Mbaʼépa ikatu jajapo ijetuʼúramo ñandéve japredika hag̃ua ogaha rupi

‘Ñandejára oremokyreʼỹ jey romombeʼu hag̃ua peẽme hembipota pyʼaguasúpe oĩramo jepe heta oñemoĩva orerehe.’ (1 TES. 2:2, ÑÑB.)

1. Mbaʼépa ohasavaʼekue Jeremías ha mbaʼéichapa ogueropuʼaka?

 JEREMÍAS ningo ñepyrũrã okyhyjevaʼekue oñeʼẽ hag̃ua, Jehová omoĩrõ guare chupe ‘profétaramo’. Haʼe heʼi: ‘Anína, Jehová che Jára! Che ningo che mitãiterei gueteri ha nañeʼẽkuaái’. Upéicharamo jepe, ojerovia Jehováre ha ojapo heʼíva chupe (Jer. 1:4-10). Ogueropuʼaka cuarenta áño rasa, oĩramo jepe heta ndaijaʼéiva, oñembohorýva ha opersegíva chupe (Jer. 20:1, 2). Jeremías ningo heta vése ikangy, upéicharamo jepe opredika meme umi hudíope, nohenduséiramo jepe chupe hikuái. Ñandejára puʼaka oipytyvõ Jeremíaspe ojapo hag̃ua peteĩ mbaʼe, ndaikatumoʼãiva ojapo ijeheguireínte (jaleemína Jeremías 20:7-9).

2, 3. Mbaʼéichapa oñeñandu koʼág̃a rupi heta ermáno?

² Heta ermáno Jehovápe oservíva oñeñandu avei Jeremías oñeñandu haguéicha. Oikuaárõ guare opredikavaʼerãha ogaha rupi, heta oĩ opensáva: “Arakaʼeve  che ndapredikamoʼãi”. Péro ohechakuaávo upe tembiapo haʼeha Jehová rembipota, ipyʼaguasu ha opredika. Upéicha avei, ikatu umi mbaʼe jahasáva ñandejokose ani hag̃ua japredika. Añetehápe ningo ijetuʼu ñañepyrũ hag̃ua japredika ogaha rupi, ha avei jasegi hag̃ua japredika Jehová ára peve (Mat. 24:13).

³ Oimérõ restudiáma heta tiémpo testigos de Jehovándi ha reho meme rreunionhápe, mbaʼépa ndejoko resẽ hag̃ua repredika ogaha rupi? Térã oimérõ rejevautisáma, ijetuʼúpa ndéve resẽ hag̃ua repredika neresãiramo jepe? Koʼág̃a rupi oĩ heta ermáno osegíva opredika ogaha rupi ijetuʼúramo jepe. Ha ndéve avei Jehová nepytyvõta rejapo hag̃ua upéva.

Ñandepyʼaguasúkena

4. Mávapa oipytyvõ apóstol Páblope opredika hag̃ua pyʼaguasúpe?

⁴ Ñande ningo koʼág̃a japredika oparupiete ko yvy ape ári Jehová espíritu ñanepytyvõ rupi, ndahaʼéi ñandekatupyry térã ñanearandu haguére (Zac. 4:6). Upéicha avei, ñanepytyvõ káda únope japredika hag̃ua (2 Cor. 4:7). Jahechamína, apóstol Pablo ohasavaʼekue. Haʼe ohai péicha: ‘Peẽ peikuaa ore rog̃uahẽ mboyve pene rendápe rohasa asy hague ha opuʼãmba hague orerehe umi Filiposgua. Ñandejára oremokyreʼỹ jey katu romombeʼu hag̃ua peẽme hembipota pyʼaguasúpe oĩramo jepe heta oñemoĩva orerehe’ (1 Tes. 2:2, ÑÑB; Hech. 16:22-24). Pablo ningo opredikavaʼekue kyreʼỹme. Upévare, ndajagueroviaséi ijetuʼúne hague chupe opredika hag̃ua. Péro haʼe ningo oikotevẽvaʼekue avei Jehová oipytyvõ chupe ipyʼaguasu hag̃ua opredika jave, ñande ñaikotevẽháicha (jaleemína Efesios 6:18-20). Mbaʼéichapa ikatu jasegi iñehémplo?

5. Mbaʼépa ñanepytyvõta japredika hag̃ua pyʼaguasúpe?

⁵ Ñañemboʼe meméramo Jehovápe ñanepytyvõta avei ñandepyʼaguasu hag̃ua. Peteĩ precursora heʼi: “Añemboʼe ikatu hag̃uáicha añeʼẽ hendápe porã, ha umi haʼéva og̃uahẽ hag̃ua che rapichakuéra korasõme. Avei, añemboʼe avyʼa hag̃ua che servísiope. Jaikuaa porã ningo Jehová omoakãha ko tembiapo. Upévare ndaikatúi jajapo mbaʼeve ñandejeheguínte, ñaikotevẽ Jehová ñanepytyvõ” (1 Tes. 5:17). Enterove jajerure meme vaʼerã Jehovápe ijespíritu ikatu hag̃uáicha ñanepytyvõ japredika hag̃ua pyʼaguasúpe (Luc. 11:9-13).

6, 7. a) Mbaʼépa ohechavaʼekue Ezequiel, ha mbaʼépa heʼise upe visión? b) Mbaʼépa ñanemboʼe Ezequiel ohechavaʼekue?

⁶ Pe lívro hérava Ezequiél ohechauka avei peteĩ mbaʼe ñanepytyvõtava japredika hag̃ua pyʼaguasúpe. Peteĩ visión rupive, Jehová omeʼẽ proféta Ezequiélpe peteĩ kuatia ojehaíva ‘ñeʼẽ asy, ñembyasy ha jaheʼo rehegua meme’ ha heʼi chupe hoʼu hag̃ua. Jehová heʼi chupe: “Kuimbaʼe raʼy, emokõ ko kuatiañeʼẽ jokuapy ha kóvagui emyenyhẽ ndepyʼa”. Mbaʼépa heʼise ko visión? Ezequiel tekotevẽ hague oikuaa porã raẽ upe heʼivaʼerã, ha ojapovaʼerãha ipyʼaite guive. Ha heʼi péicha: ‘Haʼu rire, eiretéicha heʼẽ asy chéve’. Ezequiélpe g̃uarã haʼete vaʼekue eiretéicha heʼẽ asýva oikuaauka Ñandejára Ñeʼẽ. Haʼe ningo omombaʼeterei pe tembiapo Jehová omeʼẽvaʼekue chupe, oĩramo jepe nohenduséiva (jaleemína Ezequiel 2:8–3:4, 7-9).

⁷ Ezequiel ohechavaʼekue ningo ñanemboʼe ñamombeʼuvaʼerãha avei ñande rapichakuérape mbaʼépa koʼẽrõitéma ojapóta Ñandejára, oĩramo jepe nañanerenduséiva. Ñamombaʼe hag̃ua pe tembiapo Jehová omeʼẽvaʼekue ñandéve ñamombaretevaʼerã ñande jerovia. Upearã, jastudia porã vaʼerã Ñandejára Ñeʼẽ, ikatu  hag̃uáicha og̃uahẽ ñane korasõme. Upéicharõ, ikatúpa nde releeve ha restudia porãve la Biblia? Rejepyʼamongetápa umi mbaʼe releévare? (Sal. 1:2, 3.)

Mbaʼéichapa ikatu ñañepyrũ ñañemongeta Ñandejára Ñeʼẽre

8. Mbaʼépa heta ermánope oipytyvõ oñepyrũ hag̃ua oñemongeta hapichakuérandi opredika jave ogaha rupi?

⁸ Hetápe ningo ijetuʼu oñepyrũ hag̃ua oñemongeta opredika jave ogaha rupi. Ha oĩ voi ningo umi lúgar ijetuʼuetereiha japredika hag̃ua. Péro oĩ heta ermáno ojeprepara porãva oñemongeta hag̃ua hapichakuérandi, oiporavo porã heʼivaʼerã ha oheja peteĩ tratádo, heʼiháicha pe rrekuádrope. Ikatu oĩ ohecharamóva umi taʼanga térã pe téma oñeʼẽha pe tratádo. Umíva ikatu jaiporu ñamombeʼu hag̃ua chupe maʼerãpa jaha ha ñaporandu chupe peteĩ mbaʼére ñañepyrũ hag̃ua ñañemongeta. Ikatu avei jahechauka chupe mbohapy térã cuatro tratádo oiporavo hag̃ua ogustavéva chupe. Péro upéva ndeʼiséi jarrepartitanteha tratádo, heʼise ñañemongeta vaʼerãha Ñandejára Ñeʼẽre ñamoñepyrũ hag̃uáicha peteĩ estúdio.

9. Mbaʼérepa jajeprepara porã vaʼerã japredika hag̃ua?

 ⁹ Jajeprepara porãramo ñandepyʼaguasúta ha javyʼavéta japredika hag̃ua ogaha rupi. Peteĩ prekúrsor heʼi: “Ajeprepara porãramo che kyreʼỹve apredika hag̃ua, aikuaágui añemongeta porãvetaha che rapichakuérandi”. Ótro prekursór heʼi: “Aikuaa porãramo mbaʼe rehépa oñeʼẽ pe rrevísta térã lívro che kyreʼỹve aikuaveʼẽ hag̃ua”. Ha iporãramo jepe ñapensa upe jaʼevaʼerãre, heta ermánope oipytyvõve oñensajáramo upearã. Upéicha ojapóramo oservi porãve Jehovápe (Col. 3:23; 2 Tim. 2:15).

10. Mbaʼépa ojapovaʼerã umi omoakãva pe aty oñesẽ hag̃ua ojepredika?

¹⁰ Ñañembyaty jave japredika hag̃ua ojeʼe ñandéve mbaʼéichapa ikatu ñande katupyryve ha javyʼa japredika jave ogaha rupi. Ha pe téysto káda diaygua oñeʼẽramo predikasión rehe, ikatu jalee ha ñañeʼẽ hese sapyʼami. Avei pe omoakãva upe rreunión ikatu heʼi umi ermánope mbaʼéichapa ikatu opredika, térã ohechauka voi mbaʼéichapa ikatu ojejapo. Upéicha umi ermáno ikatupyryvéta opredika hag̃ua. Umi ansiáno ha omoakãva guive umi aty oñesẽ hag̃ua ojepredika, ojeprepara porã vaʼerã ikatu hag̃uáicha oipytyvõ ermanokuérape ha ani hag̃ua ipukueterei upe rreunión (Rom. 12:8).

Ñaporohendukuaákena

11, 12. Emombeʼumi peteĩ ehémplo ohechaukáva ñaporohendukuaáramo ikatuha pe marandu porã og̃uahẽ ñande rapichakuéra korasõme.

¹¹ Ñañepyrũ hag̃ua ñañemongeta ñane vesinokuéra ndive ha og̃uahẽ hag̃ua ikorasõme pe marandu porã, ndahaʼéi jajeprepara porãnte vaʼerã, jajepyʼapyvaʼerã avei hesekuéra. Ha ñande ningo ikatu jahechauka jajepyʼapyha hesekuéra ñahendukuaáramo chupekuéra. Peteĩ superintendénte de circuito heʼi: “Ñahaʼarõkuaa ha ñaporohendukuaáramo katuete omomýita ñande rapichakuérape ñanerendu hag̃ua, ha ikatúta jahechauka jahayhu ha jajepyʼapyha hesekuéra”. Ñahendúramo pyʼaporãme ñande rapichakuérape ikatúta omomýi chupekuéra ñanerendu hag̃ua. Upéva jahecháta koʼág̃a peteĩ mbaʼe oikovaʼekuépe.

¹² Pe diário Le Progrès, ojejapóva Saint- Étienne, Francia-pe osẽ peteĩ kárta ohaivaʼekue peteĩ kuñakarai omanovaʼekue chugui imemby de tres mesemi. Upe kártape heʼi omano riremi imemby, og̃uahẽ hague mokõi tapicha hógape. Ha heʼi: “Ahechávo chupekuéra aikuaáma Testígo de Jehováha hikuái. Añemoĩ haʼe porã hag̃uáicha chupekuéra ndaikatumoʼãiha añemongeta hendivekuéra, ha ahecha pe folléto oikuaveʼẽva oñeʼẽha mbaʼérepa Ñandejára oheja jahasa asy. Upémaramo amog̃uahẽ, haʼe hag̃ua chupekuéra tuichaiterei ojavyha. Una óra rasa rupi oĩ chendive umi Testígo ha cherendu hikuái pyʼaporãme. Añemongeta rire hendivekuéra añeñandu porãvema, upévare haʼe ahaʼarõ jeytaha chupekuéra” (Rom. 12:15). Tiémpo rire, pe kuñakarai ostudia la Biblia. Jahechakuaa pe kuñakarai omombaʼeve hague oñehendu chupe pyʼaporãme, ndahaʼéi katuetei umi ermáno heʼivaʼekue chupe.

13. Mbaʼéichapa ikatu ñañemongeta umi mbaʼe ñande rapichakuérape oipyʼapývare?

¹³ Ñahendúramo pyʼaporãme ñande rapichakuérape, jahechakuaáta mbaʼépa oipyʼapy chupekuéra ha ikatúta ñamombeʼu mbaʼépa Ñandejára ojapóta koʼẽrõite Igoviérno rupive. Oiméne rehechakuaa ohendukuaaha hapichakuérape umi ikatupyrýva opredika hag̃ua (Pro. 20:5). Haʼekuéra ningo añetehápe ojepyʼapy hesekuéra. Upévare ovisita chupekuéra, oanota héra  ha moõpa oiko, avei mbaʼépa ohasa ha oikotevẽ. Oĩramo oñeʼẽva chupekuéra iprovlémare, oheka informasión ha ogueraha chupekuéra. Apóstol Pablo ojapo haguéicha, oñemongeta pe óga járandi umi téma oikuaasevévare (jaleemína 1 Corintios 9:19-23). Péicha ohechauka ojepyʼapyha hapichakuérare ha omomýi hetápe oñemoag̃ui hag̃ua Ñandejárare. Ha upéva ohechauka ‘Ñandejára ñandeporiahuverekoha’ (Luc. 1:78).

Japredikákena kyreʼỹme oĩramo jepe nañanerenduséiva

14. Mbaʼéichapa ikatu jahechauka Ñandejára ñandeporiahuverekoha?

¹⁴ Jehová ningo ñanderayhu ha ñanemombaʼe. Ha ipuʼakapáramo jepe, nañandeovligái jaservi hag̃ua chupe, oipota guei ñañemoag̃ui hese jahayhu rupi chupe. Ha umi ojapóva upéicha ohupyty heta mbaʼe porã (Rom. 2:4). Ñande ningo jajeprepara porã vaʼerã ñamombeʼu hag̃ua marandu porã, jahechauka hag̃ua mbaʼeichaitépa Ñandejára ñandeporiahuvereko (2 Cor. 5:20, 21; 6:3-6). Upéva ikatúta oiko japredikáramo kyreʼỹme ñande rapichakuérape, ijetuʼúramo jepe ñandéve. Mbaʼépa ñanepytyvõta japredika hag̃ua kyreʼỹme?

15. a) Mbaʼépa ojapovaʼerã Jesús remimboʼekuéra oĩramo nohenduséiva pe marandu porã? b) Mbaʼéichapa ikatu jaheka umi ohenduse ha omombaʼéva pe marandu porã?

¹⁵ Jesús heʼivaʼekue hemimboʼekuérape ani hag̃ua ojepyʼapyeterei ha omboguapy ijehe oĩramo nohenduséiva pe marandu porã. Heʼi guei chupekuéra oheka hag̃ua umi ohenduse ha omombaʼéva pe marandu porã (jaleemína Mateo 10:11-15). Mbaʼéichapa ñande ikatu avei jajapo upéva? Ñañehaʼãvaʼerã jahecha mbaʼépa ikatu jajapove Jehovápe g̃uarã. Pór ehémplo, peteĩ ermáno oñembojoja peteĩ óro ohekávare, ha heʼi péicha: “Hiʼãite ningo chéve ajuhu peteĩ óro ko árape”. Ótro ermáno katu oñehaʼã ojuhu káda semána peteĩ tapicha ohenduvaʼerã chupe, ha oho jey hag̃uáicha oñemongeta hendive upe riremínte”. Oĩ katu oñehaʼãva olee peteĩ téysto jepe umi óga járape. Mbaʼépa ikatu reñehaʼã rejapove Jehovápe g̃uarã?

16. Mbaʼérepa japredikavaʼerã?

¹⁶ Ndaikatúi jaʼévo oho porãha ñandéve predikasiónpe oĩ rupi ñanerendu porãvante. Jaikuaa ningo ikatuha hetaiterei ipyʼaporãva ojesalva ojepredika rupi chupekuéra, péro oĩ avei heta mbaʼe iñimportánteva ikatúva jahupyty predikasión rupive. Mbaʼépa umi mbaʼe? Japredika meméramo jahechaukáta jahayhuha Jehovápe (1 Juan 5:3). Avei japredikáramo ñaipytyvõ ani hag̃ua oñehundi ñande rapichakuéra (Hech. 20:26, 27). Ha japredikáramo jaikuaaukáta ‘og̃uahẽmaha Ñandejára oporohusgataha ára’ (Rev. 14:6, 7, BNP). Péro iñimportantevéva katu ñamombaʼeguasúta Jehovápe oparupiete ko yvy ape ári (Sal. 113:3). Upévare, oĩramo jepe nañanerenduséiva, japredikavaʼerã kyreʼỹme pe marandu porã. Aníkena ñande resarái Jehová omombaʼetereiha ñañehaʼãramo ñamombeʼu pe marandu porã (Rom. 10:13-15).

17. Mbaʼépa opavave ohechakuaáta koʼẽrõitéma?

 ¹⁷ Oĩramo jepe hetaiterei nohenduséiva pe marandu porã, koʼẽrõitéma tesaparápe ojecháta hikuái (Mat. 24:37-39). Jehová heʼi Ezequiélpe og̃uahẽvo pe ára oporohusga hag̃ua, umi Israelgua ohechakuaáta ‘oĩ hague peteĩ proféta ijapytepekuéra’ (Eze. 2:5). Upéicha avei, Jehová ohundíta vove ko múndo aña, opavave ohechakuaáta umi testígo de Jehová ndaijapúi hague heʼívo Jehová ombouha chupekuéra omombeʼu hag̃ua pe marandu. Ajépa ningo tuichaite mbaʼe jaiko Jehová téstigoramo ha ñamomarandu mbaʼépa ojapóta koʼẽrõitéma! Aníkena ñanekangýtei, Ñandejára espíritu ñanepytyvõta japredika hag̃ua ogaha rupi, oĩramo jepe nañanerenduséiva.

Mbaʼépa ñambohováita?

• Mbaʼéichapa ikatu ñandepyʼaguasu japredika hag̃ua?

• Mbaʼéichapa ikatu ñañepyrũ ñañemongeta ñande rapichakuérandi japredika jave ogaha rupi?

• Mbaʼéichapa jahechauka jajepyʼapyha ñande rapichakuérare?

• Mbaʼépa jajapovaʼerã japredika hag̃ua kyreʼỹme oĩramo jepe nañanerenduséiva?

[Porandu ñahesaʼỹijóva]

[Taʼanga ha rrekuádro oĩva páhina 16-pe]

Mbaʼéichapa ikatu ñañepyrũ ñañemongeta ñande rapichakuérandi

Ñañepyrũ hag̃ua

◼ Ñamomaitei rire ñande rapichápe ikatu ñameʼẽ chupe peteĩ tratádo ha jaʼe: “Aju ningo nerendápe ñañemongetami hag̃ua peteĩ mbaʼe iñimportantereívare”.

◼ Térã ikatu remeʼẽ chupe peteĩ tratádo ha ere: “Sapyʼaitemínteko añeʼẽsemi ne ndive ko témare”.

Pe óga jára ohejáramo pe tratádo

◼ Upe rire ñaporandu chupe mbaʼépa opensa upe témare.

◼ Jajapysaka porãkena heʼívare ha ñañehaʼã ñantende upe opensáva. Jaagradese chupe upe heʼívare ha ñañeʼẽve hendive upe mbaʼére.

Ñañemongetave hag̃ua

◼ Jalee ha ñahesaʼỹijo peteĩ térã hetave téysto. Ha ñañemongeta ñande rapichándi umi mbaʼe oipyʼapývare chupe.

◼ Ñanerendu porãramo, ñaikuaveʼẽ chupe peteĩ folléto térã lívro ha, ikatúramo jahechauka chupe mbaʼéichapa jastudia la Biblia. Ha epyta reho jey hag̃uáicha ótro día.