1, 2. ¿Mbaʼépa ojapo Jehová siervokuéra ymaite guive?

YMAITE guivéma Jehová omeʼẽ heta profesía, ha isiervokuéra ipasiénsia ohaʼarõ aja oñekumpli umíva. Por ehémplo, Jeremías oprofetisa vaʼekue umi vavilónio ohunditaha Judá. Ha upéva oñekumpli áño 607-pe a.C. (Jer. 25:8-11). Isaías katu oprofetisa Jehová oipytyvõtaha umi hudíope osẽ hag̃ua Babilóniagui ha oho jey hag̃ua hetãme. Upévare heʼi kuri: “Ovyʼaite umi hese ojeroviáva” (Is. 30:18, NM). Proféta Miqueas avei oĩ vaʼekue segúro umi profesía oñekumplitaha. Upéicha rupi haʼe heʼi: “Che añatende porãta” (Miq. 7:7, NM). Ha heta tiémpore Ñandejára siervokuéra ohaʼarõ pe Mesías oñepromete vaʼekue (Luc. 3:15; 1 Ped. 1:10-12). *

² Ñane tiémpope avei, ñande ñahaʼarõ oñekumpli umi profesía oñeʼẽva Ñandejára Rréinore. Jesús haʼe hína pe Rréi ogovernáva upe Rréino ha koʼẽrõite ohundíta ko múndo aña ha ñandesalváta. Og̃uahẽ vove pe fin, haʼe ohundíta umi hénte aña ha oipeʼaitéta opa mbaʼe ñanembosufríva (1 Juan 5:19).  Pe fin og̃uahẽta en kualkiér moméntontema, upévare ñaime vaʼerã preparádo.

3. ¿Mbaʼépa ikatu ñañeporandu oiméramo ojapóma heta tiémpo ñahaʼarõ hague pe fin?

³ Oime vaʼerã enterovéva jaipotaitereíma og̃uahẽ pe ára ojejapotahápe Ñandejára rembipota ko “yvy ape ári” (Mat. 6:10). Péro oiméramo ojapóma heta tiémpo ñahaʼarõ hague pe fin, ikatu ñapensa otardaitereimaha ha upévare ñañeporandu: “¿Mbaʼére piko jasegi vaʼerã ñaĩ alérta ha preparádo?”.

4. ¿Mbaʼérepa iñimportánte ñaĩ alérta ha preparádo?

⁴ Jesús omanda vaʼekue isegidorkuérape: “Peñatende porãke” (Mat. 24:42; Luc. 21:34-36). Upévare iñimportanteterei ñaĩ alérta ha preparádo. Avei Ñandejára organisasión pyʼỹinte heʼi ñandéve ‘ñahaʼarõ vaʼerãha Jehová ára’, ha ñapensa meme vaʼerãha umi promésa oñekumplítavare pe múndo pyahúpe (elee 2 Pedro 3:11-13).

5. ¿Mbaʼérepa tekotevẽ avei ñaime preparádo?

⁵ Síglo primérope, umi kristiáno ohechauka vaʼekue oĩha alérta ha preparádo. Ha ñande koʼytevéntema ñaime vaʼerã preparádo, pórke hiʼag̃uimbaitéma pe fin. ¿Mbaʼérepa ikatu jaʼe pe fin hiʼag̃uimbaitemaha? Pórke pe profesía Jesús omeʼẽ vaʼekue ohechauka haʼe oñepyrũmaha ogoverna ha “ko múndo ára pahaite oñemoag̃uimaha”. Por ehémplo, áño 1914 guive ko múndo ivai vaive ohóvo. Avei pe marandu porã oñeʼẽva Ñandejára Rréinore ojepredika hína ko yvy tuichakuére (Mat. 24:3, 7-14). Jesús ndeʼíri kuri mboy tiémpopa oduráta umi ára paha. Upéicharõ, ñaime vaʼerã preparádo, pórke pe fin og̃uahẽta en kualkiér moménto.

6. ¿Mbaʼérepa ikatu jaʼe ivaivetaha ohóvo pe situasión ko múndope?

⁶ Ñane tiémpope, ko múndo ivaive hína ohóvo. La Biblia heʼi voi umi hénte iñañavetaha “umi ára pahápe” (2 Tim. 3:1, 13; Mat. 24:21; Apoc. 12:12). Upévare ñande jaikuaa nomehoramoʼãiha la situasión, síno amás día ivaivereitaha. Péro, ¿heʼisépa upéva ñahaʼarõ vaʼerãha oiko peteĩ sarambi opárupi ou mboyvemi pe fin?

7. ¿Mbaʼépa jahechakuaa ñapensávo umi mbaʼe heʼívare Mateo 24:37-39?

⁷ Ikatu oĩ opensáva káda tetãme oĩtaha gérra ha opárupi oĩtaha ñembyahýi ha mbaʼasy, oñepyrũ mboyvemi pe ‘jehasa asy guasu’ (Apoc. 7:14). Péro, ¿ikatúpa jaʼe oikotaha koʼã mbaʼe? Nahániri, pórke oikóramo upéva entéronte, tahaʼe umi orrechasáva la Biblia jepe, ohechakuaáta oñekumpliha umi profesía. Péro Jesús heʼi vaʼekue la majoría umi hénte ndohechakuaamoʼãiha ñaimemaha umi ára pahápe ha ‘nopenamoʼãiha mbaʼevére’. Haʼe heʼi avei pe fin og̃uahẽtaha umi hénte oimoʼãʼỹetére (elee Mateo 24:37-39). Ñapensávo umi mbaʼe Jesús heʼi vaʼekuére, jahechakuaa natekotevẽiha ivaive la situasión ko múndope oñepyrũ hag̃ua pe gran trivulasión (Luc. 17:20; 2 Ped. 3:3, 4).

8. ¿Mbaʼépa jaikuaa porã ñande jaservíva Jehovápe?

⁸ Jesús omeʼẽ umi profesía oñeʼẽva umi ára paháre ontende hag̃uáicha umi persóna oĩva alérta añoite. Péicha haʼekuéra ohechakuaáta pe fin og̃uahẽtamaha. Upévare ñande jaservíva Jehovápe ‘ñañatende porã jaikóvo’ (Mat. 24:27, 42). Áño 1914 guive jahecha mbaʼéichapa oñekumplipaite ohóvo umi profesía, ha ñaĩ segúro  ñaimemaha umi ára pahápe ha “ko múndo ára pahaite oñemoag̃uimaha”. Jehová odesidíma arakaʼépa ohundíta ko múndo vaiete.

9. ¿Mbaʼérepa tekotevẽ ñaĩ alérta ha preparádo?

⁹ Jahecha haguéicha, tekotevẽ ñaĩ alérta ha preparádo. ¿Mbaʼérepa? Primero, ñaneñeʼẽrenduségui Crístope. Ha segundo, pórke jaguerovia oñekumplimaha umi profesía oñeʼẽva umi ára paháre. ¿Mbaʼérepa ñapensa upéicha? Ndahaʼéi jarovia rupi oimeraẽ mbaʼe reínte, síno jahechakuaágui umi profesía oĩva la Bíbliape añetehápe oñekumplimaha.

10, 11. a) ¿Mbaʼérepa Jesús heʼi idisipulokuérape oĩ vaʼerãha alérta? b) ¿Mbaʼépa jajapo vaʼerã ñapensáramo pe fin otardaha? (Ehecha pe taʼanga oĩva iñepyrũme.)

¹⁰ Heta oĩ ñande apytépe áñorema ohaʼarõva og̃uahẽ pe fin. Péro tahaʼe haʼéva pe tiémpo ñahaʼarõva, lomímonte ñaĩ vaʼerã alérta. Ñande ningo ñaĩ vaʼerã preparádo Jesús ou vove ohundi hag̃ua ko múndo aña oĩva Satanás poguýpe. Haʼe heʼi vaʼekue idisipulokuérape tekotevẽha oĩ alérta, pórke ndoikuaái arakaʼépa og̃uahẽta pe fin. Avei heʼi kuri chupekuéra: “Pejesareko meméke ha peñatende porãke, cháke ndapeikuaái pe ára Ñandejára oiporavo vaʼekue. Haʼete ningo peteĩ karai ohóva ótro tetãme. Haʼe oheja hóga hembiguaikuéra poguýpe, ha omeʼẽ peteĩteĩme hembiaporã. Pe okẽre oñangarekóvape katu heʼi oñatende porã hag̃ua. Upévare, peñatende porãke peikóvo, cháke ndapeikuaái hína arakaʼépa oúta pe Ogajára. Ndapeikuaái oútapa kaʼarupytũ, pyharepyte, de madrugáda, térãpa koʼẽmbotávo. Ani ág̃a peimoʼãʼỹve jave og̃uahẽ, ha pendetopa pekejoa hína. Ko haʼéva peẽme, enterovépe haʼe: Peñatende porãke peikóvo” (Mar. 13:33-37).

¹¹ Áño 1914-pe, umi kristiáno ohechakuaa Jesús oñepyrũmaha ogoverna, ha ontende hikuái pe fin ikatuha og̃uahẽ en kualkiér moménto. Upémarõ ojeprepara hikuái. ¿Mbaʼéichapa ojapo upéva? Haʼekuéra oñepyrũ opredika meme. Marcos kapítulo 13-pe, Jesús heʼi pe ogajára ikatuha og̃uahẽ ‘de madrugáda, térã koʼẽmbotávo’. Upéva heʼise ikatuha og̃uahẽ tardemie umi tembiguái ohaʼarõvagui. Péro tahaʼe haʼéva pe óra og̃uahẽva pe ogajára, haʼekuéra oĩ vaʼerã alérta. ¿Mbaʼépa ñanemboʼe upéva? Ojapóramo jepe heta áñoma ñahaʼarõ hague og̃uahẽ pe fin, upéva ndeʼiséi ofaltaitiha heta tiémpo, térã ñamano jepetamaha og̃uahẽ mboyve. Ñanemanduʼákena siémpre ñaĩ vaʼerãha alérta.

12. a) ¿Mbaʼépa oporandu vaʼekue Habacuc Jehovápe? b) ¿Mbaʼépa Jehová okontesta Habacúcpe?

¹² Ñapensamína proféta Habacuc ehémplore. Haʼe oavisa vaʼekue umi héntepe Jerusalén oñehunditaha, ha pyʼaguapýpente ohaʼarõ oiko upéva. Habacuc omeʼẽ mboyve ko mensáhe, oĩma vaʼekue voi unos kuánto proféta opredikáva heta áñore upe oikótava. Haʼe ohechakuaa umi hénte iñañavereiha ohóvo. Upémarõ oporandu Jehovápe: “Jehová, ¿arakaʼe peve piko ajeruréta ndéve ajúda?”. Ñandejára ndeʼíri Habacúcpe mbaʼe tiémpopepa oñehundíta Jerusalén, péro omanda chupe ‘oĩ hag̃ua alérta’, ha opromete: “Upe día nog̃uahẽmoʼãi tárde” (elee Habacuc 1:1-4 ha 2:3).

13. a) ¿Mbaʼépa ikatu kuri opensa Habacuc? b) ¿Mbaʼépa oiko vaʼerãmoʼã Habacuc opensárire upéicha?

¹³ Ñañeimahinamína mbaʼépa oiko vaʼerãmoʼã  Habacuc naipasiensiavéirire ha opensa: “Aretéma ahaʼarõ oñehundi Jerusalén, péro ndoikói mbaʼeve. Oiméne ofaltáiti heta tiémpo, ¿maʼerã rei piko asegíta apredika? Tovéna topredika ótro”. ¿Mbaʼépa ikatu kuri oiko Habacuc opensárire upéicha? Katuete ningo opyta vaíta Jehovándi. Ha Jerusalén ojedestruírõ haʼe oĩʼỹme preparádo, omanóta kuri.

14. ¿Mbaʼéichapa ñañeñandúta pe múndo pyahúpe?

¹⁴ Koʼág̃a eñeimahinami reimemaha Ñandejára múndo pyahúpe. Rehechapaite kuri mbaʼéichapa oñekumpli umi mbaʼe Jehová heʼi vaʼekue oikotaha umi ára pahápe. Katuete ningo rejeroviave Jehováre ha reime segúro okumplipaitetaha umi mbaʼe oprometéva (elee Josué 23:14). Avei reagradeseterei Jehovápe ogueru haguére pe fin itiempoitépe, ha omanda haguére isiervokuérape oĩ hag̃ua alérta ha preparádo (Hech. 1:7; 1 Ped. 4:7).

15, 16. ¿Mbaʼérepa jasegi vaʼerã japredika?

¹⁵ Jehová organisasión osegíta ñanemomanduʼa mbaʼépa hína la iñimportantevéva: jaservi vaʼerã Jehovápe. Upéva ñanepytyvõta jasegi hag̃ua ñaneñeʼẽrendu chupe, ha ani hag̃ua ñanderesarái iñimportantetereiha pe mensáhe japredikáva. Ñande ndajadudái ni michĩmi oñekumpliha ohóvo umi profesía oñeʼẽva koʼã ára paháre, ha saʼietereíma ofaltaha og̃uahẽ hag̃ua pe fin. Upévare, la iñimportantevéva ñandéve g̃uarã haʼe hína jaservi Jehovápe, ha japredika pe marandu porã oñeʼẽva pe Rréinore (Mat. 6:33; Mar. 13:10).

¹⁶ Ko múndo oĩva Satanás poguýpe oñehundi potaitéma. Ha ñande japredika jave umi héntepe ñaipytyvõ hína chupekuéra ojesalva hag̃ua. Jahechamína peteĩ ehémplo ohechaukáva mbaʼérepa iñimportantete ñaipytyvõ ñande rapichakuérape ojesalva hag̃ua. Áño 1945-pe, peteĩ várko alemán oñeundi ha hetaiterei persóna omano. Peteĩ matrimónio ojesalva vaʼekue ha upéi oikóva chuguikuéra Testígo, imanduʼa pe várkope oĩ hague peteĩ kuñakarai osapukáiva: “Che valíha... Che alahakuéra... ¡Anínati! Maʼẽna nde, oñeundipáma ohóvo”. Péro umi ótro pasahéro ni michĩmi ndojepyʼapýi umi mbaʼére, síno oipytyvõseve umi ótro hapichápe ojesalva hag̃ua. Ñane tiémpope avei oĩ heta hénte ikatúva hína omano. Upévare japredika meme vaʼerã chupekuéra, pórke  jaikuaa heta ikatutaha ojesalva ohendúramo pe mensáhe. Jajapose opa ikatúva ñaipytyvõ hag̃ua umi héntepe ojesalva hag̃ua.

17. ¿Mbaʼérepa jaʼekuaa pe fin ikatuha og̃uahẽ en kualkiér moménto?

¹⁷ Oiméne jahechakuaa umi profesía oĩva la Bíbliape oñekumpliha ohóvo, ha saʼietereíma ofaltaha og̃uahẽ hag̃ua pe fin. Koʼẽrõitéma pe Organización de las Naciones Unidas ha umi goviérno oapojáva chupekuéra ohundiséta umi rrelihión fálsape (Apoc. 17:16). ¿Tekotevẽpa ohasa heta tiémpo oiko hag̃ua upéva? Nahániri. Ñanemanduʼa vaʼerã umi governánte oatakasetaha umi rrelihiónpe pórke Jehová ‘omoĩta upéva ipyʼapypekuéra’. Ha haʼe ikatu ojapo upéva pyaʼénte voi ha en kualkiér moménto (Apoc. 17:17). Ko múndo oĩva Satanás poguýpe oñehundítama. Upévare, jajapókena Jesús heʼi vaʼekue: “Peñatendéke ani hag̃ua arakaʼeve peñekevranta peikógui pekarurasa, pemokõrasa térã pejepyʼapyetereígui pene remikotevẽre ha peichahágui upe ára ou pende ári peimoʼãʼỹve jave” (Luc. 21:34, 35; Apoc. 16:15). Jasegíkena ñaĩ alérta ha ñañemeʼẽmbaite Jehová servísiope. Jajeroviákena haʼe osalvataha entéro umi oĩvape alérta ha preparádo (Is. 64:4).

18. ¿Mbaʼe porandúpa ñakontestáta pe artíkulo oúvape?

¹⁸ Ñahaʼarõ aja og̃uahẽ pe fin, jasegi vaʼerã jajapo Judas heʼi vaʼekue: “Peẽ che ermanokuéra ahayhuetéva, peñemombaretéke pende jerovia marangatu rupive, ha peñemboʼe espíritu sánto poguýpe. Pejapo upéva peiko hag̃ua Ñandejára mborayhúpe, pehaʼarõ aja ñande Ruvicha Jesucristo poriahuvereko ñandegueraháva jeikove opaveʼỹvape” (Jud. 20, 21). Péro, ¿mbaʼéichapa ikatu jahechauka ñahaʼarõmaha hína pe múndo pyahu Ñandejára opromete vaʼekue? Upéva ñahesaʼỹijóta pe artíkulo oúvape.