Ñaneakãguapýkena ha ani ñañemohatã ñande jaʼévapente

“Nemanduʼákena opavavépe [ani hag̃ua oñemohatã heʼívapente].” (TITO 3:​1, 2.)

1, 2. Mbaʼéichapa ohechauka la Biblia ñaneakãguapyvaʼerãha, ha mbaʼéichapa ikatu jahechauka upéva?

 ÑANDE Ru Jehová ningo iñarandueterei. Upévare ñande yvyporakuéra ñañemoag̃ui hese ñanehekomboʼe hag̃ua (Salmo 48:14). Santiago, Jesús remimboʼe, heʼi ñandéve ‘umi oguerekóva arandu Ñandejáragui oúva heko potĩ, ndaipochykuaái, iñakãguapy, iñeʼẽrendukuaa, oporoporiahuverekokuaa, ndahovamokõiri ha ojapo iporãva’ (Santiago 3:17).

² Apóstol Pablo heʼi: ‘Opavave toikuaa peneakãguapyha’ (Filipenses 4:5). * Jahechaháicha, tekotevẽterei ñaneakãguapy ha ani ñañemohatã ñande jaʼévapente. Upéva ikatu jahechauka ñañemoĩvo Jesucristo poguýpe, omoakãva umi kongregasión (Efesios 5:23). Ikatu avei jahechauka ñaneakãguapyha ñanembaʼerechakuaáramo ha ani jaipota ojejapo ñandéve ñandegustaháichante.

3, 4. a) Emombeʼu umi ehémplo ohechaukáva mbaʼéichapa ñanepytyvõ nañañemohatãiramo ñande jaʼévapente. b) Mbaʼe mbaʼépa jahecháta koʼág̃a?

³ Oñekotevẽramo, opavavépe ñanepytyvõta nañañemohatãiramo ñande jaʼévapente. Pór ehémplo Gran Bretáñape ojekuaárõ guare umi terrorista ojapomoʼãhague peteĩ mbaʼe ivaietereíva, ndojehejavéi heta mbaʼe ojehupi aviónpe, ha umi hénte iñeʼẽrendu. Jahechakuaa avei ñamaneha jave sapyʼánte jahejavaʼerãha ohasa umi ótro omaneháva, ani hag̃ua ojehu ñandéve mbaʼeve ha ñambotypa upe tape. Upéva ikatu oiko jahasáta jave peteĩ tape hetaiterei mbaʼyru ohasaha rupi.

⁴ Upéicharamo jepe, heta vése jajapose ñande jaʼévante. Jahechamína mbohapy mbaʼe ñanepytyvõtava ani hag̃ua jajapo upéicha: Mbaʼépa ñanemomyivaʼerã ani hag̃ua jajapose ñande jaʼévante? Mbaʼéichapa jahechavaʼerã umi mburuvichakuérape? Ha moõ pevépa jajapovaʼerã ojeʼéva ñandéve?

Mbaʼérepa nañañemohatãivaʼerã ñande jaʼévapente?

5. Mbaʼépa omomyivaʼekue umi tembiguái evréope opyta hag̃ua ijára ndive?

⁵ Jahechami peteĩ Léi Jehová omeʼẽvaʼekue Moiséspe ohechaukáva mbaʼérepa nañañemohatãivaʼerã ñande jaʼévapente. Upe Léi heʼi, umi tembiguái evréo ojepoivaʼerãha 7 áño ombaʼapo rire térã pe Jubiléope, pe arete guasu ojapóva hikuái káda 50 áño. Péro umi tembiguái ikatu odesidi opyta ijára ndive (jaleemína Éxodo 21:​5, 6). Mbaʼérepa ojapóne hikuái upéicha? Ohayhúgui ijárape. Oiméramo otrata porã rakaʼe chupekuéra ijára katuete opytaséta ipoguýpe.

6. Mbaʼépa ñanemomýita ani hag̃ua jajapo ñande jaʼévante?

⁶ Upéicha avei, jahayhúgui Jehovápe ñañemeʼẽ chupe ha ñakumpli pe ñaprometevaʼekue (Romanos 14:​7, 8). Apóstol Juan ohaivaʼekue, ‘jahayhu Ñandejárape heʼise jajapo hembipota, ha hembipota ndahaʼéi mbaʼe pohýi’ (1 Juan 5:3). Péicha oporohayhúva ndojapói haʼe heʼívante (1 Corintios 13:​4, 5). Jahayhúgui ñande rapichakuérape ndajajapomoʼãi ñande jaʼévante, ñamotenondéta guei  chupekuéra. Upéicha, ñanembaʼerechakuaa hendivekuéra ha nañapensái ñandejehénte (Filipenses 2:​2, 3).

7. Mbaʼérepa tekotevẽta ñamboyke umi mbaʼe ñandegustáva japredika jave?

⁷ Ñañatendevaʼerã ani hag̃ua jaʼe térã jajapo umi mbaʼe ñande rapichakuérape noĩporãiva (Efesios 4:29). Jahayhúramo chupekuéra ndajajapomoʼãi mbaʼeve omokangyvaʼerã ijerovia, ndahaʼéiramo ñaneretãygua térã nopensáiramo ñandéicha. Upévare pyʼỹinte tekotevẽ ñamboyke umi mbaʼe ñandegustáva. Pór ehémplo, umi misionéra oñepinta ha oiporúva média, ha ohóva oservi peteĩ lugár ndojehechaporãihápe koʼã mbaʼe, ndoiporúi umi mbaʼe ani hag̃ua oporomoñepysãnga térã oñeñeʼẽ vai hesekuéra (1 Corintios 10:​31-33).

8. Mbaʼéichapa ñanepytyvõta jahayhúramo Ñandejárape jaiko hag̃ua upe ‘michĩvévaramo’?

⁸ Jahayhúramo Jehovápe ñanepytyvõta avei ani hag̃ua ñañemombaʼeguasu. Umi Jesús remimboʼekuéra ojodiskutírõ guare mávapa iñimportanteve ijapytepekuéra, Jesús omoĩ peteĩ mitã henondepekuéra ha heʼi: “Pe oguerohorýva ko mitãmíme che rérape, chéve che rerohory; ha pe chéve che rerohorýva, oguerohory avei pe che mbouharépe. Pe michĩetevéva pende apytépe, upéva pe tuichavéva” (Lucas 9:48; Marcos 9:​36, BNP). Ñandéve katu sapyʼánte ijetuʼu jaiko hag̃ua pe ‘michĩvévaramo’, ñaneimperfékto ha ñañemombaʼeguasuse rupi. Péro ñaneumílderamo nañañemohatãmoʼãi ñande jaʼévapente, ha ñamombaʼéta ñande rapichakuérape (Romanos 12:10).

9. Mbaʼépa jahechakuaavaʼerã ani hag̃ua jajapose ñandéve ñandegustaháichante?

⁹ Jahechakuaáramo Jehová omoĩhague heta tapichápe oporosãmbyhy hag̃ua ndajajapomoʼãi ñandéve ñandegustaháichante. Ñande kristiáno jarrespeta umi oporosãmbyhývape. Apóstol Pablo heʼivaʼekue umi oikóvape Coríntope: “Opáichavo, aipota peikuaa Cristoha pe kuimbaʼe akã, ha pe kuimbaʼe pe kuña akã, [...] Ñandejaraháicha Cristo akã” (1 Corintios 11:​3, BNP).

10. Mbaʼépa jahechauka ñañemoĩramo Ñandejára poguýpe?

¹⁰ Ñañemoĩramo Ñandejára ñanderayhuetéva poguýpe, jahechauka jajeroviaha hese. Haʼe ningo oikuaa mbaʼépa jahasañaína ha ñanevendesíta katuete upévare. Ñanemanduʼavaʼerã ko mbaʼére oĩrõ ñandetrata vaíva térã ipochyetereíva ñanderehe. Apóstol Pablo ohaivaʼekue: ‘Peñehaʼãmbaite ikatuha peve peiko hag̃ua pyʼaguapýpe opavave ndive’. Ha omombareteve hag̃ua upe ohaivaʼekue heʼi: ‘Che pehẽnguekuéra ahayhúva, ani peñevenga peẽ voi pende rapicha rehe, peheja Ñandejára pópe haʼe toporokastiga. Ñandejára Ñeʼẽme niko heʼi: “Che aporokastigavaʼerã, che amyengoviáta heʼi Ñandejára”’ (Romanos 12:​18, 19, BNP).

11. Mbaʼéichapa jahechauka ñañemoĩha Jesucristo poguýpe?

¹¹ Ñandejára omoĩ avei tapicha omoakãvaʼerã kongregasión. Revelación kapítulo únope ohechauka Jesucristo oguerekoha ipo deréchape ‘estrellakuéra’ (Apocalipsis [Revelación] 1:​16, 20, BNP). Umi ‘estrélla’ orrepresenta avei umi ansianokuérape omoakãva kongregasión. Haʼekuéra oñemoĩ Jesucristo poguýpe ha oporotrata haʼe ojapohaguéicha. Jesús heʼivaʼekue pe tembiguái jeroviaha ha iñarandúvape omeʼẽ hag̃ua umi mbaʼe oñekotevẽva omombaretétava ñande jerovia. Upévare opavave kristiáno jajapo pe tembiguái heʼiháicha (Mateo 24:​45-47). Jastudiávo umi puvlikasión omeʼẽva ñandéve pe tembiguái ha jajapo umi mbaʼe ñaaprendéva ohechauka ñañemoĩha Jesucristo poguýpe. Upéicha jajapóramo jaikóta peteĩ ñeʼẽme ha pyʼaguapýpe (Romanos 14:​13, 19).

Moõ pevépa jajapóta ojeʼéva ñandéve?

12. Mbaʼéicha javépa ndajajapói ojeʼéva ñandéve?

¹² Oĩ porãramo jepe jajapo ojeʼéva ñandéve, upéva ndeʼiséi ñamboyketaha umi mbaʼe Jehová heʼíva. Umi rrelihión omoakãva heʼírõ  guare umi kristiáno ypykuépe anive hag̃ua oporomboʼe Jesús rérape, mbaʼépa ojapo hikuái? Pedro ha umi apostolkuéra heʼi: “Oreñeʼẽrenduvaʼerã [Ñandejárape] yvypórape rangue” (Hechos 4:​18-20; 5:​28, 29). Upéicha avei koʼág̃a rupi, umi “mburuvichakuéra” ñandejokose jave anive hag̃ua japredika, ñemiháme jepe jajapo upéva. Ndoipotavéiramo hikuái japredika ogaha rupi, ñande jahecha mbaʼéichapa ikatu ñañeʼẽ ñande rapichakuéra ndive, ha upéicha jajapo pe tembiapo Jehová omeʼẽvaʼekue ñandéve. Ha ndoipotavéiramo ñañembyaty Salónpe katu, ñañembyaty ogaha rupi (Romanos 13:​1, BNP; Hebreos 10:​24, 25).

13. Mbaʼéichapa ohechauka Jesús jajapovaʼerãha mburuvichakuéra heʼíva ñandéve?

¹³ Upéicharamo jepe, Jesús oñemoñeʼẽrõ guare pe sérro ári guive ohechauka tekotevẽha jajapo mburuvichakuéra heʼíva ñandéve. Haʼe heʼi: “Oĩramo nde rerahaséva [hués renondépe] oipeʼaségui ndehegui nde ao, eheja togueraha nde ahoja avei. Oĩramo oguerojaukaséva ndéve imbaʼe pohýi 1 légua, eraha chupe 2 légua” (Mateo 5:​40, 41). * Ñanembaʼerechakuaa ha ñaporopytyvõséramo ñanemomýita jajapove hag̃ua upe ñande rapichakuéra ojerurévagui (1 Corintios 13:5; Tito 3:​1, 2).

14. Mbaʼérepa arakaʼeve nañahenduivaʼerã umi apóstata heʼíva?

¹⁴ Ñaimérõ jepe jajapo hag̃uáicha ojeʼéva ñandéve, nañahenduivaʼerã umi apóstata heʼíva, umíva omboyke Ñandejárape ha oñeʼẽ vai hese. Jajepytasovaʼerã ko mbaʼépe ani hag̃ua oñemongyʼa umi mbaʼe porã Ñandejára ñanemboʼéva ha jaiko porã meme hag̃ua kongregasiónpe. Apóstol Pablo heʼivaʼekue umi ‘ermáno guaʼu’ rehe: “Opáichavo, sapyʼamínte jepe ndorohejái oremoĩ ipoguypekuéra, roipotágui opyta peẽme pe [marandu porã] añeteguáva” (Gálatas 2:​4, 5, BNP). Oĩramo jepe omboykéva Jehovápe ha oñeʼẽ vai hese, nameméi oiko upéva. Péro umi kristiáno iñeʼẽrendúva ojepytaso mbarete pe hekopeguávare.

Umi ansianokuéra noñemohatãivaʼerã umi mbaʼe heʼívapente

15. Mbaʼéicha javépa umi ansiáno noñemohatãivaʼerã haʼekuéra heʼívapente?

¹⁵ Apóstol Pablo ohaivaʼekue: ‘umi ansianokuéra iñakãguapyvaʼerã’, térã noñemohatãivaʼerã haʼekuéra heʼívapente (1 Timoteo 3:​2, 3). Upéva koʼýte oñekotevẽ oñembyaty jave hikuái oñemongeta hag̃ua kongregasiónpe oñekotevẽvare. Ojedesidi mboyve umi mbaʼe ojejapótava, káda uno ikatu heʼi mbaʼépa opensa. Ha ohendu rire hikuái mbaʼépa heʼi la Biblia upe mbaʼére, ikatu peteĩ ansiáno okambia upe opensáva. Upeichaite, upe ansiáno ohenduvaʼerã hapichakuéra heʼíva, ndahaʼéi oñemohatãva haʼe heʼívapente. Ñepyrũrã ikatu haʼekuéra nopensái peteĩcha. Péro oñemboʼe ha ojepyʼamongeta rire hikuái, ha noñemohatãiramo umi mbaʼe heʼívape ha ojapóramo opa mbaʼe hekopete, oipytyvõta chupekuéra oiko porã hag̃ua oñondive (1 Corintios 1:10; jaleemína Efesios 4:​1-3).

16. Mbaʼépa ojapovaʼerã umi ansiáno?

¹⁶ Umi ansiáno oñehaʼãvaʼerã ojapopaite Ñandejára heʼiháicha iñorganisasión rupive. Upéva oipytyvõta chupekuéra oñangareko jave iñermanokuérare, imbaʼerechakuaa ha imbaʼeporã hag̃ua hendivekuéra. Apóstol Pedro heʼivaʼekue: ‘Peñangareko umi Ñandejára ovecháre oñemoĩvaʼekue pende pópe. Pejapo kyreʼỹme oipotaháicha Ñandejára, ha ani jejopýpe térã pláta potágui, pejapo uvei pende pyʼaite guive’ (1 Pedro 5:2).

17. Mbaʼépa enterove kristiáno ojapovaʼerã kongregasiónpe?

¹⁷ Umi ermáno ha ermána ijedámava oagradeseterei oipytyvõhaguére chupekuéra umi mitãrusu ha mitãkuñanguéra, ha upévare omombaʼe chupekuéra. Upéicha avei, haʼekuéra omombaʼe umi ijedámavape, oservihaguére heta áñorema Jehovápe (1 Timoteo 5:​1, 2). Umi ansianokuéra katu oheka umi  ermáno ikatupyrývape ha omboʼe chupekuéra oñangareko hag̃ua avei Jehová ovechakuérare (2 Timoteo 2: 1, 2). Enterove kristiáno ojapovaʼerã apóstol Pablo heʼivaʼekue: ‘Peneñeʼẽrendúkena umi penemoakãvape ha peñemoĩ ipoguypekuéra. Haʼekuéra niko oñangareko penderehe kaneʼõʼỹre, oikuaágui ojechataha Ñandejárandi umi mbaʼe ojapovaʼekuére. Peñehaʼã taivevúi chupekuéra hembiapo, ani ipohýi. Peichaʼỹrõ, naiporãichéne peẽme’ (Hebreos 13:17).

Ani jajapose ñande jaʼévante ñande rogapýpe

18. Mbaʼérepa naiporãi jajapose ñande jaʼévante ñande rogapýpe?

¹⁸ Ñande rogapýpe naiporãi avei jajapose ñande jaʼévante (jaleemína Colosenses 3:​18-21). La Biblia ohechauka mbaʼépa ojapovaʼerã ména, tembireko ha taʼyrakuéra ogapýpe. Ména ningo omoakã hembirekópe ha ohekomboʼevaʼerã avei ifamíliape. Pe tembireko katu ohechakuaavaʼerã iména omoakãha hogapy. Ha taʼyrakuéra katu oñehaʼãvaʼerã ojapo isy ha itúva heʼíva ha péicha omombaʼeguasu Jehovápe. Enterove ikatu oipytyvõ noñemohatãirõ haʼekuéra heʼívapente, ha upéicha oĩta pyʼaguapy hogapýpe. Péro iñakãguapyvaʼerã hikuái, ha ohechakuaa mbaʼépa ojapóta térã ndojapomoʼãi. Jahechamína la Bíbliape umi ehémplo ohechaukáva upéva.

19, 20. a) Mbaʼépepa ojoavy Elí ha Jehová ojapovaʼekue ohendu rire itaʼyrakuérape? b) Mbaʼépa ikatu tuvakuéra oaprende koʼã ehémplogui?

¹9 Samuel imitãrõ guare, Elí haʼevaʼekue saserdóte guasu Israélpe. Ha itaʼyrakuéra Hofní ha Finehás katu “kuimbaʼe iñañáva ha [Ñandejára] rehe ndojeroviái”. Elí oikuaa umi mbaʼe vai itaʼyrakuéra ojapóva, heko vaiha hikuái umi kuña ndive oservíva pe tavernákulo renondépe. Mbaʼépa ojapo oikuaávo upéva? Heʼi chupekuéra hembiapo vaíramo Jehová renondépe ndaikatumoʼãiha avave oñemboʼe hesekuéra, péro ndokorrehíri avei chupekuéra. Haʼekuéra katu osegi hembiapo vai, upévare Jehová heʼi ohunditaha chupekuéra. Elí oikuaarõ guare itaʼyrakuéra omanoha, haʼe omano avei. Ajépa ivaiete upe oikovaʼekue! Jahecha ivaietereiha Elí ojapovaʼekue, oheja reívo itaʼyrakuérape osegi hembiapo vai (1 Samuel 2:​12-17, 22-25, 34, 35; 4:​17, 18).

²⁰ Koʼág̃a jahecháta mbaʼéichapa Jehová otrata umi itaʼyrakuéra oĩva hendive yvágape. Proféta Micaya ohecha peteĩ visión rupive Jehová oñembyatýrõ umi anhelkuéra ndive. Jehová oporandu mávapa ijapyteguikuéra ombotavýne rréi Acábpe, oñemongúi hag̃ua chupe. Upe rire katu ohendu umi anhelkuéra heʼíva. Peteĩva heʼírõ guare haʼe ojapotaha, Jehová oporandu chupe mbaʼéichapa ojapóta. Jehová ohecha porã upe heʼíva, upévare heʼi chupe ojapo hag̃ua upéicha (1 Reyes 22:​19-23). Mbaʼépa ikatu oaprende umi família ko mbaʼe oikovaʼekuégui? Ndojapoivaʼerãha chupekuéra ogustaháichante. Pe ména omoakãva hogapy tekotevẽ ohendu hembireko ha ifamília heʼíva. Haʼekuéra katu omombeʼu rire mbaʼépa  oñandu ha oipota, ohejavaʼerã upe omoakãva pópe odesidi hag̃ua. Ñandejára voi heʼi pe ména ojapovaʼerãha upéicha.

21. Mbaʼépa jahecháta pe artíkulo oúvape?

²¹ Jaagradesete ningo ñande Ru ñanderayhu ha iñaranduetévape ñanemomanduʼahaguére ani hag̃ua jajapose ñande jaʼévante! (Salmo 119:99.) Pe artíkulo oúvape jahecháta mbaʼéichapa ikatu ovyʼa umi omendáva iñakãguapy ha imbaʼerechakuaáramo.

[Nóta]

Mbaʼépa ñambohováita?

• Mbaʼépa jahupytýta nañañemohatãiramo ñande jaʼévapente?

• Mbaʼéichapa ikatu ohechauka umi ansiáno noñemohatãiha haʼekuéra eʼívapente?

• Mbaʼérepa ñande rogapýpe nañañemohatãivaʼerã ñande jaʼévapente?

[Porandu ñahesaʼỹijóva]

[Nóta oĩva taʼanga ndive páhina 10]

Umi ansianokuéra oñemboʼe, ojepyʼamongeta ha imbaʼerechakuaáramo oñembyaty jave og̃uahẽ porãvéta peteĩ ñeʼẽme