Redefendekuaátapa nde jerovia?

NDÉPA redefendéma nde jerovia? Jahechamína ohasavaʼekue Susana, peteĩ testigo de Jehová orekóva 16 áño ha oikóva Paraguáipe. Omeʼẽ jave hikuái ética koléhiope peteĩ ikompañéro osẽ heʼi testigos de Jehová ndojeroviaiha “Antiguo Testamento” rehe, Jesucrístore ni Maríare. Heʼi avei haʼekuéra ifanatikoitereiha, ha omanotanteha oheja rangue umi doktór oñatende hesekuéra. Reimérire upépe, mbaʼépa rejapovaʼerãmoʼã?

Susana oñemboʼe Jehovápe ha ohupi ipo oñeʼẽ hag̃ua. Ndaiporivéima rupi tiémpo oporandu imaéstrape ikatúpa oprepara peteĩ exposición omombeʼu hag̃ua ikompañerokuérape mbaʼépa oguerovia testigos de Jehová. Imaéstra heʼi chupe ikatuha ojapo, ha upémarõ Susana ojeprepara dos semána aja. Upearã oiporu pe folléto Los testigos de Jehová: ¿quiénes son y qué creen?

Upéi og̃uahẽ pe ára ojapo hag̃ua pe exposición. Susana omombeʼu mbaʼérepa jaiporu pe téra testigos de Jehová, omombeʼu ñahaʼarõva tenonderãme g̃uarã ha avei heʼi mbaʼérepa nañamoĩukái tuguy. Upéi heʼi ikompañerokuérape ikatuha oporandu chupe oikuaaséva, ha oĩ heta oporandúva. Imaéstra ohecharamoiterei mbaʼéichapa pe mitãkuña oiporu la Biblia okontesta hag̃ua.

Peteĩ ikompañéro omombeʼu oho hague testigos de Jehová atyhápe ha ndohechái ni peteĩ sánto raʼanga. Imaéstra oporandu Susánape mbaʼérepa upéva ha haʼe olee chupe Salmo 115:4-8 ha Éxodo 20:4. Imaéstra ijurujái opytávo ha heʼi: “Ha mbaʼeichakue piko upéicharõ umi tupao henyhẽ sántogui, la Biblia heʼíramo ivaiha?”.

Péicha oñemongeta hikuái cuarenta minúto aja. Upéi Susana oporandu ikompañerokuérape ohechasépa pe vidéo hérava La negativa a la sangre. La medicina acepta el reto. Enterovénte heʼi ohechaseha ha upémarõ imaéstra heʼi: ‘Jahecháta koʼẽrõ’. Ohechapa rire hikuái pe vidéo Susana omombeʼu mbaʼe tratamiéntopa ikatu oiporu testigos de Jehová. Imaéstra heʼi: “Eʼa, chéko ndaikuaáikuri oĩha hetaite tratamiénto ndojeporuihápe tuguy ha ojapo porãha ñanderehe. Ha testigos de Jehovápe g̃uarãnte piko koʼã tratamiénto?”. Ojeʼévo chupe ndaupeichaiha, haʼe opromete: “Ág̃a oho jeývo peteĩ testígo che rógape añemongetáta hendive”.

 Veinte minútonte oñeʼẽtakuri hikuái, péro amo ipahápe oñemongeta tres óra rupi. Una semána haguépe ótro ikompañerokuéra oñeʼẽ avei irrelihiónre. Oñeporandu chupekuéra heta mbaʼe péro ndaikatúi ombohovái hikuái. Imaéstra heʼi chupekuéra: “Mbaʼére piko ndaikatúi pedefende pegueroviáva ojapo haguéicha pene kompañéra testigo de Jehová?”.

Haʼekuéra okontesta: “Ha umi testígo ningo ostudia la Biblia, ore katu nahániri”.

Pe maéstra heʼi Susánape: “Rofelisita ne mitãkuña, añetehápe restudia la Biblia ha reñehaʼã rejapo upe reaprendéva”.

Susana ikatuvaʼerãmoʼã okirirĩnte. Péro haʼe oñeʼẽ ha péicha ojapo yma ojapo haguéicha peteĩ mitãkuñaʼi Israelgua. Ko mitãkuñaʼípe ojegueraha Síriape ha upépe oñemombaʼapo Naamán rógape. Naamán ningo Siria soldadokuéra ruvicha ha oreko peteĩ mbaʼasy ndevaipa jepéva. Pe mitãkuñaʼi oñemoĩ heʼi Naamán rembirekópe: “Che jára ohóramo Samariapegua maranduhára rendápe, okueráta ikuru vaígui”. Ko mitãkuñaʼi oñandu oñeʼẽvaʼerãha Ñandejára teére. Ha upeakuére, ipatrón Naamán oñepyrũ oadora Jehovápe (2 Rey. 5:3, 17).

Susana avei oñandu oñeʼẽvaʼerãha Jehová ha isiervokuérare. Oñeñeʼẽ vaívo testigokuérare haʼe oñehaʼã odefende ijerovia. Péicha ojapo ko konsého heʼíva: ‘Pemombaʼeguasu Crístope pende pyʼaite guive. Peime tapiákena pemombeʼu hag̃uáicha oñeporandúramo peẽme pende jeroviáre, ha pemombeʼuvaʼerã pejejapoʼỹ rehe’ (1 Ped. 3:15, BNP). Ha nde, redefendekuaátapa nde jerovia opa ijahápe ndéve?

[Nóta oĩva taʼanga ndive páhina 18]

Koʼã mbaʼe nepytyvõta redefende hag̃ua nde jerovia