Ajépa ivale hikuái

MBOHAPY mitãrusu oikóva África centrálpe, ohoseterei ñande aty guasu tres diaguápe. Péro mombyryeterei oikóta haʼekuéra oĩhágui, 90 kilometrohápe voi. Mbaʼéicha piko ohóta hikuái? Hiʼarive ivai pe tape ha ndorekói hikuái mbaʼépepa ohóta. Upémarõ oiporusemoʼã hapichágui mbohapy visikléta, péro ndoikovéima oho hag̃ua hikuái mombyryeterei hiʼári.

Peteĩ ansiáno kongregasionpegua ohendu mbaʼépa iprovléma hikuái ha oiporuka chupekuéra ivisikléta. Ha itujámaramo jepe ivisikléta, oiko porã gueteri. Ko ermáno omombeʼu umi mitãrusúpe mbaʼépa haʼe ojapovaʼekue hapichakuéra ndive yma oho hag̃ua peteĩ aty guasu tres diaguávape. Heʼi chupekuéra ojopyru hag̃ua upe visiklétare. Upéva ningo haʼete výro rei péro tekotevẽ opensa porã hikuái mbaʼéichapa ojapóta. Ha mbaʼépa ojapo umi ermáno?

Ani hag̃ua oho kuarahy akúre, voi porã ohupi imaléta visikléta ári ha ojeʼóima hikuái. Peteĩva oho aja visikléta ári umi mokõi pyaʼe oho hapykuéri. Ha oiméne 500 métro mbaʼe oho rire pe visikléta arigua oguejy ha ombojeko ivisikléta peteĩ yvyra mátare oheja hag̃ua chupekuéra. Oheja umi ótro ohecha hag̃uáme pono oñemonda chuguikuéra. Upe rire osegi haʼe yvy rupi.

Umi mokõi og̃uahẽvo visikléta oĩháme, peteĩva oho hiʼári ha pe ótro katu oguatamie, ha 500 metrohápe otokáma chupehaite. Ikyreʼỹ ha iñakãporã rupi koʼã ermáno, oguata 60 kilómetronte, oguatarangue 90 kilómetro. Ha noñehaʼãreíri hikuái, og̃uahẽ pe aty guasurã ha ohendu heta mbaʼe porã Ñandejára Ñeʼẽgui. Avei ohasa porã ermanokuéra ndive (Deu. 31:12). Reñehaʼãtapa nde avei reho ág̃a ñande aty guasu tres diaguápe?