Jehová ohendu ñane ñemboʼe

“Ñandejára oñangareko umi ijoheipyréva rehe, ha ohendu umíva ñemboʼe.” (SALMO 34:16 [34:​15, NM].)

1, 2. a) Mbaʼéichapa oñeñandu heta tapicha koʼág̃a rupi? b) Mbaʼérepa nañanemondýiri umi mbaʼe vaieta oikóva?

 REHASAPAREÍNA peteĩ mbaʼe ijetuʼúva? Oiméramo upéicha, ndahaʼéi neañónte rehasáva upéva. Hetaiterei tapicha ohasa umi mbaʼe ijetuʼúva koʼẽ koʼẽre ko múndo añáme. Umíva apytépe oĩ ohasa asyetereíva ha ndoikuaavéimava mbaʼépa ojapóta. Haʼekuéra oñeñandu David oñeñanduhaguéicha, heʼivaʼekue: “Chekangy, chekaneʼõ, chepyʼa rugua guive chepyahẽ. Chepyʼa operere, chekangypa, che resa jepe iñypytũmba” (Salmo 38:​9, 11 [38:​8, 10, NM]).

² Ñandéve nañanemondýiri umi mbaʼe vaieta oikóva, Jesús heʼimavaʼekue koʼã mbaʼe oikovaʼerãha voi ha “jehasa asy ñepyrũha koʼã mbaʼe” (Marcos 13:​8, JMP; Mateo 24:3). Pe “jehasa asy ñepyrũha” ojetradusíva griégo ñeʼẽgui, ojeporu oñeñeʼẽ hag̃ua pe kuña ohasa asývare imemby potaite jave. Péicha ojehechauka mbaʼeichaitépa ohasa asy yvyporakuéra koʼág̃a rupi, ‘ñaimehaguére pe ára ijetuʼúvape’ (2 Timoteo 3:1).

Jehová ohechakuaa umi mbaʼe ñandejopýva

3. Mbaʼépa oikuaa porã Ñandejára siervokuéra?

³ Ñandejára siervokuéra jaikuaa porã jahasa asytaha ha ijetuʼuvetaha ohóvo. Upéicha avei, oĩ peteĩ ndaijaʼéiva ñanderehe. Upéva hína Satanás, oñehaʼãmbaitéva ñanemboyke hag̃ua ñande jeroviágui (1 Pedro 5:8). Ikatu ñañeñandu David oñeñanduhaguéicha: “[Atĩeterei], chepyʼa yvýre hoʼa, chekangypa ha ndaikuaái upe ajapótava. Opa rupi aheka che [poriahuverekomivaʼerã], ha máva piko opena cherehe?” (Salmo 69:​21, [69:​20, NM]).

4. Mbaʼépa ikatu ñanepytyvõ jahasa asy jave?

⁴ Heʼisépa rakaʼe David operdemaha la esperánsa? Mbaʼevéicharamo. Jahechamína mbaʼépa heʼive upe rire: “[Ñandejára] ojapysaka imboriahúvare, ha nomboykéi umi [isiervokuérape] iñapytĩmby oikóva” (Salmo 69:​34, [69:​33, NM]). Ikatu ñañeñandu ku ñañeñapytĩrõguáicha jahasa asyetereígui. Ikatu avei ñaimoʼã avave ndohechakuaaiha upe jahasáva. Péro Davídpe oipytyvõhaguéicha, ñanembopyʼaguapýta avei jaikuaávo Jehová ohechakuaaha jahasa asy jave (Salmo 34:15).

5. Mbaʼépa oikuaa porã vaʼekue rréi Salomón?

⁵ Rréi Salomón ohechaukavaʼekue avei upeichaha ojededikárõ guare pe témplo oĩva Jerusalénpe (jaleemína 2 Crónicas 6:​29-31). Oñemboʼe Jehovápe ha ojerure chupe ohendumínte hag̃ua umi tapicha oñembyasy asývape oñemboʼe jave. Mbaʼépa ojapóta Ñandejára ohendu rire iñemboʼe? Salomón oikuaa porã Jehová ohendutaha umi ohasa asývape, ha ombohovaitaha chupekuéra iñemboʼe. Mbaʼérepa heʼi upéva? Jehová ‘oikuaa rupi yvyporakuéra pyʼapy’.

6. Mbaʼépa ikatu jajapo jajepyʼapy jave, ha mbaʼérepa?

⁶ Upeichaite, ñande ikatu avei ñañemoag̃ui Jehováre ñemboʼe rupive, ha ñamombeʼu chupe opa mbaʼe ñanembohasa asýva. Ñanembopyʼaguapy jaikuaa rupi Jehová ohechakuaaha upe jahasáva ha ojepyʼapyha ñanderehe. Apóstol Pedro heʼivaʼekue avei upeichaha: “Pemoĩmba opaichagua pende jepyʼapy ipópe haʼe oñangarekógui penderehe” (1 Pedro 5:​7, JMP ). Upeichaite, Jehová ojepyʼapy ñanderehe. Jesús ohechaukavaʼekue mbaʼeichaitépa Itúva oñangareko ñanderehe: “Noñemeʼẽipa mokõi guyraʼi peteĩ pláta saʼimi  rehe? Opáichavo, peteĩnte jepe ndoʼái yvýpe oikuaaʼỹ rehe pende Ru. Peneakãrague peteĩteĩ jepe [oikuaapa]. Aníke aipóramo pekyhyje, peẽ mbaʼeguasueteve heta guyraʼígui” (Mateo 10:​29-31, BNP ).

Jehová ikatu ñanepytyvõ

7. Mbaʼéichapa Jehová ikatu ñanepytyvõ?

⁷ Jehová ñanepytyvõse oimeraẽ mbaʼe jahasávape. “[Ñandejára] ñanemoʼã ha ñanemombarete, haʼe oñangareko ñanderehe jajejopy vai jave” (Salmo 34:​15-18; 46:​2, [46:​1, NM ].) Mbaʼéichapa ñanepytyvõ haʼe? Jahechami mbaʼépa heʼi 1 Corintios 10:​13-pe: “Peẽ ndapehasái jepyʼaraʼã ikatuʼỹva peropuʼaka yvypóraicha. Upéva rangue, pejepyʼaraʼãvo [Ñandejára] ohechaukáne peẽme mbaʼéichapa ikatu pesẽ chugui, ikatu hag̃ua peropuʼaka. Ha ikatu peẽ pejerovia [Ñandejárare], napenderejaichéne hag̃ua, pehasa [jave] jepyʼaraʼã ipohyivéva pe ikatúvagui ojereropuʼaka. [Ñandejára ombohapéta avei peẽme] pesẽ hag̃ua chugui, ikatu hag̃ua peropuʼaka”. Ikatu Jehová oipeʼa upe mbaʼe ñanembohasa asýva térã omeʼẽ ñandéve ipuʼaka ñaaguanta hag̃ua. Tahaʼe haʼeháicha, Jehová ñanepytyvõta.

8. Mbaʼépa jajapovaʼerã Ñandejára ñanepytyvõ hag̃ua?

⁸ Mbaʼépa jajapovaʼerã ikatu hag̃uáicha Ñandejára ñanepytyvõ? Jahechamahaguéicha, apóstol Pedro heʼivaʼekue ‘ñamoĩ hag̃ua Jehová pópe opa mbaʼe ñandepyʼapýva’. Upéva heʼise jahejaha ipópe ñane provléma, anive jajepyʼapyeterei ha ñahaʼarõ Ñandejára tomeʼẽ ñandéve ñaikotevẽva (Mateo 6:​25-32). Heʼise avei jajeroviaha hese ndahaʼéi ñandejehénte. Upearã ñaneumildevaʼerã. Jajapóramo upéicha jahechaukáta ñañemoĩha Ñandejára poguýpe (jaleemína 1 Pedro 5:6). Upéicha rupi jagueropuʼaka porãvéta umi mbaʼe Jehová ohejáva oiko. Jaipotáramo jepe oñesolusiona pyaʼe umi ñane provléma, jajerovia Jehová ohechataha arakaʼépa ha mbaʼéichapa ñanepytyvõta (Salmo 54:7; Isaías 41:10).

9. Mbaʼépa rréi David omoĩvaʼekue Jehová pópe?

⁹ Ñapensami rréi David heʼivaʼekuére Salmo 55:​23-pe [55:​22, NM]: “Ñandejára pópe emoĩ umi mbaʼe ndepyʼapýva ha haʼe oñangarekóta nderehe. Haʼe ndohejamoʼãi oñehundi umi hekojojáva”. Rréi David ohaivaʼekue ko sálmo ohasa asyve jave (Salmo 55:4). Oiméne upéva oiko itaʼýra Absalón opuʼãrõ guare hese ha oisãmbyhy hendaguépe. Opuʼã avei hese Ahitofel, upe kuimbaʼe haʼe ojeroviaha. Ha ani hag̃ua ojuka chupe hikuái, rréi David oho Jerusaléngui (2 Samuel 15:​12-14). David ohasáramo jepe heta mbaʼe ijetuʼúva, osegui ojerovia Jehováre, ha haʼe ndohejareíri chupe.

10. Mbaʼépa jajapovaʼerã oĩ jave ñandejopy asýva?

¹⁰ David ojapohaguéicha, ñande ñañemboʼevaʼerã avei Jehovápe ñamombeʼu hag̃ua chupe opa mbaʼe ñande jopýva. Jahechamína mbaʼépa heʼi ñandéve apóstol Pablo jajapo hag̃ua (jaleemína Filipenses 4:​6, 7). Mbaʼépa jahupytýta ñañemboʼéramo Jehovápe ñande pyʼaite guive? “Ñandejára omeʼẽne [ñandéve] ipyʼaguapy, tuichavéva opa ikatuvaʼerãgui yvypóra ohaʼãrõ. Ha pe pyʼaguapy oñangarekóne [ñandepyʼapy ha ñaneremiandúre], Cristo Jesús rupi”.

11. Mbaʼéichapa pe ‘pyʼaguapy Ñandejára omeʼẽva’ ñanepytyvõta?

¹¹ Oipeʼátapa Ñandejára umi mbaʼe  ñandejopýva ñañemboʼéramo chupe? Ikatu, péro jahechakuaavaʼerã Jehová nameméi ombohovaiha ñane ñemboʼe ñande jaipotaháicha. Ñañemboʼéramo ñanepytyvõta ñaneakãguapy ha ñandepyʼaguapy hag̃ua. Ñandejára ñanembopyʼaguapýta ha oñangarekóta umi mbaʼe ñapensa ha ñañandúvare jahasa asy jave, umi soldádo oñangarekoháicha peteĩ távare ani hag̃ua ojeike pype. Upe ‘pyʼaguapy Ñandejára omeʼẽva’ ñanepytyvõta anive hag̃ua jakyhyje, ñandepyʼamokõi ha ñapensa nosẽporãmoʼãiha voi ñandéve mbaʼeve. Avei ñanepytyvõta ani hag̃ua jajapo oimeraẽ mbaʼe rei ñandepyʼatarovágui (Salmo 145:18).

12. Emoĩmi peteĩ ehémplo ohechaukáva mbaʼéichapa ikatu ñandepyʼaguapy.

¹² Ikatúpa ñandepyʼaguapy ñane provléma hetáramo? Jahechami peteĩ ehémplo ohechaukáva upe jahasavañaína. Peteĩ mbaʼapohápe pe omoakãva personalkuérape otrata vaieterei peteĩ ombaʼapóvape. Peteĩ jey, upe tapicha oñeʼẽ pe patrón ndive, peteĩ kuimbaʼe imbaʼerechakuaa ha ipyʼaporãva. Upe patrón ontende mbaʼéichapa oñeñandu ha heʼi chupe upe omoakãva personalkuérape oñemonguitaha. Mbaʼépa ojapóta upe tapicha? Ohechávo ontendeha chupe upe ipatrón ha oñesolusionataha upe mbaʼe oikóva, osegi ombaʼapo oaguantátaramo jepe heta mbaʼe gueteri. Upéicha avei, ñande jaikuaa Jehová ontendeha umi mbaʼe jahasáva. Heʼi avei ñandéve koʼẽrõitéma ‘ko múndo ruvicha, oñemosẽtaha’ (Juan 12:​31, BNP ). Tuichaitépa ñanembopyʼaguapy upéva!

13. Ñañemboʼe rire, mbaʼépa jajapovaʼerã avei?

¹³ Heʼisépa upéva iporãmaha ñamombeʼúma guive Jehovápe ñaneprovléma? Nahániri, oĩve gueteri jajapovaʼerã. Ñañemboʼe rire, ñañehaʼãvaʼerã jajapo upe jajerurehaguéicha. Rréi Saúl omondórõ guare hembiguaikuéra ojuka hag̃ua Davídpe, David oñemboʼe péicha: “[Ñandejára] ani rehejátei haʼa cherehe opuʼãva pópe, ani rehejátei haʼa hembiapo vaíva poguýpe, ani rehejátei haʼa iñañáva pópe, ani rehejátei haʼa chejukaséva pópe” (Salmo 59:​2, 3 [59:​1, 2, NM ]). Péro David oñemboʼe rire, ohendu avei hembireko heʼíva ha okañy upégui (1 Samuel 19:​11, 12). Ñande ikatu avei jajerure Jehovápe arandu ñambohovái hag̃ua umi mbaʼe ñandejopýva, térã ombovevuive hag̃ua ñandéve umi mbaʼe vai jahasáva (Santiago 1:5).

Mbaʼépa ikatu ñanepytyvõ jagueropuʼaka hag̃ua opa mbaʼe?

14. Mbaʼépa ikatu ñanepytyvõ jagueropuʼaka hag̃ua umi mbaʼe ñanembohasa asýva?

¹⁴ Umi mbaʼe ñanembohasa asýva ikatu ndopái sapyʼaitépe. Upéicha oikóramo, mbaʼépa ikatu ñanepytyvõ jagueropuʼaka hag̃ua? Primero, ñanemanduʼavaʼerã jaservíramo Jehovápe jahasa asýrõ jepe, jahechaukahañaína jahayhuha chupe (Hechos 14:22). Ani ñanderesarái Satanás oñeʼẽ rei hague Job rehe heʼírõ guare Jehovápe: “Ndareíri niko ndéve iñeʼẽrendu opa ára. Nderehejái avavépe opoko hese, hogaguáre ha umi mbaʼereta oguerekóva rehe. Nde rehovasa opa mbaʼe ojapóva, ha haʼe niko hína pe hymba hetavéva tetã tuichakue. Eipeʼamíntena chugui opaite mbaʼe oguerekóva ha rehecháta mbaʼéichapa ojahéi nderehe” (Job 1:​9-11). Upéicharamo jepe, Job nomboykéi Jehovápe ha upéicha ohechauka Satanás ijapuhague. Ha ñande jagueropuʼakáramo umi mbaʼe ñanembohasa asýva, jahechaukáta avei Satanás ijapuetereiha. Ha jajapóramo upéicha, umi mbaʼe ñahaʼarõva ha ñande jerovia imbaretevéta (Santiago 1:4).

15. Máva ehémplopa ikatu ñanemombarete?

¹⁵ Segundo, jahechakuaavaʼerã avei ko ‘Yvy tuichakuére ñane ermanokuéra ohasa asyha hína ñandéicha avei’ (1 Pedro 5:9). Upeichaite, “Umi jepyʼaraʼã oúva [...] ou avei opavave yvypóra ári” (1 Corintios 10:​13, BNP ). Upévare, jajepyʼapyeterei rangue ñane provlémare, jajepyʼamongeta guei umi ehémplo omoĩvare ñane ermanokuéra. Upéicha ñandepyʼaguasúta ha jagueropuʼakáta  opa mbaʼe (1 Tesalonicenses 1:​5-7; Hebreos 12:1). Jaikuaápa peteĩ tapicha ogueropuʼakavaʼekue peteĩ mbaʼe ombohasa asýva chupe? Ñapensami mbaʼépa ikatu ñaaprende upe ehémplogui. Jahekámavapa umi puvlikasiónpe ermanokuéra ohasamavaʼekue umi mbaʼe ñande jahasáva avei? Jaleéramo umíva katuete ñanemombaretevéta jagueropuʼaka hag̃ua opa mbaʼe.

16. Mbaʼéichapa ñanemombarete Ñandejára jagueropuʼaka hag̃ua umi mbaʼe ñanembohasa asýva?

¹⁶ Tercero, ñanepytyvõta avei jagueropuʼaka hag̃ua umi mbaʼe jahasáva ñanemanduʼáramo Jehová haʼeha “ñande Ru oporoporiahuverekóva ha [...] Ñandejára tapia oporokonsoláva. [...] Ñandejára niko ñanekonsola opa umi ñande jepyʼapýpe, ikatu hag̃ua ñande avei ñakonsola umi ojepyʼapývape pe konsuélo [...] Ñandejára omeʼẽva ñandéve rupi” (2 Corintios 1:​3, 4, BNP ). Upeichaite, Jehová oĩ ñande ykére ñanemokyreʼỹ ha ñanemombarete hag̃ua, ndahaʼéi jahasa asy javénte, ñanekonsola avei opa umi mbaʼe ñande pyʼapývape. Upéva ñanepytyvõ ñakonsola hag̃ua ñande rapichakuérape oĩva ‘opaichagua jehasa asýpe’. Apóstol Pablo ohaivaʼekue koʼã ñeʼẽ haʼe voi ohasapyrégui koʼã mbaʼe (2 Corintios 4:​8, 9; 11:​23-27).

17. Mbaʼéichapa la Biblia ikatu ñanepytyvõ ñambohovái hag̃ua umi provléma jahasáva?

¹⁷ Cuarto, jareko Ñandejára Ñeʼẽ la Biblia, “[iporãva] ñamboʼe ha ñañemoñeʼẽ hag̃ua ñande rapichápe, japorohekomboʼe ha ñaporomoarandu hag̃ua hekopete. Upéicharõ, pe [Ñandejárape] omombaʼeguasúva noikotevẽmoʼãi mbaʼeve ojapo hag̃ua opa mbaʼe iporãva” (2 Timoteo 3:​16, 17). La Biblia ñanepytyvõ ñambohovái hag̃ua opa mbaʼe ñendepyʼapýva, upéicha rupi ‘nañaikotevẽmoʼãi mbaʼeve jajapo hag̃ua opa mbaʼe iporãva’. Upe ñeʼẽ ojetradusíva griégogui jajuhúva ko teýstope, heʼise ‘pe tapicha oĩmbaitemaha ojapo hag̃uáicha opa mbaʼe iporãva’. Yma, upe ñeʼẽ ojeporu oñeñeʼẽ hag̃ua peteĩ várko orekopámava opa mbaʼe osẽ hag̃uáicha, térã peteĩ mákina oĩmavare ombaʼapo hag̃uáicha. Upéicha avei, Jehová omeʼẽ ñandéve Iñeʼẽ rupive umi mbaʼe ñaikotevẽva ñambohovái hag̃ua opa mbaʼe oĩva ñande raperãme. Upévare ikatu jaʼe: “Ñandejárama niko oheja ahasa koʼã mbaʼe, katuete aaguantáta, chepytyvõmantevaʼerã”.

Jehová oipeʼapaitéta opa mbaʼe ñandepyʼapýva

18. Mbaʼérepa ñanemanduʼa meme vaʼerã ñaaguanta hag̃ua opa mbaʼe?

¹⁸ Ha cincoha, ñanepytyvõta avei ko mbaʼe: ñanemanduʼa meme vaʼerã Jehová oipeʼapataha opa mbaʼe ñandepyʼapýva (Salmo 34:19;  37:​9-11; 2 Pedro 2:9). Péro ndoipeʼamoʼãi ñandehegui umi mbaʼe koʼág̃a jahasávante, omeʼẽta avei ñandéve jeikove opaveʼỹva, ko Yvy ape ári térã yvágape Jesucristo ndive.

19. Mbaʼépa jajapovaʼerã jagueropuʼaka hag̃ua umi mbaʼe jahasáva?

¹⁹ Ñahaʼarõite ningo pe ára ndaiporimoʼãveimahápe ohasa asýva! (Salmo 55:​6-8.) Ha og̃uahẽ meve upe ára ñaaguantavaʼerã. Jajapóramo upéicha, jahechaukáta Satanás ijapuetereiha. Ñañemboʼe meme ha jajepyʼamongetavaʼerã umi ehémplo omoĩvare ñane ermanokuéra ohasa asýva ñandéicha, upéicharõ jagueropuʼakáta opa mbaʼe. Jastudia Ñandejára Ñeʼẽ ikatu hag̃uáicha jajapo opa mbaʼe Ñandejára oipotáva. Ha aníkena ñanderesarái ‘Ñandejára ñanekonsolataha’ ha oñangarekotaha ñanderehe. Ñanemanduʼa memékena: “Ñandejára oñangareko umi ijoheipyréva rehe, ha ohendu umíva ñemboʼe” (Salmo 34:16 [34:​15, NM ]).

Ñambohovaimi koʼã porandu

• Mbaʼéichapa oñeñandu David ombohováirõ guare umi mbaʼe ijetuʼuetereíva?

• Mbaʼe rehépa ojeroviavaʼekue rréi Salomón?

• Mbaʼépa ñanepytyvõta jagueropuʼaka hag̃ua umi mbaʼe Jehová ohejáva jahasa?

[Porandu ñahesaʼỹijóva]

[Nóta oĩva taʼanga ndive páhina 17]

Rréi Salomón oikuaa porã vaʼekue Jehová oipytyvõtaha hembiguaikuéra ohasa asývape

[Nóta oĩva taʼanga ndive páhina 19]

David ndahaʼéi oñemboʼénteva Jehovápe omombeʼu hag̃ua chupe ojopýva, oñehaʼã avei ojapo ojerurehaguéicha