Eservíkena Jehovápe nemitã aja

‘Nde katu ani arakaʼeve remboyke umi mbaʼe reikuaa ha reroviáva’ (2 TIM. 3:14.)

1. Mbaʼéichapa Jehová ohecha umi mitãrusu ha mitãkuñanguéra oservívape chupe?

 JEHOVÁ ningo omombaʼeterei umi mitãrusu ha mitãkuñanguéra oservíva chupe. Upévare ohaikavaʼekue peteĩ profesía oñeʼẽva hesekuéra. Pe salmísta heʼivaʼekue: ‘Ne retã oñekuaveʼẽne kyreʼỹme regovernaha tiémpope. Marangatúgui ningo rejajaipa, ha koʼẽtĩ guive nemoirũta mitãrusu ha mitãkuñanguéra ojajáiva ysapýicha’ (Sal. 110:​3, S.) Péicha jahecha mbaʼeichaitépa Jehová oguerohory ha omombaʼe umi mitãrusu ha mitãkuña oñehaʼãmbaitéva oservi chupe.

2. Mbaʼépa oñemokyreʼỹ jepi umi mitãrusu ha mitãkuñanguérape ojapo hag̃ua?

² Ha nde mitãrusu térã mitãkuña, reñemeʼẽmapa Jehovápe? Hetápe ningo hasy odesidi hag̃ua oñemeʼẽtapa Jehovápe. Umi empresário, ne amigokuéra, nde profesór, térã nde sy ha nde ru voi ikatu nemokyreʼỹ reiko hag̃ua pláta rapykuéri. Heta vése ko múndope ojeapoʼi umi mitãrusu odesidívape oservi Jehovápe. Péro haʼekuéra ohupyty hetave mbaʼe porã ha ovyʼave ojapohaguére upéicha (Sal. 27:4). Jahechamíta koʼã mbohapy porandu: Mbaʼérepa reservivaʼerã Jehovápe? Mbaʼépa nepytyvõta reservi hag̃ua Chupe kyreʼỹme oĩramo jepe oñeʼẽ vaíva térã oñemoĩva nderehe? Mbaʼe mbaʼépa ikatu rejapove Jehová servísiope?

Reservivaʼerã Jehovápe

3. Mbaʼépa ñañehaʼãvaʼerã jajapo ñamañávo Jehová rembiapokuére?

³ Mbaʼérepa reservivaʼerã Jehovápe? Apocalipsis (Revelación) 4:​11-pe heʼi: ‘Jehová, ore Jára, ndéve añoite opavave nembotuicha ha nemombaʼeguasuvaʼerã. Nde rejapo haguére opa mbaʼe, ha ne rembipota rupi oikovaʼekue opa mbaʼe oĩva’. Jehová ningo opa mbaʼe Apohare. Ajépa iporãite ko Yvy jaikoha! Jehová ojapovaʼekue umi yvyramáta, yvotykuéra, mymbakuéra, umi y guasu térã océano, kataráta, sérro ha hetaitereive mbaʼe neporãmbajepéva. Upévare pe salmísta ohaivaʼekue: “ko Yvy henyhẽ nerembiapokuégui” (Sal. 104:24). Jaagradesete ningo Jehovápe ñandeapo porãiterei haguére! Upéicha rupínte ningo ikatu javyʼa ha ñamombaʼe hembiapokue. Upévare ñamañávo Jehová rembiapokuére ñañehaʼãvaʼerã ñambaʼapove chupe g̃uarã.

4, 5. Mbaʼérepa Josué ojeroviavaʼekue Jehováre ipyʼaite guive?

⁴ Jaikuaa hag̃ua mbaʼérepa jaservivaʼerã avei Jehovápe, iporã jahechami Josué ohaivaʼekue omano mboyvemi: “Peẽ niko peikuaa porã pende pyʼaite guive Ñandejára omeʼẽhague peẽme opa umi mbaʼe porã haʼe heʼivaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe”. Mbaʼérepa Josué ojeroviavaʼekue Jehováre ipyʼaite guive? (Jos. 23:14.)

⁵ Josué imitãrõ guare oiko Egíptope, ha oiméne oikuaamavaʼekue Jehová heʼihague umi Israelguápe omeʼẽtaha chupekuéra ijyvyrã (Gén. 12:7; 50:​24, 25; Éxo. 3:8). Tuicha riréma, ohecha mbaʼéichapa Jehová oñepyrũ okumpli ipromésa umi Israelguápe. Ha oguenohẽ hag̃ua chupekuéra Egíptogui, ombou diez plága ha mbaretépe ojopy faraónpe opoi hag̃ua chuguikuéra. Josué ohasavaʼekue avei umi Israelgua ndive pe már Rojo, ha ohecha mbaʼéichapa faraón ha ijehérsito ojahogapa. Ohórõ guare hikuái pe desiértore hérava Sinaí, ‘tuichaitereíva ha oporomongyhyjéva’,  Josué ohecha mbaʼéichapa Jehová omeʼẽ umi Israelguápe opa mbaʼe oikotevẽva. Ni peteĩ nomanói uhéi ha ñembyahýigui (Deu. 8:​3-5, 14-16; Jos. 24:​5-7). Josué ohechavaʼekue avei mbaʼéichapa Jehová oipytyvõ chupekuéra oikérõ guare Canaánpe, ojagarra hag̃ua upe tetã Jehová oprometevaʼekue chupekuéra (Jos. 10:​14, 42).

6. Mbaʼépa nemokyreʼỹta reservise hag̃ua Jehovápe?

⁶ Josué oikuaa porã vaʼekue Jehová okumplihague ipromésa. Upévare heʼi: “Che ha maymáva che rogaygua romombaʼeguasúta Ñandejárape” (Jos. 24:15). Jehová ningo heta mbaʼe oprometevaʼekue okumplíma, ha oĩ gueteri neʼĩrava okumpli. Rejepyʼamongetávo koʼã mbaʼére nemokyreʼỹta reservi hag̃ua Jehovápe Josué ojapohaguéicha.

7. Mbaʼérepa tekotevẽ jajevautisa?

⁷ Remañáramo umi mbaʼe neporãmbajepéva Jehová ojapovaʼekuére, ha rejepyʼamongeta ipromésare, nemokyreʼỹta reñemeʼẽ hag̃ua Chupe ha rejevautisa. Oserviséva guive Ñandejárape tekotevẽ ojevautisa, Jesús ojapohaguéicha. Haʼe ningo oñepyrũ mboyve opredika ha oiko chugui Mesías, ohovaʼekue Juan el Bautista rendápe ojevautisa hag̃ua. Mbaʼérepa ojapo upéva? Jesús heʼi: “Che niko ndajuivaʼekue ko Yvy ári ajapo hag̃ua pe che aipotávante. Ajuvaʼekue katu ajapo hag̃ua che Ru, chembouvaʼekue, oipotáva” (Juan 6:38.) Jesús ojevautisárõ guare ohechauka oñemeʼẽha Itúvape ojapo hag̃ua hembipota (Mat. 3:​13-17).

8. Mbaʼérepa Timoteo odesidi omombaʼeguasu Jehovápe, ha mbaʼépa rejapovaʼerã nde avei?

⁸ Jahechamína Timoteo ohasavaʼekue. Haʼe imitã guive heta mbaʼéma oñemeʼẽ chupe ojapo hag̃ua Jehová servísiope. Mbaʼérepa Timoteo odesidivaʼekue omombaʼeguasu Ñandejárape? La  Bíbliape heʼi Timoteo ‘oaprende ha oñehekomboʼehague chupe oguerovia hag̃ua Ñandejára Ñeʼẽ’, upévare odesidi oservi Jehovápe (2 Tim. 3:14). Oiméne nde restudiáma Ñandejára Ñeʼẽ ha reguerovia umi mbaʼe reaprendéva Timoteo ojapohaguéicha. Upéicharõ, koʼág̃ama redesidivaʼerã mbaʼépa rejapóta. Mbaʼérepa nereñemongetái nde sy ha nde túva ndive umi mbaʼe rejaposévare? Haʼekuéra ha umi ansiáno kongregasionpegua, nepytyvõta rehechakuaa hag̃ua mbaʼépa heʼi la Biblia rejapovaʼerãha rejevautisa hag̃ua (jaleemína Hechos 8:12).

9. Mbaʼéichapa oñeñandúta nde rapichakuéra rejevautisáramo?

⁹ Rejevautisa rire, reñepyrũta reservi porãve Jehovápe. Upéicha rejapóramo, koʼág̃ama voi revyʼáta ha tenonderãme ikatúta reikove opa ára g̃uarã (Heb. 12:​2, 3). Rembovyʼáta avei ne famíliape oservímava Jehovápe ha ne amigokuéra kongregasionpegua. Péro iñimportantevéva hína rejevautisávo rembovyʼáta Jehovápe (jaleemína Proverbios 23:15). Upéicharamo jepe, oĩta nontendéiva mbaʼérepa redesidi remombaʼeguasu Jehovápe, ha oñepyrũne oñeʼẽ vai térã oñemoĩ voi nderehe. Péro nde ikatu regueropuʼaka koʼã mbaʼe ijetuʼúva.

Oĩramo oñeʼẽ vaíva umi mbaʼe redesidívare térã oñemoĩva nderehe

10, 11. a) Mbaʼépa ikatu oñeporandu ndéve redesidíramo reservi Jehovápe? b) Mbaʼéichapa rembohovaivaʼerã oñeporandúramo ndéve umi mbaʼe regueroviávare?

¹⁰ Redesidíramo reservi Jehovápe, ikatu nekompañerokuéra kolehiopegua, ne vesíno térã ne hentekuéra nontendéi mbaʼérepa rejapo upéva. Ikatu voi oporandu ndéve mbaʼérepa redesidi upéicha ha mbaʼépa reguerovia. Mbaʼéichapa rembohovaivaʼerã? Ñepyrũrã, reikuaa porã vaʼerã mbaʼépa repensa ha reñandu. Ha avei remyesakãta jave umi mbaʼe regueroviáva, iporãvéta rejapo Jesús ojapohaguéicha.

¹¹ Umi omoakãva hudiokuéra rrelihión oporandu Jesúspe oñemoingove jeýtapa umi omanovaʼekue. Haʼe ombohovái chupekuéra Ñandejára Ñeʼẽ rupive, ha oiporu umi téysto haʼekuéra ndohechakuaaivaʼekue (Éxo. 3:6; Mat. 22:​23, 31-33). Peteĩ mboʼehára oporandúrõ guare Jesúspe mbaʼépa pe iñimportantevéva Ñandejára oipotáva jajapo. Jesús  oiporu jey Ñandejára Ñeʼẽ ombohovái hag̃ua chupe, ha upe tapicha oagradesénte (Lev. 19:18; Deu. 6:5; Mar. 12:​28-34). Ohendúvo umi hénte mbaʼéichapa Jesús oporomboʼe ha oiporu Ñandejára Ñeʼẽ ‘ojoavypa hikuái oñeʼẽvo Jesúsre’, oĩ rupi ogueroviáva chupe ha ndogueroviáiva. Péro umi oñemoĩva hese ndaikatúi ojapo mbaʼeve ivaíva (Juan 7:​32-46). Upéicha avei, oñeporandúramo ndéve umi mbaʼe regueroviávare, reiporuvaʼerã Ñandejára Ñeʼẽ rembohovái hag̃ua Jesús ojapohaguéicha. Ha ehechauka ndepyʼaporã ha rerrespetaha nde rapichakuérape (1 Ped. 3:15). Oiméramo ndereikuaái mbaʼéichapa rembohováita oñeporandúva ndéve, ere porãnte rehekataha informasión oñeʼẽva upe témare. Upearã ikatu reiporu Índice de las publicaciones Watch Tower térã CD-ROM Watchtower Library. Ha rejeprepara porãramo, ‘reikuaáta mbaʼépa eréta mamo ombaʼe porandúvape’ (Col. 4:6).

12. Mbaʼérepa nanekangyivaʼerã rehasa asýramo?

¹² Ikatu oĩ otakýva nderehe oporandu rangue ndéve umi mbaʼe regueroviávare. Ani reheja upéva nemokangy, nemanduʼavaʼerã ko múndo oĩha Satanás poguýpe. Haʼe ningo ndaijaʼéi Ñandejárare (jaleemína 1 Juan 5:19). Ndaikatúi voi rehaʼarõ opavave oguerohory rejapóva. Ikatu oĩ oñemoĩva térã ‘oñeʼẽ vaíva nderehe’ (1 Ped. 4:4). Péro nemanduʼavaʼerã ndahaʼeiha ndénte rehasáva upéva. Jesucristo ohasa asy vaʼekue avei ojepersegi rupi chupe. Upéicha oikovaʼekue avei apóstol Pédrore. Haʼe ningo ohaivaʼekue: ‘Che pehẽnguekuéra ahayhuetéva, aníke pemombaʼe pehasáva. Upéva rangue, pevyʼavaʼerã pehasa asýramo peservi haguére Jesucrístope’ (1 Ped. 4:​12, 13).

13. Mbaʼérepa revyʼa vaʼerã oĩramo jepe ndepersegíva?

¹³ Reaguantáramo oĩ jave ndepersegíva térã oñemoĩva nderehe reservi haguére Jehovápe, revyʼavaʼerã. Mbaʼérepa upéva? Ko múndo ndeguerohorýramo heʼise reikoha Satanás oipotaháicha, ndahaʼéi Ñandejára oipotaháicha. Jesús heʼivaʼekue: “Aichejáranga peẽ opavave oñeʼẽ porãramo penderehe, upéicha ojapomivaʼekue avei pende ypykuéra umi [proféta guaʼu] rehe!” (Luc. 6:​26, JMP). Oĩramo ndepersegíva reservi haguére Jehovápe, upéva ohechauka porã ko múndo ha Satanás ipochyetereiha nderehe (jaleemína Mateo 5:​11, 12). Ha revyʼavaʼerã oĩramo oñeʼẽ vaíva nderehe remoirũ haguére Jesucrístope (1 Ped. 4:14).

14. Mbaʼépa ikatu rehupyty neñeʼẽrendúramo Jehovápe oĩramo jepe oñemoĩva nderehe?

¹⁴ Oĩ cuatro mbaʼe porã ikatúva rehupyty neñeʼẽrendu haguére Jehovápe oĩramo jepe oñemoĩva nderehe térã ndepersegíva. Primero, rehechauka reimeha Jehová ha Jesús ykére. Segundo, reaguantáramo remokyreʼỹta ermanokuérape. Tercero, umi ohecháva neñeʼẽrenduha Jehovápe oñemoag̃uiséta hese (jaleemína Filipenses 1:​12-14). Ha cuarto katu, rehecháta mbaʼéichapa Jehová nemombarete regueropuʼaka hag̃ua opa mbaʼe vai, ha péicha rehayhuvéta Chupe.

Ikatu rembaʼapove Jehovápe g̃uarã

15. Mbaʼépa ija porãiterei vaʼekue apóstol Páblope ojapo hag̃ua?

¹⁵ Apóstol Pablo imanduʼa opredikárõ guare  Éfesope ha heʼi: ‘Ija porãitereígui chéve, ambaʼapove Ñandejára rembiapópe’ (1 Cor. 16:​8, 9, BNP). Apóstol Páblope ija porãiterei vaʼekue opredika ha omboʼeve hag̃ua Ñandejára Ñeʼẽ upe távape. Ha ojapóvo upéva, hetaitereípe oipytyvõ oikuaa ha omombaʼeguasu hag̃ua Jehovápe.

16. Mbaʼeichagua tembiapópa 1919-pe Jesús omeʼẽ umi ohótavape yvágape?

¹⁶ Áño 1919-pe, Jesucristo omeʼẽ peteĩ tembiapo ijojahaʼỹva umi ohótavape yvágape (Rev. 3:8). Oñepyrũ hikuái opredika pe marandu porã ha kyreʼỹme omboʼe Ñandejára Ñeʼẽ hapichakuérape. Mbaʼépa ojehupyty ojapo haguére hikuái upéicha? Koʼág̃a, pe marandu porã ojepredikáma ko Yvy tuichakue javeve. Ha siete millones rupi oĩ ñande rapicha ohaʼarõva oiko opa ára g̃uarã Ñandejára múndo pyahúpe.

17. Mbaʼéichapa ikatu rembaʼapove Jehovápe g̃uarã?

¹⁷ Enterove kristiáno ningo ikatu ñambaʼapove Jehovápe g̃uarã. Umi ojapóva upéicha, kyreʼỹme opredika ha ovyʼave. Ha nde, mitãrusu térã mitãkuña, remombaʼepareína reipytyvõ haguére nde rapichápe oikuaa hag̃ua Jehovápe? (Mar. 1:​14, 15.) Repensámapa ikatuha rejapo prekursorádo auxiliar térã regular? Ikatu avei rembaʼapo Construcción de Salones del Réinope, Betélpe térã reservi misionéroramo. Enterove ñañehaʼãvaʼerã ñambaʼapove Jehovápe g̃uarã, jahechakuaágui oñehundipotaitemaha ko múndo aña, oĩva Satanás poguýpe. Ikatúpa rembaʼapove Jehovápe g̃uarã?

‘Peneñeʼẽrendúkena ha pehecháta Jehová ipyʼaporãha’

18, 19. a) Mbaʼéichapa Jehová oipytyvõvaʼekue Davídpe? b) Mbaʼéichapa jaikuaa David nombyasyihague arakaʼeve oservi haguére Jehovápe?

¹⁸ David ohaivaʼekue: ‘Peneñeʼẽrendúkena ha pehecháta Jehová ipyʼaporãha’ (Sal. 34:8). Rréi David imitãrõ guare, Jehová oñangareko hese ani hag̃ua mbaʼeve ojapo hese umi mymba ñarõ. Oipytyvõ avei chupe oñemoĩrõ guare Goliat rehe. Upéicha avei, oguenohẽvaʼekue chupe heta jejopy vaígui (1 Sam. 17:​32-51; Sal. 18, ñepyrũmbýpe). Jehová ningo ñanderayhueterei, upéva omomyivaʼekue Davídpe ohai hag̃ua: ‘Jehová, hetaite mbaʼe porãma niko rejapo. Ndaipóri ndeichagua’ (Sal. 40:​6, [40:​5, NM]).

¹⁹ David ningo ohayhuvaʼekue Jehovápe ipyʼaite guive ha omombaʼeguasuse chupe (jaleemína Salmo 40:​8-10). Haʼe nombyasýi arakaʼeve oservi haguére Jehovápe. Chupe g̃uarã iñimportanteve vaʼekue ojapo Jehová rembipota, ha upéva ombovyʼaiterei chupe. Ituja riréma ohaivaʼekue: “Nderehénte voi [Jehová] che mitã guive ajerovia. Koʼág̃a niko chetujáma ha che akã iñapatĩ, [Jehová], anítei chereja rei” (Sal. 71:​5, 18). Naimbaretevéimaramo jepe, David oñemoag̃uive Jehováre ha ojeroviave hese.

20. Mbaʼérepa umi oservíva Jehovápe ovyʼave?

²⁰ Josué, David ha Timoteo ohasavaʼekue, ohechauka porã javyʼaveha jaservíramo Jehovápe. Ko múndo oikuaveʼẽva ndaikatúi ñambojoja umi mbaʼe porã Jehová omeʼẽtavare isiervokuérape, oservíva chupe ‘ipyʼaite guive ha hiʼánga rugua guive’ (Jos. 22:5). Oimérõ neʼĩra gueteri reñemeʼẽ Jehovápe iporã reñeporandu: “Mbaʼépa chejoko ajapo hag̃ua upéva?”. Ha oimérõ rejevautisáma katu, revyʼasevépa? Upéicharõ, reñehaʼãvaʼerã rembaʼapove Jehovápe g̃uarã. Pe artíkulo oúvape rehecháta mbaʼéichapa ikatu rejapo upéva remañávo apóstol Pablo ehémplore.

Mbaʼépa ñambohováita?

• Emombeʼu mbaʼérepa jaservivaʼerã Ñandejárape.

• Mbaʼépa oipytyvõvaʼekue Timotéope odesidi hag̃ua oservi Jehovápe?

• Mbaʼérepa neñeʼẽrenduvaʼerã Jehovápe oĩramo jepe oñemoĩva nderehe?

• Mbaʼéichapa ikatu rembaʼapove Jehovápe g̃uarã?

[Porandu ñahesaʼỹijóva]

[Nóta oĩva taʼanga ndive páhina 23]

Jaservíramo Jehovápe javyʼavéta