Ñañatende porãke mbaʼéichapa ‘ñaporomboʼeñaína’

‘Emoherakuã pe ñeʼẽ, egueroviauka, eporomomarandu ha eporomboʼe katupyry ha pasiénsia reheve.’ (2 TIMOTEO 4:​2, BNP.)

1. Mbaʼépa Jesús ojapovaʼekue, ha mbaʼépa ojeʼe hemimboʼekuérape ojapo hag̃ua?

 JESÚS oĩrõ guare ko Yvy ape ári hetápe omongueravaʼekue. Upéicharõ jepe, chupe ojekuaavaʼekue mboʼeháraramo, ndahaʼéi peteĩ milágro apoha térã pohãnoháraramo (Marcos 12:19; 13:1). Chupe g̃uarã iñimportantetereivaʼekue omombeʼu pe marandu porã Ñandejára Goviérno rehegua. Ha upéicha avei hemimboʼekuéra koʼag̃aguápe g̃uarã. Ñandéve ningo ojeʼe avei ñamboʼe hag̃ua ñande rapichakuérape. Upévare ñamboʼe chupekuéra opa mbaʼe Jesús heʼivaʼekue (Mateo 28:​19, 20).

2. Ñandéve ningo ojeʼe japredika hag̃ua, ha mbaʼépa tekotevẽ jajapo upearã?

² Jajaposégui oñehaʼarõva ñandehegui, koʼẽ koʼẽre ñañehaʼã ñandekatupyryve ñamboʼévo  ñande rapichápe. Apóstol Pablo ohechaukavaʼekue tekotevẽha ñandekatupyry ñaporomboʼe hag̃ua. Péicha heʼivaʼekue Timotéope: ‘Eñangarekókena ndejehe, ha upe reporomboʼévare, ha eñemoĩ hatã koʼã mbaʼépe. Rejapóramo upéicha, ndejupe voi rejesalváta ha umi nerendúvape avei’ (1 Timoteo 4:​16, BNP). Apóstol Pablo heʼírõ guare ñaporomboʼevaʼerãha, ndeʼiseivaʼekue ñamyanyhẽvaʼerãha ñane estudiánte akãme umi informasión. Ñambaʼapo porãramo predikasiónpe ñag̃uahẽta ñande rapichakuéra korasõme, ha ñamomýita chupekuéra okambia hag̃ua. Ha upearã ñandekatupyryvaʼerã. Upévare, mbaʼépa ikatu jajapo ñandekatupyryve hag̃ua ñamboʼévo ñande rapichápe ñamosarambi jave pe marandu porã? (2 Timoteo 4:2.)

‘Ñañembokatupyrýkena ñaporomboʼe hag̃ua’

3, 4. a) Mbaʼéichapa ñañembokatupyryñaína ñaporomboʼe hag̃ua? b) Mbaʼéichapa ñanepytyvõ pe Eskuéla dél Ministério Teokrátiko oiko hag̃ua ñandehegui peteĩ mboʼehára ikatupyrýva?

³ Ñandekatupyrýtaningo jastudia, jahecha ha jajapo meméramo peteĩ mbaʼe. Upévare, jaipotáramo oiko ñandehegui peteĩ mboʼehára ikatupyrýva jajapovaʼerã koʼã mbohapy mbaʼe. Ñañemboʼevaʼerã ha upéi jastudia ñantende hag̃ua pe jaikuaasevañaína (jaleemína Salmo 119:​27, 34). Ñañatendevaʼerã mbaʼéichapa umi ermáno ikatupyrýva oporomboʼe ikatu hag̃uáicha jajapo avei upéicha. Ha ñañehaʼãvaʼerã jaiporu umi mbaʼe ñaaprendéva ikatu hag̃uáicha ñandekatupyryve (Lucas 6:40; 1 Timoteo 4:​13-15).

⁴ Jehová hína pe Mboʼehára ijojahaʼỹva. Ha iñorganisasión rupive omboʼe isiervokuérape oikuaa hag̃ua mbaʼéichapa opredikavaʼerã (Isaías 30:​20, 21). Upéva jahechakuaa pe Eskuéla dél Ministério Teokrátiko rehe, ojejapóva káda semána kongregasiónpe, oñepytyvõ hag̃ua puvlikadorkuérape, ha upéicha ikatupyry hag̃ua predikasiónpe. Ko eskuélape Ñandejára Ñeʼẽ hína pe lívro ojeporuvéva. Ñandejára Ñeʼẽ ningo ohechauka ñandéve mbaʼépa ñamboʼevaʼerã, ha avei mbaʼéichapa ikatu ñamboʼe porãve ñande rapichápe. Pe Eskuéla dél Ministério Teokrátikope ojeʼe jey jey ñandéve jaiporuvaʼerãha la Biblia ñaporomboʼe hag̃ua. Ojeʼe avei ñaporandukuaavaʼerãha, ñamboʼe hasyʼỹ hag̃uáicha ha jajepyʼapy añete vaʼerãha ñande rapichakuérare. Koʼã mbaʼe jajapóramo mante oikóta ñandehegui peteĩ mboʼehára ikatupyrýva. Upévare ñahesaʼỹijomíta peteĩteĩ koʼã mbaʼe. Jahecháta avei mbaʼéichapa ikatu ñag̃uahẽ ñane estudiantekuéra korasõme.

Jaiporúkena Ñandejára Ñeʼẽ ñaporomboʼe hag̃ua

5. Mbaʼépa jaiporuvaʼerã ñaporomboʼe hag̃ua, ha mbaʼérepa?

⁵ Jesús hína pe mboʼehára guasu, haʼe ningo katuete Ñandejára Ñeʼẽgui oporomboʼevaʼekue (Mateo 21:13; Juan 6:45; 8:17). Jesús ningo oñeʼẽ Jehová rérape, ndahaʼéi ijehegui reínte oporomboʼéva (Juan 7:​16-18). Ha ñande jajapo avei upéicha. Upéicharõ, japredika térã ñaporomboʼe jave jaiporuvaʼerã Ñandejára Ñeʼẽ (2 Timoteo 3:​16, 17). Ndaipóri mbaʼeve ñande jaikuaáva ikatúva ombojoja Ñandejára Ñeʼẽme. Nañanderesarairivaʼerã Ñandejára Ñeʼẽ tuicha ipuʼakaha. Upéicharõ, ñañeʼẽ jave peteĩ mbaʼére ñane estudiántepe, jajerurevaʼerã chupe tolee Ñandejára Ñeʼẽ ontende porãve hag̃ua (jaleemína Hebreos 4:12).

6. Mbaʼépa jajapovaʼerã ñane estudiánte ontende porã hag̃ua pe ñahesaʼỹijovañaína?

⁶ Péro, upéva ndeʼiséi natekotevẽiha jajeprepara ñamboʼe hag̃ua ñande rapichápe. Upe mboyve katu jaiporavo porãma vaʼerã mbaʼe téystopa ñande jaleéta térã umi téysto oleétava ñane estudiánte. Iporãvéta hína jaleéramo umi téysto oñeʼẽva umi mbaʼe jagueroviávare. Jahechavaʼerã avei ñane estudiántepa ontende porã hína umi téysto (1 Corintios 14:​8, 9).

 Ñaporandukuaákena

7. Mbaʼérepa iporã ñaporandu ñane estudiántepe omyesakã hag̃ua umi mbaʼe oaprendevahína?

⁷ Ñaporandukuaáramo ñamopensáta ñane estudiántepe ha ñag̃uahẽta ikorasõme. Ha ñamyesakãmbarangue ñande voi umi téysto, ñaporanduvaʼerã ñane estudiántepe mbaʼéichapa ontende upéva ha haʼete voi tomyesakã. Sapyʼánte tekotevẽta ñaporandu chupe hetave mbaʼe ontende porã hag̃ua. Upéicha haʼe oñeʼẽvéta umi mbaʼe oaprendevarehína, ha haʼete voi ohechakuaáta mbaʼérepa ogueroviavaʼerã peteĩ mbaʼe (Mateo 17:​24-26; Lucas 10:​36, 37).

8. Mbaʼéichapa ikatu jaikuaa oĩva ñane estudiánte korasõme?

⁸ Ñane puvlikasionkuérape oñemoĩ umi porandu ha oñembohovái umi párrafope. Upéicha, umi ostudiáva ñanendive ombohovaikuaáta umi porandu oñemoĩva káda párrafope g̃uarã. Péro, pe mboʼehára ikatupyrýva nohaʼarõi oñembohováinte chupe umi porandu. Ñamoĩ chupe, ñane estudiánte oikuaaha mbaʼépa heʼi la Biblia umi oikóvare oñondive omendaʼỹre (1 Corintios 6:18). Péro ñaporandukuaáramo, jaikuaáta mbaʼépa opensa upe mbaʼére. Ikatu ñaporandu chupe: “Mbaʼérepa la Biblia heʼi ivaiha peteĩ kuimbaʼe ha kuña oiko oñondive omendaʼỹre? Mbaʼépa nde ere umi oikóvare upéicha? Iporãnepa ñaneñeʼẽrendu Ñandejárape koʼã mbaʼépe?”. Ñane estudiánte heʼíva rupive koʼã mbaʼére, jaikuaáta mbaʼépa oĩ ikorasõme (jaleemína Mateo 16:​13-17).

Ñaporomboʼékena hasyʼỹ hag̃uáicha

9. Mbaʼérepa ñanemanduʼavaʼerã ñamboʼe jave Ñandejára Ñeʼẽ?

⁹ Ndahaʼéiningo hasyetereíva umi mbaʼe Ñandejára Ñeʼẽme heʼíva. Péro ñanemanduʼavaʼerã ikatuha ñane estudiántepe omboʼe vai rakaʼe umi rrelihión japu, ha upéicha rupi koʼág̃a nontendeporãi heta mbaʼe. Upévare ñande ñamyesakãvaʼerã chupe la Biblia hasyʼỹ hag̃uáicha. Umi mboʼehára ikatupyrývango oporomboʼe oñentende porã hag̃uáicha ha oĩhaichaite la Bíbliape. Upéicharõ ndaijetuʼumoʼãi umi estudiántepe ontende hag̃ua. Upévare nañañeʼẽivaʼerã heta mbaʼe natekotevẽivare ni opa mbaʼe umi téysto heʼívare. Upéva rangue ñañeʼẽvaʼerã umi mbaʼe iñimportantevévare ñamyesakã porã hag̃ua pe ñahesaʼỹijovañaína. Ha ñande rapicha ostudiavévo, ontendevéta umi mbaʼe hypyʼũvéva la Biblia omboʼéva (Hebreos 5:​13, 14).

10. Mbaʼéichapa jaikuaáta heta mbaʼépa ñahesaʼỹijovaʼerã jastudia jave?

¹⁰ Heta mbaʼépa ñahesaʼỹijovaʼerã jastudia jave ñande rapicha ndive? Ndajaʼekuaáiningo mbaʼeichaite vaʼerãpa, jaikuaágui káda mboʼehára ha estudiánte napeteĩchaiha. Upéicharõ jepe, ñanemanduʼavaʼerã ñande ñaipytyvõseha ñane estudiántepe ojerovia mbarete hag̃ua Ñandejárare. Upévare, ndajajapuraivaʼerã jahasáma hag̃ua ótro párrafope. Ñahaʼarõvaʼerã olee, ontende ha oguerovia raẽ Ñandejára Ñeʼẽ omboʼéva. Aníkena ñahesaʼỹijose heta párrafo hasýramo ñane estudiántepe ontende hag̃ua, péro ani avei ñanembegueterei upévare. Ontende vove peteĩ mbaʼe, jahasakuaáma ótrope (Colosenses 2: 6, 7).

11. Mbaʼépa ñanemboʼe apóstol Pablo?

¹¹ Apóstol Pablo omombeʼúmi pe marandu porã hasyʼỹ hag̃uáicha. Iñaranduetereíramo jepe ndoiporúi umi ñeʼẽ hasýva oñentende hag̃ua (jaleemína 1 Corintios 2:​1, 2). Ñandejára Ñeʼẽ omboʼévaningo ndahasýi, upévare umi tapicha ipyʼaporãva ovyʼa ha oikuaaseve. Ha natekotevẽi ñanearandueterei ñantende hag̃ua (Mateo 11:25; Hechos 4:13; 1 Corintios 1:​26, 27).

Ñaipytyvõvaʼerã ñane estudiántepe omombaʼe hag̃ua oaprendevahína

12, 13. Mbaʼépa omomýita ñane estudiántepe ojapo hag̃ua oaprendevahína? Emoĩmína peteĩ ehémplo.

¹² Ñamboʼe porã hag̃ua, ñag̃uahẽvaʼerã  ñane estudiánte korasõme. Haʼe ohechakuaavaʼerã pe oaprendevahína oipytyvõtaha chupe ha ojapo porãtaha hese. Ontendevaʼerã oiko porãvetaha ojapóramo Ñandejára Ñeʼẽ heʼíva (Isaías 48:​17, 18).

¹³ Ñamoĩ chupe, ñahesaʼỹijohañaína Hebreos 10:​24, 25. Upépe ñanemokyreʼỹ ñañembyaty hag̃ua ñane ermanokuéra ndive ikatu hag̃uáicha ñamombarete ñande jerovia ha jahechauka jahayhuha chupekuéra. Oiméramo ñane estudiánte ndohói gueteri rreunionhápe, ñamombeʼukuaa chupe mbaʼéichapa ojejapo ha mbaʼérepa oñeñeʼẽ upépe. Ikatu jaʼe chupe jaháramo rreunionhápe ñamombaʼeguasuha avei Ñandejárape, ha ojapo porãitereiha ñanderehe. Upe rire ñainvita chupe oho hag̃ua ñanendive. Ha ndahaʼeivaʼerã jaʼégui chupénte ohóva, haʼe ojapovaʼerã la Biblia heʼíva iñeʼẽrenduségui Jehovápe (Gálatas 6:​4, 5).

14, 15. a) Mbaʼépa ikatu oikuaa umi ostudiáva la Biblia? b) Mbaʼérepa ojapo porãta umi estudiántere oikuaáramo mbaʼeichaguápa Jehová?

¹⁴ Umi ostudiáva la Biblia ha ojapóva upépe heʼiháicha ohupyty heta mbaʼe porã. Umíva apytépe oikuaa porãta mbaʼeichaguápa Jehová ha ohayhúta chupe hikuái (Isaías 42:8). Jehová ningo ñande Ru ñanderayhuetéva, ñande Apohare ha opa mbaʼe oĩva Jára. Ha umi ohayhu ha oservívape chupe oikuaauka mbaʼeichaguápa haʼe ha mbaʼépa ikatu ojapo (jaleemína Éxodo 34:​6, 7). Moisés oguenohẽ mboyvemi umi Israelguápe Egíptogui, Jehová ojekuaauka chupekuéra heʼívo ojapotaha opa mbaʼe tekotevẽva okumpli hag̃ua heʼivaʼekue isiervokuérape (Éxodo 3:​13-15). Jehová ojekuaauka hag̃ua umi Israelguápe ojapovaʼekue hetave mbaʼe: oñorairõ hesehapekuéra, omosãso, omongaru ha ojapo heʼivaʼekue chupekuéra (Éxodo 15:​2, 3; 16: 2-5; Josué 23:14).

¹⁵ Ñane estudiánte ningo ndohasaichéne umi mbaʼe guasuete Moisés ohasavaʼekue. Upéicharõ jepe, ohayhu ha omombaʼeguasúgui Ñandejárape katuete ojaposéta umi mbaʼe oaprendéva, upéicha javépe katuete ohechakuaáta ojerurevaʼerãha Jehovápe ombopyʼaguasu, omoarandu ha oisãmbyhy hag̃ua chupekuéra. Ha ohechávo mbaʼéichapa Jehová ohendu chupekuéra, ohechakuaáta avei mbaʼéichapa haʼe oñangareko hesekuéra, ipojera ha oñemoñeʼẽkuaa chupekuéra (Salmo 55:22; 63:7; Proverbios 3: 5, 6).

Jajepyʼapy añetékena ñande rapicháre

16. Mbaʼérepa nañandekatupyrýiramo jepe ñandejeheguínte, ñaipytyvõ porãtante avei ñane estudiántepe?

¹⁶ Oiméramo nañandekatupyrýi ñaporomboʼe hag̃ua, aníkena ñanekangy upévare. Jehová ha Jesús ningo omoakãhína ko tembiapo ojejapóva oparupiete (Hechos 1:​7, 8; Revelación 14:6). Haʼekuéra ñanepytyvõta ikatu hag̃uáicha jaʼéva og̃uahẽ ñande rapichakuéra korasõme (Juan 6:44). Nañandekatupyrýiramo jepe ñandejeheguínte,  ñaipytyvõ porãtante avei ñane estudiántepe jahayhúramo chupe ha jajepyʼapýramo hese. Apóstol Pablo ohechakuaavaʼekue haʼe ohayhuvaʼerãha umi hapichakuéra omboʼévape. Ha umi mbaʼe ojapóvare ohechaukavaʼekue upéva (jaleemína 1 Tesalonicenses 2:​7, 8).

17. Mbaʼéichapa ikatu jahechauka jajepyʼapyha ñane estudiantekuérare?

¹⁷ Ñande avei ikatu jahechauka jajepyʼapyha ñane estudiantekuéra rehe. Mbaʼéichapa jajapokuaa upéva? Ñañemongetávo jaikuaa porãve hag̃ua chupekuéra. Ñañemongeta jave hendivekuéra Ñandejára Ñeʼẽ heʼívare, jaikuaa porãvéta mbaʼéichapa oiko hikuái. Ikatu ningo jahechakuaa okambiamaha heta mbaʼépe, péro avei oikotevẽha gueteri okambia ambue mbaʼépe. Jaʼevaʼerã chupekuéra mbaʼéichapa ikatu ojapo Ñandejára Ñeʼẽme heʼiháicha. Upéicha jahechaukáta jahayhuha ñane estudiántepe ha ñaipytyvõta chupekuéra omoirũ hag̃ua Jesucrístope.

18. Mbaʼérepa iñimportánte ñañemboʼe ñane estudiánte ndive ha jajerure Jehovápe oipytyvõ hag̃ua chupe?

¹⁸ Iñimportantetereíningo ñañemboʼe ñane estudiánte ndive ha ñanemanduʼa hese ñane ñemboʼépe. Ñande rapicha ohechakuaavaʼerã ñaipytyvõseha chupe oikuaa porã hag̃ua Ñandejárape, oñemoag̃ui hag̃ua hese ha ojapo hag̃ua Haʼe ojeruréva (jaleemína Salmo 25:​4, 5). Jajerurevaʼerã Jehovápe oipytyvõmi hag̃ua ñane estudiántepe ojapo hag̃ua umi mbaʼe oaprendevahína. Upéicha ohechakuaáta hikuái ‘ojapovaʼerãha Ñandejára Ñeʼẽ heʼíva’ (Santiago 1:22). Ha ohendúvo mbaʼéichapa ñañemboʼe, oikuaátama avei hikuái mbaʼéichapa oñemboʼevaʼerã. Javyʼaitereíningo ñaipytyvõhaguére ñande estudiántepe oñemoag̃ui hag̃ua Jehováre.

19. Mbaʼépa jaikuaáta pe artíkulo oúvape?

¹⁹ Javyʼaitereínigo jaikuaávo seis millones rasáma oĩha oservíva Jehovápe. Haʼekuéra ningo oñehaʼã ikatupyryve omboʼévo hapichakuérape. Ikatu hag̃uáicha oipytyvõ hikuái umi tapicha ipyʼaporãvape ojapo hag̃ua opa mbaʼe Jesús heʼivaʼekue. Ha mbaʼépa ojehupyty ojepredikahaguére? Jaikuaáta upéva pe artíkulo oúvape.

Ñanemanduʼápa koʼã mbaʼére?

• Mbaʼérepa tekotevẽ ñañehaʼãmbaite ñandekatupyryve ñamboʼévo ñande rapichápe?

• Mbaʼe mbaʼépa ikatu jajapo oiko hag̃ua ñandehegui mboʼehára ikatupyrýva?

• Oiméramo nañandekatupyrýi ñandejeheguínte, mbaʼe jajapóramopa ñaipytyvõ porãtante avei ñane estudiántepe?

[Porandu ñahesaʼỹijóva]

[Nóta oĩva taʼanga ndive páhina 15]

Mbaʼérepa jajerurevaʼerã ñane estudiántepe haʼete voi olee hag̃ua la Bíbliape umi mbaʼe ñahesaʼỹijóva?

[Nóta oĩva taʼanga ndive páhina 16]

Ñañemboʼékena ñane estudiánte ndive ha ñanemanduʼa hese ñane ñemboʼépe