Mbaʼe mbaʼépa ñanemboʼe Juan
Jehová Ñeʼẽ ningo oikove
Mbaʼe mbaʼépa ñanemboʼe Juan
JUAN ningo ‘pe temimboʼe Jesús ohayhuetéva’. Haʼe ohai pe último lívro omombeʼúva Jesús rekovekue (Juan 21:20, ÑÑB). Ko lívro ojehai áño 98 rupi ha heta mbaʼe oĩva ipype noĩri Mateo, Marcos ha Lucas kuatiañeʼẽme.
Apóstol Juan omombeʼu porã maʼerãpa ohai ko kuatiañeʼẽ. Haʼe heʼi: ‘Koʼãva katu oñemoĩ perovia hag̃ua Jesús haʼeha pe Cristo, Ñandejára Raʼy, ha peroviávo pereko hag̃ua pe tekove tapia g̃uarã héra rupi’ (Juan 20:31, BNP). Upéicharõ ko kuatiañeʼẽ katuete ñanepytyvõta (Hebreos 4:12).
‘KÓVA HAʼE ÑANDEJÁRA OVECHA RAʼY’
Ohechávo Jesúspe, Juan Bautista heʼi hese: ‘Kóva haʼe Ñandejára Ovecha Raʼy oipeʼáva yvyporakuéra pekádo’ (Juan 1:29, BNP). Upéi Jesús opredika Samaria, Galilea, Judea ha umi táva opytávape rrío Jordángui kuarahyresẽ gotyo. Haʼe omboʼe umi héntepe ha ojapo heta milágro. Upévare oĩ heta oúva hendápe ha ojeroviáva hese (Juan 10:41, 42).
Jesús ojapo peteĩ milágro tuichaitereíva omoingove jeýrõ guare Lázarope. Heta hénte ojerovia hese ohechávo omoingove jeyha pe kuimbaʼe cuatro día omano rire. Péro umi saserdóte ruvicha ha umi fariséo oñemoĩ peteĩ ñeʼẽme ojuka hag̃ua Jesúspe. Upévare haʼe ‘osẽ upégui ha oho peteĩ távape hérava Efraín’ (Juan 11:53, 54).
Porandukuéra:
1:35, 40. Mávapa Juan Bautista remimboʼe oĩvaʼekue Andrés ndive? Oiméne raʼe Juan, pe ohaivaʼekue ko kuatiañeʼẽ. Haʼe arakaʼeve ndeʼíri mbaʼéichapa héra, ha heʼi vove “Juan” katuete oñeʼẽ Juan Bautista rehe.
2:20. Mbaʼérepa umi hudío heʼi pe témplo oñemopuʼãhague ‘46 áñope’? Upérõ áño 30 ha oñembaʼapo gueteri upe témplore. Rréi Herodes Judeaygua ojapouka upe tembiapo. Heʼiháicha pe istoriadór Josefo haʼekuéra oñepyrũ ombaʼapo pe témplore Herodes ogovernávo 18 áñore, péva hína áño 18 térã 17 Jesús ou mboyve. Jepe umi párte iñimportantevéva ojejapopa ocho áñope, pe témplo ndojejapopái gueteri Pascua áño 30-pe.
5:14. Heʼiséparaʼe Jesús umi hénte hasyha opekahaguére? Nahániri, ndeʼiséi upéva. Pe kuimbaʼe Jesús omongueravaʼekue ningo 38 áñoma hasyhague ogueronase rupi pe imperfeksión (Juan 5:1-9). Péro Ñandejára oiporiahuvereko chupe ha upévare okuera. Haʼe osegivaʼerã pe tape porãre ha oñehaʼã anive opeka. Ndojapóiramo upéva oikóta hese peteĩ mbaʼe ivaivéva: ikatu ojapo peteĩ mbaʼe vai ikatuʼỹva oñeperdona. Ha omanóramo ndorekomoʼãvéima esperánsa (Mateo 12:31, 32; Lucas 12:10; Hebreos 10:26, 27).
5:24, 25. Mávapa umi ohasáva “ñemanógui jeikovépe”? Koʼápe Jesús oñeʼẽ umi Jehovápe oikuaaʼỹvare. Péro ohendu rire Jesúspe, ojerovia hese ha oheja hape vai. Ohasa “ñemanógui jeikovépe” oñeperdona ha oñemeʼẽ rupi chupekuéra esperánsa oikovetaha opa ára g̃uarã ojeroviáramo Ñandejárare (1 Pedro 4:3-6).
5:26; 6:53, [BNP]. Mbaʼépa heʼise ‘oikove ijehegui voi’? Jesús rehe ojeʼe jave upéva heʼise Ñandejára ohejaha chupe tojapo mokõi mbaʼe. Primero oipytyvõ yvyporakuérape oĩ porã hag̃ua Jehová renondépe, ha segundo omoingove jey umi omanovaʼekuépe. Jesús remimboʼekuérare ojeʼe jave katu heʼise ohupytytaha pe jeikove iporãvéva. Oĩ umi oñemoingove jeýva yvágape. Ha umi oikótava ko Yvy ape ári katu ohupytýta upe jeikove, ág̃a ohasávo pe pruéva paha Cristo ogoverna rire Mil áñore (1 Corintios 15:52, 53; Apocalipsis [Revelación] 20:5, 7-10).
6:64. Jesús oiporavórõ guare Judas Iscariótepe, oikuaámaparaʼe otraisionataha chupe? Ndoikuaaichéneraʼe. Péro un áño upe rire, áño 32-pe Jesús heʼi umi apóstolpe: “Peteĩva peẽ haʼe aña”. Oiméne upérõ Jesús ohecha ñepyrũ raʼe Judas iñañaha (Juan 6:66-71, JMP).
Mbaʼépa ñanemboʼe:
2:4. Upérõ ningo Jesús ojevautisáma. Upévare haʼe ontendeukase Maríape iñeʼẽrenduvaʼerãha Itúva yvagapeguápe añoite. Jesús oñepyrũ ramoite opredika, péro oikuaa porã mboy tiémpopa oreko ha arakaʼépa omanóta. Upévare ndohejái avave ojoko chupe, tahaʼe isy jepe raʼe. Iporãitétapa ñande jaservíramo péicha avei Jehovápe.
3:1-9, [BNP]. Nicodemo ningo “isrraelitakuéra ruvicha” ha pe ojapovaʼekue ohechauka ñandéve mokõi mbaʼe. Primero jahecha noñembotuichái, iñakãporã ha ohechakuaaha oikotevẽha Ñandejárare. Upévare ohechakuaa peteĩ karpintéro raʼy haʼeha Ñandejára remimbou. Entéro kristiáno tee koʼag̃agua oñehaʼãvaʼerã avei ani oñembotuicha. Segundo katu Nicodemo ohechakuaáramo jepe koʼã mbaʼe nomoirũi Jesúspe oĩ aja ko Yvy ape ári. Mbaʼérepa? Oiméne okyhyjégui hapicha yvypóragui, ndohejaséigui ipuésto umi hudío trivunálpe térã ohayhúgui pláta ha mbaʼerepy. Péva ohechauka ndajahejaivaʼerãha mbaʼeve ñandejoko ñamoirũ hag̃ua Jesúspe (Lucas 9:23).
4:23, 24. Ikatu hag̃uáicha jaadora Jehovápe haʼe oipotaháicha, jahechavaʼerã mbaʼépa heʼi la Biblia ha jaheja ijespíritu sánto ñanesãmbyhy.
6:27. Ñañehaʼã ‘tembiʼu oñehundiʼỹvare ha omeʼẽva jeikove opaʼỹva’ heʼise ñañehaʼãvaʼerãha ñañemoag̃uive Ñandejárare. Jajapóramo upéva javyʼáta (Mateo 5:3).
6:44. Jehová ñanderayhu ha upévare oipota ñañemoag̃ui itaʼýrare. Mbaʼéichapa ñanepytyvõ upearã? Predikasión rupive ha avei omeʼẽvo ijespíritu sánto ñanepytyvõva ñantende ha jajapo hag̃ua la Biblia heʼíva.
11:33-36. Jahechaukáramo mbaʼéichapa ñañeñandu ndeʼiséi ñanekangyha.
‘CHEMOIRŨ MEMÉKENA’
Hiʼag̃uívo Pascua arete áño 33-pe, Jesús oho jey Betániape. Nueve de nisán oike Jerusalénpe peteĩ vúrro ári, ha 10 de nisán katu oho témplope. Upépe oñemboʼe itúvape ha ojerure omombaʼeguasu hag̃ua Héra. Upe jave oñehendu yvágagui peteĩ ñeʼẽ heʼíva kóicha: “Ahechaukáma tuichaha ha ahechauka jevýne” (Juan 12:28).
Osena aja hikuái pe Pascua árape, Jesús oñemoñeʼẽ hemimboʼekuérape ha oñemboʼe hesekuéra. Upéi ojejagarra chupe, ojehusga ha ojejuka peteĩ yvyráre. Péro Ñandejára omoingove jey chupe.
Porandukuéra:
14:2. Mbaʼéichapa Jesús oho oprepara hemimboʼekuéra rendag̃ua yvágape? Ikatu hag̃uáicha oñemoingove jey chupekuéra yvágape, Jesús opresentavaʼerã itúvape isakrifísio repykue. Tekotevẽ avei oiko chugui rréi. Koʼã mbaʼe oiko rire ae ikatu oñepyrũ oñemoingove jey umi kristiáno ohótava yvágape (1 Tesalonicenses 4:14-17; Hebreos 9:12, 24-28; 1 Pedro 1:19; Revelación [Apocalipsis] 11:15.
19:11. Jesús oñeʼẽrõ guare Pilátope pe kuimbaʼe ontregavaʼekuére chupe, oñeʼẽparaʼe Judas Iscariótere? Oiméne Jesús oñeʼẽraʼe entéro umi oipotávare ojejuka chupe. Umíva apytépe oĩ Judas, ‘saserdóte ruvichakuéra ha upe Sanedrín’ ha umi ‘hénte’ ojeruréva ojepoi hag̃ua Barrabásgui (Mateo 26:59-65, JMP; Mt 27:1, 2, 20-22, BNP).
20:17. Mbaʼérepa Jesús heʼi María Magdalénape anive hag̃ua oñesaingo hese? Oiméne María oñesaingo Jesús rehe oimoʼãgui ojupíta yvágape ha ndaikatumoʼãvéima ohecha chupe. Upévare Jesús heʼi chupe opoi hag̃ua chugui ha toho tomombeʼu hemimboʼekuérape oikove jey hague.
Mbaʼépa ñanemboʼe:
12:36, [JMP]. Oiko hag̃ua ñandehegui “tesapeha raʼy”, térã japorohesape hag̃ua tekotevẽ jaikuaa porã Ñandejára Ñeʼẽ. Jaiporuvaʼerã jaikuaáva ñanohẽ hag̃ua umi héntepe pytũnguýgui ha ñaipytyvõ chupekuéra oñemoag̃ui hag̃ua Ñandejárare.
14:6. Jesucristo añoite ikatu ñanemoĩ porã Ñandejára ndive. Upearã jajeroviavaʼerã hese ha jajapo haʼe ojapohaguéicha (1 Pedro 2:21).
14:15, 21, 23, 24; 15:10. Jajapóramo Ñandejára rembipota, Haʼe ha Jesucristo ñanderayhúta (1 Juan 5:3).
14:26; 16:13. Jehová espíritu ñanemboʼe ha ñanepytyvõ ñanemanduʼa hag̃ua ñaaprendevaʼekue. Avei omyesakã ñandéve heta mbaʼe. Ikatu ñanepytyvõ jaikuaave hag̃ua, ñanearanduve, ñanembaʼerechakuaa ha ñaneakã porãve hag̃ua. Upévare jajerure meme vaʼerã Jehovápe ijespíritu sánto (Lucas 11:5-13).
21:15, 19. Jesús oporandu Pédrope ohayhuvépa chupe “koʼãvagui” térã umi pirágui. Péicha Jesús ohechauka Pédrope iñimportanteveha omoirũ meme chupe oiko rangue ombaʼapo péskape. Ha mbaʼépa ikatu jaʼe ñandejehe? Jalee aja Mateo, Marcos, Lucas ha Juan kuatiañeʼẽ, ñañehaʼãkena ñamombarete ñane mborayhu Jesús rehe ha ñamotenonde upéva ñande rekovépe. Ñamoirũ memékena chupe opa ára.