Maʼerãpa jaikove?

MBAʼÉREPA IÑIMPORTÁNTE ÑAMBOHOVÁI KO PORANDU. Ndajavyʼaietereíningo ndajaikuaáiramo maʼerãpa jaikove. Péro jarekóramo peteĩ mbaʼe jahupytyséva ñande rekovépe, ñambohovái porãve provlemakuéra. Pe neurólogo Viktor E. Frankl, ohasavaʼekue Holocausto nazi, ohai: “Chéverõ g̃uarã jaikuaáramo maʼerãpa jaikove, ñanepytyvõta jagueropuʼaka hag̃ua umi mbaʼe ivaivéva jepe”.

Upéicharõ jepe, heta mbaʼe ojeʼe upévare. Heta oĩ heʼíva káda uno oikuaavaʼerãha ijehegui reínte maʼerãpa ñaime koʼápe. Ha umi heʼíva jajuha animálgui katu omboʼe ñande ñaime reinteha koʼápe.

Jaikuaa porãsérõ maʼerãpa ñaime koʼápe ñaporanduntevaʼerã ñande Apohare Jehovápe. Jahechamína mbaʼépa heʼi la Biblia ko mbaʼére.

Mbaʼépa heʼi la Biblia?

La Biblia omombeʼu Ñandejára ojapohague kuimbaʼe ha kuñáme peteĩ mbaʼerã. Jahechami mbaʼépa heʼivaʼekue Jehová ñande ru ha ñande sy ypykuépe ojapo hag̃ua.

Génesis 1:28: “Pende raʼýkena, taheta, taisarambi Yvy tuichakue ha toguereko ipoguýpe pira, guyra, mymbakuéra ha opaichagua yvýre otyryrýva”.

Upéicharõ, Ñandejára oipotavaʼekue Adán ha Eva ha ifamiliakuéra avei ojapo ko Yvýgui peteĩ hardín neporãva. Ndoipotaivaʼekue yvyporakuéra ituja ha omano, ni ombyai hekoha. Péro, oiporavo vai rupi ñande ru ha ñande sy ypykue, ñanderupyty avei pekádo ha ñemano (Génesis 3:​2-6; Romanos 5:12). Upéicharõ jepe, Jehová nokambiái oipotavaʼekue ñandéve g̃uarã.  Koʼẽrõitéma ko Yvýgui oikóta peteĩ hardín neporãva (Isaías 55:​10, 11).

Jehová ñandeapórõ guare ñanembokatupyry ha ñanemombarete ikatu hag̃uáicha jajapo hembipota. Nañandeapoivaʼekue jaiko hag̃ua ñaneakãre. Upévare, jajesarekomína koʼã téystore jaikuaa hag̃ua maʼerãpa Ñandejára ñandeapovaʼekue.

Eclesiastés 12:13: “Ñeʼẽ opáma. Ojeʼevaʼerã ojeʼepáma. Embojerovia [Ñandejárape] ha ejapo hembiapoukapy, upéva niko tembiaporã tuichave oguerekóva yvypóra”.

Miqueas 6:8: “Ha mbaʼépa haʼe ndehegui ohaʼarõ: Ejapo hekojojáva, eporoporiahuvereko, ha ejapo [Ñandejára] oipotáva, rejejapoʼỹre”.

Mateo 22:​37-39: “‘Ehayhu [Jehová] nde Járape ndepyʼaite guive, ne anga rugua guive, ha opa ne arandukue reheve.’ Kóva hína pe tuichavéva ha pe tenondeteguáva. Upéva rire oúva ojogua chupe, ha heʼi kóicha: ‘Ehayhu nde rapichápe rejehayhuháicha nde’”.

Mbaʼérepa ñanembopyʼaguapy la Biblia heʼíva

Oimehaichagua mákina oiko porã hag̃ua, ojeporuvaʼerã pe ijapohare heʼihaichaite. Upéicha avei, ñande jaikovaʼerã Ñandejára heʼihagueichaite ndajapytavaiséiramo hendive, ha akóinte javyʼa ha ñaneresãi hag̃ua. Jahechami mbaʼéichapa ñanembopyʼaguapýta Ñandejára oipotáva ñandéve g̃uarã jajapo jave koʼã mbaʼe:

Mbaʼépa ñamotenondéta ñande rekovépe, heta tapicha oimoʼã iñimportanteveha ñande pláta heta. Péro la Biblia heʼi porã ñandéve: ‘Umi imbaʼeretaséva katu ojepyʼaraʼã ha hoʼa heta mbaʼe pota tarovápe ha oporombyaíva ñuhãme’ (1 Timoteo 6:​9, 10).

Ha umi oñehaʼãva omombaʼe Ñandejárape ha ndaiplatarayhúiva, añetehápe ovyʼa (1 Timoteo 6:​7, 8). Haʼekuéra ningo oikuaa tekotevẽha ombaʼapo ha ohupyty hemikotevẽ (Efesios 4:28). Upéicharõ jepe, imanduʼa hikuái Jesús heʼivaʼekuére: “Avave ndaikatúi ombojerovia mokõi karaípe. Ndaijaʼéine peteĩre ha ohayhúne pe ambuépe, térã ombojeroviáne peteĩme ha ojahéine pe ambuére. Ndaikatúi ñambojerovia [Ñandejára] ha viru oñondive” (Mateo 6:24).

Upéicharõ, ñambaʼapoiterei térã ñandeplatapotaitereirangue, ñamotenondevaʼerã Ñandejárape opa mbaʼépe. Jaikuaa ñaneñeʼẽrendúramo Jehovápe, haʼe oñangarekotaha ñanderehe. Ha añetehápe ningo Ñandejára ojepyʼapy ñane renonderãre (Mateo 6:​25-33).

Mbaʼéichapa jatrata ñande rapichakuérape, heta tapicha ningo opensa raẽ ijehénte. Upéicha rupi ndojeikói pyʼaguapýpe, hetaiterei oĩ ‘imbaʼerãnte oipotáva opa mbaʼe’ ha ‘ndoporohayhúiva’ (2 Timoteo 3:​2, 3). Ha ndogustáiramo chupekuéra hapicha ojapóva térã nopensáiramo haʼekuéraicha, ‘ipochy vai ha osapukái hikuái ojupe térã ijuru guasu ojupe’ (Efesios 4:31). Péicha ndojejokokuaáiva ndaipyʼaguapýi ha ‘oñorairõ’ opavavéndi (Proverbios 15:18).

Umi iñeʼẽrendúva Ñandejárape katu ohayhu hapichápe haʼe ojehayhuháicha voi, ha ‘ipyʼaporã oñondive ha oporoporiahuvereko. Oheja rei ojupe mbaʼe vai ojapóva ojuehe’ (Efesios 4:32; Colosenses 3:13). Ha oĩramo jepe ijaýva hendivekuéra, oñehaʼã ojapo Jesús ojapohaguéicha. Haʼe ningo ‘ojejahéiramo jepe hese nombohovairivaʼekue jejahéipe’ (1 Pedro 2:23). Jesús ojapohaguéicha ohechakuaa hikuái añetehápe ovyʼaha oipytyvõramo hapichakuérape, umi nomombaʼéivape jepe ojejapóva hesekuéra (Mateo 20:​25-28; Juan 13:​14, 15; Hechos 20:35). Ñandejára Jehová omeʼẽ ijespíritu umi ojapóvape Itaʼýra ojapohaguéicha, ha upe espíritu ombopyʼaguapy chupekuéra (Gálatas 5:22).

Upéicharõ, mbaʼéichapa umi mbaʼe ñahaʼarõva ikatu ñanembopyʼaguapy?

[Nóta oĩva taʼanga ndive páhina 6]

Ñande ningo ñaikotevẽ jaikuaa maʼerãpa jaikove