Armagedón—Ñandejára ñorairõ guasu oipeʼaitétava opaichagua ñorairõ

“Ivaieterei chupekuéra g̃uarã pe jejuka. Ndoikuaái hikuái mbaʼérepa oiko umi gérra, ha ombojeguarueterei voi chupekuéra. Upévare pe ñeʼẽ gérra ndaipóri iñidiomapekuéra.” (UPÉICHA HEʼI FRIDTJOF NANSEN UMI INUIT GROENLÁNDIAPE OIKÓVA REHE [1888]).

MÁVA piko ndoikosemoʼãi umi péicha opensáva apytépe? Máva piko ndoikosemoʼãi peteĩ múndo ndojekuaaihápe voi pe ñeʼẽ gérra? Hasyeterei ningo jajuhu hag̃ua ãichagua lugár, ha koʼýte hasyvéta ñahaʼarõramo yvypóragui koʼã mbaʼe.

Péro la Bíbliape Ñandejára voi heʼi ojapotaha upéva. Heʼi umi espádagui ojejapotaha arádo ha kóga kytĩha, ha noñorairõmoʼãveimaha umi tetãnguéra (Isaías 2:4).

Koʼág̃a 20.000.000 soldádo rupi oĩ oñorairõ hag̃uáicha ha oikohína veinte gérra rupi. Upévare heta mbaʼe gueteri ojejapovaʼerã oñekumpli hag̃ua pe promésa. Ndareíriningo Jehová ohusgáta yvypórape ha osolusionáta umi provléma orekóva oñondive. Ko mbaʼe Ñandejára ojapótava yvyporakuérare opáta Armagedónpe, heʼiháicha la Biblia (Apocalipsis [Revelación] 16:​14, 16).

Koʼág̃a rupi oñeñeʼẽvo Armagedón rehe, ojeʼehína oikotaha peteĩ desástre nuclear opárupi ko Yvy ape ári. Upéicharõ jepe pe Enciclopedia Hispánica heʼi Armagedón rehe: ‘Peteĩ lugár oñembyatytahápe opa mbaʼe porã ha opa mbaʼe vai omoñepyrũ hag̃ua Ñandejára ipuʼakapáva ñorairõ guasu’. Opaiténepa opaichagua mbaʼe vai, térãpa ojeʼe reínte oikotaha pe ñorairõ guasu?

Ñandepyʼaguapy jaikuaávo la Biblia heʼi jey jeyha oñehundietetaha opa mbaʼe vai. Sálmope heʼi: ‘Oñehundipáta umi tekove ñaña oikóva guive ko Yvy apére ha omanombáta umi heko vaíva’ (Salmo 104:​35, ÑÑB). Ha Proverbios katu heʼi: “Hekojojávamante oikóne ko Yvy ape ári, ijoheipyrévamante hendáne ipype. Iñañáva katu oñehundipáne, ojehapoʼóne ko Yvýgui” (Proverbios 2:​21, 22).

La Biblia omyesakã porã avei umi heko añáva ndohejamoʼãiha hembiapo vai péicha reínte. Upévare tekotevẽ Ñandejára ohundiete opaichagua mbaʼe vai, umíva apytépe umi  ñorairõ (Salmo 2:2). Jahechataháicha, iñimportantehína ko ñorairõ ijojahaʼỹva, la Biblia ohenóiva Armagedón.

Umi ñorairõ oikovaʼekue Meguidó ypýpe

Armagedón ou pe ñeʼẽ heʼisévagui “montaña de Meguidó”. Oĩningo peteĩ siuda hérava Meguidó, orekóva peteĩ ñu ojekuaáva llanura (o valle) de Jezreel ramo. Upépe heta oñeñorairõvaʼekue. Eric H. Cline heʼi peteĩ lívro ohaivaʼekuépe, hérava The Battles of Armageddon (Umi ñorairõ Armagedón rehegua): “Heta áño oñeñorairõvaʼekue Meguidó ha Jezreélpe. Ha upéicha rupi heta mbaʼe ojedesivaʼekue”.

Heʼihaguéicha Eric H. Cline, umi ñorairõ ojejapovaʼekue Meguidó ypýpe iñimportantevaʼekue. Umi soldádo Mongoliaygua ojagarravaʼekue heta párte Asia síglo XIII-pe. Péro operde ñepyrũ hikuái Jezreélpe. Ha umi soldádo Gran Bretañaygua katu, oĩva pe mburuvicha Edmund Allenby poguýpe, ogana umi túrkope Meguidó ypýpe primera guerra mundial aja. Peteĩ militár heʼi Allenby ogana rupi ojedesidihague heta mbaʼe iñimportantetereíva.

La Biblia omombeʼu avei oñeñorairõhague Meguidó ypýpe. Umíva apytépe, Barac oganavaʼekue upépe umi soldádo Canaanguápe, oĩvaʼekue Sísara poguýpe (Jueces 4:​14-16; 5:​19-21). Gedeón avei, 300 kuimbaʼe reheve ohundi Meguidó ypýpe umi madianítape (Jueces 7:​19-22). Rréi Saúl ha itaʼýra Jonatán katu omanovaʼekue pe sérro Guilboa ypýpe, opytáva Kuarahy resẽ gotyo Jezreélpe. Upérõ umi filistéo ogana isrraelitakuérape (1 Samuel 31:​1-7).

Ha opyta porãiterei haguére, Meguidó ha Jezreel ñúme oñeñorairõ meme vaʼekue umi cuatro mil áño ohasavaʼekuépe. Peteĩ istoriadór oipapa 34 ñorairõ rupi upépe oikovaʼekue.

Heta mbaʼe oikovaʼekue Meguidópe. Avei pe lugár opyta porã oñeñorairõ hag̃ua. Upévare jaikuaáma koʼág̃a mbaʼéicha rupípa ojeporu pe ñeʼẽ Armagedón. Ko ñeʼẽ Armagedón peteĩ téystopente ojeporu la Bíbliape ha ojetopa Apocalípsispe. Upéicharõ jepe, jahecháramo  mbaʼépa heʼive la Biblia Armagedón rehe, hesakã porãiterei ohupytytaha opavave tapichápe.

Mbaʼépa heʼi Ñandejára Ñeʼẽ Armagedón rehe

Iñimportánteramo jepe umi ñorairõ oikovaʼekue Meguidópe, ni peteĩ ndoipeʼaivaʼekue opa mbaʼe vai. Ndoikóiva gueteri peteĩ ñorairõ opuʼãhápe ojuehe umi mbaʼe porã ha umi mbaʼe vai. Jaikuaa porã ningo upeichagua ñorairõ Ñandejára mante ikatuha omoñepyrũ, haʼémanteko ojapo opa mbaʼe porã. Heʼihaguéicha Jesús, ‘ndaipóri imarangatúva, Ñandejára añoite mante’ (Lucas 18:​19, BNP). La Biblia heʼi avei Armagedón Ñandejára ñorairõ guasuha.

Apocalipsis heʼi: ‘Ha osẽ ombyaty hag̃ua opa umi Yvy arigua mburuvichakuérape oñorairõ hag̃ua Ñandejára ipuʼakapáva ára guasúpe’ (Apocalipsis [Revelación] 16:​14, BNP]). Upe rire heʼi ombyatytaha chupekuéra ‘pe lugár evréo ñeʼẽme héravape Har–​Magedón térã Armagedón’ (Apocalipsis [Revelación] 16:​16, BNP). Jaleevéramo heʼi avei ‘umi Yvy arigua mburuvichakuéra ijehersitokuéra reheve oñembyatytaha oñorairõ hag̃ua upe oguapýva ndive kavaju ári, ha ijehersitokuéra ndive’ (Apocalipsis [Revelación] 19:​19, BNP). Ko kavaju arigua ningo Jesucristo (1 Timoteo 6:​14, 15; Revelación 19:​11, 12, 16).

Mbaʼépa ikatu jaʼe jaleepa rire koʼã téysto? Hesakã porãiterei ningo Armagedónpe Ñandejára oñorairõtaha umi naiñeʼẽrendúiva ndive. Mbaʼérepa Jehová ha Itaʼýra Jesucristo omoñepyrũta ko ñorairõ? ‘Ohundipa hag̃ua umi ombyaívape ko Yvy’ (Apocalipsis [Revelación] 11:​18, BNP). Upéva rupi oĩta avei pyʼaguapy ko Yvy ape ári. Oĩta ‘yvága pyahu ha Yvy pyahu Ñandejára heʼihaguéicha ha upépe katu opa mbaʼe ipotĩ ha imarangatuvaʼerã’ (2 Pedro 3:​13, BNP).

 Maʼerãpa oikovaʼerã Armagedón?

Hasýpa ñandéve ñantende hag̃ua mbaʼérepa Jehová, pe ‘mborayhu Jára’, omoĩta Itaʼýrape, pe “Mburuvicha guasu pyʼaguapy reruha” oñorairõ hag̃ua? (2 Corintios 13:11; Isaías 9: 5; [9: 6 NM].) Ñantende hag̃ua tekotevẽ jaikuaa mbaʼépa omomýi Ñandejárape ojapo hag̃ua heta mbaʼe. Mbaʼérepa Jesús oñorairõ? Sálmope oñehenói chupe peteĩ gerréro oikóva kavaju ári ha heʼi ‘oñorairõha añeteguáre ha omeʼẽha imbaʼéva imboriahúvape’. Péva heʼisehína oñorairõha ohayhúgui pe tekojoja ha ndaijaʼéigui opa mbaʼe vaíre (Salmo 45:​5, 8; [45: 4, 7 NM]).

Ha mbaʼépa heʼi Ñandejára Jehová ndaiporihaguére tekojoja koʼág̃a rupi? Proféta Isaías heʼi: “Ñandejára ipochy ohechávo ndaiporiha tekojoja”. Ha ipochyeterei rupi, la Biblia heʼi oñemondeha peteĩ soldádoicha ha omoĩha tekojoja ipytiʼa moʼãháramo ha iñakã moʼãháramo katu pe salvasión. Heʼi avei omondeha ijehe pe vengánsa ha oñeñuãha pochýpe (Isaías 59:​15, 17).

Oĩ aja umi mburuvicha ojapo meméva ivaíva, umi hekojojáva ndaipyʼaguapymoʼãi ha okyhyjeháre oikóta (Proverbios 29:2; Eclesiastés 8:9). Ñapensa porãramo, hasy opa hag̃ua umi mbaʼe vai oĩramo yvypóra hembiapo vaíva. Upévare ikatu hag̃uáicha oĩ pyʼaguapy ha tekojoja opaveʼỹva, oñehundivaʼerã umi heko añávape. Salomón heʼi ojepeʼataha umi heko añáva ha umi heko potĩva opytataha hendaguépe (Proverbios 21:18).

Ñandejára ningo peteĩ Hués, upévare jaikuaa porã umi mbaʼe ojapótava umi heko añáva rehe, oĩ porãtaha katuete. Upévare Abrahán oporanduvaʼekue: “Ko Yvy tuichakue Hués piko ndojapomoʼãi hekoitepegua?”. Ha haʼete voi ohechakuaa Jehová akóinte ojapoha iporãva (Génesis 18:​25, ÑÑM). La Biblia heʼi avei Jehovápe nombovyʼaiha peteĩ tapicha heko añáva omanóvo. Ha naipohãvéiramo añoite ohundi umichaguápe (Ezequiel 18:32; 2 Pedro 3:9).

Aníkena ñaimoʼã ko mbaʼe vyroreiha

Máva ládopepa ñaiméta pe ñorairõ guasúpe? Pyaʼe porã ikatu jaʼe ñande ñaimeha umi mbaʼe porã ládope. Péro mbaʼéichapa ikatu jaikuaa porã upeichaha? Sofonías heʼi ñanderekojoja ha ñanemansovaʼerãha (Sofonías 2:3). Ñandejára “ningo oipota opavave ojesalva ha toikuaa pe añetegua”, heʼi apóstol Pablo (1 Timoteo 2:​4, ÑÑB).

Jajesalva hag̃ua, primero jaikuaavaʼerã Jehovápe ha mbaʼépa ojapotahína oipeʼa hag̃ua opa mbaʼe vai ko Yvy ape árigui. Segundo katu ñanderekojojavaʼerã, upéicharõ Ñandejára ñandeguerohorýta ha oñangarekóta ñanderehe.

Jajapóramo koʼã mbaʼe iñimportánteva, ikatúma vyʼápe ñahaʼarõ pe ñorairõ guasu oipeʼaitétava opaichagua ñorairõ: Armagedón. Ha Armagedón opa rire katu, entéro yvypóra jaʼéta ndajaikuaaiha mbaʼépa pe ñorairõ ha ñanembojeguarúta. Avavéma “noñembosakoʼimoʼãvéi ñorairõrã” (Isaías 2:4).

[Komentário oĩva páhina 5-pe]

Armagedón heʼise Ñandejára oñorairõtaha umi naiñeʼẽrendúiva ndive

[Nóta oĩva taʼanga ndive páhina 6]

Meguidó

[Nóta oĩva taʼanga ndive páhina 6]

Gedeón ha iñirũnguéra ogana peteĩ ñorairõ iñimportánteva Meguidó ypýpe

[Nóta oĩva taʼanga ndive páhina 6 ha 7]

Armagedón opa rire, entéro yvypóra jaʼéta ndajaikuaaiha mbaʼépa pe ñorairõ ha ñanembojeguarúta

[Nóta oĩva taʼanga ndive páhina 8]

Jajesalva hag̃ua, jaikuaa raẽ vaʼerã Jehovápe ha mbaʼépa ojapóta