Mbaʼe mbaʼépa ñanemboʼe Romanos
Jehová Ñeʼẽ ningo oikove
Mbaʼe mbaʼépa ñanemboʼe Romanos
AMO áño 56 rupi apóstol Pablo ojapóvo itercér viáhe opredika hag̃ua og̃uahẽ Coríntope. Upépe oñemombeʼu chupe kongregasión Romayguápe oiko vaiha oñondive umi ermáno hudío ha hudioʼỹva. Upémarõ Pablo ohai peteĩ kárta oipytyvõtava chupekuéra oiko porã jey hag̃ua oñondive ha Cristo ndive.
Ko kártape Pablo omombeʼu mbaʼéichapa ikatu ñande reko potĩ Jehová renondépe, ha mbaʼéichapa jaikovaʼerã. Avei ñanepytyvõ jaikuaave hag̃ua Ñandejárape ha Iñeʼẽ. Ohechauka mbaʼéichapa Jehová imbaʼeporã ñanendive, ha omombaʼe Jesús ojapovaʼekue ñandesalva hag̃ua (Heb. 4:12).
MBAʼÉICHAPA YVYPORAKUÉRA IKATU HEKOJOJA ÑANDEJÁRA RENONDÉPE?
Apóstol Pablo ohai: ‘Opavave niko hembiapo vai ha mombyry oĩ Ñandejára reko mimbipágui. Ñandejára katu, imbaʼeporãgui oporombohekojoja, Jesucristo rupi, oporopeʼáva jejopy vaígui’. Upéi heʼi yvyporakuéra ikatuha hekojoja “ijerovia rupi, ha ndahaʼéi ojapo haguére Léi heʼíva” (Rom. 3:23, 24, BNP, 28, JMP). Ojerovia rupi “Jesucristo rembiapokue” rehe umi ungido ha pe “aty guasu” ikatu ‘ojereko imarangatúvaramo’. Umi ungido ningo oho yvágape ogoverna hag̃ua Jesucristo ndive. Ha pe aty guasúgui katu oiko Ñandejára amígo ha ikatúta ohasa pe ‘jehasa asy guasu’ (Rom. 5:18; Apoc. [Rev.] 7:9, 14, BNP; Juan 10:16; Sant. 2:21-24; Mat. 25:46).
Pablo heʼi: ‘Upéicharõpa mbaʼe? Japekátapa ñaime haguére Ñandejára mborayhúpe ha nañaiméi haguére léi poguýpe? Mbaʼevéicharamo! Peneñeʼẽrendúramo pekádope, upéva ogueru ñemano, térã peneñeʼẽrendúramo Ñandejárape, upéva ogueru teko potĩ’ (Rom. 6:15, 16, BNP). Upéi heʼi avei: “Ha espíritu rupi pejukáramo upe yvypóra reko kangy, peikovéta” (Rom. 8:13).
Porandukuéra:
1:24-32, ÑÑB. Mávarepa ojeʼe ojapoha koʼã mbaʼe vai, umi hudío térã umi tetã ambuegua? Ikatu ningo oimeraẽvare ojeʼe, péro koʼápe Pablo oñeʼẽhína umi Israelguáre omboykevaʼekue Jehovápe. Haʼekuéra ‘oikuaa porã Ñandejára rembipota’ péro nopenái hese. Upévare ivaiete upe ojapóva hikuái.
3:24, 25. Mbaʼéichapa Jesucristo sakrifísio rupi ‘ojeheja rei umi mbaʼe vai ojejapovaʼekue’ haʼe ou mboyve? Génesis 3:15 oñeʼẽ Mesías rehe. Upépe heʼíva ningo oñekumpli áño 33-pe ojejukárõ guare Jesúspe peteĩ yvyráre (Gál. 3:13, 16). Jehová heʼírõ guare ko mbaʼe oikuaa oikotaha katuete ha ojesalvataha yvyporakuérape. Upévare, jepe Jesús nomanói gueteri yvyporakuérare, Jehová operdona Adán familiarépe ojeroviáva upe promésare. Jesús sakrifísio rupive ikatúta avei oñemoingove jey umi omanovaʼekuépe haʼe ou mboyve ko Yvy ape ári (Hech. 24:15).
6:3-5. Mbaʼérepa ojeʼe oĩha ojevautisáva Jesucrístope ha ojevautisáva iñemanóme? Jehová oiporavóvo espíritu sánto rupive umi ohótava yvágape oiko chuguikuéra Cristo rete, haʼéva pe kongregasión. Ha Jesús omoakã chupekuéra. Péicha koʼã kristiáno ojevautisa Jesucrístope (1 Cor. 12:12, 13, 27; Col. 1:18). Avei umi ungido ojevautisa Cristo ‘ñemanóme’. Mbaʼéichapa oiko upéva? Haʼekuéra ningo heta ojesakrifika ha oikuaa ndaikatumoʼãveimaha oiko ko Yvy ape ári. Péicha jahechakuaa omanoha hikuái Jesús omano haguéicha péro ndoipeʼái avavépe pekádo poguýgui. Ko vautísmo Cristo ñemanóme oñemohuʼã oñemoingove jeývo chupekuéra yvágape.
7:8-11, BNP. Mbaʼéichapa pe pekádo ‘oiporu pe léi’? Moisés léi ningo oipytyvõ umi Israelguápe oikuaa hag̃ua mbaʼépa ivai ha ohechakuaa hag̃ua haʼekuéra pekadorha. Péicha oikuaa hikuái ivaiha heta mbaʼe ymave oimoʼãvaʼekue ndaivairiha. Ha hetave oĩ ohechakuaáva ojavy memeha. Upévare ojeʼe pe pekádo oiporuha pe léi.
Mbaʼépa ñanemboʼe:
1:14, 15. Oĩ heta mbaʼe ñanemokyreʼỹva japredika hag̃ua. Pór ehémplo, jaikuaa Jesús omano hague opaichagua tapicha rehehápe, ha upévare ñaipytyvõvaʼerã chupekuéra oikuaa hag̃ua Ñandejárape ha umi mbaʼe ojapótava.
1:18-20. Opa mbaʼe Jehová ojapovaʼekue ohechauka mbaʼeichaguápa haʼe. Upévare umi hénte iñañáva “ndoguerekói mbaʼeve heʼivaʼerã”.
2:28; 3:1, 2; 7:6, 7. Pablo oñeʼẽ heta mbaʼe ikatúvare ombopochy umi hudíope, péro heʼi avei heta mbaʼe ogustátava chupekuéra. Péva ohechauka ñañeʼẽta jave peteĩ provlémare jaʼekuaavaʼerãha, ani ñambopochy ñanerendúvape.
3:4. Yvyporakuéra heʼíramo peteĩ mbaʼe ojoavýva Ñandejára Ñeʼẽ heʼívare, jahechauka Ñandejára ndaijapuiha jajeroviávo la Bíbliare ha jajapóvo Jehová heʼíva. Avei japredika kyreʼỹ ha ñamboʼe jave ñande rapichakuérape ñaipytyvõñaína chupekuéra oikuaa hag̃ua Haʼe ndaijapuiha.
4:9-12. Abrahán ningo oñesirkunsida orekópe 99 áño. Péro upéva mboyve, Jehová oguerohorymavaʼekue chupe ojerovia rupi (Gén. 12:4; 15:6; 16:3; 17:1, 9, 10). Péicha Jehová ohechauka ikatuha ñaime porã henondépe ñande jerovia rupi.
4:18. Pe esperánsa ñanepytyvõ jajerovia hag̃ua (Heb. 11:1).
5:18, 19. Pablo omombeʼu mbaʼépepa ojojogua Jesús ha Adán. Haʼe omyesakã porãiterei mbaʼérepa peteĩ kuimbaʼe ikatu ‘omeʼẽ hekove heta rehehápe’ (Mat. 20:28, ÑÑB). Tekotevẽ jajapo haʼe ojapo haguéicha; ñamyesakã porã jaʼéva ha ani ñambopukueterei (1 Cor. 4:17).
7:23, BNP. Ñañatendevaʼerã ani jaiporu vai rupi ñande juru, ñande po, ñane retyma térã ambue párte ñande retégui, ñañemoĩ ‘pekádo poguýpe’.
8:26, 27. Ñambohovái jave provléma ijetuʼuetereíva ha ndajaikuaái mbaʼéichapa ñañemboʼéta Jehovápe, pe “espíritu voi oñemboʼe ñanderehe”. Jehová ningo ‘ohendu maymáva ñemboʼe’, upévare ñanerendúta ñañemboʼévo chupe ha jaiporu umi ñemboʼe oĩva la Bíbliape (Sal. 65:3 [65:2, NM]).
8:38, 39. Jehová ningo ñanderayhu ha ndohejamoʼãi umi desgrásia, umi demónio, térã umi mburuvicha ñandepeʼa imborayhúgui. Aníkena jaheja koʼã mbaʼe ñanemomombyry chugui.
9:22-28; 11:1, 5, 17-26. Heta profesía heʼíva Israel oĩ porã jeytaha oñekumpli umi kristiáno ohótavare yvágape. Umíva ojeporavo ‘hudío ha hudioʼỹva’ apytégui.
10:10, 13, 14. Jahayhúramo Jehovápe ha ñande rapichakuérape, ha jajerovia mbaretéramo hese ha ipromésare ñanekyreʼỹta ñamombeʼu hag̃ua enterovépe pe marandu porã.
11:16-24, BNP, 33. ‘Ñandejára ningo ipyʼaporã, opáichavo ipochy avei’ péro ohechauka koʼã mbaʼe hekoitépe. “Haʼe ningo pe Ita guasu, hembiapo iporãiterei, mayma hapekuéra hekoitepegua” (Deu. 32:4, ÑÑB).
JAHECHAUKA ÑANDEREKOJOJAHA UMI MBAʼE JAJAPÓVARE
Pablo heʼi: ‘Upévare che ermanokuéra, che ajerure asy peẽme, Ñandejára jeporiahuvereko rehehápe, pemeʼẽmba hag̃ua pende rekove Ñandejárape, peteĩ sakrifísio oikovévaicha, ipotĩva ha ombovyʼáva chupe’ (Rom. 12:1, ÑÑB). Umi kristiáno hekojoja Ñandejára renondépe ijerovia rupi. Upévare umi mbaʼe Pablo heʼíva upéi oipytyvõvaʼerã chupekuéra ohecha hag̃ua mbaʼépa opensa ijehe, hapichakuérare ha mburuvichakuérare.
Pablo heʼi: ‘Haʼe opavave peẽme, anítei avave oñemombaʼeguasu ijupe hekopeʼỹ’. Avei: “Pejoayhu tova mokõiʼỹre” (Rom. 12:3, BNP, 9, ÑÑB). Upéi katu heʼi: “Maymáva oñemoĩvaʼerã mburuvicha poguýpe” (Rom. 13:1). Ha oĩ jave umi mbaʼe káda uno odesidivaʼerã, Pablo omokyreʼỹ kristianokuérape ani hag̃ua ohusga hapichakuérape (Rom. 14:13).
Porandukuéra:
12:20, JMP. Mbaʼéichapa ‘ñambyatýta tatapỹi’ umi ndaijaʼéiva ñanderehe akã ári? Yma ningo oñemboyku hag̃ua umi metál oñemoinge tatakuápe ha oñemoĩ tatapỹi iguýpe ha hiʼári. Péicha oñemboyku ha oñemopotĩ. Ñande ‘ñambyaty tatapỹi’ umi ndochaʼéiva ñanderehe akã ári jatrata porãvo chupekuéra. Péicha mbeguekatúpe imbaʼeporãta ohóvo ñanendive.
12:21, ÑÑB. Mbaʼéichapa ikatu ‘ñandepuʼaka ivaíva rehe mbaʼe porã rupi’? Jajapo upéva jaikuaaukávo pyʼaguasúpe umi mbaʼe porã ojapótava Ñandejára goviérno. Ha upéva jajapovaʼerã Jehová oipotaha peve (Mar. 13:10).
13:1. Mbaʼérepa ikatu jaʼe mburuvichakuéra haʼeha ‘Ñandejára omoĩvaʼekue meme’? Haʼekuéra ningo ogoverna Ñandejára oheja rupínte. Oĩ vése Jehová omoĩuka hague Iñeʼẽme mávapa ogovernáta. Umívare ikatu jaʼe haʼeha ‘Ñandejára omoĩvaʼekue meme’.
Mbaʼépa ñanemboʼe:
12:17, 19. Ñañevengáramo jajapoñaína peteĩ mbaʼe Jehovánte ojapovaʼerã. Upévare, mbaʼeveichavérõ naiporãmoʼãi ñañembotuichase ha jaiko ‘ñamyengovia ivaíva ivaívape’.
14:14, 15. Ñañatendevaʼerã ani ñaikuaveʼẽ ñane ermánope tembiʼu térã vevída ikatúva omokangy ijerovia.
14:17. Ñandejára ñandeguerohory ndahaʼéi jaʼu térã ndajaʼúi haguére peteĩ mbaʼe, síno ñanderekojoja, ñandepyʼaguapy ha javyʼa rupi.
15:7. Kongregasiónpe jahayhuvaʼerã entéro umi ou pyahúvape oikuaaségui Jehovápe. Ha jaikuaaukavaʼerã Ñandejára goviérno ojapótava opaichagua tapichápe.
[Nóta oĩva taʼanga ndive páhina 31]
Ikatúnepa jaʼe Jesús omano hague avei umi hénte oikovaʼekuére haʼe ou mboyve ko Yvy ári?