Jaheja Ñandejára tañanesãmbyhy opa mbaʼe jajapóvape

“[Jehová] toiko ore Jára teéramo opa árape g̃uarã, Haʼe ñanesãmbyhyvaʼerã [...] ñamano [meve].” (SALMO 48:​14, ÑÑB.)

1, 2. Mbaʼérepa jahejavaʼerã Jehová ñanesãmbyhy jajerovia rangue ñandejehe, ha mbaʼe mbaʼépa ñambohováita ko artíkulope?

 NDAHASYIETÉPA jajapo hag̃ua umi mbaʼe ovaleʼỹva térã vyroreíva ha upéicha ñañembotavy ñandejupe voi (Proverbios 12:11.) Jajaposéramo peteĩ mbaʼe naiporãiva, ñanekorasõ ikatu ñanembotavy ha ojapouka ñandéve upéva (Jeremías 17:​5, 9). Upévare, pe salmísta ojerure Jehovápe: “Ehesape ha emyesakã chéve cheraperã” (Salmo 43:3). Haʼe ojeroviavaʼekue Jehováre, ndahaʼéi ijehénte, ha upéva ojapo porãiterei hese. Ñande avei jajapo porãta jajeruréramo Ñandejárape tañanesãmbyhy.

² Mbaʼérepa jajeroviavaʼerã Ñandejára ñanesãmbyhy porãvetaha? Mbaʼéicha javépa jajapovaʼerã upéva? Mbaʼépa ñanepytyvõta ñaneñeʼẽrendu hag̃ua chupe? Mbaʼéichapa ñanesãmbyhy Jehová? Ko artíkulope ñambohováita koʼã porandu.

Mbaʼérepa jajeroviakuaa Jehová ñanesãmbyhy porãvetaha?

3-5. Mbaʼérepa jajeroviaiterei Jehová ñanesãmbyhy porãtaha?

³ Jehová ningo ñande Ru yvagapegua (1 Corintios 8:6). Haʼe ñandekuaa porãiterei ha ikatu ohecha opa mbaʼe, ñande pyʼapýpe oĩva jepe (1 Samuel 16:7; Proverbios 21:2). Pe rréi David heʼivaʼekue Jehovápe: “Nde reikuaa aguapy ha apuʼãrõ, mombyry guive reikuaa upe che akãme arekóva. Ñeʼẽ neʼírã gueteri osẽ che jurúgui, ha nde, che Jára, reikuaáma upe haʼetavahína” (Salmo 139:​2, 4). Ñandejára ningo ñandekuaa porãiterei, ha upévare katuete oikuaa mbaʼépa iporãvéta ñandéve g̃uarã. Péro ndahaʼéi upéva añónte: oikuaapaite voi opa mbaʼe oĩva. Mbaʼeve nokañýi chugui. Ndaipóri kuimbaʼe ohupytýva chupe arandúpe. Ha oikuaa avei opa mbaʼe iñepyrũ guive (Isaías 46:​9-11; Romanos 11:33). “Haʼe añoite pe Iñarandúva” (Romanos 16:​27, JMP).

⁴ Avei, Jehová ñanderayhu ha oipota iporãvante ñandéve g̃uarã (Juan 3:16; 1 Juan 4:8). Ha ñanderayhúgui imbaʼeporã ñanendive. Pe disípulo Santiago ohai: “Opa mbaʼe iporãva ha hekopetegua oñemeʼẽva ñandéve, ou yvatégui, [...] Ñandejáragui ojapovaʼekue umi tesaperã yvagapegua” (Santiago 1:​17, BNP). Umi ohejáva haʼe oisãmbyhy chupekuéra ohupyty hetaiterei mbaʼe porã.

⁵ Ha ipahápe, Jehová ipuʼakapaite opa mbaʼére. Pe salmísta heʼi: “Upe oikóva upe Yvatetegua ãme, ha oñemoĩva upe Ipuʼakapáva guýpe, heʼi Ñandejárape: ‘[...] nde hína upe chemoʼãva, nderehe che ajerovia’” (Salmo 91:​1, 2). Jahejáramo Jehová ñanesãmbyhy, haʼe ñanemoʼãta katuete. Oĩramo jepe oñemoĩva ñanderehe, haʼe ñanepytyvõta. Nañanderejareimoʼãi arakaʼeve (Salmo 71:​4, 5; jaleemína Proverbios 3:​19-26). Jahechaháicha, Jehová oikuaa porã mbaʼépa ñaikotevẽ, oipota iporãvante ñandéve g̃uarã ha ikatupyry omeʼẽ hag̃ua upéva. Tuichaitépa jajavýta ñamboykéramo chupe! Jahechami koʼág̃a mbaʼéicha javépa ñaikotevẽ haʼe ñanesãmbyhy.

 Mbaʼéicha javépa ñaikotevẽ Ñandejára ñanesãmbyhy?

6, 7. Mbaʼéicha javépa ñaikotevẽ Ñandejára ñane sãmbyhy?

⁶ Añetehápe, ñaikotevẽ Ñandejára ñanesãmbyhy térã ñanerekomboʼe jaikove aja pukukue: ñane mitã guive ñande tuja peve. Pe salmísta heʼi: “[Jehová] toiko ore Jára teéramo opa árape g̃uarã, Haʼe ñanesãmbyhyvaʼerã [...] ñamano [meve]” (Salmo 48:​14, ÑÑB). Ojapohaguéicha pe salmísta, kristianokuéra ñanearandu ha jajerure meme Jehovápe tañanesãmbyhy.

⁷ Upéicharamo jepe, sapyʼánte ñaikotevẽtereive Ñandejára ñanesãmbyhy. Ikatu jajejopy vai jajepersegi térã ñanderasyetehaguére, térã japytahaguére travahoʼỹre (Salmo 69:​16, 17). Umícha jave ikatu ñañemboʼe Jehovápe, jaikuaa porã rupi haʼe ñanepytyvõtaha ñaaguanta ha jadesidi porã hag̃ua. Ajépa tuichaite ñanembopyʼaguapy jaikuaávo upéva! (jaleemína Salmo 102:17.) Péro ndahaʼéi umícha javénte ñaikotevẽtava Jehová ñanesãmbyhy. Sapyʼánte japredika jave ñane vesinokuérape, ñaikotevẽ Ñandejára ñanesãmbyhy. Upéicha añoite osẽ porãta ñandéve. Ha jadesidi mboyve peteĩ mbaʼe, tahaʼe vyʼarãre, mávarepa jajeheʼáta, umi mbaʼe ñamondétava, moõpa ñambaʼapóta térã mbaʼépa jastudiáta, jahechavaʼerã mbaʼépa heʼi Ñandejára umi mbaʼére ikatu hag̃uáicha jaiporavo porã. Añetehápe, ñaikotevẽ opa ára Ñandejára heʼi ñandéve mbaʼéichapa jaikovaʼerã.

Mbaʼépa ikatu oiko ñamboykéramo Ñandejárape

8. Mbaʼérepa Eva hoʼu pe yva ojeʼevaʼekue chupekuéra ndoʼuivaʼerãha?

⁸ Ñanemanduʼavaʼerã tekotevẽha jajapo Ñandejára heʼíva ñande voi jajaposégui. Haʼe ndojapoukamoʼãi ñandéve ndajajaposéiramo. Yvyporakuéra apytépe, Eva raẽ oñepyrũvaʼekue omboyke Ñandejára heʼíva, ha jahecháma mbaʼeichaitépa ivai jajapo upéva. Ñapensami mbaʼérepa Eva odesidi ojapo upéicha. Oikoségui Ñandejáraicha, ‘oikuaávo iporãva ha ivaíva’, hoʼu pe yva ojeʼevaʼekue chupekuéra ani hag̃ua opoko (Génesis 3:5). Ojapóvo upéicha, odesidi ijehegui voi mbaʼépa iporã ha mbaʼépa ivai, ha upéva Ñandejára añoite ikatu ojapo. Upéicha omboyke Jehová sãmbyhy. Eva ndoikoséi Ñandejára poguýpe, ha iména Adán omoirũ chupe (Romanos 5:12).

9. Mbaʼépa jahechaukañaína ndajajapóiramo Jehová heʼíva, ha mbaʼérepa ivaieterei upéva?

⁹ Upeichaite avei, ndajajapóiramo Ñandejára heʼíva, ñamboykeñaína Jehová sãmbyhy. Ñapensami peteĩ tapicha ojeheʼáva kongregasión rehe, péro ohechamantéva umi taʼanga tieʼỹ. Upe tapicha oikuaa mbaʼépa heʼi Ñandejára teko kyʼáre ha oikuaa naiporãiha ñañeʼẽ jepe upévare. Mbaʼéicha piko upéicharõ haʼe ohecháta umi mbaʼe? (Efesios 5:3.) Omboykévo Ñandejára heʼíva, upe tapicha omboykehína Jehová sãmbyhy (1 Corintios 11:3). Ha upéva ivaieterei. Heʼihaguéicha Jeremías, yvypóra “ndoikuaaiha mbaʼépa oikóta chugui” (Jeremías 10:23).

10. Mbaʼérepa jaiporavokuaavaʼerã?

¹⁰ Oĩ ndohechaporãiva Jeremías heʼivaʼekue. Heʼi hikuái Ñandejára ohejámaramo jaiporavo, mbaʼére piko ñande kastigáta jajapóramo upéva. Péro ñanemanduʼavaʼerã ikatúramo jepe jaiporavo, upéva tuicha rresponsavilida. Upeichaite, jajecháta Jehová ndive opa mbaʼe jaʼe ha jajapóvare (Romanos 14:10). Jesús heʼivaʼekue: “Pe ñande pyʼapýpe jarekóva, ñahenduka ñande juru rupi”. Heʼi avei: “Ñande pyʼapýgui osẽ mbaʼe ivaíva, jejuka, ñemyakãratĩ, teko vai, monda, japu, ha ñañeʼẽ rei ñande rapicháre” (Mateo 12:34; 15:19). Jahechaháicha, umi mbaʼe jaʼe ha jajapóva ohechauka mbaʼépa oĩ ñane korasõme, mbaʼeichaguápa ñande. Upévare, umi kristiáno iñakãguapýva oheja katuete Ñandejára oisãmbyhy chupekuéra. Jehovápe g̃uarã, umichagua kristiáno ‘ipyʼaporã ha heko potĩ’, ha upévare heta mbaʼe porã ojapóta hesekuéra (Salmo 125:4).

11. Mbaʼépa ñanemboʼe umi Israelguápe ojehuvaʼekue?

 ¹¹ Ñanemanduʼavaʼerã umi Israelguápe ojehuvaʼekue. Odesidi porã jave hikuái ha iñeʼẽrendu Jehovápe, haʼe oñangareko hesekuéra (Josué 24:​15, 21, 31). Upéicharamo jepe, pyʼỹi haʼekuéra oiporavo vai ha ojapo ojaposévante. Jeremías tiémpope, Jehová heʼi hesekuéra: “Nohendúi ha ndojapói cheñeʼẽ, oikónte ipyʼa hatã ha iñañáva ohekomboʼeháicha ichupekuéra, ha oho hikuái tapykue gotyo ohorangue henonderã gotyo” (Jeremías 7:​24-26, ÑÑB). Ñambyasyetépa! Aníkena ñañemohatã ñande ñaimoʼãvapente, térã vyʼa rehehápe jajapo ñane korasõ oipotáva ha ñamboyke Ñandejára heʼíva. Upéicha jajapóramo, ñañemoag̃uirangue Jehováre ñañemomombyrýta chugui.

Mbaʼépa ñaikotevẽ Ñandejára ñanesãmbyhy hag̃ua?

12, 13. a) Mbaʼépa ñaikotevẽ jajapo hag̃ua Ñandejára heʼíva ñandéve? b) Mbaʼérepa tekotevẽ jajerovia?

¹² Jahayhúramo Jehovápe jajapóta haʼe heʼíva (1 Juan 5:3). Upéicharamo jepe, ndahaʼéi upéva añónte ñaikotevẽva. Pablo heʼi: “Jerovia rupi niko jaiko ha ndahaʼéi jahecháva rehe” (2 Corintios 5:​6, 7, BNP). Mbaʼérepa iñimportantete pe jerovia? Jehová ‘ñanesãmbyhy ihustísia rape rehe’, ha upe tape ñandegueraha hetaiterei mbaʼe porãme (Salmo 23:​3, ÑÑB). Upévare jajesareko porã vaʼerã umi mbaʼe jahupytývare jaservihaguére Ñandejárape (jaleemína 2 Corintios 4:​17, 18). Jajeroviáramo Jehováre javyʼáta ñanemboriahúramo jepe (1 Timoteo 6:8).

¹³ Jesús heʼivaʼekue ñamombaʼeguasu hag̃ua Ñandejárape ñamboykevaʼerãha heta mbaʼe, ha upearã ñande jerovia imbaretevaʼerã (Lucas 9:​23, 24). Oĩ kristiáno jeroviaha hetáma oiko asýva: imboriahu, ohasa vai ha ojepersegi (2 Corintios 11:​23-27; Revelación 3:​8-10). Upéicharamo jepe, ijerovia mbarete rupi ipuʼaka koʼã mbaʼére ha osegi ovyʼa (Santiago 1:​2, 3). Ñande jerovia imbaretéramo, jaikuaa katuete iporãvetaha jajapóramo Jehová heʼiháicha. Umi ojepytasóva Jehová ykére ohupytýta umi mbaʼe porã ijojahaʼỹva, ohasátava oimeraẽ jehasa asýpe (Hebreos 11:6).

14. Mbaʼérepa Agar tekotevẽvaʼekue iñumílde?

¹⁴ Ñandejára ñanesãmbyhy hag̃ua, tekotevẽ avei ñaneumílde. Upéva jahecha Sara rembiguái ojapovaʼekuére, hérava Agar. Sara oikuaárõ guare ndaikatuiha imemby, ojerure iména Abrahánpe oñeno hag̃ua Agar ndive. Upéi Agar imemby ha oñepyrũ otrata vai Sárape. Upémaramo Sara ‘ombohasa asy chupe’, ha Agar osẽ oho rei. Upe rire, Jehová ánhel osẽ chupe ha heʼi: “Tereho jevy nde jára rendápe ha eñemomirĩ ipoguýpe”  (Génesis 16:​2, 6, 8, 9, ÑÑB). Ikatu oime Agárpe ndogustapairakaʼe upéva. Péro ojapo hag̃ua pe ánhel heʼivaʼekue okambiamantevaʼerã. Upéicharamo jepe, iñumílde ha ojapo ojeʼevaʼekue chupe. Upéicha rupi, imemby Ismael onase Abrahán kampaméntope, oĩ porãvetahápe.

15. Mbaʼéicha javépa ñaneumildevaʼerã jajapo hag̃ua Jehová heʼíva?

¹⁵ Sapyʼánte ñande avei ñaneumildevaʼerã jajapo hag̃ua Ñandejára heʼíva. Ñapensami koʼã mbaʼére. Ikatu peteĩ ermáno ohechakuaa peteĩ vyʼarã chupe ogustáva Jehovápe naiporãiha. Ikatu avei peteĩ ermáno ombopochy hapichápe ha tekotevẽ ojediskulpa, térã oime ojavy raʼe ha koʼág̃a ohechakuaavaʼerã upéva. Ha mbaʼépa ikatu jaʼe peteĩ ermáno tuicha ojavýramo? Iñumildevaʼerã ha omombeʼu umi ansiánope. Ikatu avei peteĩ ermáno oñemosẽ kongregasióngui. Mbaʼépa ojapovaʼerã oike jey hag̃ua kongregasiónpe? Oñembyasyvaʼerã ipyʼaite guive ha ojevy hape vaígui. Umícha jave, ñanemokyreʼỹta ñapensáramo Proverbios 29:​23-pe [ÑÑB] heʼívare: “Pe tapicha oñembotuicháva oñemotĩvaʼerã ha pe ánga oñemomirĩva oñembotuichavaʼerã”.

Mbaʼéichapa Jehová ñanesãmbyhy?

16, 17. Mbaʼépa jajapovaʼerã jaipotáramo la Biblia ñanepytyvõ?

¹⁶ Jehová oiporu heta mbaʼe ñanesãmbyhy hag̃ua, ha pe iñimportantevéva hína la Biblia (jaleemína 2 Timoteo 3:​16, 17). Jaipotáramo ñanepytyvõ, nañahaʼarõivaʼerã ñane provléma raẽ jalee hag̃ua la Biblia. Upéva rangue, jaleevaʼerã koʼẽ koʼẽre (Salmo 1:​1-3). Upéicha jaikuaa porãvéta mbaʼépa heʼi ñandéve. Ñapensáta Ñandejáraicha ha ñambohovaikuaáta oimehaichagua provléma, umi ñahaʼarõʼỹva jepe.

¹⁷ Jaleévo la Biblia tekotevẽ avei jajepyʼamongeta jaleévare ha ñañemboʼe umi mbaʼe jahasávare. Jajepyʼamongetáramo la Bíbliape heʼívare, ñaguenohẽta heta mbaʼe porã ikatútava jaiporu upe rire (1 Timoteo 4:15). Oiko sapyʼáramo peteĩ mbaʼe ivaíva, iporã ñañemboʼe Jehovápe jaikuaa hag̃ua mbaʼépa jajapóta. Ijespíritu ñanepytyvõta ñanemanduʼa hag̃ua umi mbaʼe jaleevaʼekue la Bíbliape térã ñane puvlikasiónpe (jaleemi Salmo 25:​4, 5).

18. Mbaʼéichapa ñanesãmbyhy Jehová umi ermanokuéra rupive?

¹⁸ Jehová avei ñanesãmbyhy ñane ermanokuéra rupive. Ha umíva apytépe oĩ pe ‘tembiguái jeroviaha ha iñarandúva’ ha pe Cuerpo Gobernante, oñeʼẽva hérape. Pe tembiguái omoĩ meme ñandéve umi mbaʼe ñaikotevẽva ñamombarete hag̃ua ñande jerovia. Ojapo upéva umi puvlikasión, rreunión ha  asambléa rupive (Mateo 24:​45-47; ikatu oñembojoja Hechos 15:​6, 22-31 reheve). Avei, kongregasiónpe oĩ ansianokuéra iñakãguapýva, ikatupyrýva oiporopytyvõ hag̃ua la Biblia rupive (Isaías 32:1). Umi mitãrusu ha mitãkuña tuichaiterei avei oñevenefisia ituvakuéra oservíramo Ñandejárape. Jehová ningo omoĩ chupekuéra oipytyvõ hag̃ua ifamíliape, ha taʼyrakuéra omombaʼevaʼerã upéva (Efesios 6:​1-3).

19. Mbaʼépa jahupyty jajeroviahaguére Jehováre?

¹⁹ Upeichaite, Jehová ñanesãmbyhy heta hendáicha, ha jaiporupaitevaʼerã umi mbaʼe omeʼẽva ñandéve. Imanduʼávo mbaʼéichapa Israel ojeroviavaʼekue Hese, rréi David heʼi Ñandejárape: “Nderehe ojeroviavaʼekue ore rukuéra ypykue, upéicha rupi, jejopy vaígui renohẽ chupekuéra. Ojerurevaʼekue ndéve reipytyvõ hag̃ua chupekuéra, ha renohẽ chupekuéra tembiguái rekógui. Ndojeroviareíri nderehe” (Salmo 22:​3-5). Jajeroviáramo Ñandejárare ha jajapo haʼe heʼíva, haʼe nañanemotĩmoʼãi; oikóta katuete upe ñahaʼarõva. Jajeroviáramo Jehováre ñandejehe rangue, koʼág̃ama voi jahupytýta heta mbaʼe porã (Salmo 37:5). Ha jajepytaso mbaretéramo ñande jeroviápe, umi mbaʼe porã ndopamoʼãi arakaʼeve. David heʼivaʼekue: “Ñandejára [ohayhu] tekojoja, ha ndohejaichéne umi hese ojeroviávape [...]. Heko potĩvape opytapáne ko yvy, ha upépe haʼekuéra oikóne opa árape” (Salmo 37:​28, 29).

Ikatúpa rembohovái?

• Mbaʼérepa ikatu jajerovia Jehová heʼívare?

• Mbaʼépa jahechaukañaína ndajajapóiramo Jehová heʼíva?

• Mbaʼéicha javépa tekotevẽ ñaneumílde?

• Mbaʼéichapa ñanesãmbyhy Jehová koʼág̃a rupi?

[Porandu ñahesaʼỹijóva]

[Nóta oĩva taʼanga ndive páhina 15]

Jahejápa Jehová ñanesãmbyhy opa mbaʼe jajapóvape?

[Nóta oĩva taʼanga ndive páhina 16]

Mbaʼépa oikotevẽvaʼekue Agar ojapo hag̃ua pe ánhel heʼivaʼekue chupe?