Haʼe ningo ñanembyasy
Ñañemoag̃uíkena Ñandejárare
Haʼe ningo ñanembyasy
“JAHECHAKUAÁRAMO ñande rapicha oñandúva ningo haʼete voi hasýva ñandéve ohasa asy jave”. Péicha heʼivaʼekue peteĩ testigo de Jehová ijedámava omombeʼúvo mbaʼérepa iporãite jahechakuaa ñande rapicha oñandúva. Jehová hína pe ohechakuaavéva mbaʼépa ñañandu. Chupe ningo hasy ohechávo isiervokuéra ohasa asy. Mbaʼéichapa jaikuaa upéva? Jesús oúramo guare ko Yvy ape ári ohechauka ñandéve mbaʼeichaguápa Jehová (Juan 5:19). Jahechamína peteĩ mbaʼe oikovaʼekue ha oñemombeʼúva Juan 11:33-35-pe.
Jesús ningo orekovaʼekue peteĩ iñamígo hérava Lázaro, omanovaʼekue imitãreve. Upéva oikóvo haʼe osẽ oho Lázaro oikohápe. Upépe iñermanakuéra hérava Marta ha María oñembyasyeterei anga iñermáno omano haguére. Jaikuaa Jesús ohayhueterei hague chupekuéra. Mbaʼépa ojapo upémarõ? (Juan 11:5). La Biblia heʼi: ‘Opoko Jesúsre ohechávo mbaʼéichapa María ojaheʼo ha umi hendive ouvaʼekue. Ha tuicha oguapy hese upéva. Oporandu chupekuéra: “Moõ piko pemoĩraʼe hetekue?” Heʼi hikuái chupe: “Eju ehecha”. Upévo Jesús hasẽ’ (Juan 11:33-35). Mbaʼérepa hasẽ Jesús? Jepe Lázaro omano, haʼe omoingove jeýta chupe (Juan 11:41-44). Mbaʼépa upéicharõ oguapyetéraʼe Jesúsre?
Jahechami jeýna pe téysto. Upépe heʼi ‘opoko’ hague Jesúsre ohechávo María ha umi ótro ojaheʼoha, ha ‘tuicha oguapy hague hese’. Umi ñeʼẽ ojeporúva koʼápe heʼise Jesús oñandu hague ipyʼaite guive upe oikóva. Haʼe ombyasyeterei chupekuéra, ha upévare hesay pororopa. * Jahecha porãiterei Jesús ombyasy hague ohechávo umi ótro oñembyasyha. Ndojehúivapa ñandéve upéva, jahechávo peteĩ hasẽva ñañepyrũ ñanerasẽ avei? (Romanos 12:15.)
Jesús ojapovaʼekue ñanepytyvõ jaikuaa porãve hag̃ua Itúva Jehovápe. Ñande jaikuaa Jesús ojoguaha Jehovápe opa mbaʼépe, upévare ikatuvaʼekue heʼi: “Upe chéve cherecháva, ohecháma che Rúpe” (Juan 14:9). Upévare jaleévo Jesús “hasẽ” hague, ikatu jaguerovia Jehová ombyasyha isiervokuérape oñembyasy jave. Avei oĩ ambue kuimbaʼe ohaivaʼekue la Biblia omombeʼúva upéva (Isaías 63:9; Zacarías 2:8). Ajépa ñanderayhuete Jehová!
Ojehayhuete ningo umi ohechakuaáva hapicha oñandúva. Ñañeñandu vai jave ñaimese koʼãichaguándi, ohechakuaáva ñandéve jahasáva ha ñañandúva. Upévare, koʼýte ñañemoag̃uise Jehováre, jaikuaágui haʼe ñanembyasyha, hasyha chupe ñañeñandu vai jave ha ontende porãitereiha mbaʼérepa ñanerasẽ (Salmo 56:8).
[Nóta]
^ párr. 6 Pe ñeʼẽ griégo ojetradusíva “hasẽ” heʼise peteĩ “hasẽva kirirĩhámente”. María ha umi ótro héntere katu ojeʼe ‘ojaheʼo hague’.