OJAPÓMA dos mil áño rupi omanohague peteĩ kuimbaʼe ipyʼaporãva ikatu hag̃uáicha heta tapicha ojesalva. Upéva oikovaʼekue umi hudío Pascua jave áño 33-pe. Mávarepa ñañeʼẽñaína? Jesús de Nazaret rehe. Ha máva rehehápepa ojaporakaʼe upéva? Entéro yvypóra rehehápe. La Bíbliape oĩ peteĩ téysto heʼíva: ‘Ñandejára ohayhuetereígui opa yvypórape, omeʼẽvaʼekue Itaʼýra peteĩete, ani hag̃ua omano umi hese ojeroviáva, oikove hag̃ua uvei opa ára g̃uarã’ (Juan 3:16).

Heta ñande rapicha ningo oikuaa ko téysto heʼíva, péro saʼi oĩ ontendéva mbaʼépa heʼise. Upévare oñeporandu hikuái: “Mbaʼérepa ñaikotevẽ Jesucristo sakrifísiore? Mbaʼéichapa peteĩ kuimbaʼe omanohaguére ikatu osalva yvyporakuérape ani hag̃ua omano ha oñehundiete?”. Jahechami mbaʼéichapa la Biblia omyesakã koʼã mbaʼe.

Oĩ oimoʼãva sapyʼamínte voi jaikovaʼerãha ko Yvy ape ári. Jahasa hag̃ua heta mbaʼe vai, javyʼaʼimi ha upéi ñamano jaha hag̃ua jaiko porãve hag̃uáme. Oimoʼã hikuái Ñandejára ojapohague yvypórape sapyʼamínte oikove hag̃ua ha upéi omano. Péro la Biblia ohechauka ndahaʼeiha upévare ñamanóva. Heʼi katu: “Pe pekádo oikehaguéicha Yvy ári peteĩ kuimbaʼe rupi, ha pekádo rupi oike pe ñemano, upéicha avei pe ñemano ohasa opavavépe opavave opekágui” (Romanos 5:​12, BNP). Koʼápe jahechakuaa ñamanoha japekahaguére, ha “peteĩ kuimbaʼe” oguerova mbaʼasýicha opavavére ko mbaʼe vaiete. Ha máva piko rakaʼe upe kuimbaʼe?

The World Book Encyclopedia omombeʼu heta sientífiko ogueroviaha yvyporakuéra ypykue peteĩnteha, ha la Biblia heʼi mávapa upe “kuimbaʼe”. Génesis 1:27 heʼi kóicha: ‘Ñandejára ojapo yvypóra, haʼéicha, ojoguáva chupe ojapo, kuimbaʼe ha kuñáva ojapo’. Ha pe kuña ha kuimbaʼe ypykue iporãiterei vaʼekue Ñandejára rembiapokue apytépe.

Génesis omombeʼúva ohechauka ñandéve mbaʼéichapa oiko porã vaʼerãmoʼã yvyporakuéra. Upépe oñemombeʼu mbaʼéichapa ojejaporakaʼe pe kuimbaʼe ypykuépe, ha ni peteĩ hendápe Ñandejára ndeʼíri omanovaʼerãha. Péro upe riréma, heʼi pe kuimbaʼe ypykuépe naiñeʼẽrendúiramo omanotaha (Génesis 2:​16, 17). Haʼe oipotavaʼekue yvyporakuéra oiko opa ára g̃uarã peteĩ hardín neporãvape, vyʼapópe ha tesãime. Ndoipotaivaʼekue ituja térã ig̃uaig̃ui hikuái ha upéi omano. Upéicharõ, mbaʼére piko enterove yvypóra omano?

Génesis kapítulo 3-pe oñemombeʼu ñande sy ha ñande ru ypykue naiñeʼẽrenduihague Ijapohare Jehovápe. Upévare, Ñandejára ojapo heʼihaguéicha chupekuéra. Heʼi pe kuimbaʼépe: “Ndéko hína yvýgui guarénte ha yvýpe jevy repavaʼerã” (Génesis 3:19). Ñandejára heʼimahaguéicha, umi mokõive yvypóra naiñeʼẽrenduihaguére omanovaʼekue.

Péro pe kuimbaʼe ha kuña ypykue rembiapo vaikue ohupyty enterovépe. Naiñeʼẽrendúi rupi hikuái ifamiliakuéra ndaikatuvéima ohupyty umi mbaʼe porã orekovaʼekue  haʼekuéra iñepyrũme. Jehová ningo imanduʼamavaʼekue yvyporakuéra neʼirãvare onase heʼírõ guare Adán ha Évape: ‘Pende raʼýkena, taheta taisarambi Yvy tuichakue ha toguereko ipoguýpe pira, guyra, mymbakuéra ha opaichagua yvýre otyryrýva’ (Génesis 1:28). Ifamiliakuéra ningo omyenyhẽvaʼerã ko Yvy ha oiko vyʼápe opa ára g̃uarã. Péro “peteĩ kuimbaʼe”, Adán omoĩmbaite opavavépe pekádo poguýpe ha upéicha rupi ñamano. Apóstol Pablo ningo Adán familiare avei, haʼe ohaivaʼekue: ‘Che ningo yvypóra, imeʼẽmbyre pekádo rembiguairã’ (Romanos 7:​14, BNP).

Umi hénte tieʼỹ ombyaiháicha umi kuádro iporãiterei ha hepyetereíva, Adán opekárõ guare ombyai avei Ñandejára rembiapokue iporãitéva, haʼéva yvyporakuéra. Adán raʼykuéra ifamiliavaʼekue avei, upéi iniéto, ha upéicha oho hese hikuái. Yvyporakuéra ningo onase, okakuaa, ifamília ha omano. Ha mbaʼérepa oñemanovaʼerã? Enterove Adán familiare rupi. La Biblia heʼi: “Peteĩ kuimbaʼe rembiapo vai rupi niko heta omano” (Romanos 5:​15, BNP). Péicha Adán otraisiona ifamíliape, ha ñande ningo ifamiliare avei hína. Upévare ñande jajapose mbaʼe vai, ñanderasy, ñandetuja térã ñaneg̃uaig̃ui, ha ñamano.

Apóstol Pablo ningo ohaivaʼekue peteĩ kárta umi Romayguápe, ha heʼi chupekuéra mbaʼéichapa oĩ yvypóra imperfékto ha mbaʼéichapa nañandepuʼakái pe mbaʼe vai apóre. Heʼi voi: “Aichejáranga che! Mávapa chepeʼáne pe mano puʼaka, che retépe oĩvagui?”. Peichaite ningo ajépa. Mávapa ikatu ñandesalva ñandéve ha Páblope avei pekádo ha ñemanógui? Apóstol Pablo voi omombeʼu ñandéve mávapa heʼívo: ‘Aagradese Ñandejárape Jesucristo rupi’ (Romanos 7:​14-25). Péicha hína, ñande Apohare omoĩ tekotevẽva ñandesalva hag̃ua Itaʼýra Jesucristo rupive.

Jesús voi omombeʼu mbaʼépa ojapo osalva hag̃ua yvyporakuérape pekádo poguýgui. Heʼi ouhague ‘omeʼẽvo hekove onohẽ hag̃ua hetápe ivaívagui’ (Mateo 20:28). Mbaʼérepa Jesús omanohaguére ñanderehehápe ikatu ñandesalva? Mbaʼeichagua mbaʼe porãpa jahupyty upévare?

La Biblia omombeʼu mbaʼeichagua kuimbaʼépa rakaʼe Jesús. Heʼi hese ‘ndopekaihague’ ha ‘ndojeheʼaihague pekadorkuérare’. Oikove aja entéro iñeʼẽrendu Ñandejárape (Hebreos 4:15; 7:26). Upéicharõ, Jesús ndahaʼeivaʼekue omanóva naiñeʼẽrenduihaguére. Adán katu omano, opeka ha naiñeʼẽrenduihaguére (Ezequiel 18:4). Jesús katu omano ojapo hag̃ua Itúva rembipota ha osalva yvyporakuérape pekádo ha ñemanógui. Jahechamahaguéicha, haʼe igústope porã ou ‘omeʼẽvo hekove onohẽ hag̃ua hetápe ivaívagui’. Ñanderayhueterei rupi, Jesús “omano ñanderehehápe” (Hebreos 2:9).

Jesús ha Adán rekove peteĩcha vaʼekue, péro upéva Adán opeka mboyve. Mbaʼépa oikóraʼe Jesús omanohaguére? Haʼe omeʼẽ hekove Jehovápe sakrifísioramo “opavave ñasẽ hag̃ua jejopy vaígui” (1 Timoteo 2:6). Upeichaite, Ñandejára oiporu Jesús rekove ñandesalva hag̃ua térã ñaneguenohẽ hag̃ua pekádo ha ñemano poguýgui.

La Biblia oñeʼẽ jey jey ko mbaʼe Ñandejára ojapovaʼekuére ñanderayhúgui. Upéva jahechakuaa apóstol Pablo heʼírõ guare umi kristianokuérape: ‘Ñandejára ohepymeʼẽvaʼekue penderehe’ (1 Corintios 6:20; 7:23). Apóstol Pedro ohaivaʼekue avei Ñandejára oiporuhague Itaʼýra ruguy ñandepeʼa hag̃ua ñemano poguýgui, ha ndahaʼéi óro térã pláta oiporuvaʼekue upearã (1 Pedro 1:​18, 19). Jesucristo sakrifísio rupive, Jehová omoĩ oñekotevẽva osalva hag̃ua yvyporakuérape.

Apóstol Juan oñeʼẽvaʼekue umi mbaʼe porã jahupytývare Jesucristo sakrifísio rupive: “[Jesucristo] omanovaʼekue ojeheja rei hag̃ua ñandéve ñane rembiapo vaikue, ha ndahaʼéi ñandévente, opa yvypórape avei” (1 Juan 2:2).  Upéicha ohechauka pe sakrifísio ojejapohague opavave rehehápe. Upéicharõ, heʼisépa upéva opavave jajesalvatanteha voi? Nahániri. Ñanemanduʼami jeýnte pe aksidénte ñañeʼẽvaʼekuére pe artíkulo jahasavaʼekuépe. Umi kuimbaʼe oipytyvõ hag̃ua umi mínape ombaʼapóvape omboguejýkuri peteĩ háula, péro haʼekuérama peteĩteĩ ojupivaʼerã pype. Upéicha avei, jaipotáramo ñanepytyvõ Jesús sakrifísio, ndahaʼéi ñahaʼarõntantemava Ñandejára omeʼẽ ñandéve heta mbaʼe porã. Ñañehaʼãmantevaʼerã.

Mbaʼépa oipota Ñandejára jajapo? Juan 3:36 heʼi: ‘Pe ojeroviáva Taʼýrare oikovéne opa ára. Pe ojeroviaseʼỹva hese katu ndoikovemoʼãi. Ha Ñandejára kastígo ipohýine chupe’. Upéicharõ Ñandejára oipota jajerovia Jesucristo sakrifísiore. Péro ndahaʼéi upévante jajapovaʼerã: ‘Pemaʼẽna mbaʼépepa jaikuaáta jaikuaaha Jesúspe: Ñaneñeʼẽrendúramo chupe’ (1 Juan 2:​3, JMP). Péicha jahecha jajei hag̃ua pekádo ha ñemano poguýgui, jajeroviavaʼerãha Jesucristo sakrifísiore ha ñaneñeʼẽrenduvaʼerãha chupe.

Ñande ningo ikatu hína jahechauka jajeroviaha Jesús sakrifísiore oipotahaguéicha ñanemanduʼáramo haʼe omanohague ñanderehehápe. Omano mboyve Jesús ojapo peteĩ séna ijapostolkuéra ndive, ha heʼi chupekuéra: “Pejapo kóva penemanduʼávo cherehe” (Lucas 22:19). Testigos de Jehová ojapo upéicha omombaʼeterei rupi Jesucrístope. Ko áñope, pe Conmemoración ojejapótava ñanemanduʼa hag̃ua Jesucristo omanohague ñanderehehápe, hoʼáta ág̃a sábado 22 de marzo, Kuarahy oike rire. Roipotaiténingo rehomi ko rreunión iñimportantetévape, rejapo hag̃ua avei Jesucristo ojerurevaʼekue. Oimeraẽ testigo de Jehová heʼíta ndéve mbaʼe óra ha moõitépa ojejapotahína. Upépe oñemombeʼuvéta ndéve mbaʼépa rejapovaʼerã Jesucristo sakrifísio ndepeʼa hag̃ua pekádo poguýgui.

Ndahetáiningo oĩ omombaʼe añetéva pe sakrifísio ojapovaʼekue ñande Apohare ha Itaʼýra ñandesalva hag̃ua. Upéicharamo jepe, umi ojeroviáva hese ovyʼa. Upéva jahecha apóstol Pedro heʼivaʼekuére umi kristiánope: ‘Peẽ pejerovia Jesús rehe, ha pendevyʼa tuichaitereígui, ndaikatúi pemombeʼupa. Péicha pende jerovia penerenohẽ jejopy vaígui’ (1 Pedro 1:​8, 9). Reñehaʼãramo rehayhu Jesucrístope ha rejerovia isakrifísiore, revyʼáta koʼág̃a ha ikatúta rejesalva pekádo ha ñemano poguýgui.