1, 2. a) ¿Mbaʼe mbaʼépa nde rejapose pe paraísope? (Ehecha pe taʼanga oĩva iñepyrũme.) b) ¿Mbaʼe mbaʼépa koʼytevéntema ñanembovyʼáta pe paraísope?

¡AJÉPA enterovénte jahupytyse pe ‘jeikove opaveʼỹva’! Apóstol Pablo heʼi vaʼekue tekotevẽha ñañehaʼãmbaite ikatu hag̃uáicha jahupyty ‘pe jeikove añeteguáva’ (elee 1 Timoteo 6:12, 19). La majoría oservíva Jehovápe ikatúta oiko pára siémpre pe paraísope ko yvy ape ári. Oiméramo nde ereko pe esperánsa, katuete rehaʼarõitereíma og̃uahẽ upe tiémpo. ¿Reñeimahinápa mbaʼeichaitépa igústota ndéve repuʼãvo káda día vyʼápe, neresãi asy ha reime trankílo porã? (Is. 35:5, 6.) ¡Ajépa igustoitéta ñaimévo vyʼapópe ñane família ha ñane amigokuérandi, umíva apytépe umi orresusita vaʼekue! (Juan 5:28, 29; Hech. 24:15.) Avei jarekóta tiémpo ñaaprende hag̃ua heta mbaʼe ñandegustáva. Por ehémplo, ikatu ñaaprende heta mbaʼe pe naturalésagui, ñambopu hag̃ua algún instruménto musikál, térã ñamopuʼã hag̃ua ñande rogarã.

² Péro oĩ avei hetave mbaʼe koʼytevéntema ñanembovyʼátava. ¿Mbaʼépa hína umíva? Por ehémplo, enterovéva omombaʼéta Jehová réra porãite ha opavavénte iñeʼẽrendúta  chupe (Mat. 6:9, 10). Avei saʼi saʼípe jahupytýta pe perfeksión ha koʼẽ koʼẽre ñañemoag̃uivéta jahávo Jehováre (Sal. 73:28; Sant. 4:8). Añetehápe, ko yvy henyhẽta persóna perféktagui, Jehová oipota haguéicha ymaite guive.

3. ¿Maʼerãpa jajepreparáma vaʼerã?

³ Ñande ñaĩ segúro Jehová okumplitaha opa mbaʼe opromete vaʼekue. ¿Mbaʼérepa? Pórke la Biblia heʼi ‘ndaiporiha mbaʼeve’ Ñandejára ikatuʼỹva ojapo (Mat. 19:25, 26). Pablo heʼi vaʼekue ñañehaʼãmbaite vaʼerãha opa ikatuháicha jahupyty hag̃ua pe jeikove opaveʼỹva. Upévare jahechauka vaʼerã jaiko lájare jaroviaha pe fin og̃uahẽtaha en kualkiér moménto. Ñaimeséramo pe paraísope, jajepreparáma vaʼerã koʼág̃a guive jaiko hag̃ua upépe. Jahechamína mbaʼéichapa ikatúma jajeprepara.

4. Emoĩ peteĩ ehémplo ohechaukáva ikatumaha jajeprepara jaiko hag̃ua pe paraísope.

⁴ ¿Mbaʼéichapa ikatu koʼág̃a guivéma jajeprepara jaiko hag̃ua pe paraísope? Ñapensamína ko ehémplore: Peteĩ persóna ovátava ótro paíspe katuete ojeprepara upearã. Por ehémplo, oaprende pe idióma oñeñeʼẽva upépe, umi kostúmbre, ha ikatúramo otantea mimi hembiʼukuéra. Péicha avei ñande ikatúma jajeprepara koʼág̃a guive jaiko hag̃ua pe paraísope. Jaikóma vaʼerã ku ñaimerõguáicha upépe. Jahechamína mbaʼéichapa jajapokuaa upéva.

5, 6. ¿Mbaʼérepa koʼág̃ama jajepokuaa vaʼerã ñaneñeʼẽrendu Jehová organisasiónpe?

⁵ Jaiko ningo peteĩ múndo ojejapohápe Satanás rembipota. Por ehémplo, heta persóna opensa natekotevẽiha iñeʼẽrendu Ñandejárape ha ikatuha ojapo ojaposéva. ¿Mbaʼe konsekuénsiapa ogueru upéva? Umi hénte osufrieterei ha ndovyʼái (Jer. 10:23). Péro ñande jaikuaa Jehová haʼeha peteĩ governánte oporohayhúva, upévare jaovedese chupe. ¡Ajépa javyʼaitéta pe paraísope, oĩtahápe umi iñeʼẽrendúva Ñandejárape añoite!

⁶ Jaikoséramo pe paraísope, koʼág̃ama jajepokuaa vaʼerã ñaneñeʼẽrendu Jehová organisasiónpe. ¿Mbaʼérepa iñimportánte upéva? Pórke pe paraísope oñemeʼẽta ñandéve heta instruksión jajapo hag̃ua ko yvýgui peteĩ hardín neporãva. Avei tekotevẽta ñaipytyvõ umi orresusitávape ikatu hag̃uáicha oikuaa Jehovápe. Oĩta ningo hetaiterei traváho. Upévare iporã ñañeporandu: “¿Ajapótapa kyreʼỹme Jehová organisasión omandáva chéve, jepe ndachegustapái?”.

7, 8. a) ¿Mbaʼérepa koʼág̃a guivéma jajepokuaa vaʼerã ñambaʼapo meme Jehová organisasión ndive? b) ¿Mbaʼe asignasiónpa orresivi heta ermáno? c) ¿Mbaʼéichapa ñañeñandúta pe paraísope?

⁷ Ikatu hag̃uáicha jajeprepara jaiko hag̃ua pe paraísope, ndahaʼéi ñaneñeʼẽrendúnte vaʼerã Jehová organisasiónpe. Tekotevẽ avei javyʼa umi traváho térã asignasión otokávare ñandéve, ha ñambaʼapo meme umi omotenondévandi Jehová organisasión. Por ehémplo, ikatu koʼág̃a jarresivi peteĩ asignasión pyahu. ¿Ñañehaʼãmbaitépa ñakumpli porã ñande traváho ha javyʼa upe jajapóvare? Jajepokuaáramo jaapoja koʼág̃ama voi Jehová organisasión, ifasilvéta ñandéve jajapo hag̃ua upéva pe paraísope (elee Hebreos 13:17). Ñapensamíntena mbaʼépa oiko vaʼekue umi isrraelítare oike rire pe Tiérra Prometídape. Haʼekuéra ndaikatúi kuri oiporavo moõpa oikóta, pórke káda únope oñeasigna mbaʼe yvýpa otokáta chupe (Núm. 26:52-56; Jos. 14:1, 2). Ñande  ningo ndajaikuaái ikatútapa jaiporavo mbaʼe lugárpepa jaikóta pe paraísope. Ikatu hína oñeasignánte ñandéve moõpa jaikóta. Péro jajepokuaáramo siémpre jaapoja Ñandejára organisasión, javyʼáta ikatu haguére jaservi Jehovápe, tahaʼe haʼéva pe lugár otokáva ñandéve.

⁸ ¡Ajépa tuichaite priviléhio jarekóta pe paraísope jaservi vove Ñandejárape Irréino poguýpe! Upévare, koʼág̃a guivéma kyreʼỹme jaapoja vaʼerã iñorganisasión. Péro ikatu sapyʼánte ojejerure ñandéve jaha hag̃ua jaservi ótro lugárpe. Por ehémplo, heta ermáno oservi vaʼekuépe Betel de Estados Unídospe, ojejerure oho hag̃ua oservi kómo prekursór ótro lugárpe. Ha heta superintendénte viahántepe oñeasigna oservi hag̃ua kómo prekursór espesiál, ijedáma rupi térã ambue mbaʼére. Entéro koʼã ermáno ovyʼa iñasignasión pyahúre, ha Jehová ovendesi chupekuéra. ¿Mbaʼépa jajapo vaʼerã avei jaserviséramo Jehovápe vyʼápe ha jaipotáramo haʼe ñanevendesi? Jajerure vaʼerã chupe tañanepytyvõ. Avei jajapo vaʼerã opa ikatúva jaservi porã hag̃ua chupe ha vyʼapópe jaasepta oimeraẽ tembiapo oñemeʼẽva ñandéve (elee Proverbios 10:22). Ikatu ningo ñañeimahináma mbaʼe lugárpepa jaikóta pe paraísope. Péro, ¿mbaʼépa jajapóta ág̃a ñaime vove upépe ha ojejeruréramo ñandéve jaiko hag̃ua ótro lugárpe? Katuete javyʼáta pe lugár ha pe traváho otokávare ñandéve. Avei jaagradesetereíta Jehovápe opermiti haguére ñandéve jaiko pe paraísope (Neh. 8:10).

9, 10. a) ¿Mbaʼérepa tekotevẽta ñanepasiénsia pe paraísope? b) ¿Mbaʼéichapa ikatu jahechauka koʼág̃ama ñanepasiensiaha?

⁹ Pe paraísope sapyʼánte tekotevẽta avei ñanepasiénsia. Por ehémplo, oiko vove pe rresurreksión, oĩta heta orresivímava vyʼápe ihénte ha iñamigokuéra omano vaʼekuépe. Péro, ¿mbaʼépa jajapóta tekotevẽramo ñande ñahaʼarõmie orresusita peve umi jahayhúva? ¿Javyʼátapa umi ótrondi ha ñanepasiénsiata ñahaʼarõ aja? (Rom. 12:15.) Koʼág̃ama voi ñanepasiénsiaramo ha ñahaʼarõ oñekumpli Jehová promesakuéra, katuete pe paraísope ñanepasiénsiata avei (Ecl. 7:8).

¹⁰ ¿Mbaʼéichapa avei ikatu jajeprepara jaiko hag̃ua pe paraísope? Por ehémplo, sapyʼánte ñane puvlikasionkuérape osẽ peteĩ entendimiénto pyahu. Péicha jave tekotevẽ ñanepasiénsia ikatu hag̃uáicha ñantende porã umíva. Ñañeporandumína: “¿Astudia porãpa hína koʼã informasión pyahu? ¿Mbaʼéichapa arreaksiona oiméramo nantendepái umíva?”. Koʼág̃ama voi ñanepasiénsiaramo, pe paraísope ifasilvéta ñandéve jasegi hag̃ua umi instruksión pyahu Jehová omeʼẽva (Prov. 4:18; Juan 16:12).

11. a) ¿Mbaʼépa ñandeprepara avei jaiko hag̃ua pe paraísope? b) ¿Mbaʼérepa koʼág̃ama voi ñaporoperdona vaʼerã?

¹¹ Ñaporoperdonáramo jahechauka avei jajepreparamaha jaiko hag̃ua pe paraísope. Jesús goviérno de 1.000 áño poguýpe, mbeguekatúpe jahupytýta jahávo pe perfeksión. Péro upe aja oĩta “hekojojáva ha hekojojaʼỹva”, upévare tekotevẽta jatrata porã ñande rapichakuérape ha ñaperdona chupekuéra ojavy jave (Hech. 24:15). Koʼág̃ama jajepokuaáramo ñaporoperdona, ifasilvéta ñandéve jajogueraha porã hag̃ua entérondi pe múndo pyahúpe (elee Colosenses 3:12-14).

12. ¿Mbaʼérepa koʼág̃ama voi jahechauka vaʼerã umi kualida porã Jehová orekóva?

¹² Pe paraísope ideprovechopaitéta  ñandéve umi kualida Jehová ñanemboʼéva koʼág̃a. Por ehémplo, haʼe ñanemboʼe ñandeagradesído ha javyʼa hag̃ua umi mbaʼe jahupytývare. Pe paraísope sapyʼánte tekotevẽtamante ñahaʼarõʼimi jarresivi hag̃ua umi mbaʼe jaipotáva. Jahechaukáramo koʼág̃a umi kualida porãite Jehová orekóva, ojekuaáta ñanderehe jajepreparamaha jaiko hag̃ua pe ‘yvy oútavape amo gotyove’, térã pe paraísope. Avei jahechaukáta ñaimeseha pe múndo pyahúpe, oĩtahápe umi persóna iñeʼẽrendúva Jehovápe añoite (Heb. 2:5; 11:1).

13. ¿Mbaʼépa iñimportantevéta ñandéve g̃uarã pe paraísope?

¹³ Pe paraísope jarekóta opa mbaʼe ñaikotevẽva javyʼa hag̃ua. Péro la ñanembovyʼavétava siémpre haʼe hína ñane amista Jehovándi (Mat. 5:3). Jadisfrutáta jaservívo Jehovápe ha ndaiporimoʼãi mbaʼeve iñimportantevétava upévagui (Sal. 37:4). Upévare, ikatu hag̃uáicha jaiko pe paraísope, koʼág̃ama voi ñamotenonde vaʼerã ñande servísio Jehovápe (elee Mateo 6:19-21).

14. ¿Mbaʼe métapa ikatu omoĩ umi mitãrusu ha mitãkuña?

¹⁴ ¿Mbaʼéichapa ikatu jadisfrutave jaservívo Jehovápe? Por ehémplo, ñamoĩkuaa méta ñande servísiope. Oiméramo nde peteĩ mitãrusu térã mitãkuña, iporãta repensáramo mbaʼéichapa reaprovecháta ne huventu reservívo Jehovápe. Ikatu rejeprepara reservi hag̃ua de tiémpo kompléto. Ñane puvlikasionkuérape osẽ jepi mbaʼe mbaʼépa rejapo vaʼerã rehupyty hag̃ua upéva. * Avei ikatu reñemongeta umi ermáno heta tiémporema oservívandi de tiémpo kompléto. Reipurúramo ne tiémpo reservi hag̃ua Jehovápe, reaprendéta heta mbaʼe ndepreparátava reiko hag̃ua pe paraísope.

15. ¿Mbaʼe métapa ikatu avei ñañehaʼã jahupyty?

¹⁵ Enterovéva, tahaʼe imitãva térã kakuaa, ikatu ñamoĩ méta japrogresave hag̃ua Jehová servísiope. Por ehémplo, ikatu ñañehaʼã jaipuru diferénte método de predikasión, térã jahecha mbaʼéichapa jasegi porãvéta umi konsého oĩva la Bíbliape. Avei ikatu ñañehaʼã jalee porãve hag̃ua en vos álta, ñakomenta porãve ha jajapo porãve hag̃ua ñande partekuéra  rreunionhápe. Ñanemanduʼákena umi méta ñanepytyvõha jaservi hag̃ua Jehovápe kyreʼỹme, ha ñandepreparaha jaiko hag̃ua pe paraísope.

16. ¿Mbaʼérepa jaʼe ndaiporiha ótra kósa ñanembovyʼavéva Ñandejára servísiogui?

¹⁶ ¿Ikatúpa jaʼe jajavyha heta mbaʼe iporãva jajepreparáramo koʼág̃ama jaiko hag̃ua pe paraísope? Nahániri. Ndaipóri ótra kósa ikatu vaʼerã ñanembovyʼave Ñandejára servísiogui. Ñande ningo ndajaservíri Jehovápe jajesalvaségui ou vove pe fin, térã oĩgui ñandeovligáva. Haʼe ñandeapo vaʼekue voi ñamombaʼeguasu hag̃ua chupe. Hiʼarive haʼe ñanderayhueterei ha ñandegia. Jaadoráramo chupe ha ñañehaʼãmbaitérõ siémpre ñaime porã hendive, katuete javyʼaitereíta (elee Salmo 63:1-3). Umi ermáno heta áñorema oservíva chupe, okomprováma javyʼaitereiveha jaservívo Jehovápe (Sal. 1:1-3; Is. 58:13, 14).

17. ¿Mbaʼépa iñimportantevéta hína pe paraísope?

¹⁷ ¿Ikatútapa jajediverti ha japytuʼu pe paraísope? Si, ikatúta. Jehová ñandeapo vaʼekue jadisfruta hag̃ua umi mbaʼe ñandegustávagui. Hiʼarive opromete omeʼẽtaha ñandéve umi mbaʼe jaipotáva (Sal. 145:16; Ecl. 2:24). Péro igústoramo jepe jajediverti ha japytuʼu, ñanemanduʼa vaʼerã jadisfrutaveha koʼã mbaʼégui ñamotenondéramo Jehovápe. Upéicharõ, pe paraísope ikatúta avei japytuʼu ha jajediverti, péro siémpre iñimportantevéta jaservi Jehovápe. Upévare, jaikókena koʼág̃a guive ñaimerõguáicha pe múndo pyahúpe ha ñapensa meme umi vendisión jahupytývare jaservi haguére Ñandejárape (Mat. 6:33).

18. ¿Mbaʼéichapa jahechauka jajepreparamaha jaiko hag̃ua Ñandejára múndo pyahúpe?

¹⁸ Ndaikatúi ningo ni ñañeimahinamba mbaʼeichaitépa javyʼáta jaiko vove Ñandejára múndo pyahúpe. Jahechaukákena ñaimeseha upépe ha jajeprepara koʼág̃a guive. ¿Mbaʼéichapa ikatu jajapo upéva? Jahechaukávo umi kualida Jehová orekóva ha japredikávo kyreʼỹme. Avei jaservi vaʼerã Jehovápe ñande pyʼaite guive ha vyʼapópe. Ñande ningo ñaime segúro pe paraísope Jehová okumplitaha opa mbaʼe opromete vaʼekue. Upévare, jaikókena koʼág̃ama ku ñaimerõguáicha upépe.