Ñañehaʼãkena jaiko Jehová heʼiháicha

‘Eñehaʼãkena eiko tekojojápe, mborayhúpe, pyʼaporãme, ne ñeʼẽrendu, ejerovia ha egueropuʼakakuaa.’ (1 TIM. 6:11, BNP.)

1. Mávarepa heʼi la Biblia oporomuña hague?

 NEMANDUÁPA mávarepa heʼi la Biblia oporomuña hague? Pór ehémplo, Moisés tiémpope faraón ha ijehérsito omuñavaʼekue umi Israelguápe, ha upéi ojahogapa hikuái már Rójope (Éxo. 14:23). Térã ikatu repensa yma peteĩ Israelgua ojukáramo hapichápe ojaposeʼỹre. Haʼe ningo pyaʼe ohovaʼerã okañy umi távape, oĩva voi okañy hag̃ua umi upéicha ojapóva. La Bíbliape heʼi mbaʼérepa okañyvaʼerã upépe: ‘Ikatu upe omanovaʼekue hénte ojukase pe oporojukavaʼekuépe, pochy pópe omuña, ohupyty ha ojuka chupe’ (Deu. 19:6).

2. a) Mbaʼe ndaijojaháivapa heʼi la Biblia ohupytytaha heta kristiáno? b) Mbaʼépa Jehová omoĩ ñane renonderãme jahupyty hag̃ua?

² Ñande ningo ikatu ñañehaʼã jahupyty heta mbaʼe ñande rekovépe. Pór ehémplo, apóstol Pablo heʼivaʼekue: ‘Añehaʼã ahupyty Ñandejára omeʼẽtava ñandéve yvágape Jesucristo rupive’ (Fili. 3:14). La Bíbliape heʼi oĩha 144.000 ohótava yvágape, oikovetaha hikuái opa ára g̃uarã ha oisãmbyhytaha Jesús ndive ko Yvy ape ári mil áño pukukue. Ndaijojahái ningo umi mbaʼe porã ohupytýtava hikuái! Upéicha avei koʼág̃a oĩ hetaiterei oñehaʼãva ohupyty jeikove opaveʼỹva peteĩ  hardínpe, ko Yvy ape ári. Jehová ningo ñanderayhuetereígui omoĩ ñane renonderãme jahupyty hag̃ua jeikove opaveʼỹva, Adán ha Eva omboykevaʼekue (Rev. 7:4, 9; 21:1-4).

3. Mbaʼéichapa ikatu jaagradese Jehovápe omeʼẽ haguére itaʼýra ñanderehehápe?

³ Enterove ningo ñaneimperfékto ha jajavy. Ha ndahaʼéi ñañehaʼã haguérente jahupytýtamava jeikove opaveʼỹva (Isa. 64:6). Jajeroviavaʼerã avei Jesús omeʼẽ hague hekove ñanderehehápe, upéicharõ añoite jahupytýta jeikove opaveʼỹva. Mbaʼéichapa ikatu jahechauka jaagradeseha Jehovápe omeʼẽ haguére itaʼýra omano hag̃ua ñanderehehápe? Ñaneñeʼẽrenduvaʼerã ko mbaʼépe: ‘Eñehaʼãkena eiko tekojojápe, mborayhúpe, pyʼaporãme, ne ñeʼẽrendu, ejerovia ha egueropuʼakakuaa’ (1 Tim. 6:11, BNP). Koʼápe ningo heʼise ñañehaʼãvaʼerãha jajapo koʼã mbaʼe. Upévare koʼág̃a jahecháta mbaʼéichapa jajapovaʼerã upéva ‘jahupyty’ hag̃ua jeikove opaveʼỹva (1 Tes. 4:1).

‘Ñanderekojojákena’

4. Mbaʼéichapa jaikuaa iñimportanteha ñanderekojoja, ha mbaʼépa tekotevẽ jajapo upearã?

⁴ Apóstol Pablo ohaírõ guare Timotéope, heʼivaʼekue chupe heta mbaʼe tekotevẽva ojapo. Ha dos vése voi heʼi chupe hekojojavaʼerãha. (1 Tim. 6:11; 2 Tim. 2:22). Avei oĩve heta téysto ñanemokyreʼỹva ñanderekojoja hag̃ua. Péicha jahechakuaa iñimportanteha jajapo upéva (Pro. 15:9; 21:21; Isa. 51:1). Ha upearã tekotevẽ ‘jaikuaa Jehová ha Jesucrístope’ (Juan 17:3). Umi upéicha ojapóva ikatúta oñembyasy ha ojevy hembiapo vaikuégui ojapo hag̃ua Jehová rembipota (Hech. 3:19).

5. Mbaʼépa ojapovaʼerã umi hekojojaséva, ha mbaʼéichapa ikatu jahechauka upéva?

⁵ Hetaiterei ningo oĩ ñande rapicha hekojojaséva, upévare oñemeʼẽ Jehovápe ha ojevautisa. Ha oimérõ rejevautisáma, rehechakuaápa akóinte reñehaʼãvaʼerãha nderekojoja? Upéva jahechaukavaʼerã opa mbaʼe jajapóvape. Ha la Biblia ñanepytyvõta jahechakuaa hag̃ua iporãva ha ivaíva jadesidíta jave. Upéicha jahechaukáta ñanderekojojaha (jaleemína Hebreos 5:14). Pór ehémplo, oiméramo remendase, rehechakuaápa naiporãiha reheka ne menarã térã ne rembirekorã peteĩ Jehovápe ndoservíriva? Rejapótapa Jehová heʼiháicha? Katuete rejapóta nderekojojasérõ (1 Cor. 7:39).

6. Mbaʼépa jajapovaʼerã ñanderekojoja hag̃ua?

⁶ Umi hekojojaséva ningo noñemombaʼeguasúi ha ndeʼíri ijehe ndojavyiha voi (Ecl. 7:16). Jesús heʼivaʼekue naiporãiha ñanderekojojaguaʼu jajechauka hag̃uánte (Mat. 6:1). Ñanderekojoja hag̃ua jaipeʼavaʼerã ñande pyʼapýgui umi mbaʼe vai jajaposéva. Upéva ñanepytyvõta ani hag̃ua jajapo ivaíva (jaleemína Proverbios 4:23; ñambojojami Santiago 1:14, 15-pe heʼívare). Ha Jehová ñanderovasáta ha ñanepytyvõta jaiko hag̃ua haʼe oipotaháicha.

 Jaservíkena Jehovápe ñande pyʼaite guive

7. Mbaʼépa heʼise “devoción piadosa”?

⁷ Peteĩ diccionario heʼi pe ñeʼẽ griégo ojetradusíva “devoción piadosa” heʼiseha “jajapo opa mbaʼe hekopete ani hag̃ua ñambopochy Ñandejárape”. Upéicharõ jahechakuaa “devoción piadosa” ndeʼiséi jajapontevaʼerãha Jehová heʼíva. Heʼise guei jahayhu, ñamombaʼe ha jaservi Chupe ñande pyʼaite guive. Yma katu umi Israelgua ndokyhyjéi Jehovágui. Haʼekuéra naiñeʼẽrendúi Chupe oguenohẽramo jepe chupekuéra Egíptogui.

8. a) Mbaʼe porandúpa oñembohovaivaʼerã Adán naiñeʼẽrendúi haguére? b) Mbaʼéichapa oñemyesakã upéva?

⁸ Adán ningo perféktoramo jepe, naiñeʼẽrenduivaʼekue Jehovápe. Upéicharõ, ikatútapa yvyporakuéra iñeʼẽrendu Ñandejárape opaite mbaʼépe? Hasy ningo upéva, opavave Adán ñemoñare iñimperfékto rupi. Upéicharõ mávapa ikatúne iñeʼẽrendu Jehovápe opaite mbaʼépe? Heta áño rire, Jehová voi omyesakã Iñeʼẽ rupive mávapa ikatúta ojapo upéva. Jehová omoĩ itaʼýra rekove María retepýpe, ha upéicha Jesús onase perfékto. Ha onase guive omano meve ohechauka ohayhuha Jehovápe ipyʼaite guive, omombaʼe ha iñeʼẽrendu chupe opaite mbaʼépe. Avei oñemboʼe jave ohechaukavaʼekue omombaʼeha ipyʼaite guive Jehovápe (Mat. 11:25; Juan 12:27, 28). Upévare, apóstol Pablo ohaivaʼekue Ñandejára espíritu rupive Jesús haʼeha peteĩ ehémplo iporãva ñandéve g̃uarã (jaleemína 1 Timoteo 3:16).

9. Mbaʼéichapa ikatu jahechauka jaserviha Jehovápe ñande pyʼaite guive?

⁹ Ñande ningo enterovéva ñaneimperfékto ha ndaikatúi jajapo opaite mbaʼe Jehová heʼihaichaite. Péro ikatu ñañehaʼã jaservi Jehovápe ñande pyʼaite guive, ha ñaneñeʼẽrendu Chupe koʼẽ koʼẽre. Upearã, ñañehaʼãvaʼerã jajapo Jesús ojapo haguéicha (1 Ped. 2:21). Ha ndovaléi ñanerovamokõi, ha ñaneñeʼẽrenduguaʼu jajechauka hag̃uánte (2 Tim. 3:5). Péro upéva ndeʼiséi ndaikatuiha jahechauka jaserviha Jehovápe ñande pyʼaite guive. Pór ehémplo, jaiporavóta jave mbaʼépa ñamondéta jahechaukavaʼerã ñamombaʼeha Jehovápe (1 Tim. 2:9, 10). Avei jajapóramo Jehová heʼíva opaite mbaʼépe, jahechaukáta ñaneñeʼẽrendu ha jaserviha Chupe ñande pyʼaite guive.

Ñamombaretékena ñande jerovia

10. Mbaʼépa jajapovaʼerã ñamombarete hag̃ua ñande jerovia?

¹⁰ Jaleemína Romanos 10:17. Ñamombarete hag̃ua ñande jerovia pyʼỹi jajepyʼamongetavaʼerã Ñandejára Ñeʼẽre. Upearã jareko lívro, rrevísta ha hetave mbaʼe ojapovaʼekue ‘tembiguái jeroviaha ha iñarandúva’. Umíva apytépe jareko El hombre más grande de todos los tiempos, Ñaaprende Mboʼehára Guasúgui ha “Ven, sé mi seguidor”. Koʼã mbohapy lívro ojejapo jaikuaa porãve hag̃ua Jesucrístope ha ñañehaʼã hag̃ua jaservi Jehovápe haʼe ojapo haguéicha (Mat. 24:45-47). Pe ‘tembiguái jeroviaha’ oprepara avei umi rreunión ha aty guasu. Upépe oñeñeʼẽ Jesús ohasa ha ojapovaʼekuére. Epensamína, mbaʼépa ikatu rejapo  koʼã mbaʼe ideprovechove hag̃ua ndéve? (Heb. 2:1.)

11. Mbaʼépa ñanepytyvõta avei ñamombarete hag̃ua ñande jerovia?

¹¹ Ñañemboʼéramo ñamombaretéta avei ñande jerovia. Peteĩ jey, Jesús remimboʼekuéra ojerure chupe: ‘Emombaretemína ore jerovia’ (Luc. 17:5, JMP). Ñande avei jajerurékena Jehovápe omombarete hag̃ua ñande jerovia ijespíritu rupive (Gál. 5:22). Ikatu avei ñamombarete ñande jerovia jajapóramo opa mbaʼe Ñandejára ojeruréva ñandehegui. Upévare ñañehaʼãkena japredikave, ha upéicha katuete javyʼavéta. Avei jajepyʼamongetavaʼerã umi mbaʼe porã jahupytýtavare. Upéicha ñamotenondéta ‘Ñandejára rréino ha jajapóta hembipota’ (Mat. 6:33, BNP).

Jahayhúkena ñane ermanokuérape

12, 13. a) Mbaʼépa Jesús heʼivaʼekue jajapovaʼerãha? b) Mbaʼéichapa ikatu jahechauka jahayhuha ñane ermanokuérape?

¹² Jaleemína 1 Timoteo 5:1, 2. Pablo omeʼẽvaʼekue heta konsého ñanepytyvõtava jahayhu ha jatrata porã hag̃ua ñane ermanokuérape. Ñaneñeʼẽrendu ha jaservíramo Jehovápe ñande pyʼaite guive ndahasymoʼãi ñandéve jajapo hag̃ua Jesús heʼivaʼekue: “Pejoayhúkena. Che pohayhu haguéicha” (Juan 13:34). Apóstol Juan heʼivaʼekue: ‘Pe oguereko hetáva ha ndoiporiahuverekói iñermáno oguerekoʼỹvape, mbaʼéicha piko heʼíta oporohayhuha’ (1 Juan 3:17). Nemanduʼápa mbaʼérõ guarépa reipytyvõ ne ermánope?

¹³ Ñaperdonáramo ñane ermanokuérape jahechaukáta avei jahayhuha chupekuéra ha nañandepyʼaroiha (jaleemína 1 Juan 4:20). Jajapókena Jesús heʼi haguéicha: ‘Peñoaguantákena ha peheja rei ojupe oimérõ pendepochy. Ñandejára oheja rei haguéicha peẽme pene rembiapo vaikue peheja rei avei peẽ pende rapichakuérape’ (Col. 3:13). Oimérõ ndepochy peteĩ ermánore, reñehaʼãpa reperdona chupe Jesús heʼi haguéicha?

Jagueropuʼakákena opa mbaʼe

14. Mbaʼépa ñanemboʼe umi ermáno Filadelfiaygua ohasavaʼekue?

¹⁴ Heta vése ijetuʼu ñahaʼarõ hag̃ua peteĩ mbaʼe ndoikopyaʼemoʼãiva. Upévare heta mbaʼe jagueropuʼakavaʼerã jahupyty hag̃ua jeikove opaʼỹva. Jesucristo ningo heʼivaʼekue umi ermáno Filadelfiayguápe: ‘Haʼékuri ndéve regueropuʼaka hag̃ua, ha upéicha rejapo. Upévare añangarekóta nderehe pe jehasa asy guasu árape’ (Rev. 3:10, BNP; nóta). Koʼápe Jesús heʼi tekotevẽha jagueropuʼakakuaa jahasa asy jave, upéicharõ añoite nañanekangymoʼãi. Umi ermáno Filadelfiaygua oiméne ogueropuʼakáraʼe heta mbaʼe ijerovia rehehápe. Upévare Jesús opromete oipytyvõtaha chupekuéra ombohovái hag̃ua umi mbaʼe ijetuʼúva ohaʼarõva chupekuéra (Luc. 16:10).

15. Mbaʼépa Jesús omokyreʼỹvaʼekue hemimboʼekuérape ojapo hag̃ua?

¹⁵ Jesús oikuaamavaʼekue hemimboʼekuérape ndohayhumoʼãiha umi hogayguakuéra ha opavave ndojeroviáiva Jehováre. Upévare omokyreʼỹ hag̃ua chupekuéra heʼi: ‘Upe ogueropuʼakáva ipahaite peve ojesalváta’ (Mat. 10:22; 24:13, ÑÑB). Jesús heʼi avei mbaʼépa oipytyvõta chupekuéra ogueropuʼaka hag̃ua opa mbaʼe ijetuʼúva. Ha peteĩ jey  ombojoja itatýre ‘umi ohendúva Ñandejára Ñeʼẽ ha ogueroviáva torypápe’, péro ojepyʼaraʼã vove ndogueropuʼakái. Upéicha avei ombojoja yvy porãre umi iñeʼẽrendúvape Ñandejára Ñeʼẽme ha ogueropuʼakáva opa mbaʼe ijetuʼúramo jepe (Luc. 8:13, 15, BNP).

16. Mbaʼépa ñanepytyvõta jagueropuʼaka hag̃ua opa mbaʼe?

¹⁶ Rehechakuaápa mbaʼépa jajapovaʼerã jagueropuʼaka hag̃ua? Jajapovaʼerã Ñandejára Ñeʼẽ heʼíva ha jajepyʼamongeta meme hese. Upearã ñanepytyvõ Traducción del Nuevo Mundo de las Santas Escrituras, ojetradusíva hetaiterei ñeʼẽme, ndahasýiva ñantende hag̃ua ha ikatúva jajerovia heʼívare. Jajepyʼamongetáramo Ñandejára Ñeʼẽre káda día ikatúta jagueropuʼaka opa mbaʼe ijetuʼúva (Sal. 1:1, 2).

Ñandepyʼaporã ha ñandepyʼaguapýkena

17. a) Mbaʼérepa ñandepyʼaporãvaʼerã? b) Mbaʼéichapa Jesús ohechaukavaʼekue ipyʼaporãha?

¹⁷ Avavépe ningo nañandegustái oñeñeʼẽ rei ñanderehe. Oĩ voi ipochyetereíva oikuaávo oñeñeʼẽ vaiha hese. Upévare, iporãvéta ñambohovái pyʼaporãme (jaleemína Proverbios 15:1). Péro upearã jajejokokuaavaʼerã. Ha Jesús voi ohechauka mbaʼépa jajapovaʼerã oĩ jave oñeʼẽ vaíva ñanderehe. La Bíbliape heʼi Jesúsre: ‘Oñeñeʼẽ pohýiramo chupe, okirirĩ. Oĩramo ombohasa asýva chupe noñeʼẽvaíri hese, ohejánte guei Ñandejára pópe, upe oporohusgáva hekoitépe’ (1 Ped. 2:23, ÑÑB). Ndaikatumoʼãiramo jepe ñandepyʼaporã Jesús ojapo hagueichaite, ikatu ñañehaʼã káda día ñandepyʼaporãve.

18. a) Mbaʼépa jahupytýta ñandepyʼaporãramo? b) Mbaʼe jajapo hag̃uápa ñanemokyreʼỹ avei la Biblia?

¹⁸ Ñaimékena ñambohovái hag̃uáicha pyʼaporãme opavave oporandúvape ñandéve ñande jeroviáre, Jesús ojapo haguéicha (1 Ped. 3:15). Jajoavýramo ñande rapichándi predikasiónpe térã peteĩ ermánondi, ñandepyʼaporãvaʼerã ani hag̃ua jaiko vai hendivekuéra (2 Tim. 2:24, 25). Upeichaite, ñandepyʼaporãramo ikatúta jaiko porã opavavéndi. Oiméne upévare apóstol Pablo ohaírõ guare Timotéope heʼi ñañehaʼãvaʼerãha ñandepyʼaguapy (2 Tim. 2:22; ñambojojami 1 Timoteo 6:11-re). Upeichaite, la Biblia ñanemokyreʼỹ ñandepyʼaguapy hag̃ua (Sal. 34:14; Heb. 12:14).

19. Mbaʼépa ñañehaʼãvaʼerã jajapo jastudia rire ko artíkulo?

¹⁹ Ko artíkulope ñanemokyreʼỹ jaiko hag̃ua hekopete, mborayhúpe, pyʼaguapýpe, ñandepyʼaporã, ñaneñeʼẽrendu, jajerovia ha jagueropuʼakakuaa hag̃ua. Ñañehaʼãramo jajapo upéicha, ñaipytyvõta ñane kongregasiónpe, ha iporãveha katu ñamombaʼeguasúta Jehovápe. Upéicharõ haʼe ikatúta ñanerekomboʼe jaservi porãve hag̃ua chupe.

Ñambohovaimi koʼã porandu

• Mbaʼépa heʼise ñanderekojoja, ha jaservi Jehovápe ñande pyʼaite guive?

• Mbaʼépa ñanepytyvõta jajerovia ha jagueropuʼakakuaa hag̃ua?

• Mbaʼérepa jahayhu ha jatrata porã vaʼerã ñane ermanokuérape?

• Mbaʼérepa tekotevẽ ñandepyʼaporã ha ñandepyʼaguapy?

[Porandu ñahesaʼỹijóva]

[Nóta oĩva taʼanga ndive páhina 13]

Jesús heʼivaʼekue naiporãiha ñanderekojojaguaʼu jajechauka hag̃uánte

[Nóta oĩva taʼanga ndive páhina 14]

Ñamombaretékena ñande jerovia jajepyʼamongetávo Ñandejára Ñeʼẽre

[Nóta oĩva taʼanga ndive páhina 16]

Ñañehaʼãkena jajoayhu ha ñandepyʼaporã