PETEĨ mína de karvón opytáva Pittsburgh ypýpe (Pensilvania, EE.UU.), peteĩ tesapirĩme ojagarrapaitémi y. Nueve tapicha ombaʼapóva upépe opyta yvyguýpe 73 metrohápe. Tres día haguépe osẽ hikuái, ha mbaʼevete ndojehuimi chupekuéra. Mbaʼéichapa ojesalváraʼe chupekuéra?

Umi osalvátava chupekuéra oiporu pe mína rehegua mápa ha sistema de posicionamiento global (GPS) ojoʼo hag̃ua ohupyty peve umi kuimbaʼe oĩha, ha omboguejy hikuái upérupi peteĩ háula peteĩteĩ oguenohẽ hag̃ua chupekuéra upévape. Ha upéicha ojesalva hikuái. Haʼekuéra ningo ovyʼaiterei ha oagradese ojesalvahaguére chupekuéra.

Ñande ningo hasy nunga japyta hag̃ua yvyguýpe umi kuimbaʼéicha, térã ñamano hag̃ua peteĩ ama guasúpe térã yvytu atãme mbaʼe. Upéicharõ jepe ñaikotevẽ peteĩ ñandesalvavaʼerã. Ñande ningo ñanderasy, ñandetuja térã ñaneg̃uaig̃ui, ha ipahápe ñamano, ha koʼã mbaʼégui ndaikatúi jajei ñandejehegui rei. Upévare Job heʼivaʼekue: “Ore yvypóra ore rekove mbyky ha orerenyhẽ jepyʼapýgui. Yvotýicha rojera ha upe rire orepiru, rohasa ha ropa rei kuarahyʼãicha” (Job 14:​1, 2). Koʼág̃a, tres mil quinientos áño rupíma upéva heʼihague, ha oiko gueteri haʼe heʼihaguéicha. Ñande ningo ñandejeheguínte ndaikatúi jajei pe ñemanógui. Jaiko jaikohápe ha ñañeñangareko porãramo jepe, enterove ñaikotevẽ jajesalva jehasa asy ha ñemanógui.

Umi sientífiko ha avei heta tapicha oheka mbaʼéichapa ikatu ojeiko areve. Peteĩ organisasión heʼi ombaʼapoha “anive hag̃ua oñemano reiete” ha “oipytyvõ ihentekuérape ohecha hag̃ua mbaʼépa ikatu ojapo ani hag̃ua omano”. Péro, koʼág̃a peve umi sientífiko ha umi oikove areséva oñehaʼãmbaitéramo jepe, oñemanóma 70 térã 80 áñope ha ojapóma tres mil quinientos áño rupi Moisés heʼimahague voi upéicha (Salmo 90:10).

Ha nañapensáiramo jepe Job opensahaguéicha ñande rekove rehe, ñandetujáta avei ha ‘japa rei kuarahyʼãicha’. Jahejáta ñane amigokuéra, ñane família, ñande róga ha opa mbaʼe jahupytyvaʼekue ñande rekovépe. Heʼihaguéicha pe rréi Salomón: “Oikovéva oikuaa omanovaʼerãha, omanóva katu ndoikuaái mbaʼeve ha ndaipóri mbaʼeve iporã vaʼerã chupekuéra, ojeitýgui tesaráipe” (Eclesiastés 9:5).

Ñambyasýramo jepe, la Bíbliape heʼiháicha pe ñemano ñanderereko ipoguýpe. Péicha jahecha enterovete ñaikotevẽhañaína jajesalva pe ñemanógui (Romanos 5:14; 1 Corintios 15:26). Umi tapicha ikatupyryvéva ko múndope jepe ndaikatúi ñandesalva opa mbaʼégui. Péro, ñande Apohare Jehová ñandesalváta.