Mbaʼe mbaʼépa ñanemboʼe Mateo
Jehová Ñeʼẽ ningo oikove
Mbaʼe mbaʼépa ñanemboʼe Mateo
MATEO ohai ypy vaʼekue umi mbaʼeguasuete Jesús ojapovaʼekue oĩ aja ko Yvy ape ári. Haʼe impuésto kovraha vaʼekue, ha upéi katu omoirũ meme Jesúspe. Mateo Marandu Porã ojehaivaʼekue evréope áño 41-pe Jesús ou rire, ha upéi ojetradusi griégope. Ko lívro iporãiterei jahasa hag̃ua Evréo Kuatiañeʼẽgui, Griégo Kuatiañeʼẽme.
Ko lívro porãite ojejapo umi hudíope g̃uarã ha ohechauka Jesús haʼeha Ñandejára Raʼy, pe Mesías oñeprometevaʼekue. Ñañehaʼãramo ñantende porã umi mbaʼe heʼíva, ñamombaretéta ñande jerovia Ñandejára teére, ipromesakuérare ha avei Jesús rehe (Hebreos. 4:12).
‘HIʼAG̃UÍMA YVAGAPEGUA RRÉINO’
Mateo ohechauka porãse mbaʼépa Ñandejára Rréino ha Jesús omboʼevaʼekue, upévare ndohaíri umi mbaʼe ojoapykueripa oikohagueichaite. Pór ehémplo, pe diskúrso Jesús omeʼẽvaʼekue peteĩ sérro ári guive (Sermón del Monte) omoĩ oñepyrũnguévo ilívro. Péro Jesús omeʼẽ upe diskúrso opredika riréma un año y medio rasa.
Jesús opredika aja Galiléare, ojapo heta milágro, omboʼe umi 12 apóstolpe mbaʼéichapa opredikavaʼerã, omombeʼu umi fariséo hembiapo vaiha, ha ombojoja Ñandejára rréino heta mbaʼére. Upéi oho Galiléagui ha “og̃uahẽ Judéape rrío Jordán mboypýri” (Mateo 19:1, BNP). Tapére heʼi hemimboʼekuérape: ‘Jahanikoñaína Jerusalénpe. Upépe haʼekuéra ojeruréta ajejuka hag̃ua. Ára mbohapyhápe katu aikove jeýta omanóva apytégui’ (Mateo 20:18, 19).
Porandukuéra:
3:16. Mbaʼéichapa “yvága ojepeʼa” Jesús ojevautisárõ guare? Oiméne heʼise Jesús imanduʼahague umi mbaʼe ojapovaʼekuére oikórõ guare yvágape ou mboyve ko Yvy ape ári.
5:21, 22. Oimérõ ñandepochy peteĩ tapicháre, ivaivépa jajaʼo vaipáramo chupe, ñaguerokirirĩrangue? Jesús ohechauka peteĩ tapicha orrenegárõ iñermánore, tuicha ojavyha. Péro ivaivétantema osẽrõ ojaʼo térã iñeʼẽ arhél chupe. Upévare ojegueraharangue peteĩ trivunálpente, ojeguerahavaʼerã Trivunál Guasu renondépe.
5:48. Ikatu piko ‘ñanemarangatu, ñande Ru yvágape oĩva imarangatuháicha’? Jaʼekuaa ikatuha. Upérõ Jesús oñeʼẽ mborayhúre, ha heʼi hemimboʼekuérape oporohayhuvaʼerãha Jehová oporohayhuháicha (Mateo 5:43-47). Mbaʼéichapa ojapóta hikuái upéva? Ohayhúvo avei umi ndochaʼéivape hesekuéra.
7:16. Mbaʼépa umi ‘tembiapo’ ñanepytyvõva jaikuaa hag̃ua pe rrelihión tee? Koʼãva ndahaʼéi umi mbaʼe jajapóvante, síno avei, mbaʼépa jaguerovia.
10:34-38. Ikatúpa jaʼe la Biblia káusare oĩha provléma ogapýpe? Ni mbaʼevéicharõ. Ojeiko vai ningo pe famíliape oĩramo ndojeroviáiva Ñandejárare ha ojokoséva ihentekuérape ani hag̃ua ojapo la Biblia heʼíva (Lucas 12:51-53).
11:2-6. Juan ningo ohendu Jehová heʼírõ guare Jesús haʼeha itaʼýra, ha upévare oikuaa haʼeha pe Mesías. Mbaʼérepa upéicharõ oporanduka Jesúspe: ‘Nde piko hína pe ouvaʼerã’? Oiméne ohenduse Jesús voi heʼíramo chupe upeichaha. Péro ikatu avei oikuaase tekotevẽpa ohaʼarõ hikuái “ambuépe”, oútava ogoverna ha ojapótava umi hudío ohaʼarõva. Jesús heʼiuka Juánpe ndaiporiha ótro oútava upe rire.
19:28. Mbaʼépa orrepresenta umi ‘doce trívu Israelgua’ ojehusgátava? La Bíbliape ojeʼe umi yvágape ohótava haʼeha Israel Ñandejára mbaʼéva ha oĩha 12 trívupe, péro koʼápe noñeñeʼẽi hesekuéra (Gálatas 6:16; Apocalipsis [Revelación] 7:4-8). Mbaʼéichapa jaikuaa upéva? Upérõ ningo Jesús oñeʼẽ ijapostolkuérape, ha haʼekuéra ohóta yvágape ogoverna hag̃ua. Ndaikatumoʼãi ojehusga ijupekuéra. Mávapepa orrepresenta upéicharõ? Jesús ningo heʼi hemimboʼekuérape ogovernataha hendive irréinope. Ojapo chuguikuéra ‘rréi ha saserdóte Ñandejárape g̃uarã’ (Lucas 22:28-30; Apocalipsis 5:10, BNP). Avei umi ungido ‘ohusgavaʼerã yvyporakuérape’ (1 Corintios 6:2, BNP). Upéicharõ umi ‘doce trívu Israelgua’ (ojehusgáva) oiméne orrepresenta entéro yvypóra ndohomoʼãiva yvágape. Koʼãvape orrepresenta umi 12 trívu Ñemoĩ Porã Jevy árape (Día de Expiación) (Levítico kap. 16).
Mbaʼépa ñanemboʼe:
4:1-10. Koʼápe jahecha Satanás ndahaʼeiha pe aña oĩva ñande pype, síno peteĩ tekove añetegua. Haʼe ñanemoñuhãse ha upearã oiporu umi mbaʼe ‘jaipotáva, ñande resa ohayhu ha ohechaséva, ha ñemombaʼeguasu umi mbaʼe jarekóvare’. Péro jajapóramo la Biblia heʼíva ñaneñeʼẽrendúta Ñandejárape (1 Juan 2:16, BNP).
5:1–7:29. Jahechakuaákena ñaikotevẽha Ñandejárare. Ñañehaʼãke jaiko porã opavavéndi. Ñapensa jave mbaʼe vaíre, pyaʼékena jaipeʼa ñane akãgui. Jaʼe jave jajapotaha peteĩ mbaʼe, jajapókena. Ñañemboʼe jave ñamotenondéke Jehovápe, ani umi mbaʼe ñande jaipotáva. Ñañehaʼãke ñambyaty mbaʼeta Ñandejára renondépe. Jaheka raẽkena Ñandejára rréino ha pe teko marangatu haʼe oipotáva. Aníkena ñañeʼẽ vai ñande rapicháre. Jajapóke Ñandejára rembipota. Ajépa hetaite mbaʼe porã ñaaprende ko diskúrso Jesús omeʼẽvaʼekuégui!
9:37, 38. Jajeruréramo kóga Járape ‘ombou hag̃ua umi omonoʼõvaʼerã’, ñande avei ñambaʼapo kyreʼỹvaʼerã japredikávo ha ñamboʼévo ñande rapichakuérape (Mateo 28:19, 20).
10:32, 33. Aníkena jakyhyje ñañeʼẽ hag̃ua ñande jeroviáre.
13:51, 52. Ñantendéramo mbaʼépa Ñandejára rréino ha mbaʼépa ojapóta, jaikuaaukavaʼerã ñande rapichakuérape.
14:12, 13, 23. Maymáva ñaikotevẽ tiémpo jajepyʼamongeta hag̃ua ñaneañohápe umi mbaʼe iñimportántevare (Marcos 6:46; Lucas 6:12).
17:20. Tekotevẽ jajerovia Jehováre ñandepuʼaka hag̃ua umi provlémare ikatúva ñandejoko jaservi porãve hag̃ua Chupe. Heta vése koʼã provléma tuicha montáñaicha. Upévare, ñañehaʼãkena akóinte ñamombarete ñande jerovia Jehováre ha ipromésare (Marcos 11:23; Lucas 17:6).
18:1-4; 20:20-28. Jesús remimboʼekuéra jepe oipotavaʼekue oñemombaʼeve chupekuéra hapichágui. Upéva oiko iñimperfékto rupi hikuái ha avei irrelihionkuérape ojeguerohoryeterei umi oñemombaʼeguasúvape. Tekotevẽ ñaneumílde, ani ñañemeʼẽ umi mbaʼe vai jajaposévape. Ha jahechákena hendápe porã umi rresponsavilida oñemeʼẽva ñandéve kongregasiónpe.
“CHE KUIMBAʼÉICHA AJUVAʼEKUE AÑEMEʼẼTA”
Jesús oike Jerusalénpe peteĩ “vúrro ári” 9 de nisán, áño 33-pe (Mateo 21:5). Upe ára rire oho Jehová rógape ha omosẽ upégui umi ombaʼevende ha oñemúvape. Once de nisán oporomboʼe témplope ha omombeʼu umi fariséo rembiapo vai. Upéi omombeʼu hemimboʼekuérape mbaʼéichapa ohechakuaáta hikuái ‘og̃uahẽmaha pe ára haʼe ou jey hag̃ua ha og̃uahẽtaha ára paha’ (Mateo 24:3, JMP). Upe ára rire heʼi hemimboʼekuérape: “Peẽ niko peikuaa koʼágui mokõi arahápe pascua areteha, ha che, kuimbaʼéicha ajuvaʼekue Yvy ári, añemeʼẽta añemosaingo hag̃ua” yvyráre (Mateo 26:1, 2, BNP).
Upéi og̃uahẽ 14 de nisán. Jesús ojapo peteĩ séna paha hemimboʼekuérandi ha heʼi ojegueromanduʼa hag̃ua upéva. Upéi oñetraisiona chupe, ojeraha préso, ojehusga ha ojejuka peteĩ yvyráre. Tres día haguépe oñemoingove jey omanóva apytégui. Oho mboyve yvágape Jesús heʼi hemimboʼekuérape: “Tapeho aipóramo opa tetã rupi ha pejapo chupekuéra che remimboʼéramo” (Mateo 28:19).
Porandukuéra:
22:3, 4, 9. Arakaʼépa oñehenói mbohapy vése umi invitádope kasamientorã? Umi invitádope oñehenói ypy áño 29-pe Jesús ha hemimboʼekuéra oñepyrũrõ guare opredika, ha osegi 33 peve. Upéi oñehenói jey oñeñohẽvo espíritu sánto Pentecostés áño 33-pe ha osegi 36 peve. Koʼã invitasión oñemeʼẽ umi hudíope, umi tapicha oikévape umi hudío rrelihiónpe ha umi samaritánope. Ipahápe katu oñehenói umi tetã ambueguápe, ndosegíriva umi hudío rrelihión. Koʼãvape orrepresenta umi hénte ojejuhúva pe táva okáre. Ko invitasión oñepyrũ 36-pe, Cornelio, peteĩ militár Romaygua ohejávo ijerovia yma guare ha omoirũ kristianokuérape, ha ko invitasión osegi koʼág̃a peve.
23:15. Mbaʼérepa umi fariséo remimboʼe rehe ojeʼe ‘haʼekuéra raẽ ohovaʼerãha Gehénape’ ha upéi ae umi fariséo? Oiméne oiko mboyve chuguikuéra fariséo remimboʼe, koʼã tapicha ojapomahikóni heta mbaʼe vai. Péro upéi oñepyrũvo opensa umi fariséoicha, ou iñañave imboʼeharakuéragui. Upévare ojeʼe ‘haʼekuéra raẽ ohovaʼerãha Gehénape’.
27:3-5. Mbaʼérepa Judas oñeñandu vai ojapovaʼekuére? Haʼe noñeñanduvaíri ombyasýgui hembiapo vaikue. Ojerurerangue Jehovápe toperdona chupe, oho oñeombeʼu umi saserdóte guasu ha ansiánope. Judas ojapo “tembiapo vai ogueraháva ñemanóme”, ha upévare ipyʼatarovaite, oñeñandu vai ha ndoikuaái mbaʼépa ojapóta (1 Juan 5:16). Haʼéko oñeñandu vaínte oikehaguére peteĩ provléma jetuʼúpe.
Mbaʼépa ñanemboʼe:
21:28-31. Jehovápe g̃uarã iñimportanteve jajapo hembipota. Pór ehémplo, japredika kyreʼỹvaʼerã ha ñamboʼe ñande rapichakuérape (Mateo 24:14; 28:19, 20).
22:37-39. Koʼã mokõi mandamiénto ohechauka porãiterei mbaʼépa Ñandejára ojerure hemimboʼekuéragui.
[Nóta oĩva taʼanga ndive páhina 31]
© 2003 BiblePlaces.com
[Nóta oĩva taʼanga ndive páhina 31]
Repredika memépa kyreʼỹme?
[Nóta oĩva taʼanga ndive páhina 31]
Mateo Kuatiañeʼẽ ohechauka iñimportanteha Ñandejára rréino