Ñañemoĩkena Jehová poguýpe
Ñañemoĩkena Jehová poguýpe
‘Jahayhúramo Ñandejárape jajapóta Haʼe heʼíva. Ha umi mbaʼe haʼe ojeruréva, ndaipohýiri.’ (1 JUAN 5:3.)
1, 2. a) Mbaʼépa ojeʼe koʼág̃a rupi umi mburuvichakuérare? b) Añetehápepa ojapo ojaposévante umi oikóva iñakãre?
KOʼÁG̃A rupi ndaiporiguasuvéi iñeʼẽrenduséva umi mburuvichakuérape. Ñahendu jepi ojeʼe “Che naikotevẽi avave heʼi chéve mbaʼépa ajapovaʼerã”. Péro añetehápepa ojapo ojaposévante umi oikóva iñakãre? Ndaupeichaiete, haʼekuéra ningo ojapo hapichakuéra ojapóvante avei. Ha upéicha oiko hikuái ‘ko múndope ojeikoháicha’ (Rom. 12:2, JMP). Apóstol Pedro heʼivaʼekue voi hesekuéra ‘oikoha hete rembipota rapykuéri’ (2 Ped. 2:19). Ha péicha ‘oiko hikuái yvypóra aña oikoháicha, ojapo ko múndo jára [Satanás] oipotáva’ (Efe. 2:2).
2 Peteĩ eskritór heʼi: “Che ndahejái avave odesidi cherehe. Tahaʼe che ru, che sy, paʼikuéra, umi omoãkáva ambue rrelihión térã Ñandejára Ñeʼẽ”. Heta tapicha ningo oĩ oporotrata vaíva, upévare ijetuʼu ñañemoĩ hag̃ua ipoguýpe. Péro heʼisépa upéva iporãveha jaiko ñane akãre? Ñamañáramo umi diariokuérare jahecháta ivaiha jaiko upéicha. Ha ñambyasyete ningo koʼã tiémpo ijetuʼuetévape oĩ haguére heta ndoipotáiva oñepytyvõ chupekuéra.
Mbaʼéichapa jahechavaʼerã umi mburuvichakuérape
3. Mbaʼéichapa ohechauka umi kristiáno ypykue naiñeʼẽrenduiha mburuvichakuérape opa mbaʼépe?
3 Ñande ndajahechái umi mburuvichakuérape ko múndope ojehechaháicha. Péro upéva ndeʼiséi ñaneñeʼẽrendutaha chupekuéra opa mbaʼépe. Sapyʼánte ndovaléi jajapo haʼekuéra heʼíva. Jahechamína mbaʼépa oikovaʼekue umi Kristiáno ypykuére. Pe saserdóte guasu ha umi ambue Sanedrinpegua heʼi chupekuéra anive hag̃ua opredika. Péro umi apostolkuérape g̃uarã iñimportanteve iñeʼẽrendu Ñandejárape mburuvicháramo kuimbaʼépe rangue (jaleemi Hechos 5:27-29).
4. Mbaʼe ehémplopa jatopa Ñandejára Ñeʼẽme?
4 Ñandejára Ñeʼẽme jatopa oĩ hague heta tapicha iñeʼẽrendúva Jehovápe opa mbaʼépe. Pór ehémplo, Moisés ‘ndoikoseivaʼekue Faraón rajy membýramo. Oiporavo guei ohasa asy ipehẽnguekuéra ndive’. ‘Ombopochýramo jepe pe mburuvicha guasúpe’ (Heb. 11:24, 25, 27). Avei, José nopenaivaʼekue Potifar rembirekóre oñenosérõ guare hendive. Oikuaáramo jepe ikatuha oñevenga hese (Gén. 39:7-9). Ha Daniel katu ndoʼúi umi tembiʼu pe rréi omoĩvaʼekue henondépe. Upéva ndogustáiramo jepe umi mburuvichakuéra Babiloniayguápe, orrespeta hikuái Daniel heʼíva. (Dan. 1:8-14). Koʼã tapicha oñemoĩvaʼekue Ñandejára poguýpe, ohasa asýramo jepe. Haʼekuéra ningo nomboykéi Jehovápe opyta porã hag̃ua hapichakuérandi. Ha jajapókena avei ñande upéicha.
5. Mbaʼéichapa jahechavaʼerã umi mburuvichakuérape?
5 Ñande ningo nañañemoĩri ha nañapuʼãi mburuvichakuérare, ko múndope ojejapoháicha. Ñande jaikuaa porã ñañemoĩvaʼerãha Jehová poguýpe. Péro umi mburuvichakuéra heʼíramo ñandéve jajapo hag̃ua peteĩ mbaʼe Jehovápe ndogustáiva, ni mbaʼevéicharõ ndajajapói. Umi apostolkuéra ojapo haguéicha, ñaneñeʼẽrendu avei Jehovápe kuimbaʼépe rangue.
6. Mbaʼérepa iporãve ñaneñeʼẽrendu Jehovápe opa mbaʼépe?
6 Mbaʼépa ñanepytyvõta ñañemoĩ hag̃ua Jehová poguýpe? Jajapovaʼerã Proverbios 3:5, 6 heʼíva: ‘Ejeroviákena Jehováre ndepyʼaite guive, ha ani ndejehénte. Nemanduʼáke hese opaite mbaʼépe, ha Haʼe omyesakãta ndéve nde raperã’. Jaikuaa porã ningo jajapóramo Jehová heʼíva, ñasẽ porãtaha katuete (jaleemi Deuteronomio 10:12, 13). Ha Jehová voi heʼi umi Israelguápe: ‘Che rohekomboʼe ha ahechauka ndéve nde raperã’. Ha heʼive: ‘Rejapysaka porãramo che Ñeʼẽre ha neñeʼẽrendu, nderekojojáta ha ndepyʼaguapýta’ (Isa. 48:17, 18). Ñande jaguerovia Jehová okumplitaha upe heʼíva. Upévare, jaikuaa iporãveha ñaneñeʼẽrendu Jehovápe opa mbaʼépe.
7. Mbaʼépa jajapovaʼerã jatopáramo Ñandejára Ñeʼẽme peteĩ mbaʼe nañantendéiva?
7 Sapyʼánte ikatu jatopa Ñandejára Ñeʼẽme peteĩ mbaʼe jajapovaʼerã ha ndajaikuaaporãi mbaʼérepa. Upéicharamo jepe ñañemoĩvaʼerã Jehová poguýpe ha jajapo heʼíva. Upéva ndeʼiséi ñande jajapotaha ojeʼéva guive ñandéve. Heʼise guei jajerovia ñandepyʼaite guive Jehová oikuaaha mbaʼépa iporãve ñandéve g̃uarã. Avei ñañemoĩvo ipoguýpe jahechauka jahayhuha Chupe. Apóstol Juan ohaivaʼekue: ‘Jahayhúramo Ñandejárape jajapóta Haʼe heʼíva. Ha umi mbaʼe haʼe ojeruréva, ndaipohýiri’ (1 Juan 5:3). Koʼág̃a jahecháta mbaʼérepa tekotevẽ avei ñaneñeʼẽrendu.
Ñahekomboʼékena ñane konsiénsia
8. Mbaʼérepa ñahekomboʼevaʼerã ñane konsiénsia?
8 Ñandejára ñeʼẽ heʼi ñahekomboʼevaʼerãha ñane konsiénsia ‘jahechakuaa hag̃ua mbaʼépa iporã ha ivai’ (Heb. 5:14). Jehová ndoipotái ñaneñeʼẽrendu chupe ojeʼe rupínte ñandéve. Oipota guei ñaneñeʼẽrendu chupe jahechakuaágui iporãva ha ivaíva Iñeʼẽ rupive. Upéicha jahechakuaáta iporãveha jajapo Haʼe heʼíva. Ha ikatúta jaʼe David heʼi haguéicha: ‘Ne ñeʼẽ oĩ che ánga ruguápe’ (Sal. 40:8, S).
9. Mbaʼéichapa ikatu ñahekomboʼe ñane konsiénsia?
9 Ñamombaʼe hag̃ua Jehová léi, rréi David ojapo haguéicha jajepyʼamongetavaʼerã Ñandejára Ñeʼẽre, ha péicha ñahekomboʼe ñane konsiénsia. Pór ehémplo, jahechakuaa rire umi mbaʼe Jehová oipotáva, ñañeporanduvaʼerã: “Mbaʼérepa iporã ajapo ko mbaʼe? Mbaʼépepa chepytyvõta ajapóramo? Mbaʼe ivaívapa ojehúta umi nopenáiva ko konséhore? Péicha ñañeporandúramo ikatúta ñahekomboʼe ñane konsiénsia jadesidi porã hag̃ua, ha ñambovyʼáta Jehovápe. Avei jaikuaáta mbaʼépa “Ñandejára rembipota” ha ñaneñeʼẽrendúta chupe (Efe. 5:17, BNP). Péro mbaʼérepa ijetuʼu jepi ñahekomboʼe ñane konsiénsia?
Satanás ojapo opa mbaʼe ani hag̃ua ñañemoĩ Jehová poguýpe
10. Mbaʼépa Satanás ojapo ani hag̃ua yvyporakuéra oñemoĩ Jehová poguýpe?
10 Ymaiterei guivéma Satanás ojapo opa mbaʼe ani hag̃ua yvyporakuéra oñemoĩ Jehová poguýpe. Ha upéva jahechakuaa oĩ rupi hetaiterei tapicha oikóva iñakãre. Pór ehémplo, koʼág̃a rupi noñemombaʼevéi pe ñemenda. Heta oĩ oikóva oñondive omendaʼỹre. Ha heta omendáva katu ojedehase oimeraẽ mbaʼére. Oiméne opensa hikuái peteĩ kuñakarai ombaʼapóva télepe heʼi haguéicha: “Kuimbaʼe térã kuña ndaikatúi oguereko peteĩ paréhante. Enterove aikuaáva ningo omoakãratĩ iména térã hembirekópe”. Upéicha avei peteĩ karai ombaʼapóva télepe imanduʼávo heta vésema omenda ha ojopoi hague heʼi: “Chéverõ g̃uarã ñande yvypóra nañaiméi voi jaiko hag̃uáicha oñondive ñamano meve”. Upéicha oñepensa rupi ko múndope, iporã opavave ñañeporandu: Amombaʼépa pe ñemenda Jehová oipotaháicha? Térãpa namombaʼevéi ko múndope ojejapoháicha?
11, 12. a) Mbaʼépa ojapo Satanás ani hag̃ua umi mitãrusu ha mitãkuñanguéra oñemoĩ Jehová poguýpe? b) Mbaʼépa oiko peteĩ ermánare naiñeʼẽrendúi haguére Jehovápe?
11 Peẽ mitãrusu ha mitãkuñanguéra, aníkena penderesarái Satanás ndoipotaiha peñemoĩ Jehová poguýpe. Upévare, ko múndo penemokyreʼỹ pejapo hag̃ua umi mbaʼe vai ‘imitãva ojaposéva’. Ikatu umi ndeavegua heʼi ndéve ijetuʼuetereiha rejapo hag̃ua opa mbaʼe Ñandejára heʼiháicha (2 Tim. 2:22). Aníkena nembotavy hikuái. Eñehaʼãkena ehechakuaa Jehová heʼíva iporãveha. Pór ehémplo Ñandejára Ñeʼẽ heʼi: ‘Pemboykékena teko vai’ (1 Cor. 6:18). Eñeporandumína: “Mbaʼérepa iporã ajapo ko mbaʼe? Mbaʼéichapa chepytyvõta cheñeʼẽrendúramo?”. Oiméne reikuaa oĩ hague ermáno nopenaivaʼekue ko konséhore ha heta ohasa asy upévare. Ha ikatu voi oñemosẽ chupekuéra Jehová kongregasióngui. Jaʼekuaápa hesekuéra, ovyʼa ha oiko porãveha ndoservivéima haguére Jehovápe? Ha ikatúpa jaʼe avei ovyʼaveha ñandehegui hikuái? (Jaleemi Isaías 65:14.)
12 Jahechami peteĩ ermána hérava Sharon ohaivaʼekue: “Nacheñeʼẽrendúi rupi Jehovápe koʼág̃a cherasy vai, areko sida. Pyʼỹinte chemanduʼa mbaʼeichaitépa avyʼamivaʼekue aservi porãrõ guare Jehovápe”. Sharon ohechakuaa ivýra rupi omboyke hague Jehovápe, ha ombyasy nomombaʼéi hague Jehová heʼíva. Sharon ohai rire koʼã mbaʼe, siete semána haguépe omano. Sharon ohasavaʼekue ñanemboʼe Satanás nomeʼẽmoʼãiha ñandéve mbaʼeve iporãva. Satanás ningo heta mbaʼe heʼi omeʼẽtaha ñandéve, péro haʼe “japu ruvicha”. Évape ijapu haguéicha koʼág̃a ijapúnte avei (Juan 8:44,ÑÑB). Péicha jahechakuaa iporãveha ñañemoĩ Jehová poguýpe.
Aníkena jaiko ñane akãre
13. Mbaʼérepa ndajaikoivaʼerã ñaneakãre?
13 Ñañemoĩ hag̃ua Jehová poguýpe, ndajaikoivaʼerã ñane akãre. Ñañemombaʼeguasúramo ikatu ñapensa nañaikotevẽiha avave heʼi ñandéve mbaʼépa jajapovaʼerã. Ha nañahendusemoʼãi umi konsého Jehová omeʼẽva iñorganisasión rupive. Aníkena ñanderesarái Jehová omoĩha ‘tembiguái jeroviaha ha iñarandúvape’ omeʼẽ hag̃ua ñandéve ñaikotevẽva (Mat. 24:45-47). Péicha Jehová oñangareko iñorganisasión rehe. Upévare ñaneñeʼẽrenduvaʼerã chupekuéra umi apóstol ojapo haguéicha. Oĩramo guare hemimboʼekuéra ipochýva Jesúsre ha ohejáva chupe, haʼe oporandu umi apostolkuérape: “Peẽpa pehose avei?” Ha Pedro heʼi: ‘Máva rendápe piko rohóta? Nde remboʼéva ningo omeʼẽ tekove opaveʼỹva’ (Juan 6:66-68, BNP).
14, 15. Mbaʼe mbaʼépa jajapóta ñañemoĩramo Jehová poguýpe?
14 Ñañemoĩramo Jehová poguýpe jajapóta Iñeʼẽme heʼíva. Pór ehémplo tembiguái jeroviaha rupive heʼi jey jey ñandéve ñaneakãguapy ha jajesareko porã hag̃ua (1 Tes. 5:6). Ko ára pahápe ningo oĩ hetaiterei ‘opensáva ijehénte ha ipláta rayhúva’, upévare iporã jajapo pe tembiguái heʼíva (2 Tim. 3:1, 2). Ñande piko ikatu avei ñapensa upéicha? Nañamotenondéirõ Ñandejára rembipota ñande rekovépe ñapensáta avei upéicha. Mbeguekatúpe ikatu jaiko pláta rapykuérinte térã nañanekyreʼỹvéi ñambaʼapo hag̃ua Jehová servísiope (Luc. 12:16-21). Ajépa iporãiteve jaiko Jehová heʼiháicha jaiko rangue ñaneakãre ko múndope ojeikoháicha! (1 Juan 2:16).
15 Pe tembiguái jeroviaha ha iñarandúva ñanemboʼe umi ansianokuéra rupive. Upévare Ñandejára Ñeʼẽme heʼi: ‘Peneñeʼẽrendúkena umi ansianokuérape ha peñemoĩ ipoguýpe. Haʼekuéra ningo oñangareko penderehe kaneʼõʼỹre. Oikuaágui ojechataha Ñandejárandi opa mbaʼe ojapovaʼekuére. Peñehaʼã taivevýi chupekuéra hembiapo, ani ipohýi. Ndapejapóiramo upéicha, ndohoporãichéne peẽme’ (Heb. 13:17). Heʼisépa ko téysto umi ansianokuéra ndojavyiha voi? Nahániri, haʼekuéra ningo ojavýnte avei, ha Jehová oikuaa porã upéva. Upéicharamo jepe Haʼe oipota ñañemoĩ ipoguypekuéra. Ñaneñeʼẽrendúramo umi ansianokuérape jepe iñimperfékto hikuái, jahechauka ñañemoĩha Jehová poguýpe.
Aníkena ñañemombaʼeguasu
16. Mbaʼépa jajapovaʼerã jaikuaa rupi Jesús omoakãha pe kongregasión?
16 Aníkena ñanderesarái Jesús Omoakãha pe kongregasión (Col. 1:18). Upévare ñaneumildevaʼerã ha ñañemoĩ umi ansianokuéra poguýpe ha ‘ñamombaʼe hembiapokuéra’ (1 Tes. 5:12, 13). Umi ansianokuéra ningo oñemoĩnte avei Jehová poguýpe. Ojapo upéva omboʼévo kongregasiónpe Jehová heʼihaichaite, ndahaʼéi haʼekuéra opensávante. La Biblia heʼi Ñandejára Ñeʼẽme oĩvante ñamboʼevaʼerãha (1 Cor. 4:6).
17. Mbaʼérepa naiporãi ñañembotuichase?
17 Enterove oĩva kongregasiónpe oñatendevaʼerã ani oñembotuichase (Pro. 25:27). Apóstol Juan oikuaavaʼekue peteĩ ermáno oñembotuichasévape. Haʼe heʼi: ‘Diótrefes katu oipota haʼe heʼívante ojejapo. Upévare, ág̃a aha vove añemoñeʼẽta chupe, oikógui ijapu ha oñeʼẽ rei orerehe’ (3 Juan 9, 10). Péva ohechauka ñandéve oiméramo ñañembotuichase jaikóvo, jaipeʼaitevaʼerãha ñandejehegui upe lája. La Biblia heʼi: “Jejapo ñandereraha ñehundípe, ha oñembotuichaséva hoʼavaʼerã katuete”. Mayma oñemoĩva Jehová poguýpe oñehaʼãvaʼerã ani oñemombaʼeguasu. Umi oñembotuichaséva ningo oñemotĩvaʼerã katuete (Pro. 11:2; 16:18).
18. Mbaʼépa ñanepytyvõta ñañemoĩ hag̃ua Jehová poguýpe?
18 Ñañehaʼãmbaitékena ñañemoĩ Jehová poguýpe ha ani jaikose ñaneakãre. Upearã, ñanemanduʼa meme vaʼerã tuicha mbaʼeha jaservi Jehovápe. Ha haʼe oipotáguinte ñaimehañaína iñorganisasiónpe (Juan 6:44). Upéicharõ, ñamombaʼevaʼerã ikatu haguére ñañemoag̃ui Ñandejárare. Ñañehaʼãkena opa mbaʼe jajapóvape jahechauka ndajaikoseiha ñaneakãre ha ñañemoĩha Jehová poguýpe.
Ñambohovaimi koʼã porandu
• Mbaʼépa heʼise ñañemoĩ Jehová poguýpe?
• Mbaʼérepa ñahekomboʼevaʼerã ñane konsiénsia?
• Mbaʼépa ojapo Satanás ani hag̃ua ñañemoĩ Jehová poguýpe?
• Mbaʼérepa naiporãi ñañembotuichase?
[Porandu ñahesaʼỹijóva]
[Nóta oĩva taʼanga ndive páhina 19]
‘Ñaneñeʼẽrenduvaʼerã Ñandejárape mburuvicháramo kuimbaʼépe rangue’
[Nóta oĩva taʼanga ndive páhina 21]
Ñaneñeʼẽrendu Jehovápe ningo iporãve oimeraẽ mbaʼégui