Moõguipa jaju?

MBAʼÉREPA IÑIMPORTÁNTE ÑAMBOHOVÁI KO PORANDU. Heta ñande rapichápe ningo oñemboʼe péicha reínte ojeikove ñepyrũ hague ko Yvy ape ári. Ojeʼe chupekuéra umi mbaʼe hasýva oiko hag̃ua, ijehegui reínte oikohague. Ha ojeʼe umi animálgui oikohague yvypóra, ha upéicha rupi ñandekatupyry, ñañandukuaa heta mbaʼe ha ñamombaʼe Ñandejárape.

Péro ñapensamína ko mbaʼére: añetehápe jajúramo animálgui ha ndaipóriramo peteĩ ñande Apohare, upéicharõngo ñande tyreʼỹetéta. Ndaiporimoʼãingo peteĩ iñarandúva ñanepytyvõvaʼerã ñasolusiona hag̃ua ñane provlemakuéra. Ñandejeheguiete jaikuaavaʼerã mbaʼéichapa ñambohováita umi ama guasu, yvyryrýi, yvytu atã, ha umi mbaʼe ñanderereko asýva, ha jahechavaʼerã avei mbaʼéichapa ñambohováita umi joavy oĩva polítikape.

Nembovyʼápa koʼã mbaʼe? Nembopyʼaguapýpa? Ndaupéichairõ, jahechami peteĩ solusión iporãvéva.

Mbaʼépa heʼi la Biblia?

La Biblia heʼi Ñandejaraite voi ojapohague yvypórape, ha ndajajuiha peteĩ animálgui térã nañañepyrũihague péicha reínte. Upéva rangue, heʼi oĩha peteĩ ñande Ru ñanderayhu ha iñarandúva. Jahechamína la Bíbliape koʼã mbaʼe.

Génesis 1:27: ‘Ñandejára ojapo yvypóra, haʼéicha, ojoguáva chupe, ojapo kuimbaʼe ha kuñáva’.

Salmo 139:14: “Chemopirĩmba ha chembojurujái upe cherehe rejapóva. Upévare romombaʼeguasu. Ajépa tuichaite upe ne rembiapokue”.

Mateo 19:​4-6: ‘Ndapeleéingaʼu piko raʼe Ñandejára kuatiañeʼẽme heʼiha, Ñandejára ojapóramo guare yvypórape iñepyrũmbýpe, ojapohague kuimbaʼe ha kuña? Heʼive avei: “Upévare pe kuimbaʼe ohejavaʼerã itúva ha isýpe, ojoaju hag̃ua hembireko ndive, ha oiko mokõivégui peteĩ”. Péicharõ, upe guive haʼekuéra ndahaʼevéima mokõi yvypóra, peteĩntema. Upévare, yvypóra ndoipeʼaivaʼerã ojuehegui umi Ñandejára ombojoajuvaʼekue’.

Hechos 17:​24, 25: “Pe [Ñandejára] ojapovaʼekue Yvy ha opa mbaʼe ipype oĩva, upéva hína Yvy ha yvága Jára. Ndoikói tupão yvypóra po rupi ijapopyrépe, ha noikotevẽi avave ojapo hese mbaʼeve, ko haʼe voi omeʼẽva ñandéve jeikove, pytuhẽ ha opa mbaʼe”.

Apocalipsis [Revelación] 4:11: ‘Nde, Jehová ore Jára, ndéve ija reñemombaʼeguasúvo, remimbipávo ha ndepuʼakapávo, nde haʼégui opa mbaʼe apohare, nde reipota rupínte oikovaʼekue’.

Mbaʼérepa ñandepyʼaguapy jaikuaávo la Biblia heʼíva

Jaikuaávo Ñandejára rupi maymáva oĩha ko Yvy ape ári, ndajahechavéima ñande rapichápe yma guaréicha (Efesios 3:15). Avei mbaʼépa ñapensa ñandejehe voi ha mbaʼéichapa jahecha umi provlemaita jahasáva. Ha heta mbaʼéma ndajahechavéi yma guaréicha. Jahechamína mbaʼe mbaʼépa.

Jadesidíta jave peteĩ mbaʼe ijetuʼúva, nañandepyʼapymoʼãi opa mbaʼe yvyporakuéra opensáva. Upéva rangue jajeroviáta la Biblia  heʼívare. Mbaʼérepa? Jaikuaágui ‘Ñandejára Ñeʼẽ oñemoĩhague Ñandejára remimoĩuka rupi, oporomboʼe ha oporomomarandu hag̃ua, oporomyatyrõ ha oporohekomboʼe hag̃ua pe hekopeteguáva rehe, ikatu hag̃ua pe kuimbaʼe Ñandejára reheguáva oĩmbaite, ojapokuaa hag̃ua opaichagua mbaʼe iporãva’ (2 Timoteo 3:​16, 17).

Upeichaite, jajapo hag̃ua la Biblia heʼíva ñañehaʼãmbaitevaʼerã ñandejehe voi. Upévare, ñande voi ñamboykevaʼerã heta mbaʼe jajaposéva (Génesis 8:21). Ha jagueroviáramo ñandeapohague peteĩ Túva ñanderayhúva, jahechakuaáta avei haʼe oikuaaha mbaʼe tapérepa jahavaʼerã (Isaías 55:9). Upévare, Iñeʼẽme heʼi ñandéve: “Ejerovia Ñandejárare nde pyʼaite guive, ha ani ndejehe añónte. Eikuaáke haʼe oĩha opárupi, ha haʼe omyesakãtaha ndéve nde rape” (Proverbios 3:​5, 6). Jajapóramo koʼápe heʼíva, ndajajepyʼapyetereivéima umi provlémare ha umi mbaʼe ijetuʼúvare jadesidi hag̃ua.

Ñaime jave umi ndahaʼéiva ñanderehegua apytépe, ndajajepyʼapymoʼãi ñandeapoʼírõ g̃uarã umi tapicha, ñaimoʼãgui haʼekuéra tetã ambuegua haguére tuichave mbaʼeha ñandehegui. Upéva rangue, ñande voi jajehayhúta hekopete. Mbaʼérepa? Ñande Ru Jehovápe g̃uarã ningo ‘peteĩchante opavave, ha oimeraẽ tetãmegua okyhyjéva chugui ha hembiapo porãvape oguerohory avei’ (Hechos 10:​34, 35, BNP).

Jaikuaávo avei ko mbaʼe nañapensavaimoʼãi ñande rapicháre jaikuaa porã mboyve chupe. Jahechakuaáta uvei ndajaʼapoʼirivaʼerãha ñande rapicha ndahaʼeihaguére ñanderehegua. Ñandejára ningo ‘peteĩ kuimbaʼégui añónte ojapo opa tetãnguéra, oiko hag̃ua Yvy ári, ha heʼi chupekuéra arakaʼépa ha moõpa oikóta’ (Hechos 17:26).

Jaikuaávo oĩha ñande Apohare ha ojepyʼapyha ñanderehe, ikatúma ñandepyʼaguapy. Péro jaiko meme hag̃ua pyʼaguapýpe ñaikotevẽve peteĩ mbaʼe.

[Nóta oĩva taʼanga ndive páhina 4]

Jajúpa umi animálgui?