Mbaʼépa hína Ñandejára Rréino?

MBAʼÉREPA Jesús oñeʼẽvevaʼekue opredika jave? Haʼe voi heʼi oñeʼẽha Ñandejára Rréinore (Lucas 4:43). Umi oĩvaʼekue hendive oiméne ohendúraʼe chupe heta vése oñeʼẽrõ upe Rréinore. Ha nontendeiparakaʼe chupe hikuái? Oporandu piko hikuái mbaʼépa upe Rréino? Nahániri. Umi lívro oĩva Bíbliape, Mateo, Marcos, Lucas ha Juánpe oñemombeʼu Jesús rembiasakue. Umívape ndaipóri ni peteĩ hendápe oporanduhague hikuái upe mbaʼe. Upéicharõ, oikuaaparakaʼe umi tapicha mbaʼépa heʼise Ñandejára Rréino?

Ñandejára Ñeʼẽ ymave guare ningo oñeʼẽ upe Rréino rehe, ha umi hudío omombaʼeterei upéva. Omyesakã porãiterei voi katu mbaʼépa hína pe Rréino ha mbaʼépa ojapóta. Koʼág̃a rupi ñande avei ikatu jaikuaave mbaʼépa upe Rréino, ha yma guaréicha jaiporukuaa la Biblia upearã. Jahechami siete mbaʼe heʼíva hese la Biblia. Umi mbohapy mbaʼe jahecha raẽtava oikuaa porã vaʼekue umi hudío Jesús tiémpope guare térã upe mboyve oikovaʼekue. Upe rire jahecháta mbohapy mbaʼe Jesucristo ha hemimboʼekuéra omombeʼuvaʼekue. Ha pe sietehapegua katu jahechakuaa ko ñane tiémpope.

1. Ñandejára Rréino ningo peteĩ goviérno oĩtava opa ára g̃uarã. Pe profesía ypykue oĩva la Bíbliape ohechauka Ñandejára omboutaha peteĩ osalvavaʼerã umi ojeroviávape hese. Upe oporosalvátavape oñehenói pe “ñemoñare”, ha ojeʼéma avei haʼe oipeʼataha umi mbaʼe vai ojapovaʼekue Satanás, Adán ha Eva (Génesis 3:15). Heta tiémpo rire, rréi Davídpe ojeʼe peteĩ mbaʼe ijojahaʼỹva pe “ñemoñare”, térã Mesías rehe. Ojeʼe chupe upe “ñemoñare” oisãmbyhytaha peteĩ Rréino, peteĩ goviérno oĩtava opa ára g̃uarã, ha ndaijojaháiva (2 Samuel 7:​12-14).

2. Ñandejára Rréino ohundíta opaichagua yvypóra goviérno. Pe proféta Daniélpe ojehechaukavaʼekue mbaʼéichapa umi poténsia mundiál ojupi ha okúi jey ymaite guive koʼág̃a peve. Ha ipahaitépe ojeʼe chupe: ‘Oisãmbyhy aja koʼã último mburuvichakuéra, Ñandejára yvagapegua omopuʼãta peteĩ rréino noñehundimoʼãiva arakaʼeve. Kóva ndoʼamoʼãi avaveichagua tetã poguýpe. Ohundietéta uvei ambue goviernokuéra ha ndopamoʼãi arakaʼeve’. Upéicharõ umi rréino térã goviérno ko mundopegua oñehundietéta umi mbaʼe vaieta ojapóva reheve. Ojeʼeháicha avei Daniélpe versíkulo 45-pe, Ñandejára Rréino ningo yvagapegua, péro koʼẽrõitéma avei oisãmbyhýta ko Yvy ape ári (Daniel 2:​44, 45).  Oñemoĩta katuete upe goviérno, ha haʼeñoite oisãmbyhýta. *

3. Ñandejára Rréino oipeʼaitéta ñorairõ, mbaʼasy, ñembyahýi ha ñemano. La Bíbliape oĩ heta profesía omombeʼúva mbaʼépa ojapóta Ñandejára Rréino ko Yvy ape ári. Upe goviérno ojapóta opa mbaʼe koʼag̃agua goviérno ndaikatúiva ojapo. Epensamíntena: opaichagua árma ojeporúva oñeñorairõ hag̃ua oñehundipaitéta! La Biblia heʼi: “[Ñandejára] ojoko opaichagua ñorairõ ko Yvy ári” (Salmo 46:9). Ha ndaiporimoʼãi rupi hasykatúva, noñekotevẽmoʼãvéima umi ospitál ni umi doktorkuérare. “Avave ndeʼimoʼãi: ‘Che rasyʼaína’.” (Isaías 33:24.) Ndaiporimoʼãvéima ipiruetereíva ha omanóva ñembyahýigui. ‘Umi kogaty henyhẽta ko Yvy ape ári.’ (Salmo 72:16.) Ndojehomoʼãvéima omanovahápe, veloriohápe, sementériope, ha ndaiporimoʼãvéima avei oñembyasýva upévare. Hasy peve oñehundíta pe ñemano ha ndaipuʼakamoʼãvéima ñanderehe. “Ñandejára oipeʼáta ñemano, noñemanoʼãi arakaʼeve, opárupi omokãta tesay.” (Isaías 25:8.)

4. Ñandejára voi oiporavo pe ogovernátava Irréino. Pe Mesías ndojeporavói ijupe voi ha ndoiporavói avei chupe yvypóra. Ñandejaraite voi oiporavovaʼekue chupe. Upéva ohechauka ñandéve umi título Mesías ha Cristo, heʼiséva ‘ojeporavohague’. Upéicharõ Jehová hína pe oiporavovaʼekue Jesúspe ogoverna hag̃ua. Ñandejaraite voi heʼi hese: “Kóina ápe che rembiguái, [...] che rembiporavo chembovyʼáva. Ipype amoĩ che espíritu ogueraha hag̃ua tekojoja opa tetãme” (Isaías 42:1; Mateo 12:​17, 18). Ha ndaipóriningo ótro oikuaavéva ñande Apoharégui mávapa ñanesãmbyhyvaʼerã.

5. Pe ogovernátava Ñandejára Rréino ohechaukáma ñandéve oisãmbyhy porãtaha. Jaikuaa porã ningo Jesús de Nazaret haʼeha pe Mesías oñeprometevaʼekue. Onase pe família Ñandejára heʼivaʼekuépe voi (Génesis 22:18; 1 Crónicas 17:11; Mateo 1:1). Oĩrõ guare ko Yvy ape ári oñekumpli hese hetaiterei profesía ymaitereíma ojehaivaʼekue. Yvága guive avei ojeʼe hese haʼeha pe Mesías. Mbaʼéicha piko oikorakaʼe upéva? Ñandejaraite oñeʼẽ yvága guive ha heʼi hese Itaʼyraha, ha umi ánhel avei heʼi hese haʼeha pe Mesías oñeprometevaʼekue. Upéicharõ jepe, Jesús ojapovaʼekue heta milágro ohechauka porã hag̃ua Ñandejára podér, ha pyʼỹinte heta renondépe voi ojapómi umi milágro. * Jesucristo heta vése ohechaukavaʼekue mbaʼeichagua governántetapa haʼe. Haʼe ndahaʼeivaʼekue ikatúnteva oipytyvõ umi héntepe, oipytyvõse voi katu chupekuéra (Mateo 8:​1-3). Haʼe ipojera, oporoporiahuvereko, ipyʼaguasu ha iñumílde. Ha umi mbaʼe ohasavaʼekue ko Yvy ape ári jatopa la Bíbliape ha enterove ikatu jalee.

6. Ñandejára oiporavo 144.000-pe ogoverna hag̃ua Jesucristo ndive. Jesús heʼivaʼekue oĩtaha oisãmbyhýva hendive yvágape. Umíva apytépe ijapostolkuéra ha avei ambue tapichakuéra. Ombohéra chupekuéra ‘ovecha aty mbovyvéva’ (Lucas 12:​32, BNP). Upe rire, apóstol Juánpe ojeʼe ko ‘ovecha aty mbovyvévape’ oĩtaha 144.000 tapicha oservíva Ñandejárape. Koʼãva oisãmbyhýta Jesucristo ndive rréi ha saserdóteramo (Apocalipsis [Revelación] 5:​9, 10; 14:​1, 3).

7. Ñandejára Rréino ogovernáma yvágape, ha ogovernapotaitéma ko Yvy ape ári avei. Tuichaiterei mbaʼe ningo ñandéve g̃uarã upéva. La Biblia omombeʼu heta mbaʼe ohechaukáva Jesús ogovernamaha yvágape peteĩ Rréiramo. Upépema oisãmbyhy koʼág̃a, ha koʼẽrõitéma oisãmbyhýta avei ko Yvy ape ári ha ojapopaitéta umi mbaʼe porãita la Biblia heʼíva ojapotaha. Péro, mbaʼéichapa ikatu jaikuaa porã Ñandejára Rréino ogovernamaha? Ha arakaʼépa ogoverna ñepyrũta ko Yvy ape ári?

[Nóta]