Umi ikatútava oikove opa ára g̃uarã ko Yvy ape ári

‘Pe Ovecharaʼy [...] oñangarekovaʼerã hesekuéra ovecha rerekuáicha, ha oguerahavaʼerã chupekuéra omboyʼu hag̃ua yvu oporomoingovéva oĩhápe’ (APOCALIPSIS [REVELACIÓN] 7:​17, BNP).

1. Mbaʼéichapa ohenói avei Ñandejára Ñeʼẽ umi ohótavape yvágape, ha mbaʼépa Jesús omeʼẽ chupekuéra ojapo hag̃ua?

 ÑANDEJÁRA Ñeʼẽme oñehenói avei ‘tembiguái jeroviaha ha iñarandúva’ umi ohótavape yvágape. Jesús ou jey pe áño 1918-pe ha ojuhu pe “tembiguái” ojapoha hekopete pe tembiapo omeʼẽvaʼekue chupe, “hogayguakuéra omongaru hag̃ua hiʼórape”. Upévare omoĩ “ipoguýpe opa oguerekóva” (jaleemína Mateo 24:​45-47). Upéicha oipytyvõ hikuái iñermanokuérape oĩ aja ko Yvy ape ári ha oho mboyve yvágape.

2. Mbaʼépa oĩ umi Jesucristo mbaʼéva apytépe?

² Peteĩ mbaʼe jára ikatu oiporu umi mbaʼe orekóva oiporuseháicha. Jesucristo ogovernáma yvágape, ha oreko avei heta mbaʼe ko Yvy ape ári. Umíva apytépe oĩ pe “aty guasu” apóstol Juan ohechavaʼekue peteĩ visión rupive. Haʼe heʼi: “Ahecha peteĩ aty guasu, avave ikatuʼỹvaʼerã oipapa, opa tetã, ha tetãygua, ha trívu, ha ñeʼẽ rehegua, oñemboʼyvahína pe tróno ha pe Ovecharaʼy renondépe, oñemondéva ao morotĩme ha oguerekóva pindo rogue ipopekuéra” (Apocalipsis [Revelación] 7:​9, BNP).

3, 4. Mbaʼe iporãitereívapa ohupyty pe aty guasu?

³ Pe aty guasu, oĩva pe “ambue ovechakuéra” apytépe, ohaʼarõ oikove opa ára g̃uarã peteĩ yvy iporãitereívape (Juan 10:16). Haʼekuéra ojerovia Jesús omeʼẽtaha chupekuéra pe jeikove opaveʼỹva  ha ‘omokãmbataha hesaykuéra’. Upévare, “ojoheivaʼekue ijaokuéra ha omomorotĩ pe Ovecharaʼy ruguýpe” (Apocalipsis [Revelación] 7:​14, 17, BNP). Ojerovia rupi Jesús omeʼẽhague hekove opavave rehehápe, Ñandejára renondépe haʼete ku ijao morotĩva hikuái. Jehová ohecha chupekuéra ihustoha ha iñamígoramo, Abrahánpe ohechahaguéicha.

⁴ Ñandejára ohecha ihústovaramo pe aty guasúpe, upévare ojerovia hikuái ikatutaha osẽ pe jehasa asy guasúgui (Santiago 2:​23-26). Ikatu oñemoag̃ui Jehováre ha ojesalva oñehundi vove ko múndo aña, oĩva Satanás poguýpe (Santiago 4:8; Apocalipsis [Revelación] 7:15). Péro haʼekuéra oservi peteĩcha Ñandejárape ha kyreʼỹme oñemoĩ umi ohótava yvágape ha Jesucristo poguýpe.

5. Mbaʼéichapa oipytyvõ pe aty guasu umi ohótavape yvágape?

⁵ Ko múndo oĩva Satanás poguýpe oñemoĩ mbarete umi ohótavare yvágape. Péro chupekuéra oipytyvõ umi ambue ovechakuéra. Saʼipaitémaramo jepe umi ohótava yvágape, umi oĩva aty guasúpe hetaitereive koʼẽ koʼẽre. Umi ohótava yvágape ndaikatúi oñangarekopa umi cien mil kongregasión rehe oĩva ko Yvy ape ári. Upévare pe aty guasu oipytyvõ chupekuéra oĩ rupi kuimbaʼe ikatupyrýva ijapytépe omoakã hag̃ua umi kongregasión. Haʼekuéra oñangareko umi kristiáno oñemoĩvaʼekuére pe ‘tembiguái jeroviaha ha iñarandúva’ poguýpe.

6. Mbaʼéichapa ojeʼevaʼekue umi ambue ovechakuéra oipytyvõtaha umi ohótavape yvágape?

⁶ Proféta Isaías heʼimavaʼekue umi ambue ovechakuéra oipytyvõtaha umi  ohótavape yvágape, heʼívo: ‘Péicha heʼi Ñandejára: “Egíptope ombaʼapóva ndojehepymeʼẽiva hembiapokuére, ha Etiopiaygua ombaʼevendéva ha Sebaygua hete tuicháva, oúta nerendápe ha nde pópe oñemoĩta. Nde rapykuéri ohóta”’ (Isaías 45:14). Umi ohaʼarõva oikove opa ára g̃uarã ko Yvy ape ári omoirũ umi ohótavape yvágape ha pe Cuerpo Gobernántepe, ohejávo oisãmbyhy chupekuéra. Avei umi ‘ombaʼapóva ha ndojehepymeʼẽiva hembiapokuére’ ojeʼéva umi ambue ovechakuérare, oiporu umi mbaʼe oguerekóva ojepredika hag̃ua opárupi. Jesús ohejavaʼekue upe tembiapo umi hemimboʼekuéra ohótavape yvágape (Hechos 1:8; Apocalipsis [Revelación] 12:17).

7. Mbaʼerãpa ojepreparahína pe aty guasúpe?

⁷ Pe aty guasu oipytyvõ umi ohótavape yvágape, ha ojeprepara avei chupekuéra oiko hag̃ua ko Yvy ape ári Armagedón rire. Haʼekuéra ojepytaso mbarete vaʼerã Jesucristo ykére, ha oĩvaʼerã ojapo hag̃uáicha kyreʼỹme heʼíva chupekuéra. Enterove ikatu jahechauka ñañemoĩtaha Jesucristo poguýpe. Jajerovia ha jajepytasóramo koʼág̃ama voi Jesucristo ykére, jahechaukáta Ñandejára múndo pyahúpe jajapotaha avei heʼíva ñandéve.

Pe aty guasu ohechauka ijerovia

8, 9. Mbaʼéichapa ohechauka ijerovia umi aty guasúpe oĩva?

⁸ Pe aty guasu ohechauka ijerovia heta hendáicha. Primero, ohechauka upéva opredikávo pe marandu porã Ñandejára Rréino rehegua (Mateo 24:14; 28:​19, 20). Segundo, oñemoĩvo kyreʼỹme pe Cuerpo Gobernante poguýpe (Hebreos 13:17; jaleemína Zacarías 8:23).

⁹ Tercero, ohechauka avei oipytyvõha umi ohótavape yvágape ojapóvo Ñandejára Ñeʼẽ heʼíva. Oñehaʼã avei hikuái omoheñói hekovépe ‘mborayhu, vyʼa, pyʼaguapy, ñehaʼarõkuaa, mbaʼerechakuaa, mbaʼeporã, jerovia, pochyʼỹ ha jejokokuaa’ (Gálatas 5:​22, 23, JMP). Koʼã mbaʼe ndajahechameméi koʼág̃a rupi, jahecha uvei ojeikoha ‘umi mbaʼe vai ñande rete ojaposéva’ rapykuéri. Upéicharamo jepe pe aty guasu ndoikói teko tieʼỹme, teko vai, teko kyʼa, taʼangakuéra ñemombaʼe, espiritísmo, jaʼeʼỹ, joavy, ñemyakateʼỹ, pochy rei, ñorairõ, ñemomombyry ojuehegui, secta, envidia, jekaʼu ha opaichagua mbaʼe vai rapykuéri (Gálatas 5:​19-21).

10. Mbaʼépa odesidíma ojapotaha pe aty guasu?

¹⁰ Ñaneimperfékto rupi ijetuʼu ñamoheñói hag̃ua ñande rekovépe umi mbaʼe porã oúva Jehová espíritugui, ñamboyke hag̃ua umi mbaʼe vai ñande rete oipotáva, ha ñambohovái hag̃ua umi jejopy vai omoĩva ñandéve Satanás. Upéicharamo jepe, jajepytaso Jesús ykére ha ndajahejamoʼãi mbaʼeve omokangy ñande jerovia ha ñane mborayhu Jehováre. Jajerovia Jehová oñangarekotaha pe aty guasúre ou vove pe jehasa asy guasu, haʼe heʼihaguéicha.

11. Mbaʼe mbaʼépa Satanás oiporu omokangy hag̃ua ñande jerovia?

¹¹ Upéicharamo jepe, ñañeñangareko jaikuaágui Satanás ndaijaʼeiha ñanderehe ha nañanderejareimoʼãiha (jaleemína 1 Pedro 5:8). Pór ehémplo, oiporu umi omboykevaʼekue Jehovápe ñanembotavy hag̃ua heʼívo japuha pe tembiguái jeroviaha omboʼéva. Péro upéva nameméi osẽ porã chupe. Oiporu avei umi tapicha ñandepersegi hag̃ua, ha ojoko sapyʼamíramo jepe predikasión, ohasávo upéva katuete imbareteve ñande jerovia. Upévare Satanás koʼág̃a oiporuve pe vyʼaʼỹ ñanemokangy hag̃ua. Oimoʼã upéicha omokangytaha ñande jerovia. Umi kristiáno ypykue oikuaavaʼekue ijetuʼuha pe vyʼaʼỹ. Ojeʼevaʼekue chupekuéra ojepyʼamongetami hag̃ua Jesús rekovekuére, ogueropuʼakavaʼekue hetaite  ñeʼẽ pohýi umi mbaʼe vai apohágui. Mbaʼérepa ojapovaʼerã hikuái upéva? ‘Ani hag̃ua ikaneʼõ ha ipyʼa kangy’ (Hebreos 12:3).

12. Mbaʼépa heʼi la Biblia oipytyvõtava umi ndovyʼavéivape?

¹² Reñeñandúmapa sapyʼánte neremeʼẽveimaha? Haʼetépa mbaʼeve nosẽporãiva ndéve? Oiméramo upéicha, ani reheja Satanás oiporu upéva nemboyke hag̃ua Jehová rapégui. Upearã restudia meme vaʼerã la Biblia, reñemboʼe nde pyʼaite guive Jehovápe, reho meme rreunionhápe ha rejeheʼa umi ermanokuérare. Upéicha rejapóramo nembaretevéta. Jehová heʼíma oipytyvõtaha isiervokuérape imbarete jey hag̃ua, ha upéva katuete ojapóta (jaleemína Isaías 40:​30, 31). Rembaʼapo meme vaʼerã Ñandejára servísiope, remboyke umi mbaʼe oiporu reíva ne tiémpo ha reipytyvõ meme nde rapichakuérape. Upéicha Ñandejára omeʼẽta ndéve ipuʼaka reaguanta ha rembohovái hag̃ua vyʼaʼỹ (Gálatas 6:​1, 2).

Osẽ jehasa asy guasúgui ha oike Ñandejára múndo pyahúpe

13. Mbaʼépa jajapóta jahasáramo Armagedón?

¹³ Armagedón rire oñemoingove jeýta hetaitereípe ndoikoivaʼekue Ñandejára oipotaháicha, ha oñepytyvõta chupekuéra oikuaa hag̃ua Jehová rembipota (Hechos 24:15). Oñemombeʼuvaʼerã chupekuéra mbaʼérepa Jesús omano ha ojeroviavaʼerã hese hikuái, upéicharõ añoite oipytyvõtaha chupekuéra. Ohejapaitevaʼerã umi japu ogueroviavaʼekue, ha avei umi hembiapo vaikue. Avei tekotevẽta oñemonde pe teko pyahúgui, ojehecháva umi kristiáno añetetévare (Efesios 4:​22-24; Colosenses 3:​9, 10). Jahasáramo Armagedón hetaitereíta ñane rembiaporã. Opa mbaʼe Jehová heʼíva ñandéve jajaposéta ndaiporimoʼãvéimagui ñande jopýva ha umi mbaʼe ikatúva ñanemboyke Ñandejáragui.

14, 15. Mbaʼépa oaprendéta ñandehegui umi Ñandejára siervokuéra oñemoingove jey vove, ha mbaʼépa ñaaprendéta chuguikuéra?

¹⁴ Umi Ñandejára siervokuéra omanovaʼekue Jesús ou mboyve, heta mbaʼe oikuaavéta oñemoingove jey rire chupekuéra. Oikuaáta hikuái mávapa pe Mesías ohaʼarõitevaʼekue. Haʼekuéra ohechaukáma oipotaha Jehová ohekomboʼe chupekuéra. Tuichaite mbaʼéta niko ñamombeʼúramo  Daniélpe mbaʼéichapa oñekumpli umi mbaʼe ohaivaʼekue, ha ndaikatúiva ontende! (Daniel 12:​8, 9.)

¹⁵ Umi Ñandejára siervokuéra oñemoingove jey vove heta mbaʼe oaprendéta ñandehegui, ñande ikatuháicha avei ñaaprende chuguikuéra. Katuete omombeʼúta ñandéve umi mbaʼe jaikuaasevéva la Bíbliape oñemombeʼúva mbykymínte. Tuichaite mbaʼéta piko ñahendúramo Juan el Bautístape oñeʼẽvo ñandéve Jesús rehe! Opa mbaʼe ñaaprendéva ñahendúvo Ñandejára siervokuérape ñanepytyvõta ñantendeve hag̃ua la Biblia. Umi Ñandejára siervokuéra omanovaʼekue yma ha umi aty guasupegua omanóva ko ára pahápe ohupytýta pe ‘jeikove jey iporãvéva’. Haʼekuéra oñepyrũkuri oservi Jehovápe ko múndo añáme, oĩva Satanás poguýpe. Ovyʼaitétapa osegitahaguére oservi hikuái Jehovápe peteĩ múndo pyahúpe, ndaiporimoʼãihápe ohasa asýva! (Hebreos 11:35; 1 Juan 5:19.)

16. Mbaʼépa oikóta pe ára Jehová oporohusga aja?

¹⁶ Pe ára Jehová oporohusga aja, oñemeʼẽta ñandéve hetave mbaʼe tekotevẽva jaikuaa, omoirũtava la Bíbliape. Upéva ojeporúta ojehusga hag̃ua yvyporakuérape. Upéicha ojehecháta oikovétapa hikuái opa ára g̃uarã (jaleemína Apocalipsis [Revelación] 20:​12, 13). Pe ára Jehová oporohusga aja, yvyporakuéra ikatúta ohechauka oñemoĩtapa Jehová sãmbyhy ykére. Káda uno odesidivaʼerã oñemoĩtapa Ñandejára Rréino ykére, ha ohejátapa oisãmbyhy chupe Jesucristo ohupyty hag̃ua jeikove opaveʼỹva, térãpa omboykéta Ñandejára Rréino ha oñemoĩ hese (Apocalipsis [Revelación] 7:17; Isaías 65:20). Opávo upe ára, enterove ikatútama odesidi, noĩmoʼãvéima rupi pekádo ha pe múndo aña poguýpe. Avave ndaikatumoʼãi heʼi Jehová ndoporohusgaihague tekojojápe. Umi heko añáva añoite oñehundipaitéta opa ára g̃uarã (Apocalipsis [Revelación] 20:​14, 15).

17, 18. Mbaʼérepa umi ohótava yvágape ha pe aty guasu oipotaitereíma og̃uahẽ pe ára Jehová oporohusgataha?

¹⁷ Umi kristiáno ojeporavovaʼekuépe Jehová omeʼẽta ogoverna hag̃ua, ha chupekuéra hiʼãitereíma ojapo upéva pe ára Jehová oporohusgatahápe. Tuichaite mbaʼéta upéva chupekuéra g̃uarã! Upe ohaʼarõva omokyreʼỹ chupekuéra ohendu hag̃ua avei apóstol Pedro heʼivaʼekue umi kristiáno ypykuépe: ‘Ñandejára niko penerenói ha pendeporavovaʼekue. Upévare peñehaʼãkena koʼã mbaʼe pembohapo porã pendepype, ani hag̃ua arakaʼeve peʼa. Upéicharõ ikatúta peike Jesucristo ogovernatahápe opa ára g̃uarã’ (2 Pedro 1:​10, 11).

¹⁸ Pe aty guasu ovyʼaiterei umi iñermáno ojeporavovaʼekue ohotahaguére yvágape ha oipytyvõ chupekuéra. Ohecha rupi Jehovápe iñamígoramo oñehaʼãmbaite hikuái oservi chupe ipyʼaite guive. Ha pe ára Jehová oporohusgataha aja, Jesús oisãmbyhýta pe aty guasúpe ohupyty hag̃ua jeikove opaveʼỹva. Haʼekuéra ojepytasóta Jehová ykére ha ojapóta hembipota ipyʼaite guive. Ovyʼaitétapa hikuái Jehová omeʼẽ vove chupekuéra oikove hag̃ua opa ára g̃uarã ko Yvy ape ári! (Romanos 8:​20, 21; Apocalipsis [Revelación] 21:​1-7.)

Ñanemanduʼápa koʼã mbaʼére?

• Mbaʼépa oĩ umi Jesús mbaʼéva apytépe?

• Mbaʼéichapa pe aty guasu oipytyvõ umi ohótavape yvágape?

• Mbaʼépa ojapo pe aty guasu ha mbaʼépa ohaʼarõ?

• Mbaʼépa reñandu repensávo pe ára Jehová oporohusgataha rehe?

[Porandu ñahesaʼỹijóva]

[Nóta oĩva taʼanga ndive páhina 26]

Pe aty guasu ojohéi ijao ha omomorotĩ pe Ovecharaʼy ruguýpe

[Nóta oĩva taʼanga ndive páhina 28]

Mbaʼépa reporanduse umi Jehová siervokuérape oñemoingove jey vove?