Mbaʼépa heʼise ñandéve g̃uarã Jesucristo ogovernamaha?

‘Mbaʼéichapa roikuaáta regovernamaha ha opatamaha ko múndo?’ (MATEO 24:​3, BNP.)

1. Mbaʼépa oporandu Jesúspe ijapostolkuéra?

 OJAPÓMA dos mil áño rupi, Jesucristo, pe Mboʼehára oñemongetahague cuatro ijapóstol ndive monte de los Olívospe ha oporandu chupe hikuái: ‘Mbaʼéichapa roikuaáta regovernamaha ha opatamaha ko múndo?’ (Mateo 24:3). Haʼekuéra ningo oikuaasehína koʼápe mokõi mbaʼe: arakaʼépa oñepyrũta Jesús ogovernaha tiémpo ha arakaʼépa ‘opáta ko múndo’. Mbaʼépa heʼise koʼã mbaʼe?

2. Mbaʼépa heʼisehína pe ñeʼẽ “opatamaha ko múndo”?

² Jahechami raẽ mbaʼépa heʼise “opatamaha ko múndo”. Pe ñeʼẽ “opatamaha” ojetradusi griégogui syn·te·léi·as, oñeguenohẽva avei pe ñeʼẽ syn·té·lei·a-gui. Pe Biblia Buenas Nuevas para el Paraguay-pe ko ñeʼẽ ojetradusi hag̃ua ojeporu “opatamaha”, péro oĩ avei peteĩ ñeʼẽ griegopegua télos ojetradusíva “paha”. Ñantende hag̃ua mbaʼépepa ojoavy koʼã ñeʼẽ, ñapensami peteĩ diskúrso ojejapóvare Salónpe. Opáta vove peteĩ diskúrso, pe ermáno oñeʼẽ jey umi mbaʼe omyesakãvaʼekuére ha heʼi mbaʼéichapa ikatu jaiporu ñande rekovépe. Pe diskúrso katu opa hína pe diskursánte oguejývo platafórmagui. Upéicha avei ojeʼévo “opatamaha ko múndo”, la Bíbliape heʼisehína peteĩ tiémpo ipukúva ha opátava ko múndo ñehundípe.

3. Mbaʼe mbaʼépa oiko Jesús ogovernaha tiémpope?

 ³ Ha mbaʼépa ikatu jaʼe Jesús ogovernaha tiémpore, umi apóstol oikuaasevaʼekue? Ojeʼe hag̃ua Jesús ogovernaha tiémpo ojeporu pe ñeʼẽ griégope oĩva pa·rou·sí·a. * Jesucristo pa·rou·sí·a oñepyrũvaʼekue oikórõ guare chugui Rréi yvágape 1914-pe, ha ohóva hese haʼe ohundi peve umi iñañávape pe ‘jehasa asy guasúpe’ (Mateo 24:21). Jesús ogovernaha tiémpope oiko heta mbaʼe. Umíva apytépe ko múndo aña oĩma pe ‘ára pahápe’, ojeporavo avei umi ogovernavaʼerãme Jesús ndive ha oñemoingove jey chupekuéra yvágape (2 Timoteo 3:1; 1 Corintios 15:23; 1 Tesalonicenses 4:​15-17; 2 Tesalonicenses 2:1). Ikatu jaʼe pe tiémpo “opatamaha [syn·te·léi·as] ko múndo” haʼeha avei Jesucristo ogovernaha tiémpo (pa·rou·sí·a).

Peteĩ tiémpo ipukúva

4. Mbaʼérepa Jesús ombojoja ogovernaha tiémpo umi mbaʼe oikovaʼekuére Noé tiémpope?

⁴ Pe ñeʼẽ pa·rou·sí·a ojeporu oñeñeʼẽ hag̃ua peteĩ tiémpo ipukúvare, ha opyta porã Jesús oiporúrõ guare oñeʼẽvo ogovernaha tiémpore (jaleemi Mateo 24:​37-39). Jahechakuaavaʼerã Jesús ndeʼirihague ogovernaha tiémpo sapyʼamitanteha pe Dilúvioicha. Haʼe ombojojavaʼekue Noé tiémpore, oñepyrũvaʼekue are pe Dilúvio mboyve ha opa pe ama guasúpe. Upe tiémpope, Noé ojapo pe árka ha opredika umi hapichakuérape og̃uahẽ meve pe Dilúvio. Heta áño ohasavaʼekue oikopa hag̃ua koʼã mbaʼe. Upéicha avei, Jesucristo ogovernaha tiémpope oiko heta mbaʼe oikovaʼerã pe jehasa asy guasu mboyve ha avei oikótava upe rire (2 Tesalonicenses 1:​6-9).

5. Mbaʼéichapa Apocalipsis kapítulo 6 ohechauka Jesús ogovernaha tiémpo ipukuha?

⁵ Oĩve avei profesía ohechaukáva Jesucristo ogovernaha tiémpo ipukuvaʼerãha, ha ndahaʼeiha sapyʼaiténte oútava ohundi hag̃ua umi iñañávape. Apocalipsis (Revelación) heʼi Jesús rehe oĩha peteĩ kavaju morotĩ ári ha oñemoĩhahína chupe peteĩ koróna (jaleemi Revelación 6:​1-8). Ojupi rire Rréiramo 1914-pe, ojeʼe hese osẽha ogana, ipuʼaka hag̃ua opa mbaʼére. Upe rire, oñeñeʼẽ heta kavaju ariguáre ha entéro umi kavaju ikolór diferénte. Ñandejára Ñeʼẽme umi kavaju arigua ohechaukahína oikotaha ñorairõ, saʼitaha hiʼupyrã ha hetataha mbaʼasy. Koʼã mbaʼe ningo oiko pe ‘ára pahápe’. Ha jahechakuaáma voi jaikohañaína upe tiémpope.

6. Mbaʼépa heʼive Apocalipsis kapítulo 12 Jesucristo ogovernaha tiémpore?

⁶ Apocalipsis kapítulo 12 omombeʼuve mbaʼéichapa oñepyrũ yvágape Ñandejára Rréino. Upépe oñemombeʼu ñandéve oikohague peteĩ ñorairõ yvágape. Miguel, haʼéva Jesucristo, ha umi ánhel oñorairõ Satanás ha idemoniokuéra ndive. Ha ipahápe, Satanás ha iñirũnguérape ojepoi Yvy ape ári. Upérõ Satanás ipochyeterei, ‘oikuaágui mbykymaha itiémpo’ (jaleemi Apocalipsis [Revelación] 12:​7-12). Péicha jahecha porã Jesucristo ogoverna ñepyrũ guive yvágape, ohasavaʼerãha peteĩ tiémpo oikohápe heta hetave mbaʼe vai ko Yvy ape ári.

7. Mbaʼérepa oñeʼẽ pe Salmo mokõihapegua, ha mbaʼépa ojeʼe umi mburuvichakuérape ojapo hag̃ua?

⁷ Pe Salmo mokõihapegua heʼimavaʼekue avei Jesúspe oñemoĩvaʼerãha yvágape ogoverna hag̃ua (jaleemi Salmo 2:​5-9; 110:​1, 2). Péro, ko Salmo ohechauka avei oñemeʼẽha tiémpo umi mburuvichakuérape ha umi ipoguýpe oĩvape oñemoĩ hag̃ua Jesucristo poguýpe. Haʼekuéra ‘ohechakuaa’ ha ‘ohendu porã vaʼerã’ ojeʼéva chupekuéra. Upe tiémpope, “ovyʼa umi oñembojáva Ñandejára rendápe” oñangareko hag̃ua hesekuéra ha umi oservíva chupe ha pe Rréi omoĩvaʼekuépe. Ha jahechaháicha, ojeʼe chupekuéra oñemoĩsérõ Jesucristo poguýpe oñemoĩma hag̃ua koʼág̃a, ko haʼe ogovernaha tiémpope (Salmo 2:​10-12).

Mávapa ohechakuaáta Jesús ogovernamaha?

8, 9. Mávapa ohechakuaáta Jesucristo ogovernamaha ha oikuaáta mbaʼépa heʼise upéva?

⁸ Peteĩ árape umi fariséo oporandu Jesúspe  arakaʼépa Ñandejára omoĩvaʼerã igoviérno. Ha Jesús heʼi haʼekuéra ‘ndohechamoʼãiha’ upéva (Lucas 17:​20, 21). Umi ndojeroviáiva Ñandejárare ndohechakuaamoʼãi. Mbaʼéicha piko ohechakuaáta hikuái ni noñemoĩseivaʼekue voi Jesús poguýpe? Upéicharõ, mávapa ohechakuaáta Jesús ogovernamaha, ha mbaʼépa heʼise upéva?

⁹ Jesús heʼi hemimboʼekuéra ohechakuaavaʼerãha upéva ohecharõguáicha ‘aratiri, overa ha ohesapepáva ára tuichakue’ (jaleemi Lucas 17:​24-29). Mateo 24:​23-27-pe heʼi avei upéicha ojehechakuaataha Jesucristo ogovernamaha.

Umi ohechakuaátava Jesús ogovernamaha

10, 11. a) Mbaʼéichapa oñemyesakãmakuri mbaʼépa heʼise “umi koʼág̃a oikovéva” jatopáva Mateo 24:​34-pe? b) Mbaʼépa ontendenerakaʼe Jesús remimboʼekuéra ojeʼérõ guare chupekuéra mávapa “umi koʼág̃a oikovéva”?

¹⁰ Ndaʼareguasúi ko rrevísta omyesakãkuri mbaʼépa heʼise “umi koʼág̃a oikovéva” oĩva Mateo 24:​34-pe. Upépe oñeʼẽhína ‘umi hudío ojeroviaʼỹva oikovaʼekuére’ síglo primérope. * Jesús oñeʼẽ jave umi ótro téystope “umi koʼág̃a oikovéva” rehe, oñeʼẽ vai katuete hesekuéra, ha upévare ko rrevístape ojeʼevaʼekue upéicha. Ha heta vése umi hénte upe tiémpope oikóvare heʼi ‘iñañaha’ térã oñeʼẽ vaive hesekuéra (Mateo 12:39; 17:17; Marcos 8:38). Upévare oñeimoʼãkuri koʼág̃a rupi oñekumpliha Jesús heʼivaʼekue “umi koʼág̃a oikovéva” rehe, umi iñaña ha ojeroviaʼỹvare ohecháva umi mbaʼe oikóva ‘opátama [syn·te·léi·a] vove ko múndo’ ha avei oñehundi vove ipahaitépe (télos).

¹¹ Ha añetehápe Jesús oiporuvaʼekue pe ñeʼẽ “umi koʼág̃a oikovéva” ojaʼo hag̃ua umi hénte ñaña itiémpope guarépe ha oiporu avei oñeʼẽ hag̃ua hesekuéra. Péro, oñeʼẽparakaʼe umichagua hénterente heʼírõ guare jatopáva Mateo 24:​34-pe? Ñanemanduʼavaʼerã umi cuatro apóstol oñemongetahague hendive “haʼeñoháme” (Mateo 24:3). Koʼápe Jesús noñeʼẽvairivaʼekue “umi koʼág̃a oikovéva” rehe. Katuete umi apóstol ontendenerakaʼe haʼekuéra oĩha avei “umi koʼág̃a oikovéva” apytépe ha ‘koʼã mbaʼe oikopavaʼerãha omanomba mboyve’ hikuái.

12. Mbaʼéichapa ñanepytyvõ ñahesaʼỹijóramo Jesús heʼivaʼekue upe mboyve ha upe rire avei oñeʼẽrõ guare “umi koʼág̃a oikovéva” rehe?

¹² Mbaʼérepa ikatu jaʼe upéicha? Ñahesaʼỹijo rupi heʼíva upe mboyve ha upe rire avei. Mateo 24:​32, 33-pe, Jesús heʼivaʼekue: ‘Pemaʼẽ umi ígo mátare peikuaa hag̃ua. Hakã kyrỹi ha hogue roky ñepyrũ vove, peikuaa og̃uahẽmaha ára haku. Péicha avei, pehecha vove ojehu koʼã mbaʼe peikuaáta aju ag̃uimaha’ (ñambojojami Marcos 13:​28-30; Lucas 21:​30-32 ndive). Upe rire Mateo 24:​34-pe jalee: ‘Añetehápe haʼe peẽme: Koʼã mbaʼe ojehupáta omanomba mboyve umi koʼág̃a oikovéva’.

13, 14. Mbaʼérepa ikatu jaʼe Jesús oñeʼẽhague hemimboʼekuérare oñeʼẽrõ guare “umi koʼág̃a oikovéva” rehe?

¹³ Jahechaháicha Mateo 24:​33-pe, Jesús heʼivaʼekue hemimboʼekuéra ohechakuaataha ‘ojehu vove koʼã mbaʼe’, ha umívape oñemeʼẽmbotamavaʼekue espíritu sánto. Upéicharõ, Jesús  oñeʼẽnerakaʼe hemimboʼekuérare heʼivérõ guare pe jaleéva versíkulo 34-pe: ‘Koʼã mbaʼe ojehupáta omanomba mboyve umi koʼág̃a oikovéva’.

¹⁴ Jesús remimboʼekuéra ndahaʼemoʼãi umi ojeroviaʼỹvaicha. Haʼekuéra ohecháta umi mbaʼe oikóva ha avei ontendéta mbaʼépa heʼise. Ohechakuaáta hikuái oñatendévo umi mbaʼe oikóvare. Oikuaa porãta hikuái Jesús ‘ou ag̃uimaha’. Ha añete avei, umi hudío ojeroviaʼỹva ha umi kristiáno ypykue michĩmínte ohecha mbaʼéichapa oñekumpli Jesús heʼivaʼekue. Péro Jesús remimboʼekuéra ohótava yvágape añoite oikuaa ha ontendevaʼekue mbaʼépa heʼise umi mbaʼe oikóva upérõ.

15. a) Koʼág̃a rupi, mávapa hína “umi koʼág̃a oikovéva” Jesús oñeʼẽhague? b) Mbaʼérepa ndaikatúi jaʼe arakaʼe pevépa oikovéta “umi koʼág̃a oikovéva”? (Jahechami heʼíva pe rrekuádro oĩva páh. 25-pe.)

¹⁵ Koʼág̃a rupi, ñande rapichakuéra ndoikuaáiva mbaʼépa Ñandejára ojapóta heʼi umi mbaʼe ohechaukáva Jesús ogoverna ñepyrũmaha ‘ndojehechaihague’. Haʼekuéra heʼi nokambiaiha mbaʼeve (2 Pedro 3:4). Upéicharõ, umi Jesucrístope omoirũtava, umi ojeporavovaʼekue oho hag̃ua yvágape, ohechakuaa umi mbaʼe oikóva ohecharõguáicha aratiri ha ontende hikuái mbaʼépa heʼise upéva. Koʼág̃a rupi, enterove umi ohótava yvágape haʼehína “umi koʼág̃a oikovéva” ha ‘koʼã mbaʼe oikopavaʼerã omanomba mboyve hikuái’. * Upéva ohechauka  ikatuha oĩ gueteri ko Yvy ape ári umi omoirũtava Jesucrístope yvágape, oñepyrũ vove pe jehasa asy guasu.

‘Ñañatende porãkena’

16. Mbaʼépa jajapovaʼerã opavave Jesús remimboʼekuéra?

¹⁶ Ndahaʼeivaʼerã jahechakuaánteva umi mbaʼe oikóva. Jesús heʼivaʼekue: ‘Ko haʼéva peẽme, haʼe opavavépe: Peñatende porãke peikóvo’ (Marcos 13:37). Upéva iñimportanteterei ñandéve g̃uarã koʼág̃a rupi, tahaʼe jahátava yvágape térã japytátava ko Yvy ape ári. Noventa áño árima ohasa 1914 guive, upérõ ningo Jesúspe oñemoĩvaʼekue ogoverna hag̃ua yvágape. Ha ijetuʼúramo jepe, ñaime porãma vaʼerã Ñandejára renondépe ha ñañatende porã jaikóvo. Upearã ñantendevaʼerã Jesucristo ogovernamaha. Upéva ñanepytyvõta ñahaʼarõ hag̃ua, jaikuaáningo haʼe ñahaʼarõʼỹve jave outaha ohundi umi hese ndaijaʼéivape (Lucas 12:40).

17. Mbaʼéichapa jaikovaʼerã jaikuaágui Jesucristo ogovernamaha, ha mbaʼépa jajapovaʼerã upévare?

¹⁷ Ñantendéramo mbaʼépa heʼise Jesucristo ogovernamaha, ñanemokyreʼỹvevaʼerã ñambaʼapo hag̃ua Ñandejárape g̃uarã. Jaikuaámaningo Jesús ogovernaha tiémpo oñepyrũmahague 1914 guive. Koʼẽrõitéma oúta ohundi hag̃ua umi iñañávape ha okambiáta heta mbaʼe oparupiete ko múndope. Upévare, kyreʼỹme jajapovaʼerã pe tembiapo Jesús ohejavaʼekue ñandéve. Haʼe heʼi: “Ha pe [...] Ñandejára rréino rehegua ñeʼẽ oñemoherakuãvaʼerã opárupi Yvy jerekuévo, opa tetãmegua oikuaa hag̃ua, ha upe rire katu og̃uahẽvaʼerã pe ipaha [télos]” (Mateo 24:​14, BNP).

[Nóta]

Mbaʼépa ñambohováita?

• Mbaʼe mbaʼérepa ikatu jaʼe Jesús ogovernaha tiémpo ipukuha?

• Mávapa ohechakuaavaʼerã Jesús ogovernamaha ha ontendevaʼerã avei mbaʼépa heʼise?

• Mávapa hína koʼág̃a rupi heʼiháicha Mateo 24:​34-pe “umi koʼág̃a oikovéva?

• Mbaʼérepa ndaikatúi jaʼe arakaʼe pevépa oikovéta “umi koʼág̃a oikovéva”?

[Porandu ñahesaʼỹijóva]

[Rrekuádro oĩva páhina 29-pe]

Ikatúpa jaʼe arakaʼe pevépa oikovéta “umi koʼág̃a oikovéva”?

Ojeʼérõ “umi koʼág̃a oikovéva” oñeñeʼẽhína umi tapicha ndahaʼéivare ojoavegua ha oikovéva peteĩ tiémpo pukukue. Upéva jahechakuaa heʼívare Éxodo 1:6: ‘Omano José ha opa iñermanokuéra, omano avei itiempopeguakuéra’. José ha iñermanokuéra ndahaʼeivaʼekue ojoavegua, péro ohasa hikuái oñondive heta mbaʼe peteĩ tiémpope. ‘Umi upérõ oikovevaʼekue’ apytépe oĩ José ermanokuéra onasevaʼekue haʼe onase mboyve, ha osegíva oikove José omano rire (Génesis 50:24). Oĩ avei umi onasevaʼekue José onase riréma, umíva apytépe Benjamín, ha oseginerakaʼe oikove José omano rire.

Upéicharõ ojeʼe jave “umi koʼág̃a oikovéva” oñeñeʼẽhína umi hénte oikovévare peteĩ tiémpope, ha ndaikatúi jaʼe arakaʼe pevépa oikovéta. Péro ikatu jaʼe nambykýi ni ndaipukuetereimoʼãiha upe tiémpo. Upéicharõ, heʼi jave “umi koʼág̃a oikovéva”, jatopaháicha Mateo 24:​34-pe, Jesús ndeʼirivaʼekue hemimboʼekuérape mbaʼéichapa oipapavaʼerã oikuaa hag̃ua arakaʼépa og̃uahẽvaʼerã huʼãme “pe ára paha”. Upe riremínte katu heʼi jey voi chupekuéra ‘upe ára térã hiʼóra ndoikuaamoʼãiha’ hikuái (Mateo 24:36).

[Nóta oĩva taʼanga ndive páhina 28]

‘Koʼã mbaʼe ojehupáta omanomba mboyve umi koʼág̃a oikovéva’