Jesucristo, pe misionéro ikatupyryvéva

“Che aikuaa chupe, chugui ajúgui ha haʼe chemboúgui.” (JUAN 7:29.)

1, 2. Mbaʼépa ojapo peteĩ misionéro, ha mávapepa ikatu ñahenói pe misionéro ikatupyryvéva?

 REHENDÚRAMO oñeñeʼẽha peteĩ misionéro rehe, mávarepa repensa? Oĩ opensáva umi misionérore rrelihión japu omondóva opa tetã rupi. Haʼekuéra pyʼỹi ombaʼapo polítikape ha umi tetã negósiope. Ñande Testigos de Jehová katu ñapensa umi misionéro Cuerpo Gobernante omondóvare, opredika hag̃ua hikuái pe marandu porã opárupi (Mateo 24:14). Haʼekuéra oiporu itiémpo ha oñehaʼãmbaite omboʼe hapichakuérape oñemoag̃ui hag̃ua Jehováre (Santiago 4:8).

² Traducción del Nuevo Mundo de las Santas Escrituras ndoiporúi pe ñeʼẽ misionéro. Upéicharamo jepe, pe nóta ojehaíva Efesios 4:11 rehe ñande Biblia con referencias-pe, ohechauka pe ñeʼẽ “evangelizadores” térã oporomboʼéva heʼiseha avei “misionéro”. Jehová ningo pe ikatupyryvéva oporomboʼe hag̃ua, péro ndaikatúi jaʼe hese haʼeha pe misionéro ikatupyryvéva. Peteĩ misionérope oñemondo ojapo hag̃ua peteĩ tembiapo, péro Jehovápe avave nomondói. Jesús katu heʼivaʼekue ijehe: “Che aikuaa chupe, chugui ajúgui ha haʼe chemboúgui” (Juan 7:29). Upeichaite, ñanderayhuetereígui Jehová ombou Itaʼýrape ko Yvy ape ári (Juan 3:16). Ombou avei chupe omombeʼu hag̃ua “umi mbaʼe añeteguáva” (Juan 18:37). Upévare, ikatu jaʼe Jesús haʼeha pe misionéro ikatupyryvéva. Opredika porãiterei vaʼekue ha hetápe oipytyvõ, upévare koʼág̃a peve ñanepytyvõ pe ehémplo omoĩvaʼekue. Mbaʼéichapa ñanepytyvõ? Enterovéva, ndahaʼéiramo jepe misionéro ikatu ñañehaʼã ñaporomboʼe Jesús ojapohaguéicha.

3. Mbaʼe porandúpa ñambohováita koʼág̃a?

 ³ Ñahesaʼỹijóvo mbaʼéichapa Jesús oporomboʼevaʼekue ikatu ñaporandu: Mbaʼe mbaʼépa ohasa oĩrõ guare ko Yvy ape ári? Mbaʼérepa omboʼekuaaitereivaʼekue? Mbaʼérepa umi mbaʼe omboʼéva oipytyvõ hetaitereípe?

Oĩvaʼekue oservi hag̃uáicha ojeʼehápe chupe

4-6. Mbaʼe mbaʼépa ohasavaʼekue Jesús oúrõ guare ko Yvy ape ári?

⁴ Umi misionéro koʼag̃agua, ha umi ohóva opredika hag̃ua oñekotevẽhápe, heta mbaʼépe okambia ijetuʼúramo jepe chupekuéra upéva. Péro ñapensáramo Jesús ohasavaʼekuére ko Yvy ape ári, tuichaiterei ojoavy yvágape ohasavaʼekuégui. Upépe oĩvaʼekue Itúva ndive ha hetaiterei ánhel oservíva Jehovápe (Job 1:6; 2:1). Koʼápe katu ou oiko yvyporakuéra apytépe peteĩ múndo añáme, ndahaʼeietéva yvágape oikórõ guaréicha (Marcos 7:​20-23). Avei ohechavaʼekue mbaʼéichapa hemimboʼekuéra jepe oiko vai oñondive (Lucas 20:46; 22:24). Upéicharamo jepe, Jesús ombohovái hekoitépe umi mbaʼe ohasavaʼekue oĩrõ guare ko Yvy ape ári.

⁵ Jesús mbeguekatúpe oaprendevaʼekue oñeʼẽ hag̃ua opavave mitãnguéraicha. Mávapa oimoʼãta haʼe upeichaha, ñapensáramo umi ánhel oĩhague ipoguýpe! Jesús oĩrõ guare ko Yvy ape ári oñeʼẽ yvypóra ñeʼẽme, ndojoguaietéva umi “anhelkuéra ñeʼẽme” (1 Corintios 13:​1, BNP). Upéicharamo jepe, ndaipóri gueteri yvypóra oñeʼẽva Jesús oñeʼẽhaguéicha (Lucas 4:22).

⁶ Ñapensami mbaʼépa ohasave Jesús oĩrõ guare ko Yvy ape ári. Jesús nonaséi pekádo reheve, onasehaguéicha umi hemimboʼekuéra ohótava hendive yvágape (jaleemína Hebreos 2:​17, 18). Pe pyhare omano mboyve, Jesús ndojeruréi Itúvape ombou hag̃ua umi anhelkuérape oipytyvõ hag̃ua chupe, jepe haʼe omoakãvaʼekue chupekuéra oĩrõ guare yvágape (Mateo 26:53; Judas 9). Jesús ojapovaʼekue heta milágro, péro upéva ndahaʼéi mbaʼeve ñambojojátaramo umi mbaʼére haʼe ikatuvaʼekue ojapo yvága guive.

7. Mbaʼéichapa oiporu pe Léi umi hudiokuéra?

⁷ Jesús, oñehenóiva avei “pe Ñeʼẽ” ou mboyve ko Yvy ape ári, oiméne oñeʼẽmavaʼekue voi Ñandejára rérape umi Israelguápe oĩrõ guare pe desiértope (Juan 1:1; Éxodo 23:​20-23). Péro oñemeʼẽramo jepe chupekuéra Ñandejára Léi umi ánhel rupive, ndojapói upe Léi heʼíva (Hechos 7:53; Hebreos 2:​2, 3). Jesús oĩrõ guare ko Yvy ape ári, umi hudiokuéra rrelihión omoakãva oiporu vai Ñandejára léi. Upéva jahecha pe léi sábadore oñeʼẽva rehe (jaleemína Marcos 3:​4-6). Umi escriba ha fariseokuéra omboyke umi mbaʼe iñimportantevéva pe léi omboʼéva, umíva apytépe “pe tekojoja, poriahuvereko ha pe jerovia” (Mateo 23:​23, JMP). Upéicharamo jepe, Jesús naikaneʼõi omombeʼu hag̃ua pe añetegua.

8. Mbaʼérepa Jesús ikatu ñanepytyvõ?

⁸ Jesucristo oĩvaʼekue ojapo hag̃uáicha opa mbaʼe oñekotevẽva. Ohayhúgui umi tapichakuérape oipytyvõ chupekuéra, ha arakaʼeve naiñateʼỹi oporomboʼe hag̃ua. Iñeʼẽrendu rupi Ñandejárape oĩrõ guare ko Yvy ape ári, “oiko chugui opa ára g̃uarã oguenohẽva jejopy vaígui, opa iñeʼẽrendúvape”. Upéicha avei, ‘haʼe voi ohasa asy vaʼekue, upévare ikatu oipytyvõ umi ohasa asývape avei’ (Hebreos 2:18; 5:​8, 9).

Peteĩ mboʼehára ikatupyryetereíva

9, 10. Mbaʼéichapa oñehekomboʼevaʼekue Jesúspe ou mboyve ko Yvy ape ári?

⁹ Koʼág̃a rupi, pe Cuerpo Gobernante omboʼe umi misionérope omondo mboyve opredika hag̃uáme. Oñehekomboʼépa Jesúspe ojeporavo mboyve chupe Mesíasramo? Upeichaite, péro nomboʼeivaʼekue chupe umi mboʼehára omoakãva hudiokuéra rrelihión (Juan 7:15; ñambojojami Hechos 22:3 rehe). Upéicharõ, mbaʼérepa oiko chugui peteĩ mboʼehára ikatupyryetéva?

 ¹⁰ Oaprendéramo jepe heta mbaʼe María ha Joségui, Jesús ikatupyry omboʼe rupi chupe Jehová. Haʼe voi heʼivaʼekue: “Che niko nañeʼẽi chejehegui reínte. Che Ru, pe che mbouvaʼekue, haʼe heʼi chéve mbaʼépa haʼe ha aporomboʼevaʼerã” (Juan 12:49). Jahechakuaa Jesúspe ojeʼehague mbaʼépa omboʼevaʼerã. Oiméne avei heta tiémpo ou mboyve ko Yvy ape ári Itúva omboʼe ha oprepara chupe. Oĩnepa ótro omboʼe porãvétava chupe Itúvagui?

11. Mbaʼéichapa ohechauka Jesús ohayhuha yvyporakuérape Itúva ohayhuháicha?

¹¹ Jesús oĩvaʼekue Jehová ykére ojapo ypy guive chupe. Oĩrõ guare yvágape ohechakuaavaʼekue mbaʼépa oñandu Itúva yvyporakuérare ohechávo mbaʼéichapa otrata chupekuéra. Upévare haʼe ohayhuvaʼekue avei yvyporakuérape Itúva ohayhuhaichaite. Jesús, pe iñaranduetéva, heʼivaʼekue ohayhu ha ovyʼahague yvyporakuéra ndive (Proverbios 8:​22, 31).

12, 13. a) Mbaʼépa oaprende Jesús ohechávo mbaʼéichapa otrata Itúva umi Israelguápe? b) Mbaʼéichapa Jesús ojapo ko Yvy ape ári umi mbaʼe oaprendevaʼekue yvágape?

¹² Jesús ohechavaʼekue avei mbaʼépa ojapo Jehová oĩ jave provléma. Jahechamína mbaʼépa ojapo Jehová umi Israelgua naiñeʼẽrendúirõ guare chupe. Nehemías 9:​28-pe heʼi hesekuéra: “Oñeñandu porãmívo katu, hembiapo vai jevýma, ha reheja chupekuéra hoʼa, [...] ijaʼeʼỹva pópe. Ojerure jevýma ndéve reipytyvõ hag̃ua chupekuéra, ha reiporiahuverekógui chupekuéra, yvágagui, pe reikohágui, reipytyvõ jevy jevy chupekuéra”. Ombaʼapo rupi Itúva ndive ha ohecha mbaʼéichapa otrata yvyporakuérape, Jesús oiporiahuvereko avei umi héntepe (Juan 5:19).

¹³ Jesús avei oiporiahuvereko hemimboʼekuérape oaprendehaguéicha Itúvagui. Pe pyhare omano mboyve, umi hemimboʼekuéra ohayhuetéva “ohejapa Jesúspe, ha okañymba hikuái” (Mateo 26:56; Juan 13:1). Apóstol Pedro katu tres vése voi heʼi ndoikuaaiha chupe! Upéicharamo jepe, Jesús nomboykéi chupekuéra. Upévare heʼi Pédrope: “Che katu añemboʼéma nderehe ani hag̃ua ne kangy nde jeroviápe. Ha nde, ág̃a rejevývo [...], eipytyvõ nepehenguekuérape taimbarete mbareteve ijeroviápe” (Lucas 22:32). Pe Israel Ñandejára mbaʼéva oñepyrũvaʼekue ‘umi apóstol ha profetakuéra’ ndive. Avei umi ita ojeporúva oñemopyenda hag̃ua la Nueva Jerusalén ogueraha ijehe umi doce apóstol réra. Koʼág̃a rupi, umi ohótava yvágape ha umi “ambue ovechakuéra” oñemoĩ Jehová ha Jesucristo poguýpe, ha opredika ko Yvy tuichakuére pe marandu porã Ñandejára Rréino rehegua (Efesios 2:20; Juan 10:16; Apocalipsis [Revelación] 21:14).

Mbaʼéichapa omboʼevaʼekue Jesús?

14, 15. Mbaʼépepa ojoavy Jesús omboʼéva umi escriba ha fariseokuéra omboʼevaʼekuégui?

¹⁴ Umi mbaʼe oaprendevaʼekue Jesús oiporu avei oporomboʼe jave. Jahechakuaa avei Jesús omboʼe porãve hague umi hudiokuéra rrelihión omoakãvagui. Umi escriba ha fariseokuéra ‘omboyke Ñandejára Ñeʼẽ ojapo hag̃ua rehehápe haʼekuéra ojepokuaaháichante’. Jesús katu ndeʼirivaʼekue mbaʼeve ijehegui reínte, omboʼevaʼekue Itúva heʼíva chupe añoite (Mateo 15:6; Juan 14:10). Ñande jajapovaʼerã avei upéicha.

¹⁵ Oĩve peteĩ mbaʼe Jesús ojoavyha umi hudiokuéra rrelihión omoakãvagui. Haʼe heʼi: “Peneñeʼẽrenduvaʼerã chupekuéra ha pejapovaʼerã opa haʼekuéra heʼíva. Upe haʼekuéra ojapóva katu ani peẽ pejapo. Haʼekuéra niko heʼi peteĩ mbaʼe ha ndojapói pe heʼíva” (Mateo 23:3). Jesús katu ojapo umi mbaʼe heʼíva ha omboʼéva. Jahechami peteĩ ehémplo ohechaukáva upéva.

16. Mbaʼéichapa jaikuaa Jesús ojapohague Mateo 6:​19-21-pe heʼihaguéicha?

¹⁶ Jesús omokyreʼỹ hemimboʼekuérape ‘ombyaty hag̃ua mbaʼereta yvágape’ (jaleemína Mateo 6:​19-21). Ojapoparakaʼe haʼe upéicha? Ojapo. Upévare, heʼivaʼekue: “Umi  aguara oguereko haity, ha umi guyra yvategua oguereko hupa, ko Yvypóra raʼy katu ndoguerekói moõpa oñenóta opytuʼumi” (Lucas 9:​58, JMP). Haʼe ndorekoivaʼekue heta mbaʼe, omombeʼu hag̃ua rehehápe marandu porã Rréino rehegua. Iñehémplo rupive ohechauka ikatuha jaiko jajepyʼapyʼỹre, ha ndajaikói jajepyʼapy ojapoháicha umi mbaʼereta rapykuéri oikóva. Avei heʼi iporãveha ñambyaty mbaʼereta yvágape, “tĩguaʼã hoʼupaʼỹháme, ha mondaha oikeʼỹháme omonda hag̃ua”. Ha ñande? Ñambyatypañaína mbaʼereta yvágape?

Mbaʼérepa umi hénte ohayhuvaʼekue Jesúspe

17. Mbaʼépa ohechaukavaʼekue Jesús hekovépe oipytyvõva chupe oporomboʼekuaaiterei hag̃ua?

¹⁷ Mbaʼérepa Jesús oporomboʼekuaaitereivaʼekue? Heta mbaʼére, ha umíva apytépe oĩ mbaʼéichapa haʼe ohecha hapichakuérape. Jesús iñumildevaʼekue, oporohayhu ha oporoporiahuvereko Itúvaicha. Jahecháta koʼág̃a umi mbaʼe porã Jesús ohechaukavaʼekue hekovépe, ha hetaite tapicha oguerohoryvaʼekue.

18. Mbaʼérepa jaʼekuaa Jesús iñumildehague?

¹⁸ Ojapo hag̃ua Itúva heʼivaʼekue, Jesús ‘oheja umi mbaʼe oguerekovaʼekue yvágape ha ojejapo tembiguáiramo, onasévo kuimbaʼéicha’ (Filipenses 2:​7, BNP). Upéicha ohechauka mbaʼeichaitépa iñumílde. Avei arakaʼeve ndoapoʼíri avavépe ha ndeʼíri oñehenduvaʼerãha chupe ouhaguére yvágagui. Jesús ndoikoivaʼekue omombeʼu opárupi rei haʼeha pe Mesías ojapoháicha umi mesías guaʼu. Sapyʼánte heʼi voi umi héntepe ani hag̃ua omombeʼu avavépe mávapa haʼe ha umi mbaʼe ojapóva (Mateo 12:​15-21). Haʼe oipota káda uno odesidi oikótapa hemimboʼéramo ohecha rire umi mbaʼe haʼe ojapóva. Upéicha avei, Jesús arakaʼeve ndojeruréi hemimboʼekuérape iperfékto hag̃ua umi anhelkuéraicha.

19, 20. Mbaʼépa ojapo Jesús ohayhu ha oiporiahuvereko rupi umi tapichápe?

¹⁹ Jesús oporohayhuvaʼekue avei, Itúva voi oporohayhuháicha (1 Juan 4:8). Upéva omomýi chupe oporomboʼe hag̃ua. Ñapensami peteĩ mburuvicha imitãva gueteri oñembojárõ guare hese (jaleemína Marcos 10:​17-22). Jesús ‘ohayhu’ ha oipytyvõse chupe, upe mitãkariaʼy katu ndohejaséi umi mbaʼe oguerekóva oiko hag̃ua chugui hemimboʼe.

²⁰ Jesúspe avei ojehayhuvaʼekue oiporiahuvereko rupi hapichakuérape. Jesús oikuaavaʼekue umi ohendúva pe marandu porã iprovléma hetaha, iñimperfékto rupi. Upévare, oiporiahuvereko ha omboʼe chupekuéra. Peteĩ jey, Jesús ha hemimboʼekuéra hembiapoiterei ha naitiémpoi okaru hag̃ua jepe. Péro mbaʼépa ojapo ohechávo peteĩ hénte aty? “Oiporiahuvereko chupekuéra, oĩgui ovecha herekuaʼỹváicha ha oñepyrũ omboʼe chupekuéra heta mbaʼe[...]” (Marcos 6:34). Jesús ohechakuaavaʼekue mbaʼeichaitépa oikotevẽ oñepytyvõ umi tapichápe. Upévare oñehaʼãmbaite omboʼe chupekuéra ha ojapo heta milágro. Upéicha jahechakuaa umi mbaʼe porã ohechaukavaʼekue omomyihague heta tapichápe oñemoag̃ui hag̃ua hese, ha oiko chuguikuéra Jesús remimboʼe.

21. Mbaʼépa jahecháta pe artíkulo oúvape?

²¹ Heta mbaʼe gueteri jaikuaáta Jesús ojapovaʼekuégui jahechataháicha pe artíkulo oúvape. Mbaʼéichapa ikatu jajapove pe Misionéro Ikatupyryvéva ojapohaguéicha?

Mbaʼéichapa ñambohováita?

• Mbaʼéichapa oñehekomboʼevaʼekue Jesúspe ou mboyve ko Yvy ape ári?

• Mbaʼérepa Jesús omboʼe porãve vaʼekue umi escriba ha fariseokuéragui?

• Mbaʼérepa umi hénte ohayhuetereivaʼekue Jesúspe?

[Porandu ñahesaʼỹijóva]

[Nóta oĩva taʼanga ndive páhina 18]

Mbaʼéichapa Jesús oporomboʼevaʼekue?