Mbaʼéichapa ojehechavaʼerã ñemenda ha mitãnguéra ko ára pahápe

“Pe árako mbykýma.” (1 CORINTIOS 7:​29, JMP.)

1. a) Mbaʼe mbaʼépa oikovaʼerã ko ára pahápe? b) Mbaʼérepa ñandepyʼapyvaʼerã noñemombaʼevéigui familiakuéra yma guaréicha?

 LA Bíbliape heʼi ‘ára pahápe’ oikovaʼerãha ñorairõ guasu, yvyryrýi, ñembyahýi ha ouvaʼerãha opaichagua mbaʼasy (Daniel 8:​17, 19; Lucas 21:​10, 11). Heʼi avei yvyporakuéra okambiavaʼerãha heta mbaʼépe. Pór ehémplo, familiakuéra omombaʼevaʼekue yma noñemombaʼemoʼãvéima. Upévare ijetuʼuvevaʼerã ko ‘ára pahápe’ (2 Timoteo 3:​1-4). Mbaʼérepa ñandepyʼapy koʼã mbaʼe oikóva? Opárupi noñemombaʼevéigui ñemenda ha mitãnguéra, ha ikatu rupi ñande avei nañamombaʼevéi. Mbaʼéichapa ikatu oiko upéva ñanderehe?

2. Mbaʼéichapa ojehecha ko múndope pe ñemenda ha divórsio?

² Koʼág̃a rupi ndahasyiete umi omendávape ojedivorsia hag̃ua, ha opárupi káda áño hetaitereive oĩ ojopoíva. Upéicharamo jepe, ñanemanduʼavaʼerã Jehová ndohechaiha ko múndope ojehechaháicha pe ñemenda ha divórsio. Mbaʼéichapa Jehová ohecha umi mbaʼe?

3. Mbaʼéichapa Jehová ha Jesús ohecha pe ñemenda?

³ Jehová oipota umi omendáva okumpli oprometevaʼekue ojupe omendárõ guare. Haʼe omomendárõ guare Adán ha Évape heʼi: ‘Pe kuimbaʼe ojoajuvaʼerã hembireko ndive, ha mokõivégui oiko peteĩnte’. Upe rire, Jesucristo heʼi avei upéicha, ha heʼive: ‘Upévare, yvyporakuéra ndoipeʼaivaʼerã ojuehegui Ñandejára ombojoajuvaʼekue. Che katu haʼe peẽme, pe opoíva hembirekógui, ndahaʼéima guive heko vaikuére, ha omendáva ambue kuñáre, omoakãratĩhína chupe’ (Génesis 2:24; Mateo 19:​3-6, 9, BNP). Upéicharõ, Jehová ha Jesúspe g̃uarã umi omendáva ombojoajuhína hekove opa ára g̃uarã. Upévare umi omendáva oĩvaʼerã oñondive omano meve (1 Corintios 7:39). Péicha jahecha mbaʼéichapa Jehová omombaʼe pe ñemenda. Upévare umi kristianokuéra nopensaivaʼerã osolusionataha iprovléma ojopoíramo. La Biblia heʼi Jehová ndaijaʼeiha umi ojedivorsiávare oimeraẽ mbaʼére (jaleemína Malaquías 2:​13-16; 3:6). *

Mbaʼéichapa jahechavaʼerã ñemenda

4. Mbaʼérepa oĩ ombyasýva omendahague imitãiterei reheve?

⁴ Ko múndo añáme ningo oñemombaʼeterei teko tieʼỹ. Upévare hetaitereive oĩ umi taʼanga tieʼỹ koʼág̃a rupi. Ha ñande ndaikatúi jaʼe umi taʼanga ndojapomoʼãiha ñanderehe mbaʼeve, ha koʼýte umi mitãrusu ha mitãkuñanguéra. Upéva ningo ikatu ñanemoakãraku mbaʼe tieʼỹre ndajaipotáiramo jepe. Mbaʼépa ojapovaʼerã umi mitãrusu ha mitãkuñanguéra ani hag̃ua oiko hesekuéra upéva? Oĩningo imitãiterei reheve omendáva, oimoʼãgui upéicha ndoʼamoʼãiha teko vaípe. Péro upe riremínte ombyasýma omendahague. Ohechakuaa rupi ojoavyha heta mbaʼépe  iména térã hembirekóndi iñakãrakupoi rire. Ha péicha koʼã tapicha tuichaiterei iprovlémata.

5. Mbaʼépa oipytyvõta umi omendávape okumpli hag̃ua oprometevaʼekue omendárõ guare? (Jahechami mbaʼépa heʼi avei pe nóta.)

⁵ Umi omendáva kristiánoramo jepe, ikatu ohechakuaa omenda riréma iména térã hembireko ndahaʼeiha upe oimoʼãvaʼekue. Ha upéva ikatu ombohasa asy chupekuéra (1 Corintios 7:28). Upévare umi omendáva ndovyʼáiramo oñondive iprovléma heta. Péro umi Jehovápe oservíva oikuaa iprovléma hetáramo jepe ndojopoirivaʼerãha hikuái oimeraẽ mbaʼére. Upévare ñamombaʼe ha ñaipytyvõvaʼerã ñane ermanokuéra oñehaʼãvape okumpli oprometevaʼekue omendárõ guare. *

6. Mbaʼépa ohechakuaavaʼerã umi omendaséva imitãva reheve?

⁶ Oimérõ nemitã gueteri ha remendaséma, mbaʼépa rehechakuaavaʼerã? Eñepyrũ mboyve reikuaa porãve peteĩ ermáno térã ermánape, rehaʼarõvaʼerã ekakuaapa raẽ ha emombarete raẽ vaʼerã nde jerovia. Upéicharõ nerembyasymoʼãi rejapovaʼekue. La Bíbliape ningo ndeʼíri mboy áñopepa oñemendavaʼerã. * Péro heʼi umi mitãrusu ha mitãkuñanguéra ohaʼarõvaʼerãha ityarõ raẽ (1 Corintios 7:36). Mbaʼérepa upéva? Akãraku reheve ikatúgui nerepensái rejapótavare ha redesidi vai. Koʼã mbaʼe ningo heta nemoprovlemáta upe rire. Nemanduʼavaʼerã umi konsého Jehová omeʼẽva omendávape nepytyvõtaha revyʼa hag̃ua (jaleemína Isaías 48:​17, 18).

Mbaʼéichapa jahechavaʼerã mitãnguéra

7. Mbaʼépa oiko umi omendávare imitãiterei reheve, ha mbaʼépa ogueru chupekuéra upéva?

⁷ Oĩningo omendáva imitãiterei reheve ha ifamíliama voi ojokuaa porã mboyve hikuái. Jaikuaaháicha mitãraʼy ningo oikotevẽ isy oñangareko hese ára ha pyhare. Ha heta vése iména ipochýma avei upévare, oipotágui hembireko oñatende avei hese. Avei, ikaneʼõiterei hikuái ndokeporãveihaguére, ha upéva ogueru hetave oprovléma chupekuéra. Ohechakuaa avei hikuái ndaikatuveimaha ojapo heta mbaʼe. Ndaikatuvéima oho umi lugár ohohaguépe jepi térã ojapo oñondive umi mbaʼe ojapovaʼekue yma. Upévare, mbaʼéichapa ohechavaʼerã umi mbaʼe ohasáva hikuái?

8. Mbaʼéichapa umi omendáva ohechavaʼerã ifamília, ha mbaʼérepa?

⁸ Jehová omombaʼeháicha pe ñemenda, omombaʼe avei mitãnguéra. Upévare tuicha mbaʼe hína ñane família. Heta mbaʼe ningo okambia ñande rogapýpe onasévo peteĩ mitã. Upéicharõ jepe, sy ha túva oservíva Jehovápe oñehaʼãmbaite ojapo oñehaʼarõva chuguikuéra. Ha omombaʼe hikuái upe mitãraʼy ‘Ñandejára voi omeʼẽ’ rupi chupekuéra. Jehová voi ningo ojapovaʼekue yvyporakuérape ifamília hag̃ua (Salmo 127:3). Upévare umi sy ha túva akóinte oñehaʼã ohekomboʼe ifamíliape ‘Jehová oipotaháicha’ (Efesios 6:​1, ÑÑB).

9. a) Mbaʼépa ojapovaʼerã sy ha túva omongakuaa porã hag̃ua ifamília? b) Mbaʼépa ojapovaʼerã pe ména ani hag̃ua hembirekógui ikangy ijerovia?

⁹ Sy ha túva oñehaʼãmbaitevaʼerã omongakuaa porãséramo ifamíliape, ha heta áño oñangarekovaʼerã hese. Upéicharõ pe ména ohechakuaavaʼerã ifamília michĩ aja, hembireko  noñatendeporãmoʼãiha rreunionhápe ha ijetuʼutaha chupe ostudia ha ojepyʼamongeta porã hag̃ua Ñandejára Ñeʼẽre. Upéva ikatu omokangyhína chugui ijerovia. Upévare, pe túva imbaʼerechakuaáva oñehaʼãmbaite oipytyvõ hembirekópe oñangareko hag̃ua mitãre. Avei, rreunión rire ikatu oñemongeta hembirekóndi umi mbaʼe ojeʼevaʼekuére. Upéicha omombeʼúta chupe umi mbaʼe nohenduivaʼekue. Oñangarekóta jepi avei mitãre ikatu hag̃uáicha hembireko ovyʼa predikasiónpe (jaleemína Filipenses 2:​3, 4).

10, 11. a) Mbaʼépa heʼise ‘oñemongakuaa ha oñehekomboʼevaʼerãha mitãnguérape’ Jehová oipotaháicha? b) Mbaʼérepa ñamombaʼevaʼerã heta sy ha túvape?

¹⁰ Sy ha túva omongakuaa porã hag̃ua ifamília oñehaʼãmbaitevaʼerã omoĩ chupekuéra hembiʼurã, ijaorã ha oñepohãnouka hag̃ua. Ko ára pahápe ningo mitãnguérape michĩmi guive oñemboʼemavaʼerã mbaʼéichapa Ñandejára oipota jaiko. ‘Oñemongakuaa ha oñehekomboʼevaʼerã chupekuéra Ñandejára oipotaháicha’ (Efesios 6:​4, ÑÑB). Upéva heʼise oñemboʼevaʼerãha chupekuéra mbaʼéichapa Jehová ohecha heta mbaʼe michĩmi guive ikariaʼy térã ikuñataĩ meve (2 Timoteo 3:​14, 15).

¹¹ Jesús heʼivaʼekue hemimboʼekuérape: “Tapeho aipóramo opa tetã rupi ha pejapo chupekuéra che remimboʼéramo”. Upérõ oiméne heʼi avei umi sy ha túva omboʼevaʼerãha ifamíliape oiko hag̃ua chugui Jesús remimboʼe (Mateo 28:​19, 20). Jahechakuaavaʼerã ijetuʼuha upéva. Ko múndope ningo heta mbaʼe vai oñemoĩ mitãrusu ha mitãkuñanguéra raperãme. Upévare, ñamombaʼékena umi sy ha túva oipytyvõva ifamíliape oservi hag̃ua Jehovápe. Haʼekuéra ningo ojapo oñehaʼarõva chuguikuéra, ha ojerovia rupi Jehováre ndaipuʼakái hesekuéra ko múndo (1 Juan 5:4).

Umi odesidíva nomendái térã naifamíliai oipytyvõ hag̃ua hapichakuérape

12. Mbaʼérepa heta oĩ ermáno odesidíva nomendavoíri?

¹² Jaikuaáningo ‘mbykymaha pe ára’ ha ‘mundopegua ohasaha ohóvo’. Upévare, Ñandejára Ñeʼẽ ñanemokyreʼỹ ñapensa hag̃ua umi mbaʼe porã jahupytýtavare nañamendáiramo (1 Corintios 7:​29-31, BNP). Upéicha rupi heta oĩ odesidíva nomendavoíri térã opyta soltéro omano meve. Ñamombaʼevaʼerã umi soltéro oiporupaitévape itiémpo oservi hag̃ua Jehovápe oikorangue iñakãre (jaleemína 1 Corintios 7:​32-35). Upévare, oĩ heta soltéro oservíva Betélpe térã ojapóva iprekursorádo. Oĩ katu ohóva Escuela de Entrenamiento Ministeriálpe oipytyvõségui oñekotevẽvehápe. Ha umi upe rire omendáva katu, ohechakuaa  tuichaiterei oipytyvõha chupekuéra oaprendevaʼekue omenda mboyve, oservírõ guare de tiémpo kompléto.

13. Mbaʼérepa heta omendáva odesidi naifamiliamoʼãiha?

¹³ Heta hendárupi ndahaʼevéi ymaguaréicha umi família. Heta omendávaningo odesidi naifamiliamoʼãiha. Mbaʼérepa odesidi hikuái upéva? Oĩningo naifamíliaiva ndorekói rupi omantene hag̃ua ha ótro katu ombaʼaposevégui ogana porãve hag̃ua. Ha umi oservíva Jehovápe katu itiempove hag̃ua oipytyvõségui hapichakuérape oikuaa hag̃ua Jehovápe. Péro upéva ningo ndeʼiséi ndovyʼaiha hikuái. Haʼekuéra naifamíliai omotenonde hag̃ua Ñandejára Rréino (1 Corintios 7:​3-5). Oĩ oservíva Jehová ha iñermanokuérape Betélpe térã superintendénte de sirkúito ỹrõ de distrítoramo, ha oĩ katu oservíva prekursór térã misionéroramo. Jajerovia Jehová ndahesaraimoʼãiha umi mbaʼe ojapóva hikuái oservi porãve hag̃ua chupe (Hebreos 6:10).

“Ohasavaʼerã heta jepyʼapy”

14, 15. a) Mbaʼépa ikatu oipyʼapy umi sy ha túvape? b) Mbaʼéichapa ñaipytyvõkuaa ñane ermanokuérape ifamília omboykéramo Jehovápe?

¹⁴ Apóstol Pablo heʼivaʼekue umi omendáva ‘ohasavaʼerãha heta jepyʼapy’ (1 Corintios 7:​28, BNP). Upéva heʼise ikatuha hasykatu haʼekuéra voi, ifamília térã isy ha itúva ijedámava. Péro ikatu avei heʼise ojepyʼapyha hikuái ifamília ojapóvare térã mbaʼéichapa omongakuaa porãta chupekuéra. Heʼihaguéicha ko artíkulope oñepyrũvo, la Biblia heʼimavaʼekue ‘ko ára pahápe jaikotaha peteĩ tiémpo ijetuʼúvape’. Heʼi avei umi mitã jepe naiñeʼẽrendumoʼãiha (2 Timoteo 3:​1-3).

¹⁵ Enterovépe ningo ijetuʼu jaiko rupi ‘ára pahápe’. Upévare tuvakuérape hasy omongakuaa porã hag̃ua ifamília. Haʼekuéra oñehaʼãmbaitevaʼerã oipytyvõ ifamiliakuérape ani hag̃ua ipuʼaka hesekuéra ko múndo aña (Efesios 2:​2, 3). Ha oñehaʼãramo jepe hikuái, heta vése ifamiliakuéra omboykénte avei Jehovápe. Upévare, ojepyʼapy katuete umi sy ha túva oñehaʼãmbaitevaʼekue ohekomboʼe ifamíliape Ñandejára Ñeʼẽ (Proverbios 17:25).

‘Oikóta peteĩ jehasa asy guasu’

16. Mbaʼeichagua ‘jehasa asýrepa’ oñeʼẽvaʼekue Jesús?

¹⁶ Opaichagua jepyʼapy ohasáva koʼág̃a rupi umi omendáva térã umi ifamíliava ndahaʼéi mbaʼeve ñambojojátaramo pe jehasa asy guasu oikótavare. Jesús oñeʼẽrõ guare ogovernaha tiémpore ha pe ára paháre, heʼivaʼekue: ‘Upe árape oikóta peteĩ jehasa asy guasu, ndoikoiháicha gueteri ára ñepyrũmby guive, ha ndoikoveimavaʼerã upeichagua arakaʼeve’ (Mateo 24:​3, 21, JMP). Upe rire Jesús heʼi peteĩ aty guasu nomanomoʼãiha upe ‘jehasa asy guasúpe’. Péro  upe mboyve, ko múndo oĩva Satanás poguýpe opuʼãta Jehová siervokuérare. Upéicharõ enterovépe ijetuʼúta upéva oiko vove, tahaʼe mitãnguérape térã kakuaávape.

17. a) Mbaʼérepa ndovaléi jajepyʼapyeterei ñane renonderãre? b) Mbaʼérepa jahechavaʼerã Jehová ohechaháicha pe ñemenda ha mitãnguéra?

¹⁷ Upéicharamo jepe, ndovaléi jajepyʼapyeterei ñane renonderãre. Umi sy ha túva iñeʼẽrendúva Jehovápe ojeroviakuaa haʼe oñangarekotaha hesekuéra ha ifamiliakuérare (jaleemína Isaías 26:​20, 21; Sofonías 2:​2, 3; 1 Corintios 7:14). Upéva oiko mboyve jahechakuaavaʼerã jaikoha peteĩ tiémpo ijetuʼúvape. Upévare jahechavaʼerã Jehová ohechaháicha pe ñemenda ha mitãnguéra ko ára pahápe (2 Pedro 3:​10-13). Enterove jajapóramo upéicha, ñamombaʼeguasúta Jehovápe ha iñorganisasiónpe avei.

[Nóta]

Ñambohovaimína koʼã porandu

• Mbaʼérepa naiporãi umi mitãrusu ha mitãkuñanguéra omenda imitãiterei reheve?

• Mbaʼépa ojapovaʼerã sy ha túva omongakuaa porã hag̃ua ifamília?

• Mbaʼérepa heta oĩ odesidíva opyta soltéro térã umi omendáva naifamiliamoʼãiha?

• Mbaʼépa ikatu oipyʼapy umi sy ha túvape?

[Porandu ñahesaʼỹijóva]

[Nóta oĩva taʼanga ndive páhina 23]

Mbaʼérepa naiporãi umi mitãrusu ha mitãkuñanguéra omenda imitãiterei reheve?

[Nóta oĩva taʼanga ndive páhina 24]

Ména oipytyvõvaʼerã hembirekópe ikatu hag̃uáicha opredika ha oñatende rreunionhápe

[Nóta oĩva taʼanga ndive páhina 25]

Mbaʼérepa heta ermáno omendáva odesidi naifamiliamoʼãiha?