Ñanemanduʼa memékena Jehováre

“Opa árape [Jehováre] chemanduʼa.” (SALMO 16:8.)

1. Mbaʼéichapa ñanepytyvõ jaikuaa oĩhague ojapóva Ñandejára oipotáva?

 LA Biblia rupive jahecha porã mbaʼéichapa Ñandejára otrata yvyporakuéra ndive. Omombeʼu heta tapicha ojapohague Ñandejára oipotáva. Péro umi mbaʼe noñemoĩri la Bíbliape jaikuaánte hag̃ua, síno ñanemoag̃uive hag̃ua Ñandejárare (Santiago 4:8).

2, 3. Mbaʼépa ñanemboʼe Salmo 16:​8-pe heʼíva?

² Enterove ñañehaʼãvaʼerã jaikuaave chuguikuéra. Umíva apytépe oĩ Abrahán, Sara, Moisés, Rut, David, Ester ha apóstol Pablo. Upéicharamo jepe, ndahaʼéi umíva rehe añónte oñeʼẽva la Biblia. Oĩ avei heta ndojekuaaguasúiva péro ikatúva ñaaprende chuguikuéra heta mbaʼe. Jajepyʼamongetáramo mbaʼépa heʼi la Biblia hesekuéra, jaʼéta avei pe salmísta heʼihaguéicha: ‘Opa árape Jehováre chemanduʼa, oĩgui che deréchape, ndaʼaichéne’ (Salmo 16:8). Mbaʼépa heʼise upéva?

³ Oñorairõ jave, pe soldádo pyʼỹi ojagarrávami pe espáda ipo deréchape ha pe eskúdo katu ijasúpe. Ojapóvo upéicha, ndaikatúi omoʼã iderécha. Upévare oikotevẽ iñirũrã omoʼã hag̃ua chupe upe gotyo. Upeichaite avei Jehová oñangarekóta ñanderehe ñanemanduʼáramo hese ha jajapo haʼe heʼiháicha. Koʼág̃a jahechamíta umi mbaʼe oikovaʼekue omombeʼúva la Biblia, ñanepytyvõtava ñamombarete hag̃ua ñande jerovia ha ‘ñanemanduʼa meme hag̃ua Jehováre’.

Jehová ohendu ñaneñemboʼe

4. Emombeʼumi peteĩ ehémplo ohechaukáva Ñandejára ohenduha ñane ñemboʼe.

⁴ Ñanemanduʼa meméramo Jehováre, haʼe ohendúta ñane ñemboʼe (Salmo 65:2; 66:19). Upéva jahecha pe Abrahán siérvo ohasavaʼekuére. Oiméne upéva Eliezer rakaʼe, pe ijedavéva hembiguaikuéra apytépe. Abrahán omondo chupe Mesopotámiape oheka hag̃ua Isaac rembirekorã, peteĩ kuña oservíva Jehovápe. Ojerure Ñandejárape oipytyvõ hag̃ua chupe, ha ohechávo Rebeca omboyʼuseha umi ikaméllope, ohechakuaa Ñandejára oipytyvõha chupe. Oñemboʼe meme rupi Jehovápe, otopa Isaac rembirekorã (Génesis 24:​12-14, 67). Ikatu ñandéve noñemeʼẽi jajapo hag̃ua peichagua tembiapo. Upéicharamo jepe, iporã jareko peichagua jerovia Jehová ombohovaitaha ñane ñemboʼe.

5. Mbaʼéichapa jaikuaa Jehová ohenduha avei umi ñemboʼe mbykymi ha ojejapóva kirirĩhápe?

⁵ Sapyʼánte ikatu ñañemboʼe mbykymínte. Peteĩ jave, pe rréi Persiaygua hérava Artajerjes oikuaase mbaʼérepa Nehemías ojepyʼapyeterei, ha oporandu chupe: “Mbaʼére piko nderovasy?”. Upémaramo Nehemías oñemboʼe pyaʼe porã ‘Ñandejára yvagapeguápe’. Mbykýramo jepe iñemboʼe ha kirirĩhápe, Jehová ohendu chupe. Pe rréi oipytyvõ Nehemíaspe omopuʼã jey hag̃ua Jerusalén murálla (jaleemína Nehemías 2:​1-8). Jahechaháicha Jehová ohendu umi ñemboʼe, jepe mbykymi ha ojejapóramo kirirĩhápe.

6, 7. a) Mbaʼe ehémplo iporãvapa omoĩ ñandéve Epafras? b) Mbaʼérepa ñañemboʼevaʼerã ñane ermanokuérare?

⁶ La Biblia avei ñanemokyreʼỹ ‘ñañemboʼe hag̃ua ojuehe’, ndajahecháiramo jepe oñembohovaiha ñane ñemboʼe  (Santiago 5:16). Epafras, “Cristo rembiguái añeteguáva”, oñemboʼe meme vaʼekue umi ermanokuérare. Pablo ohai Roma guive: “Penemomaitei pene irũ Epafras, haʼe avei [...] Jesucristo rembiguái. Oñehaʼã avei pende rehehápe iñemboʼe rupive, penemombarete hag̃ua pende jeroviápe pejapopaite hag̃ua [Ñandejára] rembipota. Haʼéko ojepyʼapy penderehe, umi Laodicea ha Hierápolis reheguakuéra rehe avei” (Colosenses 1:7; 4:​12, 13, JMP).

⁷ Táva Hierápolis, Laodicea ha Colosas oĩvaʼekue Asia Menórpe, ha namombyrýi ojuehegui. Hierápolispe ojeadoravaʼekue peteĩ diósa hérava Cibeles, ha heta kristiáno oiko upépe. Laodicéape katu umi hénte oiko mbaʼereta rapykuérinte. Ha Colósaspe ojeguereko tuicha mbaʼérõ umi filosofía kuimbaʼekuéra omboʼéva. Epafras onasevaʼekue Colósaspe, upévare jahechakuaa mbaʼérepa oñemboʼe umi ermanokuéra upepeguáre (Colosenses 2:8). La Biblia ndeʼíri mbaʼéichapa Ñandejára ombohovái Epafras ñemboʼe, péro katuete haʼe osegi oñemboʼe iñermanokuérare. Ha ñande avei ñañemboʼe meme vaʼerã ñane ermanokuérare. Ndajaikéiramo jepe ñande rapichakuéra provlémape, ikatu jaikuaa ñande rogaygua térã ñane amígo ohasa asyha (1 Pedro 4:15). Ikatu ñaipytyvõ ñañemboʼévo hesekuéra. Apóstol Páblore ojapo porãiterei umi ermáno oñemboʼérõ guare hese, ha ñande avei ikatu jajapo upéicha ñane ermanokuérare (2 Corintios 1:​10, 11).

8. a) Mbaʼéichapa jaikuaa umi ansiáno Efesoygua omombaʼehague pe ñemboʼe? b) Mbaʼéichapa jahechavaʼerã pe ñemboʼe?

⁸ Ojehechápa ñanderehe ñamombaʼeha pe ñemboʼe? Pablo oñembyatýrõ guare Efesoygua ansianokuéra ndive, “oñesũ ha oñemboʼe hendivekuéra”. Upe rire “opavave hasẽ ha ohetũ ha oñañuvã Páblope. Ha ipyʼañembyasyeterei heʼihaguére chupekuéra ndohechamoʼãveimaha chupe” (Hechos 20:​36-38). La Biblia nomombeʼúi umi ansiáno réra, péro jaikuaa omombaʼehague hikuái pe ñemboʼe. Ñande avei ñamombaʼevaʼerã ikatu haguére ñañemboʼe Jehovápe. Jajerovia memékena hese ha ‘ñamopuʼã ñande po yvága gotyo’ jaikuaágui ombohovaitaha ñaneñemboʼe (1 Timoteo 2:8).

Ñaneñeʼẽrendúkena Ñandejárape opa mbaʼépe

9, 10. a) Mbaʼe ehémplopa omoĩ Zelofehad rajykuéra? b) Mbaʼépa omboʼe upéva umi kristiáno nomendáivape?

⁹ Ñanemanduʼa meméramo Jehováre, ñaneñeʼẽrendúta chupe opa mbaʼépe, ha upéva oguerúta ñandéve hetaiterei mbaʼe porã (Deuteronomio 28:13; 1 Samuel 15:22). Ñañehaʼãmbaitevaʼerã ñaneñeʼẽrendu Jehovápe. Ñapensami mbaʼeichaitépa iñeʼẽrendu umi cinco kuñataĩ Zelofehad rajykuéra, oikovaʼekue Moisés tiémpope. Israélpe umi família yvy oñemeʼẽvami taʼýra kuimbaʼépente. Péro Zelofehad naifamíliai vaʼekue ni peteĩ kuimbaʼe. Upévare Jehová heʼi oñemeʼẽ hag̃ua pe yvy umi itajyrakuérape. Upéicharamo jepe, haʼekuéra omendavaʼerã umi Manasés trivuygua rehe añónte. Upéicha pe erénsia opytáta upe trívupe (Números 27:​1-8; 36:​6-8).

¹⁰ Zelofehad rajykuéra ojeroviavaʼekue osẽ porãmbataha chupekuéra iñeʼẽrendúramo Ñandejárape. La Biblia heʼi: “Upéramo Maala, Tirsa, Hogla, Milca ha Noa, Zelofehad rajyre, ojapo pe Ñandejára heʼivaʼekue Moiséspe ha omenda itúva [ermáno] raʼykuéra rehe. Haʼekuéra omenda Manasés, José raʼy ñemoñaregua rehe ha péicha ijyvy opyta itúva Zelofehad ñemoñareguápe” (Números 36:​10-12). Koʼã kuña iñeʼẽrendu ha ojapo Jehová heʼivaʼekue (Josué 17:​3, 4). Koʼág̃a avei umi kristiáno nomendáiva gueteri ojapo upéicha: ojerovia Ñandejárare ha omenda kristiánore añónte (1 Corintios 7:39).

11, 12. Mbaʼéichapa ohechauka Caleb ojeroviaha Ñandejárare?

 ¹¹ Caleb iñeʼẽrenduvaʼekue avei Jehovápe opa mbaʼépe, ha ñande jajapovaʼerã haʼe ojapohaguéicha (Deuteronomio 1:36). Israel osẽ rire Egíptogui síglo XVI-pe Jesús ou mboyve, Moisés omondo doce kuimbaʼe omangea hag̃ua Canaán yvy. Péro Josué ha Caleb añoite omokyreʼỹ umi héntepe ojerovia hag̃ua Jehováre ha oike upe yvýpe (Números 14:​6-9). Cuarenta áño upe rire, Caleb ha Josué oservi meme gueteri Jehovápe. Umi ótro diez kuimbaʼe katu omano oiko aja Israel pe desiértore cuarenta áño pukukuére (Números 14:​31-34).

¹² Ohasapa rire umi mbaʼe, Caleb heʼi Josuépe: “Che katu ajapo [Jehová] che Jára heʼihagueichaite chéve” (jaleemína Josué 14:​6-9). Orekópe 85 áño, ojerure oñemeʼẽ hag̃ua chupe pe yvy umi montáña oĩha, Jehová oprometehaguéicha. Ojapo upéva oĩramo jepe upépe heta ndaijaʼéiva hesekuéra (Josué 14:​10-15).

13. Mbaʼépa jajapovaʼerã ñañemoĩ porã hag̃ua Ñandejára ndive, ijetuʼúramo jepe umi mbaʼe jahasáva?

¹³ Jajapóramo Jehová heʼihaichaite ñandéve, haʼe ñanepytyvõta oipytyvõhaguéicha Calébpe. Upeichaite, ñaneñeʼẽrendúramo chupe opa mbaʼépe, haʼe ñanepytyvõta ñambohovái jave oimeraẽ mbaʼe vai. Upéicharamo jepe, ijetuʼuhína ñaneñeʼẽrendu hag̃ua Ñandejárape Caleb ojapohaguéicha. Jahechami rréi Salomón rehe oikovaʼekue. Oñepyrũ porãramo jepe, ituja rire umi hembireko ogueraha vai chupe ha oadora umi ñandejára guaʼúpe. Upéicha rupi naiñeʼẽrendúi Jehovápe, itúva David iñeʼẽrenduhaguéicha (1 Reyes 11:​4-6). Upévare, ñaneñeʼẽrendúkena Ñandejárape opa mbaʼépe, ha ñanemanduʼa meme hese ijetuʼúramo jepe umi mbaʼe jahasáva.

Jajerovia memékena Jehováre

14, 15. Mbaʼéichapa ñanemboʼe Noemí ohasavaʼekue jajeroviavaʼerãha Ñandejárare?

¹⁴ Jajeroviavaʼerã Ñandejárare, koʼýte oiméramo ñañedeprimi ojere vaipaitégui ñandéve. Ñapensami Noemí rehe, oikovaʼekue Moábpe omanórõ guare iména ha umi mokõi imemby kuimbaʼe. Oho jey rire Judápe, ko kuñakarai ijedámava oñembyasy kóicha: “Anive peje chéve Noemiha [heʼẽva, nóta] che réra, peje chéve haʼeha Mára [iróva, nóta]. [Ñandejára] Ipuʼakaitéva niko chemyanyhẽ pyʼarógui. Hetaite mbaʼe reheve niko águi asẽvaʼekue ha péina Ñandejára che reru mbaʼeveteʼỹre. Mbaʼe rehépa pejéta chéve Noemí? [Ñandejára] Ipuʼakaitéva niko cherundíma vyʼaʼỹme” (Rut 1:​20, 21).

¹⁵ Jahecha Noemí oñeñandu vaietereihague. Upéicharamo jepe, jalee porãramo pe lívro hérava Rut, jahechakuaa naikangyihague ijerovia Jehováre. Ha tuichaite oñevendesi upévare! Inuéra Rut, opytavaʼekue viúda, omenda Boaz rehe ha upéi  imemby peteĩ mitãkuimbaʼe. Avei, Noemí ovyʼa omongakuaahaguére iniétope. La Biblia omombeʼu: “Umi kuña Noemí róga jerére oikóva heʼi: ‘Oúma Noemíme imembyrã’, ha ombohéra hikuái upe mitã Obed. Kóva haʼe hína [Jesé] ypykue. [Jesé] katu David ypykue” (Rut 4:​14-17). Noemí oñemoingove jey vove, ojotopáta Rut ndive ha oikuaáta inuéra haʼehague Jesucristo ypykue (Mateo 1:​5, 6, 16). Ojehuhaguéicha Noemípe, ñande avei ndajaikuaái mbaʼéichapa oñemyatyrõta umi ñane provléma. Upévare, jajerovia memékena Jehováre, heʼiháicha Proverbios 3:​5, 6: “Ejerovia Ñandejárare nde pyʼaite guive, ha ani ndejehe añónte. Eikuaáke haʼe oĩha opárupi, ha haʼe omyesakãtaha ndéve nde rape”.

Jaheja tañanesãmbyhy Ñandejára espíritu

16. Mbaʼéichapa oipytyvõ Ñandejára espíritu umi ansianokuérape oikovaʼekue Moisés tiémpope?

¹⁶ Ñanemanduʼa meméramo Jehováre, haʼe ñanesãmbyhýta ijespíritu rupive (Gálatas 5:​16-18). Ñandejára omeʼẽ ijespíritu umi 70 ansiáno ojeporavovaʼekuépe oipytyvõ hag̃ua Moiséspe. Haʼekuéra oipytyvõ chupe ‘oñangareko hag̃ua Israelgua rehe’. Oñemombeʼúramo jepe Eldad ha Medad réra añónte, Ñandejára espíritu oipytyvõ enterovépe ojapopa hag̃ua hembiapo (Números 11:​13-29). Katuete koʼã kuimbaʼe ikatupyry ha iñeʼẽrendu Ñandejárape, ha upéicha avei umi kuimbaʼe ojeporavovaʼekue haʼekuéra mboyve (Éxodo 18:21). Koʼã mbaʼe ojehecha avei umi ansiáno koʼag̃aguáre.

17. Mbaʼéichapa Ñandejára espíritu oipytyvõvaʼekue ojejapo hag̃ua pe tabernáculo?

¹⁷ Jehová espíritu sánto tuichaiterei oipytyvõ avei ojejapo hag̃ua pe tabernáculo desiértope. Jehová omoĩ Bezalélpe omoakã hag̃ua upe tembiapo, ha heʼi omyenyhẽtaha chupe ijespíritu ha ikatupyrýgui, ojapokuaa hag̃ua opa mbaʼe (Éxodo 31:​3-5). Bezalel ha Oholiab ha umi kuimbaʼe oipytyvõva chupekuéra, ojapo peteĩ tembiapo ijojahaʼỹva. Avei, Jehová espíritu omomýi enterove ipyʼaporãvape ipojera hag̃ua (Éxodo 31:6; 35:​5, 30-34). Upe espíritu omomýi avei koʼág̃a Ñandejára siervokuérape oñehaʼãmbaite hag̃ua Ñandejára Rréino rehehápe (Mateo 6:33). Ñandekatupyrýramo jepe, tekotevẽ jajerure Ñandejárape ijespíritu ha jaheja tañanesãmbyhy. Upéicharõ añoite jajapopaitéta pe tembiapo Jehová omeʼẽvaʼekue ñandéve (Lucas 11:13).

Ñamombaʼeguasu opa árape Ñandejára ipuʼakapávape

18, 19. a) Mbaʼe jajapo hag̃uápa ñanemomýi pe espíritu sánto? b) Mbaʼépa ñanemboʼe Simeón ha Ana ojapovaʼekue?

¹⁸ Pe espíritu sánto ñanemomýi ñamombaʼeguasu hag̃ua Jehovápe ha ñanemanduʼa meme hag̃ua hese. Ñandejára puévlope ojeʼevaʼekue yma: ‘Ñandejára ipuʼakapávape pemombaʼeguasuvaʼerã’ (Isaías 8:13). Simeón ha Ana, oikovaʼekue Jerusalénpe Jesús onasérõ guare, ojapovaʼekue upéicha (jaleemína Lucas 2:​25-38). Itujámaramo jepe, Simeón ohaʼarõ gueteri “pe Israel pytyvõhára [BNP]”, ojeroviágui umi profesía rehe. Ijespíritu rupive, Ñandejára heʼi chupe omano mboyve ohechataha pe Mesías, ha upeichaite oiko. Pe áño 2 ko ñande ára mboyve, peteĩ jave María ha José ogueru Jesúspe témplope.  Ñandejára espíritu rupive, Simeón oñepyrũ omombeʼu mbaʼépa ohasáta pe Mesías. Heʼi avei mbaʼéichapa María oñeñandúta ohechávo Jesúspe ojejukaha pe yvyráre. Péro ñapensami avei mbaʼeichaitépa ovyʼáneraʼe Simeón ohupívo ijyva ári upe Jehová oiporavovaʼekuépe! Ko kuimbaʼe marangatu omoĩ peteĩ ehémplo iporãva Ñandejára siervokuéra koʼag̃aguápe.

¹⁹ Ana, peteĩ viúda orekóva 84 áño, ‘arakaʼeve nosẽi’ pe témplogui. Ára ha pyhare oservi Jehovápe “okaruʼỹre ha oñemboʼévo”. Haʼe avei ohecha pe mitãme. Oiménepa ovyʼaite ohechárõ guare pe Mesías ojeporavovaʼekuépe! Upepete oñepyrũ oagradese Ñandejárape ha oñeʼẽ pe mitãre umi tapicha ipyʼaporãvape. Ana ndaikatúi okirirĩ, omombeʼuseterei rupi pe notísia porãite. Ojapohaguéicha Simeón ha Ana, umi kristiáno ijedáva ovyʼa oikuaahaguére ikatuha gueteri oservi Jehovápe.

20. Ñanemitã térã ñande tujáramo jepe, mbaʼépa jajapovaʼerã ha mbaʼérepa?

²⁰ Ñanemitã térã ñandetujáramo jepe, ñanemanduʼa meme vaʼerã Jehováre. Upéicha ñanevendesíta ñañeʼẽramo hese ha umi mbaʼe porãita ojapovaʼekuére (Salmo 71:​17, 18; 145:​10-13). Upéicharamo jepe, ñamombaʼe hag̃ua Jehovápe ñamoheñoivaʼerã ñande pype umi mbaʼe haʼe oguerohorýva. Jaikuaave hag̃ua umívagui, jahechavemi la Biblia omombeʼúva.

Mbaʼépa ñambohováita?

• Mbaʼéichapa jaikuaa Jehová ohenduha ñane ñemboʼe?

• Mbaʼérepa ñaneñeʼẽrenduvaʼerã Ñandejárape opa mbaʼépe?

• Mbaʼérepa jajeroviavaʼerã Jehováre, ñañedeprimíramo jepe?

• Mbaʼéichapa oipytyvõ pe espíritu sánto Ñandejára siervokuérape?

[Porandu ñahesaʼỹijóva]

[Nóta oĩva taʼanga ndive páhina 11]

Jajeroviavéta Jehováre jahechávo mbaʼéichapa oñemyatyrõ umi provléma orekovaʼekue Noemí