Mbaʼe mbaʼépa ñanemboʼe Marcos
Jehová Ñeʼẽ ningo oikove
Mbaʼe mbaʼépa ñanemboʼe Marcos
MARCOS kuatiañeʼẽ mbykyve Mateo, Lucas ha Juan kuatiañeʼẽgui. Ohai Juan Marcos, 30 áño rupi Jesús omano ha oñemoingove jey rire. Ko lívro omombeʼu porãiterei Jesús ojapovaʼekue opredika aja 3 áño rasa.
Ko kuatiañeʼẽ ojehai umi Romaygua ha ambue tetãyguápe g̃uarã. Omombeʼuve Jesús ojapovaʼekue omombeʼurangue haʼe omboʼéva. Ohechauka Jesús haʼeha Ñandejára Raʼy, milágro apoha ha kyreʼỹme omoherakuãhague marandu porã. Ñahesaʼỹijóramo Marcos Kuatiañeʼẽ ñamombaretéta ñande jerovia Crístore ha ñanekyreʼỹta jaikuaauka hag̃ua Ñandejára marandu porã (Hebreos 4:12).
PREDIKASIÓN GUASUETE GALILÉAPE
Catorce versíkulope Marcos omombeʼúma Juan Bautista ojapóva ha avei mbaʼépa oiko Jesús oĩrõ guare desiértope cuarenta ára aja. Upéi katu kyreʼỹme omombeʼu mbaʼéichapa Jesús opredika Galilea rupi. Haʼete ku Marcos pyaʼeterei omombeʼupaséva oikovaʼekue ha upévare pyʼỹi heʼi upevovete oikoha umi mbaʼe (Marcos 1:10, 12).
Tres áño ohasa mboyve Jesús opredikapaitéma Galiléare 3 vése. Marcos omombeʼu umi mbaʼe ojoapykueripa oikohagueichaite, péro nomoĩri Jesús oñemoñeʼẽrõ guare peteĩ sérro ári, térã umi ótro diskúrso ipukuvéva.
Porandukuéra:
1:15 [BNP]. Mbaʼépa pe ‘ára og̃uahẽmava’ Jesús heʼivaʼekue? Heʼívo upéva Jesús ohechauka og̃uahẽmaha pe ára oñepyrũ hag̃ua opredika. Haʼe ningo pe rréi Ñandejára oiporavovaʼekue, upévare ikatu heʼi Ñandejára rréino hiʼag̃uimaha. Upéicharõ umi tapicha ipyʼaporãva ohendúva chupe ikatu ojapo oñekotevẽva oĩ porã hag̃ua Jehová ndive.
1:44; 3:12; 7:36. Mbaʼérepa Jesús ndoipotái oñemombeʼu umi milágro ojapóva? Haʼe ndoipotái umi hénte ojerovia hese ohenduhaguére ojapoha milágro ndetuichapajepéva. Oipota guei ijehegui ohechakuaa hikuái haʼeha pe Cristo ha odesidi upe rire ojeroviátapa hese (Isaías 42:1-4; Mateo 8:4; 9:30; 12:15-21; 16:20; Lucas 5:14). Omonguera rire peteĩ endemoniádo Gerasayguápe katu heʼi chupe oho hag̃ua omombeʼu ihentekuérape. Jesúspe ningo oñemosẽ upe lugárgui ha upévare ndaikatúi opredika umi héntepe. Pe kuimbaʼe oñemongueravaʼekue katu oipytyvõkuaa ani hag̃ua oñeñeʼẽ vai hese. Oĩne katuete ipochýva umi kure atýra omanombahaguére (Marcos 5:1-20; Lucas 8:26-39).
2:28, [JMP]. Mbaʼérepa Jesúspe oñehenói “avei sábado arete jára”? Apóstol Pablo heʼivaʼekue ‘Moisés léi haʼeha umi mbaʼe porã ouvaʼerã joguahánte’ (Hebreos 10:1). Heʼiháicha pe léi, oñembaʼapo rire 6 día ou pe sábado, ha Jesús omonguera hetápe sabadokue. Upéva orrepresenta Cristo goviérno Mil Áño aja. Upérõ yvyporakuéra oikóta pyʼaguapýpe ha opytuʼúta Satanásgui. Upévare Jesucristo rehe ikatu ojeʼe avei “sábado jára” (Mateo 12:8; Lucas 6:5, JMP).
3:5; 7:34; 8:12. Mbaʼéichapa Marcos ikatúraʼe oikuaa Jesús oñandúva? Marcos ningo ndahaʼéi apóstol térã Jesús irũete. Ojeʼéningo oikuaahague umi mbaʼe apóstol Pedro rupi. Haʼekuéra oñoamigoitevaʼekue (1 Pedro 5:13).
6:51, 52. Mbaʼépa pe ‘techapyrã pankuéra rehegua’ Jesús remimboʼekuéra nontendeivaʼekue? Upe mboyvemi Jesús oiporúkuri cinco pán ha mokõi pira omongaru hag̃ua 5 mil kuimbaʼépe, ha hendivekuéra heta kuña ha mitã avei. Ohechávo ko ‘techapyrã pankuéra rehegua’ Jesús remimboʼekuéra ohechakuaavaʼerãmoʼã haʼe ojapoha ko milágro Jehová puʼaka rupive (Marcos 6:41-44). Hesakãrire chupekuéra mbaʼeichaitépa tuicha Jesús puʼaka, ndohecharamoivaʼerãmoʼã haʼe ikatuhague oguata y ape ári.
8:22-26. Mbaʼérepa Jesús omonguera mbegue katúpe upe ohechaʼỹvape? Ojapóneraʼe upéva oiporiahuverekógui upe kuimbaʼépe. Haʼe ningo aréma oiko pytũnguýpe, upévare omonguera chupe mbegue katúpe ikatu hag̃uáicha ojepokuaa kuarahy mimbíre.
Mbaʼépa ñanemboʼe:
2:18, BNP; 7:11; 12:18; 13:3. Marcos omyesakã heta mbaʼe ojapóva umi hudío, mbaʼépa heʼi ha oguerovia hikuái, ha avei umi lugár ndojekuaaguasúiva, ikatu hag̃uáicha umi tetã ambuegua ontende upe ojeʼéva. Heʼi umi fariséo ‘oajunaha’, corbán heʼiseha ‘oñemboykéva Ñandejárape’ g̃uarã, umi saduséo ‘ndogueroviaiha omanóva oikove jeyha’, ha pe témplo oĩha ‘Yvyty Olivoty rovái’. Umi ndahaʼéiva hudío ndoikuaaseichéne mbaʼe famíliaguipa ou Jesús, upévare Marcos nomoĩri. Iporãta avei ñande jajapóramo péicha. Japredika térã ñameʼẽ jave diskúrso ñañehaʼãvaʼerã jahechakuaa mbaʼépa opensa ha oguerovia umi hénte ñanerenduvahína.
3:21. Jesús hentekuéra ningo ndojeroviái hese. Upévare haʼe oikuaa porãiterei mbaʼéichapa oñeñandu umi ihénte oñembohory térã oñemoĩva hesekuéra oservihaguére Jehovápe.
3:31-35. Jesús ojevautisárõ guare Ñandejára ohechauka espíritu sánto rupive haʼe itaʼyraha ha ikatutaha oiko yvágape. Ojeʼe avei “Jerusalén yvagapegua” haʼeha isy (Gálatas 4:26). Upe guive Jesús ohayhuve idisipulokuérape ihentekuéragui. Péva ñanemboʼe ñamotenondevaʼerãha Ñandejára rembipota ñande rekovépe (Mateo 12:46-50; Lucas 8:19-21).
8:32-34. Nañahenduivaʼerã oĩramo heʼíva ñandéve natekotevẽiha jajesakrifikaiterei, pyaʼe ñamboykevaʼerã péicha ñanemokangysévape. Jesús remimboʼekuéra ningo ‘oñembyesaraivaʼerã ijehegui’, péva heʼise omboykevaʼerãha oipotáva. ‘Ohupivaʼerã ijyvyra pohýi ijapére’ térã ogueropuʼakavaʼerã ñemotĩ, jejahéi ha jejuka ojerovia rupi Crístore. Ha ‘omoirũ’ meme vaʼerã Jesúspe, oikóvo haʼe oikohaguéicha. Jaikoséramo Jesús remimboʼéicha, ñañemeʼẽvaʼerã ñande rapichakuérare haʼe ojapohaguéicha (Mateo 16:21-25; Lucas 9:22, 23).
9:24. Aníkena ñatĩ ñañeʼẽ hag̃ua ñande jeroviáre térã jajerure hag̃ua toñemombareteve ñande jerovia (Lucas 17:5).
OG̃UAHẼMBOTÁVO ÁRA JESÚS OMANO HAG̃UA
Áño 32 opávo Jesús og̃uahẽ “Judea gotyo, Jordán y mboypýri”, ha umi henteita ijaty jey hendápe (Marcos 10:1, BNP). Opredika rire upépe oho Jerusalénpe.
Og̃uahẽvo 8 de Nisán Jesús oĩ Betániape. Okaru aja ou hendápe peteĩ kuña ha oñohẽ aséite hyakuã asýva iñakãre. Upéi Marcos omombeʼu oikohagueichaite Jesús oike guive peteĩ rréicha Jerusalénpe, oñemoingove jey peve.
Porandukuéra:
10:17, 18. Mbaʼérepa Jesús oñeʼẽjoko peteĩ kuimbaʼépe heʼíva chupe “Mboʼehára marangatu”? Ndohejáivo ojeʼe chupe péicha, Jesús omombaʼeguasu Jehovápe ha ohechauka opa mbaʼe porã ouha Ñandejáragui. Avei Jesús ohechauka peteĩ mbaʼe iñimportánteva: Jehová ningo opa mbaʼe Apohare ha haʼe añoite ikatu heʼi mbaʼépa iporã ha ivai (Mateo 19:16, 17; Lucas 18:18, 19).
14:25. Mbaʼépa heʼiséraʼe Jesús heʼírõ guare ijapostolkuérape: “Haʼe peẽme ndaʼumoʼãveiha ko víno, og̃uahẽ peve upe ára haʼu jeývo víno [Ñandejára] oisãmbyhyhápe”? Jesús ndeʼiséi oĩha víno yvágape. Heta vése ningo oñeñeʼẽ vínore ojehechauka hag̃ua ojevyʼaha. Upéicharõ Jesús heʼise ovyʼataha hemimboʼekuéra oĩ jey vove hendive Ñandejára rréinope (Salmo 104:15; Mateo 26:29).
14:51, 52. Mávapa pe mitãrusu ‘okañyvaʼekue opívo’? Marcos añoite omombeʼu ko mbaʼe, upéicharõ oiméne haʼe raʼe pe opívo okañyvaʼekue.
15:34. Ikangýparaʼe Jesús jerovia, upévare heʼi: ‘Che Jára, che Jára, mbaʼére piko chereja cheaño’? Nahániri. Ndajaikuaái mbaʼérepa heʼíraʼe ko mbaʼe, péro upéva ohechauka Jesús ontendeha Jehová ohejahague chupe ohecha hag̃ua mbaʼeichaite pevépa ojerovia hese. Ikatu avei heʼíraʼe oñekumpli hag̃ua Salmo 22:1 (Mateo 27:46).
Mbaʼépa ñanemboʼe:
10:6-9. Jehová oipota umi omendáva oiko oñondive opa árare. Upévare ojopoirangue, ména ha tembireko oñehaʼãvaʼerã ojapo la Biblia heʼíva ha péicha ombohovái oimehaichagua provléma (Mateo 19:4-6).
12:41-44. Ko viúda mboriahumi ojapóva ñanemboʼe ñandepojeravaʼerãha ñameʼẽ jave Jehovápe g̃uarã.