‘Umi añetehápe oikoveséva opa ára g̃uarã, oguerovia pe marandu porã’

‘Oguerovia opa umi añetehápe oikoveséva opa ára g̃uarã.’ (HECHOS 13:​48, BNP.)

1, 2. Mbaʼéichapa umi kristiáno ypykue omombeʼurakaʼe opárupi pe marandu porã, Jesús heʼihaguéicha?

 PE LÍVRO hérava Hechos omombeʼu mbaʼéichapa umi kristiáno ypykue ojapo Jesús heʼihaguéicha, ha oparupiete omombeʼu hikuái pe marandu porã (Mateo 24:14). Oĩvaʼekue umi kyreʼỹme oñepyrũva opredika ha upe rire umi ótro omoirũma chupekuéra. Opredika kyreʼỹ rupi Jesús remimboʼekuéra Jerusalénpe, hetaitereive oĩ hikuái kongregasiónpe. Umíva apytépe oĩvaʼekue hetaiterei saserdóte avei (Hechos 2:41; 4:4; 6:7).

² Umi misionéro upe tiémpope guare hetaitereípe oipytyvõ oservi hag̃ua Ñandejárape. Umíva apytépe oĩvaʼekue Felipe, haʼe ningo oho Samáriape ha otopa hetaiterei ohenduséva chupe (Hechos 8:​5-8). Apóstol Pablo ohovaʼekue mombyrymbyry iñirũnguéra ndive omombeʼu hag̃ua pe marandu porã. Oho hikuái Chipre, Macedonia, Grecia, Italia ha heta henda rupi Asia Menórpe. Upévare hetaiterei hudío ha griégo oguerovia pe marandu porã ha oservi Ñandejárape (Hechos 14:1; 16:5; 17:4). Tito ojapo umi tembiapo ojehejavaʼekue chupe ojapo hag̃ua Crétape (Tito 1:5). Apóstol Pedro opredikavaʼekue Babilóniape. Ha ohaírõ guare pe primera kárta, áño 62 ha 64 rupi, ojepredikamavaʼekue Ponto, Galacia, Capadocia, Asia ha Bitinia rupi (1 Pedro 1:1; 5:13). Aje piko iporãite upéva! Umi kristiáno ypykue opredika kyreʼỹ vaʼekue. Upévare umi ndaijaʼéiva hesekuéra heʼi ‘oporomyangekoiha hikuái ko Yvy jerekuévo’ (Hechos 17:6; 28:22).

3. Mbaʼépa ohupytyhína puvlikadorkuéra predikasiónpe, ha mbaʼéichapa nde reñeñandu reikuaávo upéva?

³ Koʼág̃a rupi avei heta hetave ñaime kongregasiónpe. Ajépa ñanemokyreʼỹete jaleéramo testigos de Jehová informe anual ha jahecha mbaʼépa ojehupytýraʼe oñondivepa. Ñandepyʼakyrỹiningo jaikuaávo ohasahague seis millones umi tapicha ostudiavaʼekue la Biblia 2007-pe. Pe áño ohasavaʼekuépe avei diez millones rupi ndahaʼéiva testigos de Jehová ohókuri Conmemoracionhápe. Upéva ohechauka heta mbaʼe gueteri ojejapovaʼerãha.

4. Mávapa umi ogueroviáva pe marandu porã?

⁴ Yma guaréicha avei koʼág̃a ‘opa umi añetehápe oikoveséva opa ára g̃uarã’ oguerovia pe marandu porã (Hechos 13:​48, BNP). Heta ningo oĩ oñemoag̃uíva Jehová organisasiónpe (jaleemína Ageo 2:7). Ha ñande ñambaʼaposéramo avei ko tembiapópe, mbaʼépa jajapovaʼerã?

 Japredikavaʼerã opaichaguápe

5. Mbaʼeichagua tapicháguipa ikatu oiko Ñandejára amígo?

⁵ Umi kristiáno ypykue oikuaavaʼekue Ñandejára ‘oguerohoryha oimeraẽ tetãmeguápe, okyhyjévape chugui ha hembiapo porãvape’ (Hechos 10:​34, 35, BNP). Oimeraẽvagui ikatu oiko Jehová amígo, ogueroviáma guive Jesús omanohague ñanderehehápe (Juan 3:​16, 36). Upévare jahechakuaa Ñandejára ‘oipotaha opavave ojesalva ha oikuaa pe añetegua’ (1 Timoteo 2:​3, 4).

6. Mbaʼépa ndajajapoivaʼerã japredika jave, ha mbaʼérepa?

⁶ Ivaítaningo ndajapredikaséiramo ñande rapichápe ipire kolór térã irrelihión diferentehaguére, imboriahu térã iplatahaguére, ipínta vaíre, térã oimeraẽ mbaʼére. Ñapensamíntena: Ajépa javyʼa pe opredika ypy vaʼekue ñandéve nomañaihaguére umi mbaʼére? Upéicharõ, mbaʼéicha piko ñamboykéta ñande rapichápe ha nañamombeʼúi chupe pe marandu porã? (Jaleemína Mateo 7:12.)

7. Mbaʼérepa ndajahusgaivaʼerã ñande rapichápe?

⁷ Jehová omoĩ Jesúspe oporohusga hag̃ua. Upévare ñande ndajahusgaivaʼerã ñande rapichápe. Ñande ningo japorohusga umi mbaʼe jahecháva ha ñahendúvarente. Jesús katu ikatu oikuaa mbaʼépa ñapensa ha ñañandu ñandepyʼapýpe (Isaías 11:​1-5; 2 Timoteo 4:1).

8, 9. a) Mbaʼeichaguápa rakaʼe Saulo oiko mboyve chugui kristiáno? b) Mbaʼépa ñanemboʼe apóstol Pablo ohasavaʼekue?

⁸ Opaichagua ñande rapicha ningo oservihína Jehovápe. Umíva apytépe ñanemanduʼakuaa Saulo de Tarso rehe. Chupe ningo ojekuaa apóstol Pábloramo. Saulo ningo peteĩ fariséo opersegi mbarete vaʼekue kristianokuérape, oimoʼãgui tuichaiterei ojavyha hikuái (Gálatas 1:13). Ñandénteramo jaʼéta voi hese ndoikomoʼãiha chugui kristiáno. Péro Jesús ohechakuaa hese ipyʼaporãha ha oiporavo chupe ojapo hag̃ua peteĩ tembiapo ijojahaʼỹva. Upéicha Sáulogui oiko peteĩ kristiáno ombaʼapo kyreʼỹva upe kongregasión ypykuépe.

⁹ Mbaʼépa ñanemboʼe apóstol Pablo ohasavaʼekue? Ikatu oĩ ñande territóriope umi tapicha nohenduséiva ñane marandu. Ñaimoʼãramo jepe ndoservimoʼãiha Ñandejárape, ñañehaʼãvaʼerã ñañemongeta hendivekuéra. Sapyʼánte ningo pe ñaimoʼãʼỹvévante ñanerendu porã. Ñanemanduʼavaʼerã ñande japredika meme vaʼerãha opaichaguápe (jaleemína Hechos 5:42).

Umi mbaʼe porã jahupytýva japredika meme rupi

10. Mbaʼérepa japredikavaʼerã avei umi tapicha ñanemongyhyjévape? Emombeʼukuaa ermanokuéra kongregasionpegua ohasavaʼekue.

¹⁰ Umi mbaʼe jahecháva ikatu ñande resa mbotavy. Jahechamína oikovaʼekue Ignacio * rehe. Haʼe América del súrpe oĩ jave kárselpe ostudia ñepyrũ vaʼekue la Biblia testigos de Jehová ndive. Ignacio ningo peteĩ kuimbaʼe ndeʼarhélva, ha enterovénte okyhyjepáva chugui. Umi karseléro ojapo heta mbaʼe ovendevaʼerã. Ha oĩramo odevéva chupekuéra oho ojerure Ignáciope okovra hag̃ua umívape. Péro Ignacio ostudiavévo la Biblia ha ojapóvo oaprendehaguéicha, okambia heta mbaʼépe. Haʼe ningo ñorairõ ha mbaretépente voi oikovaʼekue, koʼág̃a katu ipyʼaguapy ha oiko porã opavavéndi. Ha avavéma ndojerurevéi chupe okovra hag̃ua umi odevévape chupekuéra. Ignacio katu ovyʼaiterei Ñandejára Iñeʼẽ ha ijespíritu rupive oipytyvõhaguére chupe okambia hag̃ua. Oagradese avei umi ermanokuérape oñehaʼãhaguére omboʼe chupe omañaʼỹre mbaʼeichaguápa haʼe.

11. Mbaʼérepa ñande jaha jey jey jepi ñande rapichakuéra rógape?

¹¹ Ñande ningo jaha jey jey jepi ñande rapichakuéra rendápe jaikuaágui ikatuha okambia hikuái. Ikatu ningo jaha riréma hendápe, hasykatúraʼe, oñemosẽ itravahohágui térã ihénte manóraʼe (jaleemína Eclesiastés 9:11). Térã umi mbaʼe vai oikóva ko múndope omopensa chupe henonderãre. Koʼã mbaʼére ikatu ohenduséma  ñane marandu jaha jey vove hógape, ndoikuaaséiramo jepe mbaʼeve upe mboyve. Upévare, aníkena ñatĩ ñañeʼẽ hag̃ua pe marandu porã rehe opa ikatúvape.

12. Mbaʼéichapa ñande jahechavaʼerã umi óga járape, ha mbaʼérepa?

¹² Ñande ningo ndajahechapái heta mbaʼe ha jaʼéma voi mbaʼeichaguápa ñande rapicha. Jehová katu ojesareko peteĩteĩ rehe ha oikuaa umi mbaʼe porã jarekóva ñande pyʼapýpe (jaleemína 1 Samuel 16:7). Ñañehaʼãkena jajapo avei upéicha japredika jave. Heta mbaʼe oikovaʼekue ohechauka ñapensa porãramo opavave óga jára rehe, ñanerendu porãvetaha hikuái predikasiónpe.

13, 14. a) Mbaʼérepa peteĩ prekursóra ndohovéi ovisita peteĩ hapichápe? b) Mbaʼépa ñanemboʼe upe oikovaʼekue?

¹³ Peteĩ prekursóra hérava Sandra opredikahikóni umi ogaha rupi peteĩ isla del Caríbepe. Upeichahápe otopa Ruth rehe. Ruth ningo vyʼapópe ohóva jepi umi karnavalhápe, ha osẽma voi dos vése reina nacional del carnaválramo. Ha Sandra opredikárõ guare chupe, omombaʼeterei pe marandu porã. Upévare heʼi chupe oho jeytaha ostudia hag̃ua hendive la Biblia. Ko prekursóra ningo heʼi: “Ag̃uahẽ ypýrõ guare hógape, ahecha peteĩ ifóto tuicháva karnavalhápe guare, ha ahecha avei umi prémio oganavaʼekue. Ahechakuaa hese la hénte ohayhuha chupe ha haʼe omombaʼetereiha umi karnavál. Upévare aimoʼã ndostudiachéne hag̃ua. Upémaramo ndahavéintema hendápe”.

¹⁴ Upe rire, Ruth oho Salón del Réinope, ha opa rire rreunión oporandu Sándrape: “Mbaʼére piko nderehovéi chevisita?”. Sandra ojediskulpa ha heʼi chupe oho jeytaha ostudia hag̃ua hikuái. Ruth pyaʼe voi okambia. Oipeʼapa ifotokuéra karnavalhápe guare, oho meme rreunionhápe, osẽ predikasiónpe ha oñemeʼẽ Jehovápe oservi hag̃ua chupe. Ha Sandra katu ohechakuaa ojapo vai hague ndohovéirõ guare ovisita chupe.

15, 16. a) Mbaʼépa oikóraʼe peteĩ ermána opredikahaguére hovajápe? b) Mbaʼérepa japredikavaʼerã ñane hentekuérape jaikuaáramo jepe mbaʼéichapa oiko hikuái?

¹⁵ Oĩ avei umi ermáno osẽ porãva opredikávo ihentekuéra ndahaʼéivape testígo. Ojapo upéicha haʼetéramo jepe ndoikomoʼãiva chuguikuéra mbaʼeve. Upéva jahechakuaa Joyce ohasavaʼekuére. Haʼe ningo oiko Estados Unídospe. Ko ermána rovaja ningo imitãrusu guive ojeguerahavaʼekue heta vése kárselpe. Joyce omombeʼu: “Ojeʼéningo hese oñehundimaha. Haʼe ningo ovende dróga, imonda ha ojapo heta mbaʼe vai. Upéicharõ jepe, che katuete añeʼẽmi chupe Ñandejárare. Ha treinta y siete áño pukukue ajapo upéicha”. Joyce ipasiénsia ha naikaneʼõi rupi, amo ipahápe hovaja ostudia testigos de Jehová ndive ha okambiaite. Ramoite ojevautisa peteĩ aty guasúpe Califórniape, orekópe 50 áño. Joyce omombeʼu: “Cherasẽningo ahechárõ guare ojevautisa. Ha avyʼaiterei ndaʼeihaguére hese nokambiaichéne hag̃ua!”.

¹⁶ Sapyʼánte ikatu nañañeʼẽséi ñane hentekuérape Ñandejára heʼívare jaikuaágui mbaʼéichapa oiko hikuái. Péro jahecháma Joyce ndohejaihague omokangy chupe upéva opredika  hag̃ua hovajápe. Ñande ningo ndaikatúi voi jaikuaávo mbaʼépa oĩ ñande rapicha pyʼapýpe. Ikatu oikuaase asy hína hikuái Ñandejára añeteguápe. Upévare, ñaipytyvõkena chupekuéra oguata hag̃ua Ñandejára rapére (jaleemína Proverbios 3:27).

Peteĩ lívro iporãitereíva

17, 18. a) Mbaʼéichapa jahechakuaa pe lívro Mbaʼépa omboʼe la Biblia? hetápe oipytyvõha? b) Pe lívro Mbaʼépa omboʼe la Biblia? rupive, mbaʼéichapa reipytyvõma nde rapichápe?

¹⁷ Opárupi oñemombeʼu pe lívro Mbaʼépa añetehápe omboʼe la Biblia? oipytyvõha hetaiterei tapicha ipyʼaporãvape. Peteĩ prekursóra oikóva Estados Unídospe hérava Penni omoñepyrũ heta estúdio ko lívro reheve. Mokõi tapicha ijedámava ha omombaʼetereíva irrelihión, ostudia avei hendive. Upévare Penni ndoikuaái mbaʼéichapa ojagarráta hikuái pe lívro Mbaʼépa omboʼe la Biblia? heʼíva. Upéicharõ jepe, haʼe heʼi: “Pe informasión oñemoĩ hesakã ha oñentende porã hag̃uáicha. Upévare che estudiantekuéra pyaʼe ohechakuaa umi mbaʼe amboʼéva chupekuéra oĩ porãha, ha oguerovia hikuái”.

¹⁸ Peteĩ ermána hérava Pat oiko Gran Bretáñape. Upépe ombostudia peteĩ kuñakarai ouvaʼekuépe Ásiagui. Ko kuñakarai ohasa heta mbaʼe vai osẽ mboyve hetãgui. Umi soldádo oñorairõvahína ogueraha iména ha imembykuérape, ha upe guive ndohechavéiva chupekuéra. Ojehapypa chugui hóga, ha haimetete omano, ha heta kuimbaʼe oviola chupe. Oiko rire hese koʼã mbaʼe, haʼe ndoikuaavéima maʼerãpa oikove ha heta vése ojesuisidasemoʼã. Péro, ostudia rupi la Biblia ohaʼarõkuaa jey heta mbaʼe porã. Pat omombeʼu: “Pe lívro Mbaʼépa omboʼe la Biblia? omyesakã hasyʼỹ hag̃uáicha opa mbaʼe ha oiporu umi ehémplo iporãitereíva. Upévare tuichaiterei oipytyvõ pe kuñakaraípe”. Upe kuñakarai ningo pyaʼe ojapókuri umi mbaʼe oaprendéva, upéi oĩma osẽ hag̃uáicha opredika ojevautisaʼỹre ha heʼi ojevautisaseha pe asambléa oúvape. Aje piko javyʼaite ñaipytyvõhaguére ñande rapichakuéra ipyʼaporãvape ohaʼarõ hag̃ua avei umi mbaʼe porã la Biblia oprometéva!

“Nañanekaneʼõivaʼerã jajapo hag̃ua iporãva”

19. Mbaʼérepa tekotevẽterei japredika?

¹⁹ Koʼẽ koʼẽre tekotevẽtereive japredika ha ñaipytyvõ ñande rapichápe oguata hag̃ua Ñandejára rapére. Káda áño hetaiterei oĩ ohendu porãva ñane marandu. Oĩ kuña ha kuimbaʼe ‘añetehápe oikoveséva opa ára g̃uarã’. Péro Jehová ára guasu hiʼag̃uimbaitéma. Upévare umi ndoikuaáiva Ñandejárape ‘oñembotyryryhína ojejuka hag̃ua’ (Sofonías 1:14; Proverbios 24:11).

20. Mbaʼépa jajapovaʼerã katuete?

²⁰ Ikatu gueteri ñaipytyvõ koʼã ñande rapichakuérape. Upearã tekotevẽ jajapo umi kristiáno ypykue ojapohaguéicha. Haʼekuéra ningo “opa ára oporomboʼémi ha omyerakuã Jesús, upe Mesías marandu porã” (Hechos 5:42). Upéicha avei ñande jajapovaʼerã: jasegi japredika oĩramo jepe opuʼãva ñanderehe, jahecha mbaʼéichapa ikatu ñandekatupyryve ñaporomboʼe hag̃ua ha japredika opaichagua tapichápe. “Nañanekaneʼõivaʼerã jajapo hag̃ua iporãva”. Jajapo meméramo upéicha, Ñandejára ñandeguerohorýta ha jahupytýta heta mbaʼe porã (2 Timoteo 4:2; jaleemína Gálatas 6:9).

[Nóta]

Mbaʼéichapa ñambohováita koʼã mbaʼe?

• Mávapa hína umi ohendu porãva pe marandu?

• Ñande ndajaʼéi mbaʼeichaguápa ñande rapicha jaikuaa porã mboyve chupe ha ñañehaʼã japredika opaichaguápe, mbaʼérepa jajapo upéicha?

• Pe lívro Mbaʼépa omboʼe la Biblia? rupive, mbaʼépa ojejapomahína?

[Porandu ñahesaʼỹijóva]

[Nóta oĩva taʼanga ndive páhina 17]

Hetaiterei tapicha ipyʼaporãva ohendu pe marandu porã

[Nóta oĩva taʼanga ndive páhina 19]

Mbaʼépa ñanemboʼe apóstol Pablo okambiahague?