Jajapókena pe misionéro ikatupyryvéva ojapohaguéicha
Jajapókena pe misionéro ikatupyryvéva ojapohaguéicha
‘Pejapókena che ajapoháicha Cristo ojapovaʼekue.’ (1 CORINTIOS 11:1.)
1. Mbaʼérepa jajapovaʼerã Jesús ojapohaguéicha?
APÓSTOL Pablo ojapovaʼekue pe misionéro ikatupyryvéva ojapohaguéicha, ha upéva hína Jesucristo. Upévare heʼi iñermanokuérape: ‘Pejapókena che ajapoháicha Cristo ojapovaʼekue’ (1 Corintios 11:1). Jesús heʼivaʼekue avei ijapostolkuérape ojapo hag̃ua haʼe ojapoháicha. Haʼe ombojepyhéi ijapostolkuérape omboʼe hag̃ua chupekuéra iñumildevaʼerãha. Upe rire heʼi: “Che ahechauka peẽme mbaʼépa pejapovaʼerã, peẽ pejapo hag̃ua avei che ajapohaguéicha penderehe” (Juan 13:12-15). Upéicha avei, koʼág̃a rupi ñande jajapovaʼerã opa mbaʼe Jesús ojapohaguéicha ha jahechauka avei umi mbaʼe porã ojehechavaʼekue hese (1 Pedro 2:21).
2. Mbaʼépa ikatu ñande jajapo ndahaʼéiramo jepe misionéro omondóva pe Cuerpo Gobernante?
2 Pe artíkulo ohasavaʼekuépe jaikuaáma mbaʼépa peteĩ misionéro: heʼise peteĩ oñemondóva opredika, omombeʼu hag̃ua marandu porã tapichakuérape. Ko mbaʼére, apóstol Pablo oporandu heta mbaʼe ñanepytyvõtava jajepyʼamongeta hag̃ua hese (jaleemi Romanos 10:11-15, BNP). Umi mbaʼe oporanduvaʼekue apytépe heʼi: ‘Mbaʼéicha piko ohendúta hikuái, ndaipóriramo peteĩ oñeʼẽva chupekuéra upe marandu porãre?’. Upe rire imanduʼávo proféta Isaías ñeʼẽnguére, heʼi: ‘Iporãitépa umi oguerúva ñeʼẽ oporombopyʼaguapýva py, ha omoherakuãva mbaʼe iporãva!’ (Isaías 52:7). Ndajaháiramo jepe misionéroramo tetã ambuépe, ikatu japredika kyreʼỹ avei Jesús ojapohaguéicha. Pe áño ohasavaʼekuépe, 6.957.852 puvlikadór opredika 236 tetãme (2 Timoteo 4:5).
“Ore niko roheja opa mbaʼe ndéve romoirũ hag̃ua”
3, 4. Mbaʼépa oheja Jesús yvágape, ha mbaʼépa ñande jajapovaʼerã ñamoirũ hag̃ua chupe?
3 Jesús ojapo hag̃ua ko Yvy ape ári Ñandejára ojerurevaʼekue chupe, ‘oheja upe oguerekovaʼekue ha oiko tembiguáiramo’. Haʼe ningo oheja yvága ha umi mbaʼe porãita orekovaʼekue (Filipenses 2:7, BNP). Ha ñande jahejavaʼekue katu ndaikatúi ñambojoja ni michĩmi haʼe ohejavaʼekuére. Upéicharõ jepe, ikatu jajapo ñande pyʼaite guive haʼe ojapohaguéicha, nañambyasýiramo umi mbaʼe jarekovaʼekue Satanás múndope (1 Juan 5:19).
4 Peteĩ árape, apóstol Pedro heʼivaʼekue Jesúspe: “Ore niko roheja opa mbaʼe ndéve romoirũ hag̃ua” (Mateo 19:27). Upeichaite ningo ojapovaʼekue Pedro, Andrés, Santiago ha Juan heʼírõ guare chupekuéra Jesús omoirũ hag̃ua chupe. Upepete voi oheja hikuái irréd ha oho hendive. Péicha oheja hikuái itravahokuéra ha ombaʼapo meme predikasiónpe. Pe lívro hérava Lucas omombeʼu Pedro heʼivaʼekue: “Ore niko rohejapáma opa mbaʼe roguerekóva ndéve romoirũ hag̃ua” (Lucas 18:28). Saʼi nunga oĩhína ñande apytépe ohejavaʼekue opa mbaʼe orekóva omoirũ hag̃ua Jesúspe. Péro, ñande ñañemboykémakuri ñamoirũ hag̃ua Jesúspe ha jaservi hag̃ua Jehovápe (Mateo 16:24). Ha upévare heta mbaʼe porãma jahupyty (jaleemi Mateo 19:29). Javyaʼitereíta ñañehaʼãramo japredika Jesucristo ojapohaguéicha, koʼýte ñaipytyvõramo michĩmi jepe ñande rapichápe oikuaa hag̃ua Ñandejára ha Itaʼýrape.
5. Oikuaa rire Jehovápe, mbaʼépa ojapo heta tapicha ohovaʼekue ombaʼapo tetã ambuépe? Emombeʼumi ojapovaʼekue peteĩ tapicha.
5 Valmir ningo Brasilgua ha ombaʼapo mínape oguenohẽ hag̃ua óro pe tetã hérava Surinámpe. Haʼe ningo ikaʼu ha heko vai vaʼekue. Oĩ jave peteĩ távape, testigos de Jehová opredika chupe. Oñepyrũ ostudia hendivekuéra la Biblia káda día, tuichaiterei okambia ha upe riremínte ojevautisáma. Ohechakuaávo itraváhogui ndaikatumoʼãiha oservi porã Ñandejárape, ovende inegósio ha oho jey Brasílpe. Oho oipytyvõ hag̃ua ihentekuérape otopa hag̃ua umi mbaʼe porãita Ñandejára omeʼẽva. Heta tapicha ohovaʼekue ombaʼapo umi tetã oñegana porãvehápe, oheja itraváho ha oho jey hetãme opredika hag̃ua ihentekuérape ha ambue hapichakuérape. Koʼã puvlikadór ningo ohechauka añetehápe opredikaseha.
6. Mbaʼépa jajapokuaa ndaikatumoʼãirõ java oñekotevẽvehápe opredikavaʼerãre?
6 Oĩ Testígo ováva ótro hendápe oñekotevẽvehápe opredikavaʼerãre, ha oĩ voi katu umi ováva opredika hag̃ua tetã ambuére. Ha ñande ndaikatumoʼãirõ jajapo umícha, ikatúnte avei jajapo Jesús ojapohaguéicha ha ñañehaʼãmbaite predikasiónpe.
Jehová ñanepytyvõ
7. Mbaʼeichagua eskuélapa oñemoĩ ñañembokatupyryve hag̃ua predikasiónpe?
7 Jesús oiporuhaguéicha umi mbaʼe Itúva omboʼevaʼekue chupe, ñande ikatu jaiporu umi mbaʼe Jehová omoĩva ñandéve koʼág̃a rupi ñanemboʼe hag̃ua. Jesús voi ningo heʼivaʼekue: ‘Umi Proféta ohaimavaʼekue: “Ñandejára ohekomboʼéta opavavépe”’ (Juan 6:45; Isaías 54:13). Koʼág̃a rupi jareko umi eskuéla ñanemboʼéva japredika hag̃ua. Katuete ningo enterovépe ñanepytyvõma pe Eskuéla dél Ministério Teokrátiko ojejapóva káda semána kongregasiónpe. Umi prekursór ikatu avei oho Escuela del Servicio de Precursor-pe. Ha umi arevéma ojapóva prekursorádo katu dos veseháma oho upe eskuélape. Umi ansiáno ha siérvo ministeriál ohokuaa Escuela del Ministerio del Reino-pe ikatu hag̃uáicha ikatupyryve oporomboʼe ha oñangareko hag̃ua ermanokuérare. Ha soltéroramo, ikatu oho Escuela de Entrenamiento Ministerial-pe, ombokatupyrýtava chupekuéra oipytyvõ hag̃ua ermanokuérape predikasiónpe. Avei, heta ermáno ha ermanakuéra oñemondovaʼekuépe misionéroramo ohóma pe Escuela Bíblica de Galaad de la Watchtower-pe.
8. Mbaʼéichapa omombaʼe heta ermáno Jehová omoĩva ñanembokatupyry hag̃ua?
8 Heta ermáno omboyke heta mbaʼe oho hag̃ua koʼã eskuélape. Umíva apytépe oĩ Yugu. Haʼe ningo ohejavaʼekue itraváho oho hag̃ua Escuela de Entrenamiento Ministerial-pe, ojejapóva Canadápe. Ojapo upéicha noñemeʼẽi rupi chupe permíso upe emprésa ombaʼapohápe. Yugu heʼi: “Nambyasyiete voi. Omeʼẽrire chéve permíso hikuái, oipotavaʼerãmoʼã ambaʼapo hendivekuéra amano meve apaga hag̃ua chupekuéra ojapovaʼekue cherehehápe. Péro koʼág̃a aime ajapo hag̃uáicha oimeraẽ mbaʼe Jehová oipotáva ajapo”. Jahechaháicha, heta oĩ ohejáva umi mbaʼe iñimportantevaʼekue chupekuéra yma, ikatu hag̃uáicha Ñandejára ohekomboʼe chupekuéra (Lucas 5:28).
9. Emombeʼu mbaʼeichaitépa ikatu oipytyvõ ñande rapichápe ñañehaʼãmbaitéramo ñamboʼe chupe la Biblia.
9 La Biblia omboʼévaningo iporã ñañehaʼãramo ñande pyʼaite guive jajapo upe heʼíva (2 Timoteo 3:16, 17). Jahechami Saulo ohasavaʼekue. Haʼe ningo peteĩ mitãʼi oikóva Guatemálape ha onase guive imbeguetereíva oaprende hag̃ua opa mbaʼe. Peteĩ mboʼehára heʼi Saulo sýpe pono ojopy chupe oleekuaa hag̃ua, upéva omoñeñandu vai reítagui chupe. Upéicha rupi, Saulo osẽ eskuélagui oleekuaaʼỹre. Péro, peteĩ testígo omboʼe chupe oleekuaa hag̃ua ha upearã oiporu pe folléto Aplícate a la lectura y a la escritura. Upe rire Saulo ikatupyryetereíma ha ojapo diskúrso Eskuéla dél Ministério Teokrátikope. Peteĩ árape, isy ojotopa Saulo mboʼeharakue ndive predikasiónpe. Omombeʼu chupe imemby oleekuaamaha, ha upémarõ pe mboʼehára ojerure chupe ohomi jey hag̃ua pe semána oúvape Saulo ndive. Ha Saulo ohórõ guare hendápe, oporandu chupe: “Mbaʼépa chemboʼéta Saulo?”. Ha Saulo oñemoĩ olee chupe peteĩ párrafo pe lívro Mbaʼépa añetehápe omboʼe la Biblia?, ha pe mboʼehára heʼi: “Anichénengo nde chemboʼereína koʼág̃a!”. Hesay pororopa ha oañuã chupe.
Ñamboʼévaningo og̃uahẽ ñande rapichakuéra korasõme
10. Mbaʼépa jareko ñaporomboʼe hag̃ua la Biblia?
10 Jesús ningo oporomboʼe hag̃ua oiporu umi mbaʼe oaprendevaʼekue Jehovágui voi ha Ñandejára Ñeʼẽ heʼívagui (Lucas 4:16-21; Juan 8:28). Ha ñande avei jajapo haʼe ojapohaguéicha jaiporúvo umi mbaʼe haʼe heʼivaʼekue ha Ñandejára Ñeʼẽ. Upéicha rupi enterove ñañeʼẽta peteĩ mbaʼérente ha ñapensáta peteĩcha, ha upévare avei jajoayhuvéta (1 Corintios 1:10). Pe “tembiguái jeroviaha ha iñarandúva” omoĩ ñandéve heta puvlikasión ani hag̃ua ojoavy pe ñamboʼévape ñande rapichakuérape ha upéicha jajapo hag̃ua oñehaʼarõva ñandehegui. Aje piko javyʼaite upévare! (Mateo 24:45; 28:19, 20.) Umíva apytépe ningo oĩhína pe lívro Mbaʼépa omboʼe la Biblia?, ojejapóva 179 idiómape.
11. Mbaʼéichapa peteĩ ermána pe lívro Mbaʼépa omboʼe la Biblia? rupive oipytyvõ peteĩ oñemoivaʼekuépe hese?
11 Jaiporúramo Ñandejára Ñeʼẽ ha pe lívro Mbaʼépa omboʼe la Biblia?, ikatu hína okambia umi nañanerenduseivaʼekue. Peteĩ prekursóra Etiopiaygua hérava Lula omboʼe la Biblia peteĩ kuñakaraípe. Upe jave pe iñestudiánte pariénte oho chupekuéra upépe ha heʼi natekotevẽiha oaprende umi mbaʼe. Upémarõ, pyʼaguapýpe porãnte Lula oñemongeta hendive ha oñeʼẽ chupe pe pláta falsifikádore, oĩva lívro Mbaʼépa omboʼe la Biblia? kapítulo 15-pe. Upe kuñakarai ipochypoi ha oheja chupekuéra ostudia jey. Upe rire, Lula oho jeýpe upe kuñakarai oĩ avei upépe, ha ojerure ombostudia hag̃ua avei chupe ha opagase voi katu upearã. Upe riremínte, ostudiamahikóni tres vése káda semána ha heta mbaʼépema okambia.
12. Emombeʼumi mbaʼéichapa umi mitãrusu ha mitãkuña ikatu avei oporomboʼe la Biblia.
12 Mitãrusu ha mitãkuñanguéra ikatu avei oipytyvõ tapichakuérape oiporúvo pe lívro Mbaʼépa omboʼe la Biblia? Hawáipe, peteĩ mitãʼi orekóva 11 áño héra Keanu. Haʼe olee jave hína ko lívro eskuélape peteĩ ikompañéro oporandu chupe mbaʼérepa ndofestehái mbaʼeve hapichakuéra ndive. Keanu olee chupekuéra pe informasión oĩvéva heʼihápe “Jafestehavaʼerãpa umi arete?”. Upe rire, oavri pe índise ha oporandu chupe mbaʼépa oikuaaseve, ha péicha oñepyrũ ostudia hendive. Pe áño ohasavaʼekuépe testigos de Jehová ojapo 6.561.426 estúdio, ha hetaiterei umíva apytégui oiporu upearã pe lívro Mbaʼépa omboʼe la Biblia? Ha nde, reiporupareína ko lívro remboʼe hag̃ua nde rapichakuérape?
13. Mbaʼéichapa ikatu okambia ñande rapichakuéra ostudiáramo la Biblia?
13 Jaiporúramo la Biblia ha pe lívro Mbaʼépa omboʼe la Biblia? ñamboʼe hag̃ua ñande rapichápe, tuicha oipytyvõta chupekuéra ojapo hag̃ua Ñandejára heʼíva (1 Corintios 1:10). Noruégape, peteĩ ermáno hembireko ndive precursor especial, ha oñepyrũ ostudia hikuái peteĩ karai, hembireko ha umi mbohapy itajýra ndive. Haʼekuéra ningo Zambiaygua, ha naifamiliasevéima hikuái. Upévare, hyeguasúrõ guare pe kuñakarai, mokõive odesidi oityukataha pe mitã. Péro, oho mboyve hikuái doktórpe, ostudia pe kapítulo heʼíva “Jahecha ñande rekove Ñandejára ohechaháicha”. Ha ohechávo peteĩ mitãraʼy raʼanga oĩva isy ryepýpe, opoko hesekuéra upéva, ha upévare odesidi jey hikuái ndoityukamoʼãiha pe mitã. Osegi hikuái oaprende heta mbaʼe ha onasérõ guare pe mitã, omoĩ chupe pe ermáno réra.
14. Emombeʼumi mbaʼépa ojehupyty jepi ojeikóramo oñemboʼeháicha.
14 Jahechakuaáningo Jesús rehe katuete ojapohague umi mbaʼe omboʼéva. Ha ñande Testígo haguére jajapo haʼéicha, ñande reko porã, ha upéva heta ñande rapichakuéra ohechakuaa. Koʼág̃a jahechamíta oikovaʼekue peteĩ karaíre. Haʼe ningo ombaʼapo porã Nueva Zelándape, ha ikóchegui oñemonda chugui imaletín. Ko karai oho odemanda oñemondahague ha peteĩ polisía heʼi chupe: “Peteĩ testigo de Jehová otopárõ añoite ningo ikatu oñemeʼẽ jey ndéve ne maletín”. Ha kavalete peteĩ Testígo orrepartíva diário otopa. Oñemombeʼúrõ guare pe karaípe ojejuhuhague imaletín, oho upe ermána rógape ha tuicha osuspira ohechávo noñehundirihague chugui peteĩ dokuménto iñimportantetereíva. Upe ermána heʼi chupe: “Che ningo katuete ameʼẽ jey vaʼerã ndéve nde kosakuéra atopavaʼekue, pórke che testigo de Jehová hína”. Pe karai ijurujái opytávo, imanduʼa ojeʼevaʼekuére chupe upe pyharevépe. Péicha jahechauka Jesús remimboʼekuéra ojapoha imboʼeháraicha ojapóvo Ñandejára Ñeʼẽ heʼíva (Hebreos 13:18).
Jahechákena ñande rapichakuérape Jesús ohechaháicha chupekuéra
15, 16. Mbaʼépa ikatu jajapo ñande rapichakuéra oikuaaseve hag̃ua Ñandejárape?
15 Oĩvaʼekue heta ohendu porãva Jesúspe, ohechágui mbaʼéichapa otrata enterovépe. Haʼe ningo oporohayhu ha iñumílde rupi heta ipyʼaporãva oho hendápe. Haʼe ningo oporoporiahuvereko ha ombopyʼaguapy umi héntepe; ha hetápe omongueravaʼekue avei (jaleemi Marcos 2:1-5). Ñande ningo ndajajapói milágro, péro ikatu japorohayhu, ñaneumilde ha japoroporiahuvereko. Koʼã mbaʼe porã ningo omomýita ñande rapichakuérape oikuaase hag̃ua Ñandejárape.
16 Peteĩ precursora especial hérava Tariua opredika jave ísla Kiribátipe, opytáva Pacífico Súrpe, og̃uahẽ peteĩ karai tujami hérava Beere rógape. Péro ko karai nohenduséi chupe. Haʼe ohechakuaa hese iparalisisha ha ombyasy chupe upévare. Upémaramo oporandu chupe: “Rehendúmavapa nde mbaʼépa Ñandejára ojapóta umi hasykatu ha ijedámava rehehápe?”. Upe rire olee chupe peteĩ téysto oĩva Isaíaspe (jaleemi Isaías 35:5, 6). Ohecharamoiterei upéva pe karai ha heʼi: “Ymaiterei guivéma aleéva la Biblia ha ou jepi cherendápe peteĩ misionéro che rrelihionpegua, ha ndaleéiva gueteri ko mbaʼe”. Beere oñepyrũ ostudia la Biblia, oaprende heta mbaʼe ha ojevautisa. Iparálisisramo jepe, koʼág̃a oñangareko peteĩ grúpo mombyry oĩvare ha oho yvy rupi pe ísla rehe opredika hag̃ua.
Jasegíkena jajapo Jesús ojapohaguéicha
17, 18. a) Mbaʼépa jajapovaʼerã ñandekatupyry hag̃ua predikasiónpe? b) Mbaʼépa ohupytýta umi oñehaʼãva opredika?
17 Jahechakuaaháicha heta mbaʼe porã ojehasa predikasiónpe, ha ñande avei ikatu ñandekatupyry ñañehaʼãramo jajapo umi mbaʼe porã Jesús ojapovaʼekue. Upévare, jajapókena ñane Mboʼehára ojapohaguéicha ha japredikákena kyreʼỹme.
18 Hetavérõ guare ohóvo Jesús remimboʼekuéra upe síglo primérope, Pedro oporandu: ‘Mbaʼépepa oñemyengoviáta oréve?’. Jesús ombohovái chupe: ‘Opa umi ohejavaʼekue hóga térã iñermáno, térã iñermána, térã ijyvy cherehehápe, pe peteĩ ohejavaʼekue rendaguépe ohupytýta cien ha ohupytyvaʼerã avei pe tekove opaʼỹva’ (Mateo 19:27-29). Upéva hína pe jahupytýtava ñañehaʼã meméramo jajapo Jesucristo, pe misionéro ikatupyryvéva ojapohaguéicha.
Mbaʼépa ñambohováita?
• Mbaʼéichapa Jehová ñanepytyvõ japredikakuaa hag̃ua?
• Mbaʼérepa iporãite pe lívro Mbaʼépa omboʼe la Biblia? jaiporu hag̃ua predikasiónpe?
• Mbaʼépa ikatu jajapo jahecha hag̃ua ñande rapichakuérape Jesús ohechahaguéicha chupekuéra?
[Porandu ñahesaʼỹijóva]
[Nóta oĩva taʼanga ndive páhina 23]
Jesús heʼírõ guare Pedro, Andrés, Santiago ha Juánpe omoirũ hag̃ua chupe, haʼekuéra pyaʼe porã voi oho hendive