Mbaʼéichapa jatratavaʼerã ñande rapichakuérape?

“Peipotaháicha opavave ojapo penderehe, upéicha avei pejapo peẽ opavave rehe.” (LUC. 6:​31, BNP.)

1, 2. a) Mbaʼépa hína pe Sermón del Monte? b) Mbaʼépa ñahesaʼỹijóta ko artíkulope ha pe oúvape avei?

 JESUCRISTO hína pe Mboʼehára Guasu. Péro oĩvaʼekue umi ndaijaʼéiva hese, ha upévare omondo hikuái soldádo ojagarra hag̃ua chupe. Koʼãva katu ndoguerahái Jesúspe ha heʼi: “Ndaipóriniko avave oñeʼẽva ko kuimbaʼe oñeʼẽháicha” (Juan 7:​32, 45, 46). Pe Sermón del Monte haʼehína peteĩ diskúrso iñimportantetereíva ojapovaʼekue Jesús. Upéva jatopa Mateo kapítulo 5 guive 7 peve. Ha Lucas 6:​20-49 oñeʼẽ avei upévare. *

² Oparupiete ningo ojekuaa pe Regla de Oro Jesús heʼivaʼekue idiskúrsope. Ko Regla de Oro ohechaukahína mbaʼéichapa jatratavaʼerã ñande rapichápe: “Peipotaháicha opavave ojapo penderehe, upéicha avei pejapo peẽ opavave rehe” (Luc. 6:​31, BNP). Ha hetaite mbaʼe porã Jesús ojapovaʼekue umi ñande rapichakuérare! Omonguera umi hasývape ha omoingove jey omanovaʼekuépe. Iñimportantevéva katu omombeʼu chupekuéra pe marandu porã. Ha umi iñeʼẽrenduvaʼekue ohupyty avei hetaiterei mbaʼe porã (jaleemína Lucas 7:​20-22). Ñande testigos de Jehová ñamombeʼu avei ñande rapichakuérape marandu porã, ha upéva ningo ñanembovyʼaiterei (Mat. 24:14; 28:​19, 20). Ko artíkulope ha pe oúvape avei ñahesaʼỹijóta Jesús heʼivaʼekue marandu porã ñemombeʼu rehe. Ha ñahesaʼỹijóta avei umi mbaʼe heʼivaʼekue Sermón del Móntepe ohechaukáva ñandéve mbaʼéichapa jatratavaʼerã ñande rapichakuérape.

Ñandepyʼaporãvaʼerã

3. Mbaʼépa ikatu jaʼe umi ipyʼaporãvare?

³ Jesús heʼivaʼekue: ‘Ovyʼaite umi ipyʼaporãva hapichakuéra ndive, oñemeʼẽvaʼerã chupekuéra ko Yvy imbaʼerãramo’ (Mat. 5:​5, ÑÑB). La Bíbliape peteĩ ipyʼaporãva ndeʼiséi ikangyha. Ñandepyʼaporãramo jajaposéta Ñandejára heʼíva. Ñanderorýta avei ñande rapichakuéra ndive. Upéicha rupi, peteĩ tapicha ipyʼaporãva ‘nomyengoviamoʼãi ivaíva ivaívape’ (Rom. 12:​17-19).

4. Mbaʼérepa ovyʼa umi ipyʼaporãva?

⁴ Umi ipyʼaporãva ovyʼa ‘oñemeʼẽta rupi chupekuéra ko Yvy’. Jesús ningo ‘ipyʼaporã ha ndaijejapói’, ‘ipoguýpe oñemoĩmba opa mbaʼe’. Upévare chupe oñemeʼẽ ko Yvy oisãmbyhy hag̃ua (Mat. 11:29; Heb. 1:​2, ÑÑB; Sal. 2:8). Péro ndahaʼéi chupénte oñemeʼẽva. La Biblia heʼimavaʼekue oĩtaha ogovernáva yvágape ‘yvypóra raʼy’ ndive (Dan. 7:​13, 14, 21, 22, 27). Umíva hína 144.000 yvypóra ojeporavovaʼekue, ha ipyʼaporãva avei. Chupekuéra ojeporavo ogoverna hag̃ua Jesucristo ndive yvágape (Rom. 8:​16, 17; Rev. 14:1). Oĩta avei heta ipyʼaporãva oikovétava opa ára g̃uarã ko Yvy ape ári Ñandejára Rréino ogoverna vove (Sal. 37:11).

5. Mbaʼépa oikóta ñandepyʼaporãramo Jesús ipyʼaporãhaguéicha?

⁵ Ñandeay guasúramo ñande rapichakuéra ndive, ikueráita ñandehegui ha ñanemboykéta. Péro ñandepyʼaporãramo Jesús ipyʼaporãhaguéicha, ñane ermanokuéra ovyʼáta ñanendive ha ñamokyreʼỹta chupekuéra. Avei, Ñandejára espíritu hína pe ñanembopyʼaporãva (jaleemína Gálatas 5:​22-25). Ha ñande ningo ñaimese umi ipyʼaporãva apytépe, jaipota avei Jehová ñanesãmbyhy ijespíritu rupive.

Ovyʼaiténingo umi oiporiahuverekóva hapichápe!

6. Mbaʼépa ojapo umi oiporiahuverekóva hapichápe?

⁶ Pe Sermón del Móntepe, Jesús heʼivaʼekue  avei: ‘Ovyʼavaʼerã umi oiporiahuverekóva hapichápe, ojeporiahuverekóta rupi chupekuéra’ (Mat. 5:7). “Umi oiporiahuverekóva hapichápe” ombyasy umi ohasa asývape ha otrata porã chupekuéra. Jesús ‘oiporiahuverekógui’ umi ohasa asývape ojapovaʼekue heta milágro (Mat. 14:14; 20:34). Ha ñande jaiporiahuvereko rupi ñande rapichápe ñanembaʼerechakuaáta hendivekuéra (Sant. 2:13).

7. Mbaʼépa ojapovaʼekue Jesús oiporiahuverekógui umi héntepe?

⁷ Peteĩ árape ningo Jesús opytuʼuse. Péro ohechávo peteĩ hénte aty ohohague hekávo ‘oiporiahuvereko chupekuéra, oĩgui ovecha herekuaʼỹvaicha, ha oñepyrũ omboʼe chupekuéra heta mbaʼe’ (Mar. 6:34). Upéicha avei ñande ñamombeʼu ñande rapichakuérape Ñandejára Rréino ojapótava ha mbaʼeichaitépa Ñandejára ñandeporiahuvereko. Ha javyʼaiténingo jajapohaguére upéicha!

8. Mbaʼérepa ovyʼa umi oiporiahuverekóva hapichápe?

⁸ Umi oiporiahuverekóva hapichápe ningo ovyʼa, ‘ojeporiahuverekóta rupi chupekuéra avei’. Jaiporiahuverekóramo ñande rapichápe, katuete haʼe avei ñandeporiahuverekóta (Luc. 6:38). Jesús heʼivaʼekue voi: “Peẽ peperdonáramo umi ojapo vaívape penderehe, pende Ru oĩva yvágape peneperdonavaʼerã avei” (Mat. 6:​14, BNP). Upeichaite ningo, Jehová oguerohory umi oiporiahuverekóvape hapichápe ha operdonáta chupekuéra hembiapo vaikue.

Mbaʼérepa ovyʼa “umi oporomoingo porãva”?

9. Mbaʼépa jajapóta ñaipytyvõséramo ñande rapichakuérape oiko porã hag̃ua oñondive?

⁹ Jesús oñeʼẽrõ guare umi mbaʼe porã ñanepytyvõtavare javyʼa hag̃ua, heʼi: “Ovyʼavaʼerã umi oporomoingo porãva, [Ñandejára] oguerekóta chupekuéra itaʼýra ha itajýraramo” (Mat. 5:9). Umi “oporomoingo porãva” oipytyvõ hapichakuérape oiko porã hag̃ua oñondive. Ha ñande jajapóramo upéicha, ‘nañamopuʼãmoʼãi oñoakãre umi ojoayhúvape’. Nañañeʼẽreimoʼãi ñande rapicháre, nañahendusemoʼãi avei umi iñeʼẽ reívape (Pro. 16:28). Ñañehaʼãta jaʼe ha jajapóva rupive ñaipytyvõ ñande rapichakuérape oiko porã hag̃ua oñondive, tahaʼe kongregasiónpe térã ambue hendápe (Heb. 12:14). Ha koʼýte ñañehaʼãta ñaime porã hag̃ua Jehová ndive (jaleemína 1 Pedro 3:​10-12).

10. Mbaʼérepa ovyʼa umi “oporomoingo porãva”?

¹⁰ Jesús heʼivaʼekue umi “oporomoingo porãva” ovyʼaha, ‘Ñandejára oguerekóta rupi chupekuéra itaʼýra ha itajýraramo’. Umi ohótava yvágape ojerovia rupi Jesucrístore ‘oikóta chuguikuéra Ñandejára raʼy’ (Juan 1:​12, BNP; 1 Ped. 2:24). Ha mbaʼépa oikóta ‘ambue ovechakuéragui’? Jesús ningo peteĩ Túvata chupekuéra g̃uarã Mil Áño aja. Upe tiémpope haʼe ogovernáta yvága guive umi iñirũnguéra ndive (Juan 10:​14, 16; Isa. 9:6; Rev. 20:6). Ha og̃uahẽ vove huʼãme umi Mil Áño, umi oiko porãva hapichakuéra ndive oikótama chuguikuéra Ñandejára raʼy (1 Cor. 15:​27, 28).

11. Mbaʼéichapa jaikóta ñande rapichakuéra ndive jahejáramo ‘Ñandejára arandu’ ñanerekomboʼe?

¹¹ Jaiko hag̃ua Jehová amígoramo, ñañehaʼãvaʼerã jajogua chupe opa mbaʼépe. Jehová ningo pe “oporombopyʼaguapýva”. Upévare jaiko porã vaʼerã ñande rapichakuéra ndive (Fili. 4:9). Jahejáramo ‘Ñandejára arandu’ ñanerekomboʼe, jaiko porãta ñande rapichakuéra ndive (Sant. 3:17). Ha ñaipytyvõramo ñande rapichakuérape oiko porã hag̃ua oñondive, javyʼáta katuete.

Lámparaicha jahesapevaʼerã opavave renondépe

12. a) Mbaʼéichapa heʼivaʼekue Jesús ñamyesakãha ñande rapichakuérape Ñandejára rembipota? b) Mbaʼéichapa koʼág̃a rupi japorohesapeñaína?

¹² Jahechamahaguéicha, jatrata porã vaʼerã ñande rapichakuérape. Péro iporãvétantema ñamyesakãramo chupekuéra Ñandejára rembipota (Sal. 43:3). Jesús heʼivaʼekue hemimboʼekuérape peteĩ ‘mbaʼe rendyichaha hikuái ko Yvy ape ári’. Heʼi avei chupekuéra peteĩ lámparaicha ‘ohesape hag̃ua opavave renondépe’, térã hapichakuéra ohecha hag̃ua hesekuéra hembiapo porãha. Ohesapéta hikuái “opavave renondépe” omyesakãvo hapichakuérape Ñandejára rembipota (jaleemína Mateo 5:​14-16). Koʼág̃a rupi, japorohesapeñaína ñaipytyvõ jave ñande rapichakuérape ikatumívape, ha jagueraha jave pe marandu porã “opa tetã  rupi” ko “Yvy jerekuévo” (Mar. 13:10; Mat. 26:13). Tuichaite mbaʼe ningo ñandéve g̃uarã upéva!

13. Mbaʼépa ohechakuaa ñande rapichakuéra ñanderehe?

¹³ Jesús heʼivaʼekue: “Peteĩ táva oĩva [sérro] ruʼãme niko ndaikatúi ndojehecháivo”. Mombyry guive ningo añete ojehecha peteĩ siuda oĩva peichahápe. Upéicha avei, ñamombeʼu jave pe marandu porã, ñande rapichakuéra ohechakuaa umi mbaʼe porã jajapóva, ñaneakãguapy ha ñande reko potĩha (Tito 2:​1-14).

14. a) Mbaʼeichagua lámparapa ojeporurakaʼe síglo primérope? b) Mbaʼérepa nañañomirivaʼerã pe jaikuaáva, ñamoĩrõguáicha peteĩ lámpara “mbaʼyru gúype”?

¹⁴ Jesús heʼivaʼekue oñemyendýramo peteĩ lámpara noñemoĩriha peteĩ mbaʼyru guýpe, oñemoĩ katu yvate ‘ohesape hag̃ua opa oĩvape peteĩ óga ryepýpe’. Umi lámpara síglo primérope guare ningo peteĩ mbaʼyru ojejapóva ñaiʼũgui, ha oñemoĩ pype aséite de olíva térã oimehaichagua aséite. Peteĩ mécha oipyte pe aséite ikatu hag̃uáicha hendy pe lámpara, ha oñemoĩ yvate peteĩ kandelérope. Ha umi kandeléro katu ojejapovaʼekue yvyra térã metálgui. Upéicha ojehesape hag̃ua umi oĩvape guive upe ógape. Avave ningo nomoĩmoʼãi pe lámpara peteĩ mbaʼyru guýpe (ko mbaʼyru ymaguare oreko nueve lítro rupi ha ojeporu oñemedi hag̃ua kogakuéra). Ha Jesús ndoipotaivaʼekue hemimboʼekuéra oñomi pe oikuaáva peteĩ lámpara oñemoĩrõguáicha “mbaʼyru guýpe”. Chupekuéra mbaʼeve ndojokoivaʼerã omyesakã porã hag̃ua Ñandejára rembipota. Upévare, aníkena ñañomi Ñandejára heʼíva, térã nañañeʼẽvéi hese oĩ rupi opuʼãva ñanderehe.

15. Mbaʼéichapa ñane rembiapo porãramo ñaipytyvõta ñande rapichakuérape?

¹⁵ Jesús oñeʼẽ rire pe lámparare, heʼi hemimboʼekuérape: “Péicha aveíke, peñehaʼã peẽ pehesape opavave renondépe. Ha haʼekuéra ohechávo pene rembiapo porãngue, omombaʼeguasúta pende Ru, yvágape oĩvape”. Oĩningo umi omombaʼeguasu ha oservíva Ñandejárape ohecha rire ñane rembiapo porãha. Upéva ñanemokyreʼỹ jasegi hag̃ua ‘ñamimbi ko múndope’ (Fili. 2:​15, BNP).

16. Ñande ningo peteĩ ‘mbaʼerendýicha ko Yvy ape ári’, mbaʼépa jajapovaʼerã upévare?

¹⁶ Ñande ningo peteĩ ‘mbaʼerendýicha ko Yvy ape ári’. Upéva rupi, ñañeʼẽvaʼerã ñande rapichakuérape Ñandejára Rréinore ha ñamboʼe chupekuéra. Péro jajapovevaʼerã peteĩ mbaʼe. Apóstol Pablo heʼivaʼekue: ‘Peiko aipóramo ojehesapehápe, upégui niko osẽ mbaʼe iporãva, hekopeguáva ha añetéva’ (Efe. 5:​8, 9, BNP). Ñande ningo ñande reko porã vaʼerã ojehechakuaa hag̃ua ñanderehe jaserviha Ñandejárape. Jajapovaʼerã apóstol Pedro heʼihaguéicha: ‘Peiko porã umi heko jeroviahaʼỹva apytépe. Upéicharõ haʼekuéra, oñeʼẽramo jepe koʼág̃a penderehe, peẽ mbaʼe vai apoharamoguáicha, ohechávo hikuái umi mbaʼe porãita pejapóva oguerohorýne Ñandejárape og̃uahẽvo ára haʼe oporandutaha chupekuéra hekovekuére’ (1 Ped. 2:12). Péro, mbaʼépa jajapovaʼerã ndajajoguerahaporãirõ peteĩ ermáno térã ermána ndive?

‘Eñemoĩ porã nde rapicha ndive’

17-19. a) Mbaʼépa hína pe jopói oñeʼẽha Mateo 5:​23, 24? b) Iñimportántepa ñañemoĩ porã jey ñane ermanokuéra ndive, ha mbaʼéichapa Jesús ohechaukavaʼekue upéva?

¹⁷ Pe Sermón del Móntepe, Jesús heʼivaʼekue hemimboʼekuérape ani  hag̃ua ipochy iñermanokuéra ndive ha ani hag̃ua oapoʼi chupekuéra. Heʼi avei chupekuéra oĩramo peteĩ ipochýva, pyaʼe oñemoĩ porã jey hag̃ua hendive (jaleemína Mateo 5:​21-25). Upévare, iporãta ñahesaʼỹijomíramo koʼág̃a Jesús heʼivaʼekue. Ñapensami ñande jaguerahahañaína peteĩ jopói pe témplope ha ñag̃uahẽvo, ñanemanduʼa sapyʼa peteĩ ermáno ipochyha ñanendive. Mbaʼépa jajapovaʼerã? Jahejavaʼerã upépe ñande jopói ha jaha ñañemoĩ porã raẽ hendive. Ñasolusiona rire ñane provléma, ikatu jaha jey ñameʼẽ hag̃ua ñande jopói.

¹⁸ Ko ‘jopói’ ningo haʼe peteĩ rregálo ojegueraháva témplope oñemeʼẽ hag̃ua Jehovápe. Umi Israelgua ningo katuete osakrifikavaʼerã mymbakuéra omombaʼeguasu hag̃ua Ñandejárape. Upéicha voi heʼi pe léi oñemeʼẽvaʼekue chupekuéra Moisés rupive. Péro, peteĩ isrraelíta imanduʼáramo iñermáno ipochyha hendive, upe jave iñimportantevehína oho osolusiona pe provléma, omeʼẽrangue ijopói. Jesús heʼivaʼekue: ‘Eheja nde jopói pe altár renondépe ha tereho nde rapicha rendápe. Eñemoĩ porã raẽ hendive ha upéi katu eju altárpe ha emeʼẽ nde jopói’. Péicha jahecha iñimportánteramo jepe umi isrraelíta ojapo ojejeruréva chuguikuéra pe léipe, iñimportanteve jey oñemoĩ porã hikuái iñermáno ndive.

¹⁹ Péro, ñanemanduʼavaʼerã Jesús ndeʼirihague mbaʼeichagua jopói térã pekádo rehépa oñeʼẽhína. Upévare, peteĩ isrraelíta ohejavaʼerã ijopói imanduʼáramo iñermáno ipochyha hendive. Oikuaveʼẽtaramo peteĩ mymba, ojukaʼỹre ohejavaʼerã “pe altár renondépe”, umi saserdotekuéra oĩhápe. Osolusiona rire iprovléma katu, ohokuaa jey ha omeʼẽ ijopói.

20. Mbaʼérepa pyaʼe ñasolusionavaʼerã ñane provléma peteĩ ermáno ndive?

²⁰ Ñandejára oguerohory hag̃ua jajapóva chupe g̃uarã, jajogueraha porã vaʼerã ñane ermanokuéra ndive. Yma ningo Israélpe Ñandejára nomombaʼeivaʼekue umi sakrifísio ojapóva chupe umi otrata vaíva hapichápe (Miq. 6:​6-8). Upévare Jesús heʼi jey jey hemimboʼekuérape tekotevẽha ‘oñehaʼã oñemoĩ porã’ iñermáno ndive (Mat. 5:25). Apóstol Pablo ohaivaʼekue avei: ‘Pendepochýramo, ani peʼa tembiapo vaípe. Ani peheja kuarahy oike jepe pendepochy poi hag̃ua. Ani pemeʼẽ lugár Añáme’ (Efe. 4:​26, 27). Ojapo vaíramo jepe ñanderehe ñande rapicha, pyaʼe ñasolusionavaʼerã pe provléma. Ndajajapóiramo upéicha, japytáta ‘ñandepochy’ ha Satanás ikatútama oiporu upéva ñanderehe (Luc. 17:​3, 4).

Ñamombaʼékena ñande rapichápe

21, 22. a) Mbaʼéichapa ikatu jajapo Jesús heʼivaʼekue? b) Mbaʼépa ñahesaʼỹijóta pe artíkulo oúvape?

²¹ Koʼã mbaʼe Jesús heʼivaʼekue pe Sermón del Móntepe ñanepytyvõvaʼerã ñandepyʼaporã hag̃ua ñande rapicha ndive ha ñamombaʼe hag̃ua chupe. Ñaneimperféktoramo jepe, ikatu jajapo Jesús heʼivaʼekue. Haʼe ni ñande Ru yvágape oĩva ndojeruremoʼãi ñandéve peteĩ mbaʼe ndaikatumoʼãiva jajapo. Jajeruréramo Jehovápe ñanepytyvõ hag̃ua ha ñañehaʼãmbaitéramo, ñandepyʼaporãta, japoroporiahuverekóta ha jaiko porãta ñande rapichakuéra ndive. Avei, ñamombaʼeguasúta Jehovápe, ha ñañemoĩ porã jeýta ñane ermanokuéra ndive jajoavy mbaʼéramo.

²² Upéicharõ, Ñandejára omombaʼe hag̃ua jajapóva chupe g̃uarã, jatrata porã vaʼerã ñande rapichápe (Mar. 12:31). Pe artíkulo oúvape ñahesaʼỹijovéta Jesús heʼivaʼekue pe Sermón del Móntepe. Umíva ñanepytyvõta avei jajapo hag̃ua iporãva. Jajepyʼamongeta rire umi mbaʼe porã Jesús heʼivaʼekuére, ñañeporandumivaʼerã: “Che piko atrata porã aína che rapichakuérape?”.

[Nóta]

Mbaʼéichapa ñambohováita?

• Mbaʼéichapa hína peteĩ ‘ipyʼaporãva’?

• Mbaʼérepa ovyʼa ‘umi oiporiahuverekóva hapichápe’?

• Mbaʼéichapa ikatu jahesape ñande rapichakuéra renondépe?

• Mbaʼérepa pyaʼe ñañemoĩ porã jey vaʼerã ñane ermáno ndive?

[Porandu ñahesaʼỹijóva]

[Nóta oĩva taʼanga ndive páhina 11]

Ñande ningo ñande reko porã vaʼerã ojekuaa hag̃ua ñanderehe jaserviha Ñandejárape