaʼekue ha ndojeheʼái umi ndohayhúivare Jehovápe. Upévare haʼekuéra ojesalva Jerusalén oñehundírõ áño 70-pe (Luc. 21:20-22).

19. ¿Mbaʼépa ñanepytyvõta jajesalva hag̃ua?

¹⁹ Jasegíkena siémpre Noé ha ifamília, ha umi kristiáno ypykue ehémplo. Haʼekuéra ningo ndojeheʼái vaʼekue umi ndohayhúivare Jehovápe. Ñande katu koʼág̃a jareko hetaiterei ñane ermáno ha ermána ikatúva jaiporavo ñane amigorã. Haʼekuéra katuete ñanepytyvõta ‘ñañakarama hatã hag̃ua ñande jeroviáre’ koʼã tiémpo ijetuʼuetévape (1 Cor. 16:13; Prov. 13:20). Koʼẽrõitéma ningo ko múndo aña oñehundíta. ¡Ajépa javyʼaitéta jajesalva vove ha jahasa pe múndo pyahúpe! Upévare, jaiporavo porãkena koʼág̃a ñane amigokuerarã.