Ñañehaʼãkena ñambaʼapove Jehovápe g̃uarã apóstol Pablo ojapohaguéicha

“Hekoitépe niko añorairõ, ipahaite peve añani, ha ndajeíri che jeroviágui.” (2 TIM. 4:7.)

1, 2. Mbaʼépepa okambiavaʼekue Saulo de Tarso, ha mbaʼe tembiapo ijojahaʼỹvapa ojapo?

 SAULO de Tarso haʼevaʼekue peteĩ kuimbaʼe iñarandu ha ipyʼaguasúva. Upéicharamo jepe, oikovaʼekue umi mbaʼe vai hete ojaposéva rapykuéri (Efe. 2:3). Haʼe voi heʼivaʼekue, ‘yma che añeʼẽ vai Jesucrístore, apersegi ha ajaʼo umi hese ojeroviávape’ (1 Tim. 1:​13, ÑÑB).

² Upe rire Saulo tuichaiterei okambia. Ndojapovéi umi mbaʼe vai ojapovaʼekue ha oñehaʼã ‘oheka iporãva hapichakuérape g̃uarã, ohekarangue ijupe g̃uarãnte’ (1 Cor. 10:​33, BNP). Imbaʼeporãiterei avei ha ohayhu umi yma ndohayhuivaʼekuépe (jaleemína 1 Tesalonicenses 2:​7, 8). Haʼe ohai: ‘Oiko chehegui Ñandejára rembiguái. Che niko che michĩve umi imichĩvéva apytépe, ha oñemeʼẽ chéve pe marandu porã amombeʼu hag̃ua umi ndahaʼéivape hudío, umi mbaʼeta ijojahaʼỹva oúva Jesucrístogui’ (Efe. 3:​7, 8).

3. Mbaʼérepa ñahesaʼỹijovaʼerã apóstol Pablo ohasáva ha ohaivaʼekue?

³ Sáulope, ojekuaavaʼekue upe rire apóstol Pábloramo. Haʼe ningo hetaiterei mbaʼe ojapo Jehová servísiope (Hech. 13:9). Ñahesaʼỹijovaʼerã apóstol Pablo ohasáva ha ohaivaʼekue. Ha ñañehaʼãramo ñambaʼapove Jehovápe g̃uarã Pablo ojapohaguéicha ñañakãrapuʼãta iservísiope (jaleemína 1 Corintios 11:1; Hebreos 13:7). Koʼág̃a jahecháta mbaʼéichapa apóstol Pablo ehémplo ikatu ñanemomýi jastudia hag̃ua Ñandejára Ñeʼẽ ñaneaño. Avei, jahecháta mbaʼépa jajapovaʼerã jahayhuve hag̃ua ñande rapichakuérape ha ani hag̃ua ñañemombaʼeguasu.

Mbaʼéichapa ostudiavaʼekue apóstol Pablo?

4, 5. Mbaʼépa Pablo ikatuvaʼekue ojapo ostudia rupi Ñandejára Ñeʼẽ?

⁴ Pablo oikuaamavaʼekue Ñandejára Ñeʼẽ omboʼéva. Haʼe ningo fariséo vaʼekue ha ‘Gamaliel omboʼe chupe Moisés léi ha umi ñande ru ypykue heʼihaichaite’ (Hech. 22:​1-3; Fili. 3:​4-6). Ojevautisa riremi Pablo ‘oho Arábiape’, oiméne ojeikoʼỹha rupi ojepyʼamongeta hag̃ua (Gál. 1:17). Ikatu ningo, Pablo ojepyʼamongetase umi téysto ohechaukávare Jesús haʼeha pe Mesías oñeprometevaʼekue. Ha ojeprepara avei ojapo hag̃ua hembiapo (jaleemína Hechos 9:​15, 16, 20, 22). Péicha jahecha apóstol Pablo omboykehague itiémpo ojepyʼamongeta hag̃ua Ñandejára Ñeʼẽre.

⁵ Apóstol Pablo ostudia rupi oikuaa ha ontende porã Ñandejára Ñeʼẽ omboʼéva. Upévare oporomboʼekuaaitereivaʼekue. Peteĩ jave, oñeʼẽrõ guare peteĩ témplope, oĩva Antioquía de Pisídiape heta vése oiporu Ñandejára Ñeʼẽ. Pór ehémplo, ohechauka hag̃ua Jesús haʼeha pe Mesías oiporu cinco téysto Escrituras Hebréasgui. Ha omyesakã jave oñentende porãiterei. Upévare ‘heta umi Israelgua ha tetã ambueguáva, ojeroviavaʼekue Ñandejárare. Ha omoirũ Pablo ha Bernabépe’ oikuaasevégui Jehovápe (Hech. 13:​14-44, BNP). Tiémpo rire, umi hudío oikóva Rómape oho Pablo rendápe oĩhápe préso. Pablo ‘oñeʼẽ  chupekuéra Ñandejára Rréinore ha oñehaʼã omyesakã chupekuéra Jesús haʼeha pe Mesías. Upearã oiporu Moisés léi ha umi profetakuéra ohaivaʼekue’ (Hech. 28:​17, 22, 23, JMP).

6. Mbaʼépa oipytyvõ Páblope ohasárõ guare heta mbaʼe ijetuʼúva?

⁶ Ohasárõ guare heta mbaʼe ijetuʼúva, Pablo ohesaʼỹijovaʼekue Ñandejára Ñeʼẽ ogueropuʼaka hag̃ua (Heb. 4:12). Oĩramo guare kárselpe ha oikuaáramo jepe ojejuka potaitemaha chupe, ojerure Timotéope oguerahami hag̃ua chupe ‘umi kuatiañeʼẽ’ (2 Tim. 4:13). Oiméne hína umi Escrituras Hebreas haʼe oiporumivaʼekue ostudia hag̃ua. Katuete ningo Páblope oipytyvõneraʼe oaprendevaʼekue Ñandejára Ñeʼẽgui ojepytaso hag̃ua Jehová ykére.

7. Emombeʼumi mbaʼérepa restudiavaʼerã Ñandejára Ñeʼẽ koʼẽ koʼẽre.

⁷ Ñande avei koʼẽ koʼẽre jastudia ha jajepyʼamongetavaʼerã Ñandejára Ñeʼẽre. Upéicha ñañakãrapuʼãta Jehová servísiope (Heb. 5:​12-14). Pe salmísta ohaivaʼekue: ‘Che ahecharamove nde léi óro ha plátagui. Ne Ñeʼẽ chemoaranduve umi cherehe ndochaʼéivagui. Ndaguatáiva tape vaíre aiko hag̃ua ne Ñeʼẽ heʼihaichaite’. Péicha, pe salmísta ohechauka Ñandejára Ñeʼẽ iñimportantetereiha (Sal. 119:​72, 98, 101). Remboykémapa ne tiémpo restudia hag̃ua la Biblia? Releépa hína la Biblia koʼẽ koʼẽre ha rejepyʼamongeta hese ikatu hag̃uáicha rembaʼapove Jehovápe g̃uarã?

Upe rire ohayhu hapichakuérape

8. Mbaʼéichapa Saulo otratavaʼekue umi ndahaʼéivape irrelihiongua?

⁸ Sáulo ningo hudío, upévare oikuaamavaʼekue Ñandejárape. Haʼe ndojepyʼapyguasúi umi ndahaʼéiva irrelihionpeguáre. Péicha vaʼekue oiko mboyve chugui Jesús remimboʼe (Hech. 26:​4, 5). Saulo oĩvaʼekue umi hudío ndive ojukárõ guare hikuái Estébanpe. Ha oiméne oimoʼã oĩ porãiterei upe ojejapóva (Hech. 6:​8-14; 7:54–8:1). Ñandejára Ñeʼẽme heʼi: ‘Saulo otrata vai Jesucristo remimboʼekuérape. Oike mbaretépe hogakuérape ha oguenohẽ tyryryhápe kuimbaʼe ha kuñáme, ha ogueraha chupekuéra kárselpe’ (Hech. 8:3). Upéi katu ‘ipochyetereive hesekuéra, ha opersegi chupekuéra umi tetã ambue rupi jepe’ (Hech. 26:11).

9. Mbaʼépa oikorakaʼe Sáulore okambia hag̃ua?

⁹ Saulo oho Damáscope opersegi hag̃ua Jesús remimboʼekuérape. Upérõ Jesús ojechauka chupe. Ohechávo Ñandejára Raʼy omimbipaha, opyta hesatũ ha ndaikatuvéi ojapo mbaʼeve. Upe rire, Jehová omondo Ananíaspe omonguera hag̃ua Sáulope. Upe guive haʼe okambia, nopensavéima hapichakuérare ymaguaréicha (Hech. 9:​1-30). Oikóma chugui Jesús remimboʼe ha ohayhu opavavépe, Jesús ojapohaguéicha. Upévare oheja hembiapo vaikue ha oiko pyʼaguapýpe opavavéndi (jaleemína Romanos 12:​17-21).

10, 11. Mbaʼéichapa Pablo ohechauka ohayhuha hapichakuérape ipyʼaite guive?

¹⁰ Pablo ndahaʼéi oikosentevaʼekue pyʼaguapýpe hapichakuérandi. Haʼe ningo ohayhu chupekuéra ipyʼaite guive. Upéva ohechauka opredika rupi kyreʼỹme. Ñepyrũrã, ohovaʼekue Asia Menórpe opredika hag̃ua. Oĩramo jepe upépe heta oñemoĩva Pablo ha iñirũnguérare, haʼekuéra oipytyvõ umi  ipyʼaporãvape oiko hag̃ua chuguikuéra Jesús remimboʼe. Upe rire, oho jey voi hikuái Listra ha Icóniope, oĩramo jepe upépe ojukasemavaʼekue Páblope (Hech. 13:​1-3; 14:​1-7, 19-23).

¹¹ Upe rire, Pablo ha iñirũnguéra oho macedoniape opytáva Filípospe, opredika hag̃ua umi ipyʼaporãvape. Lidia, peteĩ kuña ndahaʼéiva hudía ohendu pe marandu porã ha oiko chugui Jesús remimboʼe. Upéi, Pablo ha Sílaspe ojegueraha mburuvichakuéra renondépe. Upépe oñembyepoti ha oñemoinge chupekuéra kárselpe. Upéicharamo jepe, Pablo opredika pe kársel rehe oñangarekóvape, ha ojevautisa haʼe ha ifamília (Hech. 16:​11-34).

12. Mbaʼépa omomýi Sáulope imbaʼeporã ha oporohayhu hag̃ua?

¹² Mbaʼérepa Saulo heta opersegi rire kristianokuérape ojerovia avei Jesúsre? Mbaʼépa omomýi chupe imbaʼeporã ha oporohayhu hag̃ua? Mbaʼérepa ojejukaséramo jepe chupe oipytyvõ hapichakuérape oikuaa hag̃ua Jehová ha Jesúspe? Pablo voi ombohovái: ‘Ñandejára katu cheporavovaʼekue yma, cherayhu rupi cherenoivaʼekue. Ha haʼe oipota rupi oikuaauka chéve Itaʼýra’ (Gál. 1:​15, 16, BNP). Jehová ningo oheja rei vaʼekue Páblope hembiapo vaikue, oiporiahuvereko ha ipyʼaporã hendive. Upéva omomýi chupe opredika hag̃ua hapichakuérape. Haʼe ningo ohaivaʼekue Timotéope: ‘Ñandejára cheporiahuvereko, Jesucristo ohechauka hag̃ua che rupive ipasiensiaha. Ha upéicha, ohechauka umi ojeroviáva Hese ikatuha oikove opa ára g̃uarã’ (1 Tim. 1:16).

13. Mbaʼérepa jahechaukavaʼerã jahayhuha ñande rapichakuérape, ha mbaʼéichapa ikatu jajapo upéva?

¹³ Jehová oheja rei avei ñandéve ñane rembiapo vaikue (Sal. 103:​8-14). Pe salmísta oporanduvaʼekue: “Nemanduʼátarõ ore rembiapo vaikuére, piko máva oñemoĩta nerenondépe?” (Sal. 130:3). Ñandejára nañandeporiahuverekóirire, ndaikatuivaʼerãmoʼã jaservi chupe ni jahupyty jeikove opaʼỹva. Péro Haʼe ohechauka ipyʼaporãitereiha. Upévare, jahechaukavaʼerã jahayhuha ñande rapichakuérape japredikávo ha ñamboʼévo chupekuéra Ñandejára Ñeʼẽ. Ha avei ñamokyreʼỹvaʼerã ñane ermanokuérape, Pablo ojapohaguéicha (jaleemína Hechos 14:​21-23).

14. Mbaʼéichapa ikatu rembaʼapove Jehovápe g̃uarã?

¹⁴ Pablo oñehaʼãvaʼekue oporomboʼe porãve Ñandejára Ñeʼẽ, ha Jesús ehémplo omokyreʼỹ chupe upearã. Jesucristo ohayhuetereivaʼekue yvyporakuérape, ha ohechauka upéva opredikávo marandu porã opavavépe. Haʼe heʼivaʼekue: ‘Heta pe ñemitỹngue, omonoʼõva katu mbovy. Upévare, pejerure pe kóga járape, tombou omonoʼõvaʼerã’ (Mat. 9:​35-38, BNP). Pablo ningo ndahaʼéi ojerurentevaʼekue Ñandejárape omboumi hag̃ua oipytyvõvaʼerã chupekuéra, haʼe voi opredika kyreʼỹme. Ha nde, ikatúpa rembaʼapove Jehovápe g̃uarã? Térã ikatúpa remohenda ne tiémpo repredikave hag̃ua ýrõ rejapo hag̃ua nde prekursorádo? Jahayhúkena ñande rapichakuérape ha ñaipytyvõ chupekuéra Ñandejára Ñeʼẽ rupive ikatu hag̃uáicha ohupyty jeikove opaʼỹva (Fili. 2:16).

Pablo noñemombaʼeguasuivaʼekue

15. Mbaʼe ehémplo iporãvapa omoĩ Pablo kongregasiónpe?

¹⁵ Pablo omoĩvaʼekue ñandéve ehémplo iporãva ojapóvo hembiapo kongregasiónpe. Oñemeʼẽramo jepe chupe heta hembiaporã, haʼe oikuaa nomereseiha ha ndahaʼeiha ikatupyrýgui oñemeʼẽva chupe. Ha oikuaa heta mbaʼe porã ohupytyha Ñandejára imbaʼeporã rupínte. Upéicha avei, ohechakuaavaʼekue oĩha ambue ermáno ikatupyrýva opredika hag̃ua. Ohupytýramo jepe heta mbaʼe porã kongregasiónpe, haʼe noñemombaʼeguasuivaʼekue (jaleemína 1 Corintios 15:​9-11).

16. Mbaʼéichapa Pablo ohechauka noñemombaʼeguasuiha oĩrõ guare omombaʼéva gueteri pe circuncisión?

¹⁶ Jahechamína mbaʼépa ojapo Pablo oĩrõ guare peteĩ provléma Antioquíape. Umi  kristiáno upepegua ojoavy oĩ rupi omombaʼéva gueteri pe circuncisión (Hech. 14:26–15:2). Pablo ningo opredika ñepyrũ vaʼekue umi hudioʼỹvape. Upévare ikatúkuri oñemoarandu chupekuéra ombohovái hag̃ua upe provléma (jaleemína Gálatas 2:​8, 9). Péro haʼe noñemombaʼeguasuivaʼekue. Upévare, ndaikatúirõ guare osolusiona upe provléma, haʼe oho pe Cuerpo Gobernante rendápe, oĩva Jerusalénpe osolusiona hag̃ua hikuái. Haʼekuéra ohendu upe oikovaʼekue ha odesidi mbaʼépa ojejapovaʼerã. Upéi omondo Páblope omombeʼu hag̃ua ojedesidivaʼekue (Hech. 15:​22-31). Pablo kyreʼỹme oñemoĩ ipoguypekuéra ha péicha ohechauka ‘omombaʼeha iñermanokuérape’ (Rom. 12:10b).

17, 18. a) Mbaʼépa Pablo oñanduvaʼekue umi ermánore? b) Mbaʼépa ojapovaʼekue umi ansiáno Efesoygua ndohechamoʼãvéima haguére Páblope ha mbaʼépa ñanemboʼe upéva?

¹⁷ Apóstol Pablo ningo noñemombaʼeguasúi ha ojeheʼa enterove ermanokuérare. Upévare ohaírõ guare umi Romayguápe, imanduʼa veinte ermánore. Chupekuéra ningo ndajaikuaaguasúi ha koʼápente jatopa herakuéra. Haʼekuéra iñeʼẽrenduvaʼekue Jehovápe. Upévare Pablo ohayhueterei chupekuéra (Rom. 16:​1-16).

¹⁸ Pablo ningo noñemombaʼeguasúi ha imbaʼeporãitereivaʼekue. Upéva omombarete umi kongregasiónpe. Oñembyaty rire umi ansiáno Efesoygua ndive, haʼekuéra ‘oañuã ha ohetũ Páblope, ombyasyeterei ndohechamoʼãvéima haguére chupe’. Pablo oñemombaʼeguasu ha ijargeleterei rire ndaiporimoʼãi ombyasýva chupe (Hech. 20:​37, 38).

19. Mbaʼéichapa ikatu jahechauka ñaneumildeha?

¹⁹ Ñañakãrapuʼã hag̃ua Jehová servísiope ñaneumildevaʼerã Pábloicha. Haʼe heʼivaʼekue iñermanokuérape: ‘Anítei pejapo mbaʼeve peñembotuichase térã peñorairõségui, peñemomirĩ guei, ha peguereko ambuekuérape mbaʼeguasuvérõ pendehegui’ (Fili. 2:​3, ÑÑB). Mbaʼéichapa ikatu jahechauka ñaneumildeha? Ñaipytyvõramo ansianokuérape, jajapo heʼíva ñandéve ha jarrespeta haʼekuéra odesidíva (jaleemína Hebreos 13:17). Ñamombaʼevaʼerã avei ñane ermanokuérape. Kongregasiónpe ningo oĩ jepi ermáno ambue tetãyguáva, ndahaʼéiva ñande pire kolór ha opaichagua tapicha. Jahayhúpa ñande rapichakuérape peteĩchapa Pablo ojapohaguéicha? (Hech. 17:26; Rom. 12:10a.) Ha Ñandejára Ñeʼẽ ñanemokyreʼỹ avei: ‘Pejoguerohorýkena, peñangareko porã ojuehe Cristo ojapohaguéicha penderehe, Ñandejárape oñemombaʼeguasu hag̃ua’ (Rom. 15:​7, JMP).

Ñañehaʼãmbaitékena jahupyty hag̃ua jeikove opaʼỹva

20, 21. Mbaʼépa ñanepytyvõta jahupyty hag̃ua jeikove opaʼỹva?

²⁰ Ñande servísio Jehovápe ikatu ñambojoja peteĩ tapicha oñanívare karréra puku. Upévare Pablo ohaivaʼekue: ‘Hekoitépe niko añorairõ, ipahaite peve añani, ha ndajeíri che jeroviágui. Ha koʼág̃a ahaʼarõhína Jesucristo, hués hekopeguáva, chemoĩ agoverna hag̃ua. Péro ndahaʼemoʼãi chévente chemoĩtava. Omoĩta avei opa umi ipyʼaite guive ohaʼarõvape haʼe ou jey’ (2 Tim. 4:​7, 8).

²¹ Jajapóramo apóstol Pablo ojapohaguéicha ikatúta ñañani jahupyty hag̃ua jeikove opaʼỹva (Heb. 12:1). Ñambaʼapo memékena Jehovápe g̃uarã ha upearã jastudiavaʼerã Ñandejára Ñeʼẽ ñaneaño, jahayhu ñande rapichakuérape ha ani ñañemombaʼeguasu.

Mbaʼépa rembohováita?

• Mbaʼépa Pablo ikatuvaʼekue ojapo ostudia rupi Ñandejára Ñeʼẽ?

• Mbaʼérepa jahayhuvaʼerã ñande rapichakuérape?

• Mbaʼépa nepytyvõta rehayhu hag̃ua nde rapichakuérape peteĩchapa?

• Mbaʼéichapa ñanepytyvõta Pablo ojapovaʼekue ñaneñeʼẽrendu hag̃ua ansianokuérape?

[Porandu ñahesaʼỹijóva]

[Nóta oĩva taʼanga ndive páhina 26]

Ñamombaretékena ñande jerovia Pablo ojapohaguéicha