Mbaʼépa jajapovaʼerã javyʼa hag̃ua?

‘Ekyhyje Ñandejáragui ha ejapo heʼíva ndéve.’ (ECLESIASTÉS 12:​13, ÑÑB.)

1, 2. Mbaʼépepa ñanepytyvõta pe lívro hérava Eclesiastés?

 ÑAPENSAMI oĩha peteĩ tapicha oguerekóva hetaiterei mbaʼe. Haʼe ningo peteĩ mburuvicha guasu iplataitereíva, ha itiémpope ndaiporivaʼekue iñaranduvéva chugui. Péro ohupytýramo jepe heta mbaʼe, oñeporandu jeýnte mbaʼépa ojapovaʼerã ovyʼa hag̃ua.

² Péva pe kuimbaʼe ningo oikovaʼekue yma, ha ojapóma tres mil áño rupi omanohague. Héra Salomón. Haʼe ohai pe lívro de Eclesiastés ha omombeʼu mbaʼépa ojapo ovyʼaségui (Eclesiastés 1:13). Umi mbaʼe ohasavaʼekue ikatu ñanemboʼehína heta mbaʼe. Upévare, pe lívro ikatu ñanepytyvõ jaikuaa hag̃ua mbaʼépa jajapovaʼerã javyʼa hag̃ua.

‘Haʼeténte ku ojokoséva yvytu’

3. Mbaʼérepa enterove jaiporukuaavaʼerã ñande rekove?

³ Salomón omombeʼu Ñandejára ojapohague hetaiterei mbaʼe neporãmba jepéva ko Yvy ape ári. Ha hetaitereíramo jepe nañanekaneʼõi jahechahague. Péro mbykýgui ñande rekove, michĩmínte ikatu jahecha Ñandejára rembiapokue (Eclesiastés 3:11; 8:17). La Biblia  heʼiháicha ndajaikoveʼaréi (Job 14:​1, 2; Eclesiastés 6:12). Upévare jaiporukuaavaʼerã ñande rekove, hasýramo jepe jajapo hag̃ua upéva. Jaikuaáningo Satanás oñehaʼãmbaiteha ñanemboyke Jehová rapégui.

4. a) Mbaʼépa heʼise pe ñeʼẽ ‘vyrorei’? b) Mbaʼe mbaʼe ojehupytysévapa jahecháta koʼág̃a?

⁴ Salomón oiporu treinta vése rupi Eclesiastéspe pe ñeʼẽ ‘vyrorei’ ojetradusíva evréogui. Ha upéicha ohechauka ñañatende porã vaʼerãha ani hag̃ua jaiporu vai ñande rekove. Upe ñeʼẽ heʼise peteĩ mbaʼe ndovaléiva mbaʼeverã ha opa reíva (Eclesiastés 1:​2, 3). Salomón oiporu jepi avei pe ñeʼẽ vyrorei oñeʼẽvo umi ‘ojokosévare yvytu’ (Eclesiastés 1:14; 2:​11, ÑÑB). Jaikuaa porã ningo ñañehaʼã reitaha jajagarra yvytu. Ha umi oñehaʼãva ojapo upéva ningo opyta po nandi. Upéicha avei opytáta umi oñehaʼãva ohupyty ko múndo oikuaveʼẽva. Ha mbykýgui ñande rekove jaiporukuaavaʼerã ani hag̃ua japyta po nandi. Upévare, jahechamíta umi ehémplo Salomón omoĩvaʼekue ohechaukáva mbaʼépa yvyporakuéra oñehaʼã jepi ohupyty. Jahecha raẽta mbaʼépa ojejapo jepi ojevyʼaségui ha ojehupyty hag̃ua mbaʼereta. Upe rire katu jahecháta mbaʼérepa iñimportánte ñambaʼapo.

Javyʼátapa jaikóramo vyʼarã rapykuéri?

5. Mbaʼépa ojapovaʼekue Salomón ovyʼaségui?

⁵ Heta ñande rapicha oikoháicha koʼág̃a rupi, Salomón oikovaʼekue avei vyʼarã rapykuéri. Upévare Salomón ohaivaʼekue: “Namboykéi che pyʼapýgui mbaʼeveichagua vyʼa” (Eclesiastés 2:​10, ÑÑB). Mbaʼeichagua vyʼarã rapykuéripa oikorakaʼe? Eclesiastés kapítulo 2-pe omombeʼu hoʼu jepi hague víno ovyʼa hag̃ua, péro ndokaʼúi, orekohague yvotyty, umi óga tuichaicháva, ohendu músika pu rory porã ha hoʼu umi tembiʼu hepa jepéva.

6. a) Mbaʼérepa ndaivaíri javyʼa? b) Mbaʼéichapa jahechavaʼerã umi vyʼarã?

⁶ Heʼípa la Biblia ivaiha ñañembyatýramo ñane amigokuéra ndive javyʼa hag̃ua? Nahániri. Pór ehémplo Salomón heʼivaʼekue javyʼaha jahupytýramo ñane rembiʼurã ñambaʼapo rire, ha upéva omeʼẽha avei ñandéve Ñandejára (jaleemína Eclesiastés 2:24; 3:​12, 13). Jehová heʼi avei umi mitãrusu ha mitãkuñanguérape ‘ovyʼa hag̃ua imitã aja’. Péro oikuaavaʼerã mbaʼépa ojapo porã ha ojapo vaíta hese (Eclesiastés 11:9). Opavavénte japytuʼu ha javyʼavaʼerã (embojoja Marcos 6:31 heʼívare). Péro koʼã mbaʼe nañamotenondeivaʼerã ñande rekovépe. Ndahaʼéi rupi pe iñimportantevéva. Ñandegustáramo jepe umi mbaʼe heʼẽ, jaʼu rasáramo ñanembyajúta, ha ikatu ñanembyai. Upéicha avei, Salomón ohechakuaa ñamotenondéramo vyʼarã ikatuha nanembyai, ha haʼetéta ku jajokoséva yvytu (Eclesiastés 2:​10, 11).

7. Mbaʼérepa jaiporavo porã vaʼerã umi vyʼarã?

⁷ Ndahaʼéiningo opaichagua vyʼarã iporãva. Heta oĩ ikatúva ñanembyai ojapouka rupi ñandéve ivaíva ha ñanemoĩ vai Jehová renondépe. Hetaiterei oĩ ‘ovyʼase rupi’ hoʼúva dróga, vevída ha oĩ avei umi ohugáva ogana hag̃ua pláta. Peichaite peve ningo oñehundi hikuái! Jehová heʼi porã ñandéve jajapóramo jajaposévante ñasẽ vaitaha ha jahasa asytaha ñane rembiapo vaikuére (Gálatas 6:7).

8. Mbaʼérepa iporã jajepyʼamongeta jajapóvare ñande rekovépe?

⁸ Ha jaikoitereíramo vyʼarã rapykuéri ndaikatumoʼãi ñamotenonde umi mbaʼe iñimportantevéva. Ñanemanduʼavaʼerã mbykyminteha ñande rekove, ha enterove ikatuha ñanderasy ha jajejopy vai. Upévare, Salomón heʼivaʼekue ñaimerangue vyʼahápe iporãveha jaha omanovahápe (koʼýte oiméramo oservíraʼe Jehovápe) (jaleemína Eclesiastés 7:​2, 4). Mbaʼérepa upéva? Ñahendúvo pe diskúrso ojejapóva upépe, jajepyʼamongetavaʼerã mbaʼéichapa pe ermáno oservirakaʼe Jehovápe omano meve. Upéva ñanepytyvõta jahecha hag̃ua mbaʼépa jajapoñaína ñande rekovépe. Ikatu jahecha mbaʼéichapa jaiporu porãvéta ñande rekove (Eclesiastés 12:1).

Javyʼátapa jaikóramo mbaʼereta rapykuéri?

9. Mbaʼépa Salomón ohechakuaavaʼekue oikoha jarekóramo heta mbaʼe?

⁹ Salomón ohaírõ guare Eclesiastés iplatave vaʼekue opavavégui ko Yvy ape ári (2 Crónicas 9: 22). Haʼe ikatu vaʼekue ohupyty opa mbaʼe oipotáva. Salomón voi omombeʼu nomboykeihague mbaʼeve ohecharamóva (Eclesiastés 2:10). Péro ohechakuaa orekóramo jepe heta mbaʼe ndovyʼaiha. Upe rire heʼi: “Pirapire ohayhúva oipotapotave; pe imbaʼeretáva arakaʼeve voi noimoʼãi oguereko hetamaha” (Eclesiastés 5:10).

10. Mbaʼépa ñanepytyvõta javyʼa ha jahupyty hag̃ua heta mbaʼe?

¹⁰ Jaikuaa umi mbaʼereta ndahaʼeiha opa ára g̃uarã. Upéicharamo jepe oĩ gueteri oñehaʼãva oreko heta mbaʼe. Estados Unídospe oñeporandúrõ guare mitãrusu ha mitãkuñanguérape mbaʼépa ohupytyse hekovépe, 75% heʼi “ipláta hetaseha”. Péro, upe rire ipláta heta mbaʼéramo, ovyʼátapa hikuái? Aniche vaʼerã. Umi estudióso ohechakuaa umi omombaʼetereíva mbaʼereta hasyveha ovyʼa hag̃ua. Yma, Salomón heʼimavaʼekue avei upéicha: ‘Ambyaty pláta ha óro, ha mbaʼereta tetãnguéra ruvicha mbaʼekue. Ha péina ape, mbaʼe reiete, ojejokoserõguáicha yvytu’ (Eclesiastés 2:​8, 11, ÑÑB). * Péro, akóinte jaservíramo Jehovápe ñande pyʼaite guive, haʼe ñanevendesíta ha jahupytýta heta mbaʼe ijojahaʼỹva (jaleemína Proverbios 10:22).

Mbaʼeichagua tembiapópa ñanembovyʼáta?

11. Mbaʼépa heʼi la Biblia umi ombaʼapóvare?

¹¹ Jesús heʼivaʼekue: “Che Ru ningo koʼág̃a peve ombaʼapohína, ha che avei” (Juan 5:17). Jehová ha Jesús ovyʼaiterei ohechávo hembiapokue. La Biblia heʼi Jehová ovyʼahague ohechávo hembiapokue: “[Ñandejára] omañávo opaite mbaʼe ojapovaʼekue rehe ha ojuhu iporãitereiha” (Génesis 1:​31, ÑÑB). Umi anhelkuéra ohechárõ guare umi mbaʼe Jehová ojapovaʼekue “ovyʼajoa” hikuái (Job 38:​4-7, ÑÑB). Salomón omombaʼevaʼekue avei umi tembiapo ñanepytyvõtava (Eclesiastés 3:13).

12, 13. a) Mbaʼéichapa mokõi tapicha heʼi oñeñanduha ombaʼapohaguére? b) Mbaʼérepa ikatu ñande traváho ñaneamarga ha ñanemoñandu vai?

¹² Koʼág̃a rupi heta oĩ avei omombaʼéva umi tembiapo ojejapo porãva. Peteĩ pintór hérava José heʼi: “Jadivuháramo umi mbaʼe ñapensáva peteĩ liensóre, javyʼaitereíta peteĩ tapicha ojupívaicha sérro ruʼãme”. Ha Miguel * katu heʼi: “Javyʼaitereíngo ñambaʼapóramo. Upéicharõ ningo ikatu ñamoĩ ñane famíliape oikotevẽva. Avei jahechakuaa jajapohague peteĩ mbaʼe porã”.

¹³ Upéicharamo jepe, heta oĩ tembiapo jajapóva ára ha ára, ha ndaikatúi voi jajapo peteĩ mbaʼe ipyahumíva. Sapyʼánte upe ñambaʼapohápe nosẽporãi mbaʼeve ha ojejapo voi heta mbaʼe hendapeʼỹ. Heʼihaguéicha Salomón, peteĩ iñateʼỹvape ikatu oñemeʼẽ umi mbaʼe porã oñemeʼẽrangue peteĩ ombaʼapo kyreʼỹvape. Pe iñateʼỹva ohupyty umi mbaʼe iñamigokuéra rupivénte (Eclesiastés 2:21). Péro oĩ hetave mbaʼe ikatúva ñanemoñandu vai. Pór ehémplo, peteĩ negósio porã ikatu osẽ vai opaitégui pláta upe jave térã oiko rupi peteĩ mbaʼe nañahaʼarõiva (jaleemína Eclesiastés 9:11). Heta vése pe tapicha oñehaʼãva ojapo porã hembiapo opyta oñamarga ha oñeñandu vai. Upéicha ‘ohechakuaágui hetaiterei ombaʼapo rei hague’ (Eclesiastés 5:​15, [5:​16, NM]).

14. Mbaʼe jajapóramopa javyʼáta?

¹⁴ Oĩnepa peteĩ traváho arakaʼeve nosẽvaimoʼãiva? José, pe pintór ñanemanduʼamahague heʼi: “Umi pintúra ningo ikatu oñembyai ituja rire, ikatu okañy térã oñehundi. Péro upéva ndoikói umi mbaʼe jajapóvare Ñandejárape g̃uarã. Jehová heʼi ñamombeʼuvaʼerãha marandu  porã ñande rapichakuérape. Ha cheñeʼẽrenduhaguére chupe ajapo peteĩ mbaʼe ndopamoʼãiva arakaʼeve. Aipytyvõ che rapichakuérape omombaʼeguasu hag̃ua Jehovápe. Upévako ndaijojahái” (1 Corintios 3:​9-11). Miguel heʼi avei ovyʼaveha omombeʼu jave hapichakuérape Ñandejára Rréino ojapótava. Heʼive avei: “Ndaiporiha ñanembovyʼavéva ñaipytyvõramo ñande rapichápe oikuaa hag̃ua Jehovápe ha jahecha mbaʼéichapa omombaʼe chupe ipyʼaite guive”.

“Ýpe eity ne rembiʼu”

15. Mbaʼépa jajapovaʼerã javyʼa hag̃ua?

¹⁵ Upéicharõ, mbaʼépa jajapovaʼerã javyʼa hag̃ua? Ñaipytyvõvaʼerã ñande rapichakuérape ha ñamombaʼeguasu Jehovápe jaikuaa rupi mbykyha ñande rekove. Ñañehaʼãkena ñañemoag̃uive Jehováre, ha ñamboʼe ñane familiakuérape Ñandejára rembipota. Avei ñaipytyvõvaʼerã ñande rapichakuérape oikuaa hag̃ua Jehovápe ha jaikuaa porãve ñane ermanokuérape (Gálatas 6:10). Koʼã mbaʼe jajapóramo jahupytýta heta mbaʼe porã. Salomón oiporu peteĩ ehémplo ohechauka hag̃ua mbaʼérepa jajapovaʼerã iporãva. Haʼe heʼi: ‘Ýpe eity ne rembiʼu, heta tiémpo rire rejuhu jeýta’ (Eclesiastés 11:1). Upéicha avei Jesús heʼivaʼekue hemimboʼekuérape: ‘Pemeʼẽ, ha Ñandejára omeʼẽne peẽme’ (Lucas 6:38). Ha Jehová voi heʼi ovendesitaha umi ojapóvape iporãva (Proverbios 19:17; jaleemína Hebreos 6:10).

16. Mbaʼe tiémpopepa jadesidivaʼerã mbaʼépa jajapóta ñande rekovépe?

¹⁶ La Biblia omokyreʼỹ mitãrusu ha mitãkuñanguérape odesidi porã hag̃ua mbaʼépa ojapóta hekovépe, ani upéi osẽ vai (Eclesiastés 12:1). Ñambyasyetétaningo jahechakuaáramo jaiporu vai hague ñane tiémpo. Jaiko rupi umi mbaʼe ko múndo oikuaveʼẽva rapykuéri. Ha upéicha jahechakuaa jaikohague yvytu rapykuéri ha japyta po nandi.

17. Mbaʼépa jajapovaʼerã jaiporu porã hag̃ua ñande rekove?

¹⁷ Jehová ñanderayhuetereígui oipota javyʼa ha jajapo iporãva. Ani ñande voi jaheka umi mbaʼe ñanembohasa asýtava (Eclesiastés 11:​9, 10). Mbaʼépa jajapovaʼerã ani hag̃ua oiko ñanderehe upéva? Ñañehaʼãvaʼerã jajapove Jehová servísiope. Ojapóma veinte áño rupi, peteĩ ermáno hérava Javier odesidivaʼerã ostudiátapa medisína térãpa ojapóta iprekursorádo. Haʼe heʼi: “Avyʼátaramo jepe aipohanohaguére hetápe, avyʼaitereive aipytyvõhaguére che rapichakuérape oikuaa hag̃ua Jehovápe. Ajapo rupi che prekursorádo avyʼaiterei. Ha ambyasy nañepyrũihague ymavéma”.

18. Mbaʼépa jahechakuaa Jesús ohasavaʼekuére ko Yvy ape ári?

¹⁸ Upéicharõ, mbaʼépa ñañehaʼãvaʼerã jahupyty? Eclesiastéspe heʼi voi: ‘Ñande réra iporãve umi mbaʼe ryakuã porãgui. Iporãve oñemanoha ára oñenaseha áragui’ (Eclesiastés 7:1). Upéva ningo jahechakuaa Jesús ohasavaʼekuére. Haʼe oĩ porã vaʼekue Jehová renondépe. Omano meve iñeʼẽrendu chupe. Upéicha ohechauka Jehová añoite ñanesãmbyhyvaʼerãha ha omano  ñanderehehápe ikatu hag̃uáicha jajesalva (Mateo 20:28). Jesús oikórõ guare ko Yvy ape ári, ohechauka mbaʼéichapa jaikovaʼerã javyʼa hag̃ua. Ha enterove ñañehaʼãvaʼerã jajapo upéicha (1 Corintios 11:1; 1 Pedro 2:21).

19. Mbaʼépa heʼivaʼekue Salomón jajapovaʼerãha?

¹⁹ Ñande avei ikatu ñaime porã Ñandejára renondépe, ha upéva iporãiteve jarekorangue heta mbaʼe (jaleemína Mateo 6:​19-21). Káda día ikatu jajapo umi mbaʼe iporãva Jehovápe renondépe. Pór ehémplo, ikatu ñamombeʼu ñande rapichakuérape pe marandu porã, jahayhuve ñane ména térã ñane rembirekópe ha ñane familiakuérape. Upéicha avei ikatu ñamombareteve ñande jerovia jastudiáramo la Biblia ñaneañohápe ha jaha meméramo rreunionhápe (Eclesiastés 11:6; Hebreos 13:16). Mbaʼépa jajapovaʼerã javyʼaséramo? Upéicharamo, jajapovaʼerã Salomón heʼíva koʼápe: ‘Ekyhyje Ñandejáragui ha ejapo heʼíva. Upéva niko tembiaporã tuichavéva oguerekóva yvypóra’ (Eclesiastés 12:13).

[Nóta]

Mbaʼépa ñambohováita?

• Mbaʼérepa ñapensa porã vaʼerã mbaʼépa jajapóta ñande rekovépe?

• Javyʼátapa jaikóramo umi vyʼarã ha mbaʼereta rapykuéri?

• Mbaʼeichagua tembiapópa ñanembovyʼáta?

• Mbaʼépa ñañehaʼãvaʼerã jahupyty ñande rekovépe?

[Porandu ñahesaʼỹijóva]

[Nóta oĩva taʼanga ndive páhina 29]

Ñamotenondevaʼerãpa ñande rekovépe umi vyʼarã?

[Nóta oĩva taʼanga ndive páhina 30]

Mbaʼérepa javyʼaite japredika jave?